ནད་པ་ལྕི་མོར་འཚོ་བཅུད་ཇི་ལྟར་འདོན་སྤྲོད་བྱེད་དགོས།

རྩོམ་པ་པོ།     ཡིག་བསྒྱུར།       དུས་ཚོད།   2024-08-20   རྩོམ་ཁུངས།    མཚོ་སྔོན་བོད་ཡིག་ཚགས་པར།

    ནད་པ་ལྕི་མོ་ཞེས་པ་ནི་ནད་གཞི་ཚབས་ཆེན་དང་ལུས་ཀྱི་ནད་རྟགས་བརྟན་པོ་མིན་པ། ལྟ་སྲུང་དང་སྨན་བཅོས་བཟང་པོ་བྱེད་དགོས་པའི་ནད་པ་ལ་ཟེར། ནད་གཞི་ཚབས་ཆེ་བས་ནད་པ་འདི་དག་གི་ལུས་པོ་དབྱེ་ཕྲལ་མཐོ་བའི་རྙིང་ཚབ་གསར་བརྗེའི་རྣམ་པར་གནས་ཡོད་པས། མ་གཞི་ནས་འཚོ་བཅུད་ཀྱི་དགོས་མཁོ་ཆེན་པོ་ཡོད། འོན་ཀྱང་གནས་ཚུལ་སྣ་ཚོགས་ཀྱི་ཤུགས་རྐྱེན་ཐེབས་ནས། ཁོ་ཚོའི་འཚོ་བཅུད་དགོས་མཁོ་རྒྱུན་པར་སྐོང་དཀའ་བ་རེད། འདི་འདྲའི་གནས་ཚུལ་འོག ནད་པ་ལྕི་མོར་འཚོ་བཅུད་ཀྱི་རྒྱབ་སྐྱོར་ལེགས་པོ་འདོན་སྤྲོད་བྱེད་རྒྱུ་ནི་ཤིན་ཏུ་གལ་ཆེ།

    ནད་པ་ལྕི་མོར་འཚོ་བཅུད་ཁ་གསབ་བྱེད་ཐབས་ལ་རིགས་གཉིས་ཡོད་དེ། གཅིག་ནི་རང་བདག་གིས་ཟ་མ་བཟའ་ཐུབ་པ་དང་། ཅིག་ཤོས་ནི་རང་བདག་གིས་ཟ་མ་བཟའ་མི་ཐུབ་པར་སྡོད་རྩ་སོགས་བརྒྱུད་དེ་འཚོ་བཅུད་འདོན་སྤྲོད་བྱེད་དགོས་པ་ཡིན། རང་བདག་གིས་ཟ་མ་བཟའ་ཐུབ་པའི་ནད་པར་སྨན་པས་རྒྱུན་དུ་སྐུལ་མ་བྱས་ནས་དུས་སྔ་མོ་ནས་ཟ་མ་བཟའ་རུ་འཇུག་པ་དང་། གལ་ཏེ་ནད་པས་རང་བདག་གིས་ཟ་མ་བཟའ་མ་ཐུབ་ཚེ། སྨན་པས་བྱེད་ཐབས་སྣ་ཚོགས་བརྒྱུད་དེ་ནད་པར་འཚོ་བཅུད་གཤེར་ཁུ་ཁ་གསབ་བྱེད་དགོས།

    ནད་པ་ལྕི་མོར་ཟས་རིགས་ཁོ་ནས་འཚོ་བཅུད་འདང་ངེས་ཁ་གསབ་བྱེད་མི་ཐུབ།

    ནད་པ་ལྕི་མོའི་འཚོ་བཅུད་དགོས་མཁོ་ནི་བདེ་ཐང་དུས་སྐབས་ལས་ཤིན་ཏུ་ཆེ་བར་མ་ཟད། དམིགས་བསལ་རང་བཞིན་དང་རྙོག་འཛིང་རང་བཞིན་ལྡན། སྤྱིར་བཏང་གི་བཟའ་བཅའ་ཡིས་ནད་པའི་འཚོ་བཅུད་དགོས་མཁོ་སྐོང་དཀའ། ནད་པ་ལྕི་མོར་རྒྱུན་པར་མིད་པའི་འགོག་རྐྱེན་དང་རྣམ་རིག་མི་གསལ་བ་སོགས་ཀྱི་ནད་རྟགས་མངོན་སྲིད་པས། རྒྱུན་སྲོལ་གྱི་བྱེད་ཐབས་ལ་བརྟེན་ནས་ཟ་མ་བཟའ་མི་ཐུབ་པ་རེད། རྒྱུན་ལྡན་བཞིན་ཟ་མ་བཟའ་ཐུབ་པའི་ནད་པ་ཡིན་ནའང་རྒྱུ་མ་སོགས་ཀྱི་དབང་བོའི་བྱེད་ནུས་ལ་གཏོར་བརླག་ཐེབས་ནས། ཟས་རིགས་ཁྲོད་ཀྱི་འཚོ་བཅུད་ནུས་ལྡན་སྒོས་འཇུ་ལེན་དང་དྭངས་སྙིགས་འབྱེད་མི་ཐུབ་པའི་སྣང་ཚུལ་འབྱུང་སྲིད། འདི་འདྲའི་གནས་ཚུལ་འོག ནད་པ་རྒྱགས་ཡོད་ནའང་། འཚོ་བཅུད་མི་འདང་བའི་གནས་ཚུལ་འབྱུང་སྲིད། ནད་པ་ལྕི་མོའི་ལུས་སྟེང་གི་ནུས་ཚད་མང་པོ་ཟད་ཡོད་པས། ཁོ་ཚོའི་ཨན་གཞི་སྐྱུར་དང་ཚིལ་སྐྱུར། འཚོ་རྒྱུ། གཏེར་དངོས་སོགས་འཚོ་བཅུད་གྲུབ་ཆའི་དགོས་མཁོ་བདེ་ཐང་གི་མི་ཚོགས་ལས་ཆེ་བ་རེད། འཚོ་བཅུད་གཤེར་ཁུ་ནི་རྒྱུན་པར་གནད་དུ་ཁེལ་བའི་སྡེབ་སྒྲིག་བྱས་ཡོད་པས། འཚོ་བཅུད་གྲུབ་ཆའི་རིགས་སྣ་དང་བསྡུར་ཚད་གང་ཡིན་རུང་། ནད་པ་ལྕི་མོའི་དགོས་མཁོ་ནུས་ལྡན་སྒོས་སྐོང་ཐུབ་ཅིང་། ནད་པའི་སྨན་བཅོས་དང་སླར་གསོ་ལ་ཕན་ཁེ་ལྡན། སྨན་པས་སྡོད་རྩ་དང་ཕོ་བའི་སྦུ་གུར་བརྟེན་ནས་འཚོ་བཅུད་ཐད་ཀར་དུ་མིའི་ལུས་སྟེང་དུ་བླུག་ནས། འཇུ་ལམ་གྱི་ཁག་ཁུར་ཇེ་ཡང་དུ་གཏོང་དགོས།

    འཚོ་བཅུད་འདོན་སྤྲོད་ཚད་གཞི་གཏན་ཁེལ་མ་བྱས་པར་ཚད་དང་མཐུན་པ་བྱེད་དགོས།

    ནད་ལྕི་མོ་བྱུང་བའི་ནད་པར་རྒྱུན་པར་ཟ་མ་བཟའ་མི་ཐུབ་པའི་འགོག་རྐྱེན་ཡོད་ལ། སྐབས་ལན་རེར་ཟ་མ་ཟས་པ་ལས་འཚོ་བཅུད་འཇུ་ལེན་དང་དྭངས་སྙིགས་འབྱེད་མི་ཐུབ་པས། ལུགས་མཐུན་གྱི་འཚོ་བཅུད་འདོན་སྤྲོད་བྱེད་རྒྱུ་ནི་ཤིན་ཏུ་གལ་ཆེ། འདི་འདྲའི་གནས་ཚུལ་འོག སྨན་པས་ནད་པའི་བྱེ་བྲག་གི་དགོས་མཁོ་ལྟར། སྡོད་རྩ་དང་ཕོ་བའི་སྦུ་གུ་བརྒྱུད་དེ་ཆེད་དམིགས་ཀྱི་འཚོ་བཅུད་གཤེར་ཁུ་འདོན་སྤྲོད་བྱེད་དགོས།

    འཚོ་བཅུད་གཤེར་ཁུ་ལ་རིགས་སྣ་མང་པོ་ཡོད་དེ། སྤྱིར་བཏང་དུ་གཤེར་ཁུའི་རྣམ་པས་སྦུ་གུ་བརྒྱུད་དེ་ནད་པའི་ལུས་ལ་འདྲེན་པ་ཡིན། འཚོ་བཅུད་གཤེར་ཁུའི་ཁྲོད་འཚོ་བཅུད་གྲུབ་ཆ་མང་པོ་འདུས་ཡོད་དེ། གཙོ་བོར་སྤྲི་དཀར་རྫས་དང་ཨན་གཞི་སྐྱུར། ཀ་ར། ཚིལ། འཚོ་རྒྱུ། གཏེར་རྫས། ཆུ། གློག་འབྱེད་རྫས་སོགས་ཡོད་ལ། གྲུབ་ཆ་འདི་དག་ནི་ནད་པ་ལྕི་མོར་ཤིན་ཏུ་གལ་ཆེ་བ་རེད། དཔེར་ན། སྤྲི་དཀར་རྫས་ཀྱིས་རྨ་ཁ་གསོ་བ་དང་། རྒུན་འབྲུམ་ཧྭགས་དང་ཚིལ་ནི་ལུས་སྟེང་གི་ནུས་ཚད་འབྱུང་ཁུངས་གལ་ཆེན་ཞིག་རེད། འཚོ་བཅུད་གཤེར་ཁུའི་ཁྲོད་འཚོ་རྒྱུ་དང་གཏེར་དངོས་མང་པོ་ཡོད་པས་ནད་པའི་སླར་གསོ་ལ་ཕན་ནུས་ཆེན་པོ་ལྡན།

    འཚོ་བཅུད་འདོན་སྤྲོད་ཚད་གཞི་གཏན་ཁེལ་བྱེད་མི་རུང་བར་ནད་པའི་ཚད་དང་མཐུན་པ་བྱེད་དགོས་ལ། ནད་པ་མི་འདྲ་བར་རང་ཉིད་ཀྱི་གཟུགས་གཞི་དང་ནད་རིགས། སྨན་བཅོས་དུས་ཡུན་སོགས་ལ་མངོན་གསལ་གྱི་ཧེ་བག་ཆེན་པོ་ཡོད་པས། སྨན་པས་ནད་པའི་ལུས་ཕུང་གནས་ཚུལ་ལ་ཕྱོགས་ཡོངས་ནས་དཔྱད་དཔོག་བྱས་ཏེ་སྒེར་གཤིས་ཅན་གྱི་འཚོ་བཅུད་འདོན་སྤྲོད་ཚད་གཞི་བཟོ་བ་དང་། ནད་པར་དུས་རྒྱུན་མཁོ་བའི་སྤྲི་དཀར་རྫས་དང་འཚོ་རྒྱུ། ཚ་ནུས་སོགས་ལ་གཞིགས་ཏེ། འོས་འཚམ་གྱི་འཚོ་བཅུད་གཤེར་ཁུ་འདོན་སྤྲོད་བྱེད་དགོས།

    འཚོ་བཅུད་གཤེར་ཁུ་འདོན་སྤྲོད་བྱས་རྗེས་འཚོ་བཅུད་གཞན་དག་འདོན་སྤྲོད་བྱེད་དགོས་སམ།

    འཚོ་བཅུད་གཞན་དག་འདོན་སྤྲོད་བྱེད་དགོས་མིན་ནི་ནད་པའི་བྱེ་བྲག་གི་གནས་ཚུལ་དང་འཚོ་བཅུད་དགོས་མཁོར་རག་ལས། འཚོ་བཅུད་གཤེར་ཁུའི་ཁྲོད་འཚོ་བཅུད་གྲུབ་ཆ་ཕུན་སུམ་ཚོགས་པོ་འདུས་ནའང་། ནད་པ་ཁ་ཤས་ལ་ནད་རིགས་དང་སྨན་རྫས་ཀྱི་ཤུགས་རྐྱེན་ཐེབས་པས། ཆེད་དམིགས་ཀྱི་འཚོ་བཅུད་གྲུབ་ཆ་དཀོན་པ་རེད། དཔེར་ན། གལ་ཏེ་ནད་པར་ལྕགས་རྒྱུ་རང་བཞིན་གྱི་ཟུངས་ཁྲག་ཟད་པ་ཡིན་ན། དམིགས་གཏད་རང་བཞིན་གྱིས་ལྕགས་ཁ་གསབ་བྱེད་དགོས། གལ་ཏེ་ནད་པའི་ལུས་སྟེང་དུ་འཚོ་རྒྱུDའདུས་ཚད་ཅུང་ཉུང་ན། འོས་འཚམ་སྒོས་འཚོ་རྒྱུDཁ་གསབ་བྱེད་དགོས། མཉམ་འཇོག་དགོས་པ་ཞིག་ལ་འཚོ་བཅུད་ཁ་གསབ་བྱེད་སྐབས་ངེས་པར་དུ་སྨན་པའི་མཛུབ་སྟོན་ལྟར་བྱེད་དགོས་ལ། དེ་ལྟར་ན་འཚོ་བཅུད་ལྷག་པའི་གནས་ཚུལ་མི་འབྱུང་བའམ་སྨན་བཅོས་ལ་ཤུགས་རྐྱེན་མི་ཐེབས་པའི་གནས་ཚུལ་འོག་ཕན་འབྲས་བཟང་པོ་ཐོན་ཐུབ།

    འཚོ་བཅུད་གཤེར་ཁུ་འདོན་སྤྲོད་བྱེད་པའམ་ཡང་ན་བྱེད་ཐབས་གཞན་གང་སྤྱད་རུང་། བྱེ་བྲག་གི་གནད་དོན་ལ་བྱེ་བྲག་གིས་དབྱེ་ཞིབ་བྱེད་དགོས་ལ། ནད་པའི་ནད་གཞིའི་འགྱུར་ལྡོག་ལྟར་སྙོམས་སྒྲིག་བྱེད་དགོས། ནད་པའི་ཁྱིམ་མིར་དོགས་གཞི་ཡོད་ཚེ། སྨན་པར་འདྲི་ཞིབ་བྱས་ཆོག་པ་དང་། སྨན་པས་ནད་པའི་གནས་ཚུལ་ལ་ཕྱོགས་ཡོངས་ནས་དཔྱད་དཔོག་བྱས་རྗེས་འོས་འཚམ་གྱི་ཐག་གཅོད་ཇུས་གཞི་བཟོ་དགོས།

    ནད་པ་ལྕི་མོ་སྨན་ཁང་ལས་བུད་རྗེས་འཚོ་བཅུད་གཤེར་ཁུ་འདོན་སྤྲོད་བྱེད་དགོས་སམ།

    རྒྱུན་ལྡན་གནས་ཚུལ་འོག སྨན་ཁང་ལས་ཕྱིར་འབུད་པ་ནི་ནད་པའི་ནད་གཞིར་ཚོད་འཛིན་བྱས་ཐུབ་ཡོད་པ་མཚོན་ལ། ལུས་པོའི་གནས་ཚུལ་ཇེ་བཟང་དུ་སོང་ཡོད་པས། སྐབས་འདིར་ནད་པས་སྤྱིར་བཏང་དུ་འཚོ་བཅུད་གཤེར་ཁུ་སྤྱད་ནས་འཚོ་བཅུད་ཁ་གསབ་བྱེད་མི་དགོས་པར་སྨན་ཁང་ལས་བུད་རྗེས་འཚོ་བཅུད་གཤེར་ཁུ་སྤྱོད་མཚམས་བཞག་ཆོག

    བཟའ་བཏུང་ཐད། ནད་པས་འཇུ་སླ་བ་དང་འཚོ་བཅུད་ཕུན་སུམ་ཚོགས་པའི་ཟས་རིགས་མང་དུ་བཟའ་བར་མཉམ་འཇོག་དགོས་ལ། དཔེར་ན་ཤ་དང་ཉ་རིགས། སྲན་བཟོས་ཐོན་རྫས། སིལ་ཏོག་དང་སྔོ་ཚོད་གསར་པ་སོགས་བཟའ་དགོས་ཤིང་། སྤུས་ལེགས་སྤྲི་དཀར་རྫས་འདུས་པའི་ཟས་རིགས་མང་དུ་བསྟེན་དགོས།

    འཚོ་བའི་ཁྲོད། ཁྱིམ་མིས་ནད་པའི་འཚོ་བཅུད་གནས་ཚུལ་ལ་དོ་སྣང་ཞིབ་མོ་བྱེད་དགོས། གལ་ཏེ་འཚོ་བཅུད་མི་འདང་བའི་གནས་ཚུལ་བྱུང་ཚེ། དུས་ཐོག་ཏུ་སྨན་ཁང་གི་འཚོ་བཅུད་སྒོ་བསྟེན་ཁང་དུ་སོང་ནས་སྨན་བཅོས་བྱེད་དགོས་པ་དང་། བཟའ་བཏུང་ཇུས་གཞི་སྙོམས་སྒྲིག་བྱས་ཏེ་ནད་གཞི་ཇེ་ལྕི་རུ་འགྲོ་བ་འགོག་དགོས་སོ། །



分享到：QQ空间新浪微博腾讯微博人人网微信