རྒྱུ་མའི་ནད་རིགས་སྔོན་འགོག་བྱེད་པར་འདི་དག་ལ་མཉམ་འཇོག་དགོས།

འཚོ་བ་རོལ་སྟངས་ལ་འགྱུར་ལྡོག་བྱུང་བ་དང་བསྟུན་ནས། མི་ཚང་མའི་རྒྱུ་མའང་སྔ་ན་མེད་པའི་འགྲན་སློང་མང་པོར་འཕྲད་ཡོད།

རྒྱུ་མའི་བདེ་ཐང་ལ་ཇི་ལྟར་དོ་སྣང་བྱེད་དགོས།

ཚི་སྣ་མཐོ་བའི་ཟས་རིགས་བཟའ་དགོས། ང་ཚོས་ཚི་སྣ་མཐོ་བའི་ཟས་རིགས་འོས་འཚམ་གྱིས་བཟའ་དགོས་ཏེ། དཔེར་ན་འབྲུ་རིགས་དང་སྲན་རིགས། སིལ་ཏོག་དང་སྔོ་ཚོད་གསར་པ་སོགས་བཟའ་དགོས། ཟས་རིགས་འདི་དག་གིས་རྒྱུ་མ་གཙང་སེལ་བྱེད་ཐུབ་པར་མ་ཟད། སྐྱེ་ཕན་སྲིན་ལ་འཚོ་བཅུད་མཁོ་སྤྲོད་བྱས་ནས་རྒྱུ་མའི་བདེ་ཐང་ལ་སྐུལ་སྤེལ་བྱེད་ཐུབ།

སྐྱེ་ཕན་སྲིན་ཁ་གསབ་བྱེད་པ། བསྙལ་ཟས་རིགས་ཏེ་དཔེར་ན་ཞོ་དང་སྐྱེ་ཕན་སྲིན་གྱི་ཟས་རིགས་གཞན་དག་སོགས་ཀྱིས་སྐྱེ་ལྡན་སྲིན་ཚོགས་ཐད་ཀར་དུ་ཁ་གསབ་བྱས་ནས་རྒྱུ་མའི་འགོག་སྲུང་ནུས་པ་ཇེ་ཆེར་གཏོང་ཐུབ།

ཆུ་མང་དུ་འཐུང་བ། རྒྱུ་མར་ཉིན་རེར་ཆུ་འདང་ངེས་མཁོ་སྤྲོད་བྱེད་དགོས། མི་དར་མས་ཉིན་རེར་ཉུང་མཐའ་ཡང་ཆུ་ཧྲེང1.5འཐུང་དགོས་ལ། དེས་རྒྱུ་མའི་ནང་ངོས་ཀྱི་འོས་འཚམ་འཁོར་རྒྱུག་རྒྱུན་འཁྱོངས་བྱེད་ཐུབ།

བདེ་ཐང་གི་བཟའ་བཏུང་ལ་བསྟེན་པ། མངར་ཆ་དང་ཚིལ་མཐོ་བའི་ཟས་རིགས་ཚོད་འཛིན་བྱེད་དགོས། ཟས་རིགས་འདི་དག་གིས་འཇུ་ལམ་གྱི་ཁུར་པོ་ཇེ་ལྕི་རུ་གཏོང་བར་མ་ཟད། གནོད་ལྡན་སྲིན་ཇེ་མང་དུ་གཏོང་སྲིད།

འོས་འཚམ་གྱིས་འགུལ་སྐྱོད་བྱེད་པ། ལུས་རྩལ་སྦྱོང་བརྡར་གྱི་དུས་ཚོད་དང་ཐེངས་གྲངས་ཇེ་མང་དུ་གཏོང་དགོས་ཏེ། དཔེར་ན་རྐང་ཐང་དུ་འགྲོ་བ་དང་ཆུར་རྐྱལ་བ། དལ་རྒྱུག་བྱེད་པ་སོགས་ནི་རྒྱུ་མ་བདེ་ཐང་ཡོང་བར་ཕན་ནོ།།

སྨན་གཟབ་ནན་གྱིས་སྤྱོད་པ། སྐྱེ་འགོག་རྒྱུ་དང་སྨན་རྫས་གཞན་དག་གང་འདོད་དུ་སྤྱད་ཚེ། སྐྱེ་ལྡན་གྱི་སྐྱེ་དངོས་ཕྲ་རབ་མང་པོ་བསད་དེ་རྒྱུ་མར་དུས་ཡུན་རིང་པོའི་གནོད་འཚེ་ཐེབས་སྲིད་པ་དང་། ལུས་པོར་ནད་རིགས་འབྱུང་བའི་ཉེན་ཁ་ཡོད། དེའི་རྐྱེན་གྱིས་ལོ་ན་རྒན་པ་དག་གིས་སྨན་པའི་ངག་བཞིན་དུ་སྨན་སྤྱོད་པ་ལས་གང་འདོད་དུ་སྤྱོད་མི་རུང་།

གཉིད་ཀྱིས་འདང་བར་བྱེད་པ། སྤུས་ཚད་མཐོ་བའི་ངང་གཉིད་པ་ནི་རྒྱུ་མའི་བདེ་ཐང་སྲུང་འཛིན་བྱེད་པའི་གོ་རིམ་གལ་ཆེན་ཞིག་ཡིན་ལ། གཉིད་པའི་གོམས་གཤིས་མི་ལེགས་པ་དེས་རྒྱུ་མའི་གཉན་ཚད་སློང་བ་དང་བྱེད་ནུས་གཞན་དག་ལ་གཏོར་བརླག་ཐེབས་སྲིད།

རྒྱུ་མའི་ནད་རིགས་ཀྱི་བརྟག་དཔྱད་བྱེད་ཐབས།

ཁྲག་དང་བཤང་གཅིན་ལ་བརྟག་པ། བྱེད་ཐབས་འདི་དག་གིས་རྒྱུ་མའི་མངོན་མེད་ཀྱི་བདེ་ཐང་ཉེན་ཁ་ཞིབ་བཤེར་ཚད་ལེན་བྱེད་ཐུབ། ཁྲག་ལ་བརྟག་པ་བརྒྱུད་དེ་འཚོ་བཅུད་སྡུད་ལེན་དང་གཉན་ཚད་སོགས་ཀྱི་གནས་ཚུལ་ཤེས་ཐུབ་པ་དང་། བཤང་གཅིན་ལ་བརྟག་པ་ལས་རྒྱུ་མར་ཁྲག་རྡོལ་ཡོད་མེད་དང་གཉན་ཚད། གཞན་བརྟེན་སྲིན་འབུ་འགོས་མཆེད་སོགས་ཀྱི་གནད་དོན་ཡོད་མེད་རྒྱུས་ལོན་བྱེད་ཐུབ།

རྒྱུ་ཤེལ་བརྟག་དཔྱད། རྒྱུ་ཤེལ་ནི་རྒྱུ་མའི་ནད་རིགས་ལེབ་བཤེར་དང་བརྟག་བཅོས། སྨན་བཅོས་བཅས་བྱེད་པའི་བྱེད་ཐབས་གལ་ཆེན་ཞིག་ཡིན། གཤམ་གྱི་མི་ཚོགས་འདི་དག་གིས་སྨན་པའི་མཛུབ་སྟོན་འོག་རྒྱུ་ཤེལ་བརྟག་དཔྱད་བྱེད་དགོས། ལོ45ཡན་གྱི་མི་དང་གཉེན་ཉེ་ལ་གཞང་འབྲས་ཀྱི་ནད་ཡོད་པ། རྒྱུ་རྐྱེན་གསལ་པོ་མིན་པར་ཁོག་པ་བཤལ་བ་དང་ན་བ། ཁྲག་ཞན་པ། འཇུ་ལམ་དུ་ཁྲག་ཐོན་པ་སོགས་ཡིན་ནོ། །