རྩོམ་པ་པོ།     ཡིག་བསྒྱུར།       དུས་ཚོད།   2024-05-27   རྩོམ་ཁུངས།    ཀྲུང་གོ་བོད་ཀྱི་དྲ་བ།
«གེ་སར་གསོལ་མཆོད་རིག་གནས་ཞིབ་འཇུག»ཅེས་པའི་དེབ་འདིར་རྩོམ་པ་པོས་ཡིག་ཐོག་དང་ངག་ཐོག་ཡིག་ཆ་རྩ་ཆེན་གང་མང་སྤྱད་དེ་གེ་སར་སྒྲུང་གི་གསོལ་མཆོད་རིག་གནས་ཀྱི་སྐོར་ལ་ཞིབ་འཇུག་བགྱིས་ཤིང་། གེ་སར་སྒྲུང་གི་གསོལ་མཆོད་ཡིག་ཆའི་རིགས་དང་དབྱེ་བ། གེ་སར་སྒྲུང་གི་གསོལ་མཆོད་ཡིག་ཆ་དང་བོད་ཀྱི་སྲོལ་རྒྱུན་རྩོམ་རིག་ལས་གསོལ་མཆོད་ཡིག་ཆའི་འབྲེལ་བའི་སྐོར་དང་། གེ་སར་གསོལ་མཆོད་ཡིག་ཆ་ལས་འཕྲོས་ཏེ་བོད་ཀྱི་རི་ཆུའི་རིག་གནས་དང་སྲོལ་རྒྱུན་སྐྱེ་ཁམས་ལྟ་བའི་སྐོར་བརྗོད་ཡོད་པས། འདིའི་ཐད་ཀྱི་ཞིབ་འཇུག་གི་སྟོང་ཆ་བསྐངས་ཡོད་པར་མ་ཟད། བོད་ཀྱི་རྩོམ་རིག་དང་གསོལ་མཆོད་རིག་གནས་ཞིབ་འཇུག་ཐད་ཀྱི་དཔྱད་གཞིའི་རྒྱུ་ཆ་གལ་ཆེན་ཞིག་གོ །
རྩོམ་པ་པོ་ངོ་སྤྲོད།
སྙིང་བོ་ཚེ་རིང་། མཚོ་སྔོན་པོའི་ལྷོ་རྒྱུད་ཀྱི་རྒྱ་ཡེ་སྡེ་བར་སྐྱེས། ད་ལྟ་མཚོ་སྔོན་ཞིང་ཆེན་གེ་སར་སྒྲུང་སྲུང་སྐྱོབ་ཞིབ་འཇུག་ལྟེ་གནས་ཀྱི་ཀྲུའུ་རེན་གཞོན་པ་དང་ཞིབ་འཇུག་པ་ཆེན་མོ་ཡིན། «ཡུལ་ཤུལ་ས་ཁུལ་གྱི་གེ་སར་རིག་གནས་རྟོག་ཞིབ་དང་ཞིབ་འཇུག»སོགས་སྔ་ཕྱིར་རྒྱལ་ཁབ་དང་ཞིང་ཆེན་རིམ་པའི་ཞིབ་འཇུག་ལས་གཞི༡༣ལ་འགོ་འཛིན་དང་གསབ་ཞུགས་བྱས། «གླིང་གེ་སར་སྒྲུང་ལ་དཔྱད་པ་བློ་གསལ་ཡིད་ཀྱི་དགའ་སྟོན»སོགས་རིག་གཞུང་ཆེད་དེབ༥དང་སྒྲིག་སྒྱུར་དེབ༤ དཔྱད་རྩོམ༣༢ «སྒ་སྡེ་ཤེས་རབ་ཁྲོ་རྫོང»སོགས་སྒྲུང་དཔེ༢༠ལེགས་སྒྲིག་བྱས་ཤིང་བསྒྱུར་དེབ༡བཅས་སོ། །རྒྱལ་ཁབ་དང་ཞིང་ཆེན་རིམ་པའི་བྱ་དགའ་མང་པོ་ཐོབ་མྱོང་ཞིང་། མཚོ་སྔོན་ཞིང་ཆེན་གྱི་ཁུ་ནུ་འཇོན་མི་མཐོ་རྩེའི་གསར་གཏོད་དང་ལས་གཏོད་འཇོན་མིའི་སྣེ་ཁྲིད་ཤེས་ལྡན་མི་སྣ་བཅས་སུ་བདམས་ཡོད། །