བློ་བཟང་ཉི་མའི་ལས་གཏོད་གཏམ་རྒྱུད།

        ཡུལ་ལྗོངས་ལྟ་ན་སྡུག་པའི་སེམས་ཀྱི་ཉི་ཟླ་གྲོང་ཁྱེར་ཡང་ཐང་གྲོང་རྡལ་མཉམ་འབྲེལ་གྲོང་ཚོའི་རུའུ་ལིན་གྲོང་མིའི་ཚོགས་ཆུང་དུ་མིང་ལ་བློ་བཟང་ཉི་མ་ཟེར་བའི་བོད་རིགས་ཕོ་རྒོད་ཅིག་ཡོད་པ་དང་ཁོང་གིས་བློ་བརྟན་འགྱུར་མེད་ཀྱི་སྙིང་རུས་དང་ཟས་མཆོག་ལ་དགའ་ཞེན་བྱེད་པའི་ཐོག་ནས་“ཤིན་ནུང་གྲོང་ཚོའི་ཟ་ཁང་ཆུང་ཆུང་”བཙུགས་ཏེ་ཡུལ་མི་ཚོའི་སྣེ་ཁྲིད་དེ་ཐུན་མོང་ཐོག་གྲོང་གསེབ་དར་རྒྱས་ཀྱི་རྒྱང་སྐྱོད་ལམ་བུ་གསར་པར་བསྐྱོད་པ་རེད།  

        བློ་བཟང་ཉི་མ་ནི་སྤྱིར་བཏང་གི་ཁྱིམ་ཚང་ཞིག་ཏུ་སྐྱེས་པ་དང་མཐོ་རིམ་སློབ་འབྲིང་ནས་ཐོན་རྗེས་ཕ་ཡུལ་གྱི་རྣམ་པར་འགྱུར་ལྡོག་གཏོང་བའི་ཕུགས་འདུན་བཅངས་ནས་ཁོང་ཕ་ཡུལ་དུ་ལོག་སྟེ་ལས་གཏོད་བྱས་པ་དང་སྔ་རྗེས་སུ་བྱ་ཕག་ཉ་གསོ་བ་སོགས་ཀྱི་ལས་ཀ་བྱེད་མྱོང་བ་དང་། ཚོད་ལྟ་བྱེད་ཐེངས་རེ་རེར་སྤྲོ་སེམས་རབ་ཏུ་འཁོལ་ཡང་དཀའ་ལས་ཡང་ཡང་བྱུང་མོད། འོན་ཀྱང་ཁོང་གིས་བློས་བཏང་མེད། ཉེ་བའི་ལོ་ཤས་རིང་བློ་བཟང་ཉི་མས་ཡུལ་སྐོར་ཁྲོམ་རའི་དགོས་མཁོར་གཞིགས་ནས་དམིགས་ཚད་གཞན་ཞིག་ལ་དམིགས་ཏེ་བོད་རིགས་ཀྱི་ཟས་མཆོག་གསར་སྤེལ་བྱས་ཡོད།

        བཟའ་བཏུང་གཡོས་སྦྱོར་ལག་རྩལ་ཁོང་དུ་ཆུད་ཆེད་བློ་བཟང་ཉི་མ་མཉམ་འབྲེལ་གྲོང་ཚོ་ཨུ་ལྷན་གྱིས་སྒྲིག་འཛུགས་བྱས་པའི་མ་བྱན་གྱི་ཐོབ་ཐང་གསོ་སྦྱོང་ནང་ཞུགས་ནས་མ་བྱན་གྱི་ལས་རིགས་རྩལ་ནུས་ཐོབ་ཐང་ལག་ཁྱེར་ཐོབ་པ་རེད། སླར་ཡང་ས་དམ་དང་ཧུང་ཧོ། ཁྲེང་ཏུའུ་སོགས་སུ་རྟོག་ཞིབ་སོང་། ད་དུང་ཁུལ་ཞིང་ལས་དང་གྲོང་གསེབ་ཅུས་ཀྱིས་སྒྲིག་འཛུགས་བྱས་པའི་ཕྱུག་འགྱུར་སྣེ་ཁྲིད་པའི་གསོ་སྦྱོང་ནང་ཞུགས་ནས་གཡོས་སྦྱོར་ལག་རྩལ་སློབ་སྦྱོང་བྱས། དེ་རྗེས་ཁོང་གིས་རང་ཁྱིམ་གྱི་བོད་ཁང་སྤྱད་དེ་བོད་རིགས་ཀྱི་ཟས་མཆོག་རྒྱུན་འཛིན་དང་གསར་གཏོད་གཞི་གཅིག་ཏུ་འདུས་པའི་ཟ་ཁང་“ཤིན་ནུང་གྲོང་ཚོའི་ཟ་ཁང་ཆུང་ཆུང་”བཙུགས་པ་རེད། ཁོང་གིས་སྤྱི་གནོད་མེད་པའི་བཟའ་བཅའི་རྒྱུ་ཆ་ཞིབ་ཚགས་ངང་བདམས་ནས་རང་ཁྱིམ་ནས་ཐོན་པའི་སྔོ་ཚལ་དང་ཤིང་འབྲས་དང་སྒོ་ཕྱུགས། ཁྱིམ་བྱར་བརྟེན་ནས་མགྲོན་པོ་ཚོར་བོད་རིགས་ཀྱི་ཁྱད་ལྡན་ཚལ་སྣ་ཚོགས་མངོན་པར་བྱས་པ་སྟེ་བོད་བྱ་དང་། སྐམས་ཤ ལུག་ཤ བོད་ལུགས་རྒྱ་ཁོག རྩམ་པ། བེ་ཤ། རི་སྐྱེས་སྔོ་ཚལ་སོགས་གིས་མགྲོན་པོ་རྣམས་ལ་མཁོ་སྤྲོད་བྱས།

        བློ་བཟང་ཉི་མའི་“ཤིན་ནུང་གྲོང་ཚོའི་ཟ་ཁང་ཆུང་ཆུང་”གིས་མགྲོན་པོ་མང་པོའི་ཡིད་དབང་བཀུག་པ་མ་ཟད་གྲོང་མི་ཚོས་གཡོས་སྦྱོར་ལག་རྩལ་སློབ་སྦྱོང་བྱེད་པའི་སྟེགས་བུར་དེ་བས་གྱུར་ཡོད། མཐའ་འཁོར་གྱི་གྲོང་མི་མང་པོ་ཞིག་གིས་སྙན་གྲགས་ལ་ཡིད་སྨོན་བྱས་ནས་ཡོང་སྟེ་ཁོང་དང་མཉམ་དུ་གཡོས་སྦྱོར་ལག་རྩལ་སློབ་སྦྱོང་བྱེད་པ་དང་ཁོང་གིས་ཀྱང་སློབ་ཁྲིད་བྱེད་འདོད་ཡོད་པས་གྲོང་ཚོ་དེའི་དགེ་ཕྲུག་མང་པོ་ཁྲིད་པ་རེད། གྲོང་ཚོའི་ནང་དུས་སྟོན་དང་རྟེན་འབྲེལ་ཞུ་བའི་བྱེད་སྒོ་སྤེལ་སྐབས་བློ་བཟང་ཉི་མ་རྟག་ཏུ་ཚལ་བརྔོ་རུ་འགྲོ་གི་ཡོད་ལ་ཁོང་གིས་ཀྱང་ཞིམ་ཟས་ལ་བརྟེན་ནས་ཡུལ་མི་ཚོར་དགའ་སྤྲོ་དང་སྤྲོ་སྣང་སྦྱིན་འདོད་ཡོད།   

            ལོ་གསར་དང་དུས་ཆེན་གཏོང་རིམ་བཞིན་བློ་བཟང་ཉི་མས་ད་དུང་གྲོང་མི་ཚོར་རིན་མེད་ངང་ཟས་ཞིམ་པོ་བསྐྱལ་ནས་ཡུལ་མི་ཚོར་དྲོ་སྐྱིད་དང་ཐུགས་ཁུར་ཟབ་མོ་ཚོར་ཐུབ་པ་བྱས་པ་རེད། “ཤིན་ནུང་གྲོང་ཚོའི་ཟ་ཁང་ཆུང་ཆུང་”བྲེལ་བ་ཆེ་བའི་སྐབས་སུ་ཁོང་གིས་ད་དུང་གྲོང་མི་ཟ་ཁང་དུ་རོགས་རམ་བྱེད་པར་འབོད་པ་དང་འབྲེལ་དུས་ཐོག་ཏུ་གླ་ཕོགས་བསྡོམས་རྩིས་བརྒྱབ་ནས་གྲོང་མི་ཐག་ཉེ་སར་འབབ་འཕར་ཡོང་རྒྱུར་སྣེ་ཁྲིད་བྱས་པ་རེད།

        ཡུལ་སྐོར་བ་དེ་བས་མང་བ་བོད་རིགས་ཀྱི་རིག་གནས་དང་ཟས་མཆོག་ཉམས་ལེན་བྱེད་པར་ཡོང་རྒྱུའི་ཡིད་དབང་འགུག་ཆེད་བློ་བཟང་ཉི་མས་བསམ་ཕྱོགས་གསར་གཏོད་ཧུར་ཐག་བྱས་ཏེ་ཉ་རྫིང་ནས་ཉ་འཛིན་པ་དང་རྐང་བགྲོད་ཡུལ་སྐོར་བྱེད་པ་སོགས་ཀྱི་ཞབས་ཞུ་བཏོན་པ་རེད། བློ་བཟང་ཉི་མས་ད་དུང་ཕྱི་རོལ་གྱི་རྐང་བགྲོད་ཡུལ་སྐོར་བར་སྦལ་མགོ་མཚོ་ཆུང་སོགས་མཛེས་ལྗོངས་ཁུལ་དུ་འགྲོ་འོང་བྱེད་པའི་འགྲིམ་འགྲུལ་དང་དེ་བཞིན་བཟའ་བཏུང་དང་ཞག་སྡོད་ཞབས་ཞུ་མཁོ་འདོན་བྱས་ནས་མཉམ་འབྲེལ་གྲོང་ཚོའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྒུལ་ཤུགས་གསར་པ་བསྣན་ཡོད།