རང་ཁུལ་གྱི་རིམ་པ་ཁག་དང་སྡེ་ཚན་ཁག་གིས་《ལག་བསྟར་བསམ་འཆར་》ལ་སློབ་སྦྱོང་གཏིང་ཟབ་བྱས་ཏེ་སྒྱུར་བཅོས་གཏིང་ཟབ་ཏུ་བཏང་ནས་བདེ་ཆེན་གྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་།

        སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཁུལ་ཨུའི་སྐབས་དགུ་པའི་ཚང་འཛོམས་གྲོས་ཚོགས་ཐེངས་བདུན་པའི་ཐོག་《ཀྲུང་གུང་བདེ་ཆེན་ཁུལ་ཨུའི་ཕྱོགས་ཡོངས་ནས་སྒྱུར་བཅོས་སྔར་བས་གཏིང་ཟབ་ཏུ་གཏོང་བ་དང་ཀྲུང་གོའི་ལུགས་ཀྱི་དེང་རབས་ཅན་གྱི་བདེ་ཆེན་ལག་ལེན་ལ་སྐུལ་འདེད་གཏོང་བ་སྐོར་གྱི་ལག་བསྟར་བསམ་འཆར་》གྲོས་ཞིབ་བྱས་ནས་གྲོས་འཆམ་བྱུང་ཅིང་།  ཕྱོགས་ཡོངས་ནས་སྒྱུར་བཅོས་སྔར་ལས་གཏིང་ཟབ་ཏུ་གཏོང་བ་དང་ཀྲུང་གོའི་ལུགས་ཀྱི་དེང་རབས་ཅན་གྱི་བདེ་ཆེན་ལག་ལེན་ལ་སྐུལ་འདེད་གཏོང་ཆེད་བརྒྱུད་རིམ་ལྡན་པའི་བཀོད་སྒྲིག་བྱས་པ་རེད།   ཉིན་ཤས་རིང་རང་ཁུལ་གྱི་རིམ་པ་ཁག་དང་སྡེ་ཚན་ཁག་གིས་《ལག་བསྟར་བསམ་འཆར་》སློབ་སྦྱོང་དང་གྲོས་བསྡུར་གཏིང་ཟབ་བྱས་ཏེ་ཁུལ་ཨུའི་ཚང་འཛོམས་གྲོས་ཚོགས་ཀྱི་དགོངས་དོན་ལ་གོ་བ་གཏིང་ཟབ་བླངས་ནས་སྒྱུར་བཅོས་ཀྱི་འཕེལ་རིམ་མགྱོགས་སུ་གཏོང་བ་དང་འཇུར་མིག་གི་གནད་དོན་སེལ་ནས་ཁུལ་ཡོངས་ཀྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཡོད།

        ཁུལ་སྒྱུར་བཅོས་ཨུ་ལྷན་གྱི་ཀྲུའུ་རེན་ཀྲའོ་ཀྲི་ལའེ་ཡིས་ས་གནས་དཔལ་འབྱོར་འཕེལ་རྒྱས་ཀྱི་ཕྱོགས་བསྡོམས་དོ་དམ་སྡེ་ཁག་ཞིག་ཡིན་པའི་ཆ་ནས་ཁུལ་སྒྱུར་བཅོས་ཨུ་ལྷན་གྱིས་ཧུར་ཐག་སྒོས་གཅིག་གྱུར་འཆར་འགོད་དང་མཐུན་སྦྱོར་གྱི་འགན་ནུས་འདོན་སྤེལ་བྱེད་དེ་སྤྱི་ཁོག་ལ་དམིགས་པ་དང་ཕྲ་མཐོང་ནས་འགོ་འཛུགས་རྒྱུ་མཐའ་འཁྱོངས་ཀྱིས་ཞིབ་ཕྲའི་ལས་དོན་ལ་དམ་འཛིན་ཡག་པོ་བྱས་ཏེ་ཁུལ་ཨུའི་ཚང་འཛོམས་གྲོས་ཚོགས་ཀྱི་སྒྱུར་བཅོས་སྐོར་གྱི་བཀོད་སྒྲིག་དེ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ཕན་འབྲས་དངོས་སུ་ཏན་ཏིག་འགྱུར་བ་བྱ་རྒྱུ་ཡིན་ཞེས་ཟེར།

        ཁུལ་ནོར་སྲིད་ཅུས་ཀྱི་ཅུས་ཀྲང་ཧོ་ཡུས་ཀྱིས་ཁུལ་ཡོངས་ཀྱི་ནོར་སྲིད་སྡེ་ཁག་གིས་ཁུལ་ཨུའི་ཚང་འཛོམས་གྲོས་ཚོགས་ཀྱི་དགོངས་དོན་དང་ཟུང་འབྲེལ་བྱས་ཏེ། ཀྲུང་དབྱང་དང་། ཞིང་ཨུ། ཁུལ་ཨུ་བཅས་ཀྱི་བསྒྱུར་བཅོས་ཁྱོན་ཡོངས་ནས་ཟབ་སྤེལ་བྱ་རྒྱུའི་སྐོར་གྱི་དམིགས་འབེན་དང་ལས་འགན་གྱི་བླང་བྱ་གཏན་འཁེལ་བྱས་ཏེ།  ཁྱོན་ཡོངས་ནས་བསྒྱུར་བཅོས་ཟབ་སྤེལ་བྱ་རྒྱུ་དེ་ནོར་སྲིད་ལས་དོན་གྱི་བརྒྱུད་རིམ་ཧྲིལ་པོ་དང་ལྷུ་ཚིགས་ཁག་ཏུ་འདྲེས་པར་བྱ་རྒྱུ་ཡིན་པ་དང་།བསྒྱུར་བཅོས་ཟབ་སྤེལ་བྱེད་པའི་སྤྱིའི་བརྟག་ཐབས་སྨྲ་བར་གོ་བ་གཏིང་ཟབ་ལེན་པ་དང་ཁོང་དུ་ཡང་དག་ཆུད་པར་བྱེད་དེ་གོམ་པ་རེ་ལ་རྐང་རྗེས་རེ་བཞག་ནས་རྒྱལ་ཁབ་ལ་དབང་བའི་མ་དངུལ་དང་རྒྱལ་ཁབ་ལ་དབང་བའི་ཁེ་ལས་བསྒྱུར་བཅོས་དང་། རྨང་གཞི་མེད་པའི་སྔོན་རྩིས་ཟབ་སྤེལ། གྲུབ་འབྲས་གདེང་འཇོག་ལམ་ལུགས་འཐུས་ཚང་དུ་གཏོང་བ། ནོར་སྲིད་དང་དངུལ་རྩའི་ཉེན་ཁར་དོགས་ཟོན་དང་སེལ་ཐབས་བྱེད་པ་སོགས་ཀྱི་བསྒྱུར་བཅོས་ལས་དོན་དོན་ཐོག་ཏུ་འཁྱོལ་བ་དང་ཕན་འབྲས་ཐོན་པར་སྐུལ་འདེད་གཏོང་རྒྱུ་ཡིན་ཞེས་ཟེར།

        ཁུལ་སྣོད་བཅུད་ཁོར་ཡུག་ཅུས་ཀྱི་ཅུས་ཀྲང་དབྱང་ཆིན་ཀྲིང་གིས་མ་འོངས་པའི་ལོ་ལྔའི་རིང་སྣོད་བཅུད་ཁོར་ཡུག་སྡེ་ཁག་གིས་སྣོད་བཅུད་ཤེས་དཔལ་གྱི་རྨང་གཞིའི་འགན་ལེན་ལམ་སྲོལ་དང་། སྐྱེ་དངོས་སྣ་མང་རང་བཞིན་སྲུང་སྐྱོང་དང་བེད་སྤྱོད་ལམ་སྲོལ། སྣོད་བཅུད་ཐོན་རྫས་ཀྱི་རིན་ཐང་མངོན་འགྱུར་ལམ་སྲོལ་བཅས་སྔར་བས་འཐུས་སྒོ་ཚང་དུ་གཏོང་བ་དང་། ལྗང་མདོག་མཛེས་སྡུག་ལྡན་པའི་བདེ་ཆེན་འཛུགས་སྐྲུན་ལ་སྐུལ་འདེད་ཤུགས་ཆེན་གཏོང་བ་དང་སྒྲིག་སྲོལ་དང་ལམ་སྲོལ་གྱི་ཞན་ཆ་གསབ་པ་བཅས་བྱས་ཏེ་བདེ་ཆེན་གྱི་སྣོད་བཅུད་ཤེས་དཔལ་འཛུགས་སྐྱོང་དཔེ་སྟོན་ཁུལ་གཏོད་པའི་གྲུབ་འབྲས་རྒྱུན་ཆད་མེད་པར་སྲ་བརྟན་དང་མཐོ་རུ་གཏོང་རྒྱུ་ཡིན་ཞེས་བཤད་པ་རེད།

        ཁུལ་ཚན་རྩལ་ཅུས་ཀྱི་ཅུས་ཀྲང་ཀྲང་ཧུང་ཀོང་གིས་ཁུལ་ཡོངས་ཀྱི་ཚན་རྩལ་སྡེ་ཚན་གྱིས་ཁུལ་ཨུའི་ཚང་འཛོམས་གྲོས་ཚོགས་ཀྱི་དགོངས་དོན་ལག་བསྟར་དོན་འཁྱོལ་ནན་ཏན་བྱེད་དེ་ཚན་རྩལ་ཁྱབ་ཁོངས་ཀྱི་སྒྲིག་སྲོལ་སྒྱུར་བཅོས་མུ་མཐུད་གཏིང་ཟབ་ཏུ་གཏོང་བ་དང་ཐོན་ཁུངས་བཀོད་སྒྲིག་རྒྱུན་ཆད་མེད་པར་ལེགས་སུ་བཏང་ནས་ཚན་རྩལ་དང་ཐོན་ལས་མཉམ་འདྲེས་གཏིང་ཟབ་ཡོང་རྒྱུར་སྐུལ་འདེད་གཏོང་རྒྱུ་ཡིན་པ་དང་།  ཕྱི་རོལ་གྱི་ཚན་རྩལ་ཐོན་ཁུངས་ལ་བརྟེན་ནས་རང་ཁུལ་གྱི་ཁྱད་ལྡན་ཐོན་ལས་ཀྱི་སྤུས་ཚད་དང་ཕན་འབྲས་མཐོ་རུ་གཏོང་རོགས་བྱེད་དེ་ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ་དང་། ཁེ་ལས་དང་བྱ་གཞག་སྡེ་ཚན་གྱིས་རྨང་གཞིའི་ཞིབ་འཇུག་བྱེད་པར་བསྔགས་སྐུལ་བྱ་རྒྱུ་ཡིན་ཞེས་ཟེར།