ཡང་བསྐྱར་གླུ་ཞིག་བླངས་ནས་དྲན་གསོའི་ཉིན་མོར་རྟེན་འབྲེལ་ཞུ།

        ཟླ3པའི་ཚེས28ཉིན་ནི་བོད་ལྗོངས་ཀྱི་ཞིང་བྲན་ཁྲི་ཚོ་བརྒྱར་ཡར་ལངས་བཅིངས་འགྲོལ་ཐོབ་པའི་དྲན་གསོའི་ཉིན་མོ་ཞིག་རེད། བོད་ལྗོངས་སུ་དམངས་གཙོའི་བཅོས་སྒྱུར་བྱས་ནས་ལོ་ངོ65འཁོར་བའི་དུས་མཚམས་འདིར། བོད་ལྗོངས་ལྷ་ས་གྲོང་ཁྱེར་ཉང་བྲན་ཁྲོམ་གཞུང་གིས་སྣ་མང་རིག་རྩལ་འཁྲབ་སྟོན་བྱས་ནས་བཀྲ་ཤིས་པའི་ཉིན་མོ་དེར་དྲན་གསོ་ཞུས་འདུག

       1959ལོའི་ཟླ3པའི་ཚེས28ཉིན་ནི་བོད་ལྗོངས་ཀྱི་ལོ་རྒྱུས་ཐོག་ཏུ་ལམ་ཚད་རྡོ་རིང་ལྟ་བུའི་དོན་སྙིང་ལྡན་པའི་ཉིན་མོ་གལ་ཆེན་ཞིག་རེད། ལོ་དེར་ལོ་ངོ་བརྒྱ་ཁྲག་ཁ་ཤས་རིང་གི་ཞིང་བྲན་ལམ་ལུགས་རྦད་དེ་རྩ་མེད་བཏང་བ་དང་། རྒྱ་ཆེའི་ཞིང་བྲན་རྣམས་ལ་ཡར་ལངས་བཅིངས་འགྲོལ་ཐོབ་ནས་རང་ལུས་རང་དབང་དང་། རང་ཁྱིམ་རང་བདག་བྱུང་ཞིང་། དུས་དེ་ནས་བཟུང་བོད་ལྗོངས་འདི་ཉིད་དེང་རབས་ཅན་གྱི་ཡར་ཐོན་དང་འཕེལ་རྒྱས་ཀྱི་ལམ་བུའི་ཐོག་སྐྱོད་འགོ་ཚུགས་ཡོད།

       ལོ་ངོ65སོང་རྗེས་ཀྱི་དེ་རིང་། བོད་ལྗོངས་ཀྱི་དཔལ་འབྱོར་སྤྱི་ཚོགས་ལ་གནམ་ས་བླ་འོག་ཏུ་འགྱུར་བ་ལྟ་བུའི་འཕོ་འགྱུར་བྱུང་ཡོད་ལ།  ཀྲུང་གོ་གུང་ཁྲན་ཏང་གི་ཡང་དག་པའི་དབུ་ཁྲིད་འོག་ཏུ་མི་དམངས་རྣམས་བདེ་ཞིང་སྐྱིད་པའི་འཚོ་བ་སྐྱེལ་རྒྱུ་བྱུང་ཡོད།

       དེ་ཉིན་འཁྲབ་སྟོན་ལ་ཕེབས་པའི་གྲོང་མི་བསོད་ནམས་དབང་འདུས་ཀྱིས། ད་ལོ་རང་ཉིད་ལོ69ཡིན། རྒན་ཡོལ་ཞུས་ནས་ལོ་མང་པོ་ཕྱིན་སོང་། ད་ལོའི་དམིགས་བསལ་གྱི་དྲན་གསོའི་ཉིན་མོ་འདིར་འཁྲབ་སྟོན་ནང་ཞུགས་རྒྱུ་བྱུང་བར་དགའ་ཚོར་ཆེན་པོ་བྱུང་། དེ་རིང་ནི་ང་ཚོ་ཚང་མས་དགའ་སྤྲོའི་ངང་དྲན་གསོ་ཞུ་འོས་པའི་ཉིན་མོ་ཞིག་རེད། གུང་ཁྲན་ཏང་གི་ཡང་དག་པའི་དབུ་ཁྲིད་འོག་ཏུ་ད་ཆ་བོད་ལྗོངས་ཀྱི་སློབ་གསོ་དང་། སྨན་བཅོས། རྒན་གསོ་སོགས་བྱ་གཞག་མང་པོ་ཞིག་བྱ་འཕུར་བ་ལྟར་འཕེལ་རྒྱས་མགྱོགས་པོ་བྱུང་ཡོད།  སྤྱི་ཚོགས་རྙིང་པར་ཟས་ཀྱིས་ལྟོ་མི་འགྲངས་ཤིང་། གོས་ཀྱིས་ལུས་མི་ཁེབས་པ། མི་ལུས་རང་དབང་མེད་པ་བཅས་དང་བསྡུར་ཚེ་གནམ་སའི་ཧེ་བག་རེད། ང་ཚོས་ད་ལྟའི་བདེ་སྐྱིད་ལྡན་པའི་འཚོ་བར་གཅེས་འཛིན་དང་། ཏང་གི་བཀའ་ལ་ཉན་པ། ཏང་གི་རྗེས་སུ་འབྲངས་ཏེ། མཛེས་སྡུག་ལྡན་པའི་འབྱུང་འགྱུར་མཉམ་དུ་གཏོད་རྒྱུར་འབད་བརྩོན་བྱ་རྒྱུ་ཡིན་ཞེས་གསུངས།

       སྟངས་སྟབས་ཉམས་འགྱུར་ལྡན་ཞིང་། བཞིན་ལས་དགའ་བའི་འཛུམ་མདངས་འཕྱུར་བའི་ཉང་བྲན་ཁྲོམ་གཞུང་གི་ལས་བྱེད་མང་ཚོགས་ཚོས་ཞིང་བྲན་ཁྲི་ཚོ་བརྒྱར་ཡར་ལངས་བཅིངས་འགྲོལ་ཐོབ་པའི་དྲན་གསོའི་ཉིན་མོར། གླུ་ལེན་གར་འཁྲབ་ཀྱིས་ཏང་ལ་བསྟོད་གླུ་ཕུལ་བ་སྟེ། ཡང་བསྐྱར་གླུ་ཞིག་བླངས་ནས་ཏང་ལ་འབུལ་ཞེས་པ་དང་། མཛེས་སྡུག་ལྡན་པའི་ཉིང་ཁྲི་ཞེས་པ་སོགས་སྣ་མང་ཕུན་སུམ་ཚོགས་པའི་རིག་རྩལ་བྱེད་སྒོ་སྤེལ་ཏེ་དམིགས་བསལ་གྱི་ཉིན་མོར་དྲན་གསོ་ཞུས་འདུག