བདེ་ཆེན་གྱིས་དཀའ་གནད་སེལ་ནས་གྲོང་གསེབ་དར་རྒྱས་ལ་རོགས་རམ་བྱས་པ།

        “ལས་དོན་མི་སྣས་འགན་ནན་ཏན་ཁུར་ནས་ངའི་ཁ་ཚ་དགོས་གཏུགས་ཀྱི་དཀའ་ངལ་སེལ་རོགས་བྱས་བྱུང་།” “གཞོན་ནུ་དེ་དག་མཐོང་ཐེངས་རེར་ངའི་སེམས་པ་སྐྱིད་པོ་ཡོང་གི་འདུག”བཅས་བཤད། ཉིན་ཤས་གོང་་བདེ་ཆེན་ཁུལ་སེམས་ཀྱི་ཉི་ཟླ་གྲོང་ཁྱེར་ཡང་ཐང་གྲོང་རྡལ་དུ་གྲོང་ཁྱེར་དང་གྲོང་རྡལ་གྱི་སྤྱི་ཚོགས་བཟོ་པས་ཁེར་སྡོད་དང་བུ་ཕྲུག་མེད་པའམ་ཡང་ན་བུ་ཕྲུག་ཚེ་ལས་འདས་པའི་རྒན་རྒོན་དུད་ཚང་7གྱི་ཁྱིམ་དུ་བཅར་འདྲི་བྱེད་པར་བསྐྱོད་དེ་རྒན་རྒོན་ཚོར་སྲུང་སྐྱོབ་ཁུག་མ་སྤྲོད་པ་དང་གློག་ཏོག་བརྗེ་བ་སོགས་བྱས་པས་སྤྱི་ཚོགས་བཟོ་པ་ཚོས་ངང་རྒྱུད་རིང་ལ་ཞིབ་ཚགས་པའི་ཞབས་འདེགས་ཞུས་པར་རྒན་རྒོན་ཚོའི་བསྔགས་བརྗོད་ཐོབ་ཡོད།

        སེམས་ལ་དྲོ་སྐྱིད་སྦྱིན་པའི་རྣམ་པ་དེ་ནི་བདེ་ཆེན་ཁུལ་གྱིས་སྤྱི་ཚོགས་རོགས་སྐྱོབ་ཀྱི་མཐའ་སྐྱོང་འགན་ལེན་གྲུབ་འབྲས་རྒྱུན་མཐུད་ངང་སྲ་བརྟན་དང་རྒྱ་ཆེར་བཏང་ནས་གྲོང་གསེབ་དར་རྒྱས་དང་སྦྲེལ་མཐུད་ནུས་ལྡན་ཐུབ་པའི་བསྡུས་རིས་ཤིག་རེད། ཉེ་བའི་ལོ་ཤས་རིང་བདེ་ཆེན་ཁུལ་གྱིས་《བདེ་ཆེན་ཁུལ་གྱིས་སྡོད་གནས་ཀྱི་མ་མཐའི་འཚོ་བ་འགན་ལེན་གྱི་དམིགས་བསལ་དཀའ་ངལ་ཡོད་པའི་འཚོ་སྐྱོང་རེ་ཞུའི་ལས་དོན་ཕྱོགས་ཡོངས་ནས་སྤེལ་རྒྱུའི་ལག་བསྟར་ཇུས་གཞི་》བཟོས་ནས་གཤམ་སྤེལ་བྱས་ཏེ་སྡོད་གནས་དང་ཐེམ་ཐོ་གནས་ཡུལ་གྱི་རོགས་ལས་ལམ་སྲོལ་འཐུས་ཚང་དུ་གཏོང་བ་དང་ཐེམ་ཐོའི་ཚོད་འཛིན་མེད་པ་བཟོས་ཏེ་སྡོད་གནས་ཀྱིས་སྤྱི་ཚོགས་རོགས་སྐྱོབ་རེ་ཞུ་ཕྱོགས་ཡོངས་ནས་ལག་བསྟར་བྱས་ནས་“དངོས་པོ་+ཞབས་ཞུའི” སྤྱི་ཚོགས་རོགས་སྐྱོབ་ཀྱི་རྣམ་པ་གསར་པ་འཚོལ་ཞིབ་བྱས་པ་རེད།

        དེ་དང་ཆབས་ཅིག་བདེ་ཆེན་ཁུལ་གྱིས་སྔོན་ལ་ཞིང་ཆེན་ཡོངས་སུ་གྲོང་ཁྱེར་དང་གྲོང་གསེབ་ཀྱི་སྨན་བཅོས་རོགས་སྐྱོབ་ཁུལ་རིམ་པའི་གཅིག་གྱུར་འཆར་འགོད་དང་དེ་བཞིན་ཁུལ་ནང་ཁུལ་གྱི་“གཅིག་འཐུས་རྣམ་པའི་”བསྡོམས་རྩིས་ཞབས་ཞུ་ལག་བསྟར་བྱས་ཏེ་རོགས་སྐྱོབ་རེ་ཞུ་དང་གཟིགས་སྐྱོང་རོགས་སྐྱོབ་དང་“གཅིག་འཐུས་རྣམ་པའི་”བསྡོམས་རྩིས་ཐབས་ལམ་ཤར་གཏོང་ཐུབ་པ་བྱས་ནས་དབུལ་པོ་བསྐྱར་ལོག་སྔོན་འགོག་ལྟ་ཞིབ་ཚད་ལེན་བྱ་ཡུལ་དང་དབུལ་སྒྲོལ་མི་འབོར་སོགས་གཙོ་གནད་མི་སྣ་ནད་གཞིས་རྐྱེན་པས་དབུལ་པོ་བསྐྱར་ལོག་བྱ་རྒྱུར་དོགས་ཟོན་དང་སེལ་བའི་ཕུགས་ཕན་ལམ་སྲོལ་འཐུས་ཚང་དུ་བཏང་བ་རེད། ཁུལ་ཡོངས་ཀྱི་དབུལ་སྒྲོལ་མི་འབོར་འགན་བཅོལ་ནང་ཞུགས་མཁན་མི་གྲངས་ཁྲི་7ལྷག་ཙམ་ཟིན་པ་དང་འགན་བཅོལ་ནང་ཞུགས་ཚད་99.41%ཟིན་པ་དང་ལྟ་ཞིབ་ཚད་ལེན་བྱ་ཡུལ་གྱི་འགན་བཅོལ་ནང་ཞུགས་མཁན་མི་གྲངས་7000ལྷག་ཙམ་ཟིན་ནས་འགན་བཅོལ་ནང་ཞུགས་ཚད་99.62%ཟིན་པ་དང་མི་ཐེངས་ཁྲི་4ཙམ་ལ་སྨན་བཅོས་རོགས་སྐྱོབ་ལོངས་སུ་སྤྱོད་རྒྱུ་བྱུང་བ་དང་རོགས་སྐྱོབ་དངུལ་སྒོར་ཁྲི་2200ལྷག་ཙམ་ཟིན་ཡོད་པ་རེད། རྫོང་དང་ཤང་། གྲོང་ཚོ་བཅས་རིམ་པ་གསུམ་གྱི་སྨན་བཅོས་སྒྲིག་གཞི་ཁྱོན་ཡོངས་ནས་གཞི་རྩའི་ཚད་གཞིའི་བླང་བྱར་སླེབས་པ་རྒྱུན་མཐུད་སྲ་བརྟན་དུ་གཏོང་བ་དང་། བདེ་ཐང་དབུལ་སྐྱོར་གྱི་འགུལ་རྣམ་ལྟ་ཞིབ་ཚད་ལེན་དང་སྔོན་བརྡ་གཏོང་བའི་ལམ་སྲོལ་དོན་འཁྱོལ་བྱེད་པ་།“སྔོན་ཚུད་ཉེན་བརྡ་ཡི་ཁྱིམ་ཚང་གི་ནད་པ” དང་ “མཐའ་ཁུལ་གྱི་མི་འབོར་”ལ་དུས་ཐོག་ཏུ་སྨན་བཅོས་རོགས་སྐྱོབ་བྱེད་པ། ནད་གཞིས་རྐྱེན་པས་སླར་ཡང་དབུལ་པོར་མི་འགྱུར་བའི་མ་མཐའི་མཚམས་ཐིག་མཐའ་གཅིག་ཏུ་སྲུང་བ་བཅས་བྱེད་པ།

        བདེ་ཆེན་ཁུལ་གྱིས་འགུལ་རྣམ་དོ་དམ་ལས་དོན་ལ་ཤུགས་སྣོན་ཧུར་ཐག་བརྒྱབ་སྟེ་དྲ་ཐོག་ཆ་འཕྲིན་བསྡུར་བ་དང་དྲ་འོག་དུད་ཚང་དུ་བསྐྱོད་དེ་ཞིབ་བཤེར་བྱ་རྒྱུ་ཟུང་འབྲེལ་བྱེད་པའི་བྱ་ཐབས་བརྒྱུད་རོགས་སྐྱོབ་བྱ་ཡུལ་ངོས་འཛིན་དེ་བས་གནད་ལ་འཁེལ་བ་དང་རོགས་སྐྱོབ་བྱ་ཡུལ་གྱི་ཁེབས་ཚད་ཀྱང་དེ་བས་ལུགས་མཐུན་ཡོང་བ་བྱས་པ་རེད། ཡུན་ནན་ཞིང་ཆེན་སྲིད་གཞུང་གི་རོགས་སྐྱོབ་ལས་སྟེགས་ཁྱབ་གདལ་དང་བེད་སྤྱོད་བཏང་ནས་སེམས་ཀྱི་ཉི་ཟླ་གྲོང་ཁྱེར་ཁོ་ནར་ལས་སྟེགས་དེས་རེ་ཞུ་ཁག་201བྱས་པ་དང་ལས་དོན་ཁག་187ཐག་གཅོད་བྱས་པ་དང་ཐག་གཅོད་བྱེད་ཚད་93%ཟིན་ནས་རོགས་སྐྱོབ་རེ་ཞུའི་སྟབས་བདེ་ཚད་དང་མཐོ་ཚད་ཚད་གཞི་མཐོ་རུ་ཤུགས་ཆེན་ཕྱིན་པ་དང་དཀའ་ངལ་ཡོད་པའི་མང་ཚོགས་ཀྱིས་མ་མཐའི་འཚོ་བ་འགན་ལེན་རེ་ཞུ་བྱེད་སྐབས་“བྱ་བ་སྒྲུབ་སྐབས་མི་ལ་རེ་བ་མི་བྱེད་པ་དང་གྲོང་ཚོ་ནས་ཕྱི་འགྲོ་མི་དགོས།” “ཆ་འཕྲིན་བརྟེན་ནས་མང་ཚོགས་འགྲོ་སྐྱོད་ཉུང་བ། ཞིབ་མཆན་ཐུག་འཕྲད་མི་བྱེད་པ། ”བཅས་ཀྱི་དམིགས་ཚད་ལ་བརྟེན་ནས་མང་ཚོགས་ཀྱི་བློ་ཡིད་ཚིམ་ཚད་མཐོ་རུ་ཕྱིན་ཡོད།

        “དེ་སྔོན་ཕྲུ་གུ་སློབ་ཆེན་འགྲིམ་པའི་དབང་གིས་ངའི་ཁྱིམ་‘སློབ་སྦྱོང་ལ་བརྟེན་ནས་དབུལ་པོར་གྱུར་པའི་དཀའ་ངལ་’གྱི་གནས་སུ་གྱར་བས་ངས་གྲོང་ཚོ་ཨུ་ལྷན་ལ་གནས་སྐབས་རོགས་སྐྱོབ་རེ་ཞུ་བྱས་པ་ཡིན། རེ་ཞུ་བྱེད་རིང་ལས་དོན་མི་སྣས་སུན་སྣང་མེད་པར་ང་ལ་འབྲེལ་ཡོད་སྲིད་ཇུས་ངོ་སྤྲོད་བྱས་པས་ངས་མིང་རྟགས་བཀོད་པ་དང་མཛུབ་ཐེལ་བརྒྱབ་པ་ཙམ་གྱིས་འགྲིག་པ་དང་དེ་བྱིངས་ཀྱི་རེ་ཞུའི་གོ་རིམ་ཚང་མ་དཔྱད་གཞིའི་ཡིག་ཆ་གྲ་སྒྲིག་སོགས་ཀྱི་ལས་དོན་ཚང་མ་གྲོང་ཚོ་ཨུ་ལྷན་གྱི་ལས་དོན་མི་སྣས་ཚབ་སྒྲུབ་བྱས་པ་ཤ་སྟག་རེད་” ཅེས་སེམས་ཀྱི་ཉི་ཟླ་གྲོང་ཁྱེར་ཧྲང་ཅང་ཤང་ཧྥུའུ་ཁུའུ་གྲོང་ཚོའི་གྲོང་མི་ལི་ཅི་ཧུང་གིས་བཤད།

        “ང་ཚོས་རོགས་སྐྱོབ་བྱ་ཡུལ་གྱི་འབྲེལ་ཡོད་དཔྱད་གཞིའི་ཡིག་ཆ་ཞིབ་བསྡུར་ནན་ཏན་བྱས་པ་དང་འབྲེལ་དུད་ཚང་དུ་བསྐྱོད་ནས་བརྟག་དཔྱད་བྱས་པ་དང་དེ་ནས་དྲ་ཐོག་གི་ཆ་འཕྲིན་བསྡུར་བ་དང་ཟུང་འབྲེལ་བྱས་ཏེ་ཞབས་ཞུ་ཡག་པོ་སྒྲུབ་པ་དང་ཆབས་ཅིག་ཞིབ་བཤེར་གྱི་འགག་སྒོ་ནན་པོ་བསྲུངས་ཡོད།” རོགས་སྐྱོབ་ལས་དོན་སྤེལ་བ་མ་ཚད་ཧྥུའུ་ཁུའུ་གྲོང་ཚོས་ད་དུང་མང་ཚོགས་རང་ངོས་ཀྱི་འབབ་འཕར་ནུས་པ་ཆེ་རུ་ཧུར་ཐག་བཏང་ནས་དབུལ་པོ་བསྐྱར་ལོག་མི་ཡོང་བ་བྱས་པ་དེ་ནི་དཔེ་མཚོན་ཞིག་རེད། ཧྥུའུ་ཁུའུ་གྲོང་ཚོའི་གྲོང་མིའི་ཨུ་ཡོན་ལྷན་ཁང་གིས་དར་འབུ་གསོ་མཁན་གདན་འདྲེན་ཞུས་ནས་ལི་ཅི་ཧུང་ལ་དར་འབུ་གསོ་སྐྱོང་བྱེད་པར་མཛུབ་ཁྲིད་བྱས་ཏེ་ཁོང་གི་ཡོང་འབབ་མང་དུ་གཏོང་བར་རོགས་རམ་བྱས་པ་རེད་ཅེས་ཧྥུའུ་ཁུའུ་གྲོང་ཚོའི་གྲོང་ཚོ་ཨུ་ལྷན་གྱི་ཀྲུའུ་རེན་གཞོན་པ་ཐན་ཧྥུའུ་ཀོང་གིས་ངོ་སྤྲོད་བྱས་པ་རེད།   

        ཁུལ་གྱི་འབྲེལ་ཡོད་འགན་འཁུར་བས་“བདེ་ཆེན་ཁུལ་གྱིས་འབྲེལ་ཡོད་ལས་སྟེགས་ལ་བརྟེན་པ་དང་སྤྱི་ཚོགས་རོགས་སྐྱོབ་སོགས་ལ་བརྟེན་ནས་རྒྱུན་རྣམ་ཅན་གྱི་དབུལ་པོ་བསྐྱར་ལོག་སྔོན་འགོག་གི་འགུལ་རྣམ་ལྟ་ཞིབ་ཚད་ལེན་དང་རོགས་སྐྱོར་མུ་མཐུད་བྱས་པ་རེད”ཅེས་བཤད།