བོད་ཀྱི་དགུ་ཐུག་རིག་གནས།

 བོད་ཟླ་བཅུ་གཉིས་པའི་ཚེས་ཉི་ཤུ་དགུ་ཉིན་གྱི་དགོང་མོ་བོད་ཡུལ་མང་ཆེ་བར་ཁྱིམ་ཚང་ཚང་མས་ནང་མི་མཉམ་འཛོམས་ཀྱིས་དགུ་ཐུག་འཐུང་ཞིང༌། དེ་ནི་ལོ་གསར་གྱི་འགོ་ཚུགས་ལྟ་བུ་ཡིན། དེ་ཡང་ལོ་རྙིང་པའི་ཟླ་བ་མཐའ་མའི་ཚེས་ཉི་ཤུ་དགུ་ཉིན། ལོ་གཅིག་གི་འགལ་རྐྱེན་སེལ་བར་དམིགས་ནས། གླུད་རྫོང་བྱེད་པའི་ཡུལ་སྲོལ་ཁྱབ་ཆེ་བ་ཞིག་ཡོད་པ་དེ་ལ་དགུ་ཐུག་ཅེས་འབོད། དེའི་རྩ་བའི་དམིགས་ཡུལ་ནི་ལོ་རྙིང་པ་དེའི་ནང་གི་འགལ་རྐྱེན་མཐའ་དག་མཇུག་སྒྲིལ་ཆེད་གླུད་རྫོང་བ་དང༌། གདོན་འདྲེ་ཕྱིར་འབུད་བྱེད་པ། ཟས་རིགས་སྣ་ཁ་དགུ་ཡོད་པའི་བག་ཐུག་འཐུང་བ་བཅས་བྱེད་སྲོལ་ཡོད། ཞིབ་ཕྲའི་བྱེད་སྒོ་སྤེལ་ཚུལ་ནི་དེ་ཉིན་བྱ་བ་གཞན་བཞག་ནས། ཁང་ཆེན་རེ་རེ་བཞིན་གད་བདར་གཙང་སྦྲ་ཞིབ་ཚགས་བྱེད་པ་དང༌། ལྷག་པར་དུ་ཐབ་ཚང་ལ་ལོ་གཅིག་རིང་ཆགས་པའི་དུ་དྲེག་རྣམས་གཙང་མར་ཕྱག་གི་ཡོད། དེ་ནས་དགུང་དྲོ་ཁྱིམ་ཚང་ཚང་མས་དུས་སྟོན་དེའི་མིང་དང་མཐུན་པའི་ཐུག་པ་བག་ཐུག་སྐོལ་གྱི་ཡོད། དེ་ཡང་རྒྱུན་གཏན་དང་མི་འདྲ་བ་སྟེ། མི་སོ་སོའི་བསམ་པ་དང་སྤྱོད་ཚུལ་བཟང་ངན་མཚོན་བྱེད་དུ་གྲོ་བྱེ་ཡིས་ཉི་ཟླ་སོགས་ཀྱི་གཟུགས་དབྱིབས་མི་འདྲ་ཁག་ཅིག་བཟོ་བ་དང༌། བག་ཚ་གཞན་ལས་ཅུང་ཆེ་ཙམ་བྱེད་པའི་ཕྱི་དབྱིབས་གཅིག་མཚུངས་ཀྱི་ནང་དུ་མཚོན་རྫས་སྣ་ཚོགས་བཅུག་པ་ཁག་ཅིག་བཟོས་ནས། མི་སོ་སོའི་ཕོར་པའི་ནང་ཁ་ཐུག་གང་འཁེལ་བླུགས་པ་དེས་བསམ་པ་དང་སྤྱོད་ཚུལ་བཟང་ངན་བརྟག་པ་བྱེད་ཀྱི་ཡོད། དཔེར་ན་ཉི་ཟླ་ཁེལ་ན་གཟི་བརྗིད་དང་སྙན་གྲགས་ལྡན་པ་མཚོན། གདན་ཆུང་གྲུ་བཞི་ཁེལ་ན་དལ་དལ་ལྷོད་ལྷོད་ཡོང་བ་མཚོན། བལ་དཀར་པོ་ཁེལ་ན་བློ་སྣ་རིང་ཞིང་གཤིས་བཟང་བ་མཚོན། དཀར་ཡོལ་ཁེལ་ན་ལྟོ་ལ་དགའ་ཞིང༌། ལས་ལ་གཡོལ་བ་མཚོན་པ་ལྟ་བུ་དེ་ལྟར་གྱི་དཔེ་མང་པོ་ཡོད་པས་རེ་རེ་བཞིན་ཞུ་ཡི་མིན། དགུ་ཐུག་ནི་ནམ་རྒྱུན་གྱི་བག་ཐག་དང་མི་འདྲ་བའི་ཁྱད་ཆོས་ཞིག་ཡོད་པ་ནི་ཐུག་པའི་ནང་ཤ་དང༌། ལ་ཕུག ཕྱུར་བ་སོགས་ཟས་རིགས་སྣ་ཁ་དགུ་འཛོམས་དགོས་པ་རེད།