ཞི་ཅིན་ཕིང་གི་2024ལོའི་ལོ་གསར་གྱི་ཤིས་ཚིག

རྩོམ་པ་པོ།     ཡིག་བསྒྱུར།       དུས་ཚོད།   2024-01-01   རྩོམ་ཁུངས།    西藏日报藏语媒体

རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་གནང་བའི་2024ལོའི་ལོ་གསར་གྱི་ཤིས་ཚིག

        ལོ་གསར་གྱི་སྔ་ནུབ་ཏུ། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་དང་དྲ་སྦྲེལ་བརྒྱུད། 2024ལོའི་ལོ་གསར་གྱི་ཤིས་ཚིག་གསུངས་པ་རེད། ཤིས་ཚིག་གི་ནང་དོན་ཆ་ཚང་གཤམ་གསལ།

        ལྷན་རྒྱས་སྐུ་ཁམས་བཟང་། ལོ་རྙིང་པ་ཕར་ལ་བསྐྱལ་ཞིང་ལོ་གསར་པ་ཚུར་ལ་བསུ་བའི་དུས་བཟང་འདིར། ངས་པེ་ཅིང་ནས་ལྷན་རྒྱས་ལ་ལོ་གསར་གྱི་སྨོན་འདུན་ཞུ་གི་ཡིན།    
        2023ལོར། ང་ཚོས་རྒྱུན་མཐུད་འབད་འཐབ་དང་དཀའ་སྤྱད་མདུན་སྐྱོད་བྱས་ཤིང་། དཀའ་ངལ་སྣ་ཚོགས་ཁྱད་དུ་བསད་པས། མཛེས་སྡུག་ལྡན་པའི་མདུན་ལམ་མཐོང་བ་དང་ལྗིད་ཏིག་ཏིག་གི་གྲུབ་འབྲས་ཐོབ་ཡོད། ཚང་མས་ལོ་དེ་ལས་སླ་པོ་ཞིག་མིན་པ་བློ་ལ་ངེས་ཤིང་། མ་འོངས་པར་ཡང་གདེང་ཚོད་ཀྱིས་ཁེངས་བཞིན་ཡོད།
        ལོ་དེར་ང་ཚོས་གོམ་པ་ཧ་ཅང་བརྟན་པོའི་ངང་སྤོས་ཤིང་། རིམས་ནད་སྔོན་འགོག་དང་ཚོད་འཛིན་གྱི་དུས་མཚམས་ལས་བརྟན་པོའི་ངང་བསྒྱུར་བ་དང་། རང་རྒྱལ་གྱི་དཔལ་འབྱོར་རྒྱུན་མཐུད་བསྐྱར་འཕར་དང་ལེགས་པའི་ཕྱོགས་སུ་འཕེལ་བ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཏན་ཏིག་བཏང་ཡོད། དེང་རབས་ཅན་གྱི་ཐོན་ལས་མ་ལག་དེ་བས་འཐུས་སྒོ་ཚང་དུ་ཕྱིན་ནས་རྩེར་སོན་ཅན་དང་། རིག་ནུས་ཅན། ལྗང་མདོག་ཅན་བཅས་ཀྱི་ཀ་རྟེན་ཐོན་ལས་གསར་པ་ཁག་གཅིག་མགྱོགས་མྱུར་འཕེལ་རྒྱས་ཕྱིན་ཡོད། འབྲུ་རིགས་ཐོན་སྐྱེད་ལ“ལོ་ཉི་ཤུ་བསྟུད་མར་ལོ་ལེགས”བྱུང་བ་དང་། སྔོ་ལྗང་རི་ཀླུང་གི་རྣམ་པ་དེ་བས་བཀྲག་མདངས་ལྡན་པར་གྱུར་པ། གྲོང་གསེབ་དར་རྒྱས་ནས་རྣམ་པ་གསར་པ་མངོན་ཡོད། བྱང་ཤར་ཕྱོགས་ཡོངས་ནས་དར་རྒྱས་ཡོང་བ་བྱེད་པར་ལེའུ་གསར་པ་བརྩམས་པ་དང་། ཞུང་ཨན་ཁུལ་གསར་མགྱོགས་མྱུར་འཕེལ་རྒྱས་བྱུང་བ། འབྲི་ཆུའི་དཔལ་འབྱོར་རྒྱུད་ཀྱི་གསོན་ཤུགས་འཕེལ་བ། ཡུའེ་ཀང་ཨའོ་ཁུག་ཆེན་ཁུལ་གྱིས་བློ་གཤོགས་ཆེན་པོས་འཕེལ་འགྲོས་ཀྱི་མདུན་བསུས་པས། ཀྲུང་གོའི་དཔལ་འབྱོར་རླབས་རྒྱུན་གྱི་ཁྲོད་དུ་འཕེལ་རྒྱས་བརྟན་པོ་བྱུང་ཡོད།
        ལོ་དེར་ང་ཚོས་གོམ་པ་ཤུགས་དང་ལྡན་པའི་ངང་སྤོས་ཤིང་། སྙིང་རུས་གཏན་འཁྱོངས་ངང་ཞུན་བརྡར་བྱས་པ་བརྒྱུད། ཀྲུང་གོའི་གསར་གཏོད་ཀྱི་སྒུལ་ཤུགས་དང་འཕེལ་རྒྱས་ཀྱི་གསོན་ཤུགས་རབ་ཏུ་རྒྱས་ཡོད། C919རྟགས་ཅན་གྱི་གནམ་གྲུ་ཆེན་པོ་ཚོང་སྤྱོད་གནམ་གྲུར་མངོན་འགྱུར་བྱུང་བ་དང་། རྒྱལ་ཐོན་མཚོ་གྲུ་ཆེ་གྲས་འགྲུལ་བཞུད་ཚོད་ལྟ་ལེགས་གྲུབ་བྱུང་བ། ལྷ་གྲུ་རྟགས་ཅན་ཁྱིམ་རྒྱུད་ཀྱིས་བར་སྣང་དུ་སྦྲེལ་མཐུད་བྱས་པ། “འབད་འཐབ་པ”རྟགས་ཅན་ཚད་བརྒལ་ངང་མཚོ་གཏིང་དུ་འཛུལ་ཡོད། རྒྱལ་ཟོག་གི་ཚོང་རྟགས་ལ་ཀུན་གྱི་དགའ་བསུ་ཐོབ་པ་དང་། རྒྱལ་ཐོན་ལག་ཐོགས་ཁ་པར་གསར་པ་བྲིན་ཁ་རྒྱུག་པ། ནུས་རྒྱུ་གསར་པའི་རླངས་འཁོར་དང་། ལིས་གློག་རྫས། འོད་ཤུགས་ཐོན་རྫས་བཅས་ཀྱིས་ཀྲུང་གོའི་བཟོ་སྐྲུན་ལ་བཀྲག་མདངས་གསར་པ་བསྣན་ཡོད། ཀྲུང་གོས་འབད་བརྩོན་ལྷོད་མེད་ཀྱི་སྙིང་སྟོབས་ཐོག་ནས་ཡང་རྩེར་འཛེགས་ཤིང་། གང་སར་མཐོང་རྒྱུ་ཡོད་པ་ནི་ཉིན་རེ་བཞིན་འཕེལ་རྒྱས་འགྲོ་བའི་གསར་གཏོད་རེད།
        ལོ་དེར་ང་ཚོས་གོམ་པ་ཧ་ཅང་ཉམས་དང་ལྡན་པའི་ངང་སྤོས་ཤིང་། ཁྲེང་ཏུའུ་འཛམ་གླིང་སློབ་ཆེན་སློབ་མའི་ལུས་རྩལ་འགྲན་ཚོགས་དང་ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་ངོ་མཚར་ཆེ་བ། ལུས་རྩལ་པ་ཚོས་སླར་ཡང་གྲུབ་འབྲས་བཟང་པོ་བཏོད་ཡོད། གུང་གསེང་སྐབས་གང་སར་ཡུལ་སྐོར་བས་ཁེངས་པ་དང་། གློག་བརྙན་ཁྲོམ་ར་འཁྲུག་ཆ་དོད་པོ་བྱུང་བ། “གྲོང་ཚོའི་རིམ་འདས་འགྲན་བསྡུར”དང“གྲོང་ཚོའི་དཔྱིད་གསར་དུས་ཆེན་གྱི་མཚན་ཚོགས”ལས་གསོན་ཤུགས་ཆེན་པོ་མངོན་པ། ཐཱན་ཉུང་འཚོ་བ་རིམ་བཞིན་དར་སྲོལ་ཆགས་པ། དྲོ་སྐྱིད་ལྡན་པའི་འཚོ་བའི་རྣམ་པ་དང་སླར་གསོ་བྱུང་བའི་བྲེལ་འཚུབ་ཀྱི་རྣམ་པ་ལས། མི་རྣམས་ཀྱིས་མཛེས་སྡུག་ལྡན་པའི་འཚོ་བར་རེ་སྙེག་བྱེད་པ་མཚོན་གྱི་ཡོད་ལ། གསོན་ཤུགས་ཀྱིས་ཕྱུག་ཅིང་ཚ་ཚ་འུར་འུར་གྱི་རྣམ་པས་ཁེངས་པའི་ཀྲུང་གོ་ཡང་མངོན་པར་བྱས་ཡོད།
        ལོ་དེར་ང་ཚོས་གདེང་ཚོད་ཧ་ཅང་ཆེ་བའི་གོམ་པ་སྤོས་ཤིང་། ཀྲུང་གོ་ནི་རྒྱལ་ཁབ་རླབས་པོ་ཆེ་ཞིག་ཡིན་པ་དང་། ཤེས་དཔལ་རླབས་པོ་ཆེའི་རྒྱུན་འཛིན་བཞིན་ཡོད། ཡངས་ཤིང་རྒྱ་ཆེ་བའི་ས་གཞི་འདིའི་ཐོག བྱེ་ཐང་ཐོག་གི་ཁེར་འཕྱུར་དུ་ཞག་དང་། འབྲི་ཆུའི་ལྷོ་ཡི་སྦྲང་ཆར་ཟིལ་མ་ཡིས། རྟག་ཏུ་མི་ཡི་དྲན་འཆར་སློང་བྱེད་ཅིང་། སེམས་ཀྱི་རྟ་ཕོ་དེ་ཡི་ཕྱོགས་སུ་ཤོར། རྨ་ཆུའི་ཁུག་པ་མིག་ལ་རབ་ཏུ་མཛེས། འབྲི་ཆུའི་རླབས་རྒྱུན་དྲག་ཏུ་འཕྱུར་བ་ཡིས། རྟག་ཏུ་མི་ཡི་ཡིད་སེམས་འགུལ་བྱེད་ཅིང་། བརྩེ་བ་དྲག་པོ་དྲན་པའི་ཀློང་ནས་བརྡོལ། ལེང་ཀྲུའུ་དང་ཨེར་ལི་ཐོའུ་ནས་འཕྲོས་པའི་ཤེས་དཔལ་གྱི་འོད་སྣང་དང་། དབྱིན་ཞུས་རུས་བརྐོས་ཀྱི་ཡི་གེ་རྒྱུན་འཛིན། སན་ཤིང་ཏུའེ་ཡི་རིག་གནས་ཀྱི་གཅེས་ནོར། རྒྱལ་ཁབ་དཔར་མའི་རྟེན་མཛོད་ཁང་གི་རིག་གནས་ཀྱི་རྒྱུན་བཅས་ལས་ཀྲུང་ཧྭ་ཡི་ལོ་རྒྱུས་ནི་ཅི་འདྲའི་ཡུན་རིང་བ་དང་། ཤེས་དཔལ་ནི་ཅི་འདྲའི་འབྱམས་ཀླས་པ་ཞིག་ཡིན་པ་མཚོན་པ་དང་། འདི་ནི་ང་ཚོའི་བློ་སྤོབས་ཀྱི་རྨང་གཞི་དང་སྟོབས་ཤུགས་ཀྱི་འབྱུང་ཁུངས་ཡིན།
        ཀྲུང་གོས་རང་ཉིད་འཕེལ་རྒྱས་བཏང་བ་མ་ཟད། ད་དུང་ཧུར་བརྩོན་ཆེན་པོས་འཛམ་གླིང་ལ་ཕྱོགས་ནས་རྒྱལ་ཁབ་ཆེན་པོའི་འགན་འཁྲི་ཁུར་དང་འཁུར་བཞིན་ཡོད། ང་ཚོས་ཀྲུང་གོ་དང་ཨེ་ཤེ་ཡ་དབུས་མའི་དབུ་ཚོགས་དང“རྒྱུད་གཅིག་ལམ་གཅིག”རྒྱལ་སྤྱིའི་མཉམ་ལས་ཀྱི་མཐོ་རིམ་གླེང་སྟེགས་སྐབས་གསུམ་པ་ལེགས་པར་གཉེར་ཞིང་། ཕྱི་འབྲེལ་བྱེད་སྒོ་རབ་དང་རིམ་པ་གཙོ་གཉེར་བྱས་ནས་གླིང་ཆེན་ལྔ་ཡི་སྐུ་མགྲོན་དང་གྲོགས་པོར་བསུ་བ་ཞུས་ཡོད། ང་རང་གིས་ཀྱང་རྒྱལ་ཁབ་ཁག་གཅིག་ལ་འཚམས་འདྲི་ཞུས་པ་དང་རྒྱལ་སྤྱིའི་གྲོས་ཚོགས་ཁག་གཅིག་ལ་ཞུགས་ཁར། གྲོགས་པོ་རྙིང་པ་དང་རོགས་པ་གསར་པ་མང་པོ་དང་ཐུག་འཕྲད་བྱས་ཏེ། ཀྲུང་གོའི་འདོད་ཚུལ་མཉམ་སྤྱོད་དང་ཐུན་མོང་གི་ངོས་འཛིན་ཟབ་ཏུ་བཏང་ཡོད། འཛམ་གླིང་ལ་འགྱུར་ལྡོག་གང་འདྲ་བྱུང་ཡང་རུང་། ཞི་བདེ་འཕེལ་རྒྱས་ནི་ཐོག་མཐའ་བར་གསུམ་དུ་དབྱངས་རྟ་གཙོ་བོ་དང་མཉམ་ལས་གཉིས་ཁེ་ནི་ཐོག་མཐའ་བར་གསུམ་དུ་བསྙོན་མེད་དོན་དམ་རེད།
        མདུན་སྐྱོད་ཀྱི་ལམ་བུར་ཆར་རླུང་ནི་རྒྱུན་རྣམ་ཡིན། ཁེ་ལས་ཁག་གཅིག་ལ་གཉེར་སྐྱོང་ཐད་གནོན་ཤུགས་འཕྲད་པ་དང་། མང་ཚོགས་ཁག་གཅིག་ལ་ལས་ཞུགས་དང་འཚོ་བའི་ཐད་དཀའ་ངལ་འཕྲད་པ། ས་ཁུལ་འགའ་ཤས་སུ་ཆུ་ལོག་དང་། རྒྱ་མཚོའི་རླུང་འཚུབ། ས་ཡོམ་སོགས་རང་བྱུང་གནོད་འཚེ་ཕོག་ཡོད། འདི་དག་ཚང་མར་ང་རང་གིས་སེམས་ཁྲལ་བྱེད་ཀྱི་ཡོད། ཚང་མས་ཆར་རླུང་ལ་མི་སྐྲག་པར་ལྟ་རེས་སྐྱོང་རེས་བྱེད་པ་དང་། དཀའ་ཉེན་གྱི་མདུན་བསུས་ནས་འགག་སྒྲོལ་དཀའ་སེལ་བྱེད་པ་མཐོང་སྐབས། ང་རང་ལ་སེམས་འགུལ་ཆེན་པོ་ཐེབས་བྱུང་། དཀའ་སྤྱད་ངལ་རྩོལ་བྱེད་མཁན་གྱི་ཞིང་པ་དང་། སྡུག་རུས་འབད་འཐབ་བྱེད་མཁན་གྱི་བཟོ་པ། མཆོང་ཕོད་པ་དང་སྒྲུབ་ཕོད་པའི་ལས་གཏོད་པ། ཁྱིམ་གཞིས་དང་རྒྱལ་ཁབ་སྲུང་མཁན་གྱི་བུ་ཕྲུག་དམག་སོགས་ལས་རིགས་ཁག་གི་མི་ཚང་མས་དཀའ་སྤྱད་འབད་འཐབ་བྱས་ཤིང་། མི་ཕལ་པས་སྤྱིར་བཏང་མིན་པའི་ལེགས་སྐྱེས་ཕུལ་ཡོད། མི་དམངས་ནི་དུས་ནམ་ཡང་ང་ཚོ་དཀའ་ངལ་མཐའ་དག་ལས་རྣམ་པར་རྒྱལ་བར་བྱེད་པའི་རྒྱབ་རྟེན་ཆེ་ཤོས་དེ་རེད།
        དུས་སང་ནི་ཀྲུང་གོ་གསར་པ་དབུ་བརྙེས་ནས་ལོ་75འཁོར་བའི་ལོ་ཞིག་རེད། ང་ཚོས་བློ་བརྟན་འགྱུར་མེད་ངང་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བ་དང་། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱས་ཏེ། འཕེལ་རྒྱས་ཀྱི་གནས་སྟངས་གསར་པ་གང་མགྱོགས་གྲུབ་པར་བྱེད་པ་དང་། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། འཕེལ་རྒྱས་དང་བདེ་འཇགས་ལ་སྤྱི་འདོམས་ཡག་པོ་བཅས་བྱེད་དགོས། བརྟན་ཐོག་ཡར་འཕེལ་དང་། ཡར་འཕེལ་བརྟན་སྐུལ། སྔོན་འཛུགས་རྗེས་གཏོར་བཅས་མཐའ་འཁྱོངས་བྱས་ཏེ་དཔལ་འབྱོར་བསྐྱར་འཕར་དང་ལེགས་པའི་ཕྱོགས་སུ་འཕེལ་བའི་རྣམ་པ་བརྟན་དུ་དང་ཤུགས་ཆེར་བཏང་ནས། དཔལ་འབྱོར་བརྟན་བགྲོད་རྒྱང་འཁྱོལ་ཐུབ་པར་བྱེད་དགོས། སྒྱུར་བཅོས་སྒོ་དབྱེ་ཕྱོགས་ཡོངས་ནས་གཏིང་ཟབ་ཏུ་བཏང་སྟེ། སྔར་ལས་ལྷག་པའི་སྒོ་ནས་འཕེལ་རྒྱས་ཀྱི་སེམས་ཤུགས་ཆེ་རུ་དང་། དཔལ་འབྱོར་གྱི་གསོན་ཤུགས་ཆེ་རུ་བཏང་ནས་ཤུགས་ཚད་དེ་བས་ཆེན་པོས་སློབ་གསོ་གཉེར་བ་དང་། ཚན་རྩལ་དར་སྤེལ། ཤེས་ལྡན་མི་སྣ་གསོ་སྐྱོང་བཅས་བྱེད་དགོས། ཤང་ཀང་དང་ཨའོ་མོན་གྱིས་རང་ངོས་ཀྱི་ལེགས་ཆ་འདོན་པར་མུ་མཐུད་རྒྱབ་སྐྱོར་བྱས་ཏེ་དེ་བས་ལེགས་པའི་སྒོ་ནས་རྒྱལ་ཁབ་འཕེལ་རྒྱས་ཀྱི་སྤྱི་ཡོངས་ཆེན་པོར་མཉམ་འདྲེས་བྱེད་རིང་ཡུན་རིང་དར་རྒྱས་དང་བརྟན་ལྷིང་རྒྱུན་འཁྱོངས་ཡོང་བར་བྱེད་དགོས། མེས་རྒྱལ་གོང་བུ་གཅིག་གྱུར་ནི་ལོ་རྒྱུས་ཀྱི་ལྡོག་མེད་ཀྱི་ཆོས་ཉིད་ཅིག་རེད། མཚོ་འགག་ངོགས་གཉིས་ཀྱི་སྤུན་ཟླས་ལག་སྦྲེལ་སེམས་མཐུན་ངང་མི་རིགས་བསྐྱར་དར་གྱི་གཟི་བརྗིད་རླབས་པོ་ཆེ་མཉམ་སྤྱོད་བྱེད་དགོས།
        ང་ཚོའི་དམིགས་ཚད་ནི་ཧ་ཅང་བརྗིད་ཆེ་བ་ཞིག་ཡིན་ལ། ཧ་ཅང་སྟབས་བདེ་བ་ཞིག་ཀྱང་ཡིན། མཐར་གཏུགས་ནས་བཤད་ན་མང་ཚོགས་རྣམས་འཚོ་བ་དེ་བས་ཡག་པ་སྐྱེལ་བར་བྱེད་རྒྱུ་དེ་ཡིན། ཕྲུ་གུ་གསོ་སྐྱོང་དང་སློབ་གསོ་གཏོང་རྒྱུ་དང་། ན་གཞོན་ལས་ཞུགས་དང་འཇོན་ཐང་ཆེ་རུ་གཏོང་རྒྱུ། རྒན་རྒོན་ལ་སྨན་བཅོས་དང་རྒན་གསོ་བྱ་རྒྱུ་བཅས་ནི་ཁྱིམ་དོན་ཡིན་ལ་རྒྱལ་དོན་ཡང་ཡིན་པས། ཚང་མས་མཉམ་དུ་འབད་འཐབ་བྱས་ནས་དོན་དག་འདི་དག་ཡག་པོ་སྒྲུབ་དགོས། ད་ལྟ་སྤྱི་ཚོགས་ཀྱི་འགྲོས་ཧ་ཅང་མྱུར་བས། ཚང་མ་བྲེལ་བ་ཧ་ཅང་ཆེན་པོ་ཡོད་ལ། ལས་ཀ་དང་འཚོ་བའི་གནོན་ཤུགས་ཀྱང་ཧ་ཅང་ཆེན་པོ་ཡོད། ང་ཚོས་དྲོ་སྐྱིད་དང་འཆམ་མཐུན་ལྡན་པའི་སྤྱི་ཚོགས་ཀྱི་ཁོར་ཡུག་གཏོད་པ་དང་། ཁོང་ཡངས་དང་གསོན་ཤུགས་ཀྱིས་ཕྱུག་པའི་གསར་གཏོད་ཀྱི་བར་ཁྱམས་རྒྱ་སྐྱེད་པ། སྟབས་བདེ་ལ་སྐྱིད་སྣང་དོད་པའི་འཚོ་བའི་ཆ་རྐྱེན་སྐྲུན་པ་བཅས་བྱས་ནས་ཚང་མ་ཐུགས་སེམས་སྤྲོ་པོ་དང་། མི་ཚེ་སྐྱ་ནམ་རྒྱས་པོ། བསམ་འདུན་ལྷུན་འགྲུབ་ཡོང་བ་བྱེད་དགོས།
        མིག་སྔར། འཛམ་གླིང་ཐོག་ད་དུང་ས་ཆ་ཁག་གཅིག་དམག་འཁྲུག་གི་ཁྲོད་དུ་ལུས་ཡོད། ཀྲུང་གོའི་མི་དམངས་ཀྱིས་ཞི་བདེ་ནི་ཧ་ཅང་རྩ་ཆེ་བ་ཞིག་ཡིན་པ་ཤེས་ཀྱི་ཡོད། ང་ཚོས་རྒྱལ་སྤྱིའི་སྤྱི་ཚོགས་དང་མཉམ་དུ་མིའི་རིགས་ཀྱི་མདུན་ལམ་སེམས་ལ་འཆང་བ་དང་། མི་དམངས་ལ་བདེ་སྐྱིད་བསྐྲུན་རྒྱུ་ཡིད་ལ་ངེས་ཐོག མིའི་རིགས་ཀྱི་ལས་དབང་གཅིག་མཐུན་འདུས་གྲུབ་གཏོད་རྒྱུར་སྐུལ་འདེད་བཏང་སྟེ། དེ་བས་མཛེས་སྡུག་ལྡན་པའི་འཛམ་གླིང་སྐྲུན་འདོད་ཡོད།
        ད་ལྟའི་དུས་འདིར། མཚན་ལྗོངས་རབ་ཏུ་མཛེས་ཤིང་། ཁྱིམ་ཚང་ཁྲི་སྟོང་མང་པོ་ནས་གློག་འོད་ཆེམ་ཆེམ་དུ་འཕྲོ། ང་ཚོས་མཉམ་དུ་མེས་རྒྱལ་མངའ་ཐང་རྒྱས་པ་དང་། འཛམ་གླིང་ཞི་བདེ་དང་ལྷིང་འཇགས་ཡོང་བའི་སྨོན་འདུན་ཞུ། ལྷན་རྒྱས་དུས་དང་རྣམ་པ་ཀུན་ཏུ་བདེ་སྐྱིད་ལྡན་པ་དང་བྱ་བ་ལམ་འགྲོ། སྐུ་གཟུགས་གསལ་ཐང་ཡོང་བའི་སྨོན་འདུན་ཞུ།
ལྷན་རྒྱས་ཐུགས་རྗེ་ཆེ།



分享到：QQ空间新浪微博腾讯微博人人网微信