ཟས་རིགས་འདི་ཚོ་ཟ་མི་རུང་ཞེས་ཡོངས་སུ་བསྒྲགས་འདུག

ད་ལོའི3.15ཉིན་ཟ་མི་རུང་བའི་ཟས་རིགས་སྐོར་ཞིག་ཡོངས་བསྒྲགས་བྱས་འདུག།

        བཟའ་བཅའི་བདེ་འཇགས་ནི་ཚང་མས་དོ་ཁུར་ཆེན་པོ་བྱེད་པའི་གནད་དོན་ཞིག་ཡིན་ཞིང་། ནད་གཞི་མང་པོ་ཞིག་བཟའ་བཏུང་ལས་བྱུང་བ་ཡིན་པ་ཀུན་གྱིས་ཤེས་གསལ་ནང་བཞིན་རེད། ད་ལོའི“3.15”བཟའ་བཅའི་ཐོན་རྫས་རྫུན་མ་ཐེར་འདོན་བྱེད་པའི་ཉིན་འདིར་བདེ་ཐང་ལ་གནོད་པའི་བཟའ་བཅའ་མི་ཉུང་བ་ཞིག་དམར་རྗེན་དུ་བཏོན་ཏེ། བཙོག་ཟིང་ཞན་གསུམ་གྱི་སྣང་ཚུལ་ཐོན་ནས་མི་ལུས་བདེ་ཐང་ལ་གནོད་པའི་ཟས་རིགས་སྐོར་ཞིག་ཡོངས་བསྒྲགས་བྱས་པ་གཤམ་གསལ་ལྟར།

        གསར་འགོད་པས་ཚོང་ཁང་མང་པོ་ཞིག་ལ་ལྐོག་ཞིབ་བྱས་ནས་བཟའ་བཅའི་གཙང་སྦྲ་ཞན་ལ་བདེ་ཐང་མིན་པའི་སྣང་ཚུལ་དམར་རྗེན་དུ་བཏོན་འདུག། ཟས་རིགས་འདི་དག་ང་ཚོའི་གམ་དུ་ཡོད་དེ། ང་ཚོའི་འཚོ་བའི་ཁྲོད་དུ་སིམ་ནས་འདུག། ཟས་རིགས་འདི་དག་རང་གིས་མི་བསྟེན་པ་དང་ནང་མི་རྣམས་ལའང་འདིའི་རིགས་འཛེམ་དགོས་པའི་སྐུལ་མ་བྱེད་རྒྱུ་ཤིན་ཏུ་གལ་ཆེ། དེས་ན་ཞོལ་ནས་ཟས་རིགས་དེ་དག་གང་གང་ཡིན་པར་རྒྱུས་ལོན་ཞིག་བྱ།

གཅིག། སིང་ཕྱེའི་རྒྱུ་མ། 

        དེ་དག་གི་ཁྲོད་དུ་ཆེས་མངོན་གསལ་དོད་པ་ནི“སིང་ཕྱེའི་རྒྱུ་མ”རེད། “སིང་ཕྱེའི་རྒྱུ་མ”ཞེས་པ་འདིའི་རྒྱུ་ཆ་ནི་གྲོ་ཕྱེ་ལས་གྲུབ་པ་ཞིག་མ་ཡིན་པར་བྱ་རིགས་ཀྱི་རུས་པ་དང་རུས་འདམ་གྱིས་བཟོས་པ་ཞིག་རེད། རུས་འདམ་ཞེས་པ་ནི་ཟས་འཕྲོའི་ཤུལ་དུ་ལྷག་པའི་རུས་པ་དང་། ཟ་ཁང་གི་བཤལ་ཆུ། བཤས་རའི་ནང་གི་གད་སྙིགས་སོགས་ཟ་སྲོལ་མེད་པའི་ཟས་རིགས་ལ་ཟེར། མ་བཅོས་རྒྱུ་ཆའི་རྐང་ཐུར་གཅིག་ལ་སྒོར་ཟུར་ལྔ་ལས་མི་དགོས་མོད། འོན་ཀྱང་བསྲེགས་རྗེས་རྐང་ཐུར་གཅིག་ལ་སྒོར་གཉིས་སམ་གསུམ་གྱི་རིན་གོང་གིས་འཚོང་གིན་འདུག།

གཉིས། བྱ་གག་གི་ཁྲག་དང་ཕག་ཁྲག། 

        ཚོང་ཁང་ཁ་ཤས་ཀྱིས་བཙོངས་པའི་བྱ་གག་གི་ཁྲག་དང་ཕག་ཁྲག་ཅེས་པ་འདི་ཡང་ཟས་རིགས་ལྷད་མེད་ཅིག་མ་ཡིན་ཏེ། འདིའི་རྒྱུ་ཆ་ནི་ཕག་གི་ཁྲག་དང་བྱ་གག་གི་ཁྲག་མ་ཡིན་པར་སྦྱོར་རྟ་འབོར་ཆེན་འདུས་ཡོད་པ་དང་། ཆུ་དྭངས་མོ་དང་བྲོ་རྫས་མཉམ་བསྲེས་བྱས་ནས་བཟོས་པ་ཞིག་རེད་འདུག། ཆ་སྙོམས་བྱས་ན་བྱ་གག་གི་ཁྲག་དང་ཕག་ཁྲག་གི་ཐོན་རྫས22ནང14ནི་རྫུན་མ་རེད་འདུག། ཐོན་རྫས་ཀྱི་རྫུན་མའི་བསྡུར་ཚད70%ཟིན་འདུག།

གསུམ། དུང་དཀར་རྒྱུས་ཐུག། 

        རྒྱལ་ཡོངས་སུ་ཁྱབ་པའི་དུང་དཀར་རྒྱུས་ཐུག་ཅེས་པ་འདི་ཡང་ཟས་རིགས་ལྷད་མེད་ཅིག་རེད་མི་འདུག་སྟེ། བཟོ་སྣོན་བྱེད་སའི་ཟ་ཁང་གི་གཙང་སྦྲ་ཞན་པ་དང་དུས་ཡོལ་བའི་བྲོ་རྫས་སྣ་ཚོགས་བཀོལ་བཞིན་ཡོད། ལྷག་པར་ཏུ་སྣུམ་བཙོས་ཕག་སུག་དེ་འཁྱག་ཡུན་རིང་དྲགས་པའི་ཐོན་རྫས་རེད། དྲི་ངན་སྔར་ལས་ཇེ་ཐུར་གཏོང་ཆེད་དྲི་བཙོག་རྫས་ཞེས་པ་ཞིག་ནང་དུ་བསྲེ་བཞིན་འདུག།

བཞི། ཁྭ་ཧྥུ་བསྲེག་ཟས། 

        ཁྭ་ཧྥུ་བསྲེག་ཟས་ཞེས་པ་འདི་ནི་ཟས་རིགས་ངན་པའི་མཐར་ཐུག་ཅིག་རེད་འདུག་སྟེ། མཚན་ཁྲོམ་སོགས་སུ་དགའ་བསུ་ཚད་མེད་བྱེད་ཀྱིན་འདུག་མོད། དོན་དུ་མིའི་ལུས་ལ་གནོད་པ་ཆེན་པོ་བཟོ་བའི་ཟས་རིགས་ཤིག་རེད་འདུག། ཟ་མ་འདིའི་རིགས་དུས་ལས་ཡོལ་ནའང་སྟེང་གི་ཟླ་ཚེས་བརྗེ་རྗེས་སུ་ཡང་བསྐྱར་འཛད་སྤྱོད་པར་མཁོ་སྤྲོད་བྱེད་ཀྱིན་འདུག།

ལྔ། སིལ་ཏོག་གཏུབ་མ། 

    པའེ་ཀུའོ་ཡོན་སིལ་ཏོག་ཚོང་ཁང་གིས་འཚོང་གིན་པའི་སིལ་ཏོག་གཏུབ་མའི་རིགས་མང་པོ་ཞིག་ཟས་རིགས་དགའ་ཞིག་རེད་མི་འདུག་སྟེ། སིལ་ཏོག་རུལ་བ་དག་ས་གཏུབ་རྡོ་གཏུབ་བྱས་ཏེ་བཟོས་པ་རང་རེད་འདུག།

དྲུག། དུས་ཡོལ་ཟིན་པའི་འོ་ཇའི་རྒྱུ་ཆ། 

        （དཔེ་ཆ་བའི་བཏུང་བ། 书亦烧仙草）（ཇ་བརྒྱ་ལམ།茶百道）（གནའ་མིང古茗）སོགས་འོ་ཇ་ཁང་སྐོར་ཞིག་གིས་ཀྱང་ཟས་རིགས་ངན་པ་ཤ་སྟག་འཚོང་གིན་འདུག་སྟེ། རྟག་པར་བཀོལ་བཞིན་པའི་རྒྱུ་ཆ་ཚང་མ་དུས་ཡོལ་ཟས་རིགས་རང་རེད་འདུག། དཔེར་ན། ཞོག་ཁོག་རུལ་བ་དང་ཆུ་ཀུབ་རུལ་བ་སོགས་ཀྱིས་བཏུང་བ་བཟོ་བཞིན་འདུག ཟས་རིགས་འདི་དག་ཚང་མ་དུས་ལས་ཡོལ་ཞིང་ངོ་བོ་འགྱུར་བའི་བཟའ་བཅའ་ཤ་སྟག་རེད། དེ་དག་འོ་ཇའི་ནང་དུ་བསྲེས་ནས་ཉོ་མཁན་ལ་གང་འདོད་དུ་འཚོང་གིན་འདུག་པ་ད་ལྟ་འབྲེལ་ཡོད་ལས་ཁུངས་ཀྱིས་ཤེས་རྟོགས་བྱུང་འདུག།

        གོང་དུ་བཤད་པའི་ཟས་རིགས་འདི་དག་ནི་ད་ལོར“3.15”ལས་ཕྱིར་མངོན་པའི་བདེ་ཐང་མིན་པའི་ཟས་རིགས་ཡིན་པས། གལ་ཏེ་ཟས་རིགས་དེ་དག་ཡོད་ན་གང་མགྱོགས་ཀྱིས་འཕེན་པ་དང་རྗེས་སུ་སྤངས་རྒྱུ་གལ་ཆེ།