ཁུལ་སྲིད་གཞུང་གི་རྒྱུན་ལས་ཚོགས་འདུ་ཐེངས་58་པ་འཚོགས་པ།

རྩོམ་པ་པོ།     ཡིག་བསྒྱུར།       དུས་ཚོད།   2024-08-29   རྩོམ་ཁུངས།    སེམས་ཀྱི་ཉི་ཟླ་བོད་ཡིག་དྲ་བ།

    སེམས་ཀྱི་ཉི་ཟླ་བོད་ཡིག་དྲ་བའི་འཕྲིན།ཟླ་8ཚེས་28ཉིན་གྱི་ཕྱི་དྲོར།ཁུལ་དཔོན་ཀྲང་ཝེ་ཏུང་གིས་ཁུལ་སྲིད་གཞུང་གི་རྒྱུན་ལས་ཚོགས་འདུ་ཐེངས་58པ་གཙོ་སྐྱོང་གནང་ཞིང་འཚོགས་པ་རེད།ཚོགས་འདུའི་ཐོག་ཉེ་དུས་འཚོགས་པའི་ཀྲུང་དབྱང་ཆབ་སྲིད་ཅུས་ཀྱི་ཚོགས་འདུའི་དགོངས་དོན་དང་།《མཛེས་སྡུག་ལྡན་པའི་ཡུན་ནན་འཛུགས་སྐྲུན་ལ་ཕྱོགས་ཡོངས་ནས་སྐུལ་འདེད་གཏོང་རྒྱུའི་སྐོར་གྱི་ཀྲུང་གུང་ཡུན་ནན་ཞིང་ཨུ་དང་ཡུན་ནན་ཞིང་ཆེན་མི་དམངས་སྲིད་གཞུང་གི་ལག་བསྟར་བསམ་འཆར》བརྒྱུད་བསྒྲགས་དང་སློབ་སྦྱོང་བྱས་པ་མ་ཟད། རང་ཁུལ་གྱི་ལག་བསྟར་དོན་འཁྱོལ་གྱི་བསམ་འཆར་ལ་ཞིབ་འཇུག་བྱས་པ་རེད།

    ཚོགས་འདུའི་ཐོག་ནན་གྱིས་བསྟན་དོན།ནུབ་རྒྱུད་གསར་སྤེལ་ཆེན་པོ་ནི་ཏང་ཀྲུང་དབྱང་གིས་བཏོན་པའི་འཐབ་ཇུས་བཀོད་སྒྲིག་གལ་ཆེན་ཞིག་ཡིན་ཞིང་། ཁུལ་ཡོངས་ཀྱི་རིམ་པ་ཁག་དང་སྡེ་ཁག་སོ་སོས་ཐོག་མཐའ་བར་གསུམ་དུ་ཀྲུང་དབྱང་གི་སྲིད་ཇུས་དང་བྱེད་ཐབས་དོན་འཁྱོལ་བྱེད་པ་དང་།“གནང་བ་གསུམ་དང་ཕན་པ་གཅིག”གི་རྩ་དོན་གལ་ཆེན་རྒྱུན་འཁྱོངས་བྱས་ཏེ།“དོན་ཆེན་བཞི”ལེགས་པར་བསྒྲུབ་དགོས། གོ་སྐབས་དམ་འཛིན་བྱས་ཏེ་ཁྱད་ལྡན་ལེགས་ཆའི་ཐོན་ལས་འཕེལ་རྒྱས་དང་སྟོབས་ཆེར་གཏོང་རྒྱུ་དེ་གཙོ་རྒོལ་ཁ་ཕྱོགས་སུ་བརྩིས་ནས་ཁུལ་ཡོངས་ཀྱི་རིག་གནས་ཡུལ་སྐོར་ཐོན་ལས་སྤུས་ཚད་མཐོ་བའི་འཕེལ་རྒྱས་དང་ས་མཐོའི་ཁྱད་ལྡན་ཞིང་ལས་ཕྱོགས་སྒྱུར་རིམ་སྤོར་དང་ལྗང་མདོག་ནུས་རྒྱུ་དང་ལྗང་མདོག་གཏེར་ལས་སྐྱོན་བྲལ་ངང་འཕེལ་རྒྱས་འགྲོ་རྒྱུར་མགྱོགས་མྱུར་སྐུལ་འདེད་གཏོང་དགོས།གྲོང་ཁྱེར་དང་གྲོང་རྡལ་ཅན་གསར་པ་དང་གྲོང་གསེབ་ཁྱོན་ཡོངས་ནས་དར་རྒྱས་ཡོང་བར་སྐུལ་འདེད་གཏོང་རྒྱུ་ཟུང་འབྲེལ་བྱས་ཏེ་“ཁྲི་སྟོང་ལས་གྲྭའི”ཉམས་མྱོང་སློབ་སྦྱོང་དང་བེད་སྤྱོད་ཡག་པོ་བྱས་ནས་གྲོང་ཁྱེར་དང་གྲོང་གསེབ་ཀྱི་རྨང་གཞིའི་སྒྲིག་བཀོད་རིམ་སྤོར་ལ་སྐུལ་འདེད་གཏོང་དགོས། ཆུ་ཚད་མཐོ་བའི་སྲུང་སྐྱོང་གིས་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་བྱ་རྒྱུ་མཐའ་འཁྱོངས་དང་ལྗང་མདོག་འཕེལ་རྒྱས་ཀྱི་ལམ་བུའི་ཐོག་བསྐྱོད་རྒྱུ་མཐའ་འཁྱོངས་བྱས་ཏེ་སྣོད་བཅུད་བདེ་འཇགས་ཀྱི་མཐའ་ཚད་བརྟན་པོ་སྲུང་དགོས།རྒྱལ་ཁབ་དང་ཞིང་ཆེན་གྱི་འཕེལ་རྒྱས་འཐབ་ཇུས་ནང་རང་འགུལ་ངང་མཉམ་འདྲེས་ཐུབ་པ་བྱས་ཏེ་ཕྱི་ཕྱོགས་དང་ནང་ཁུལ་དུ་སྒོ་དབྱེ་མཉམ་ལས་བྱེད་ཤུགས་ཆེ་རུ་བཏང་ནས་ཕྱི་ཤུགས་ལ་བརྟེན་པ་ནས་མཉམ་ལས་མཉམ་ཁེའི་བར་འགྱུར་ལྡོག་ཡོང་བ་བྱེད་དགོས།

    ཚོགས་འདུའི་ཐོག་ནན་གྱིས་བསྟན་དོན།མཛེས་སྡུག་ལྡན་པའི་ཡུན་ནན་འཛུགས་སྐྲུན་བྱེད་རིང་བདེ་ཆེན་གྱི་ནུས་པ་འདོན་སྤེལ་ཡག་པོ་བྱས་ནས་མཛེས་སྡུག་ལྡན་པའི་བདེ་ཆེན་གྱི་ལག་ལེན་ལ་སྐུལ་འདེད་ཏན་ཏིག་གཏོང་དགོས། བྱ་སྤྱོད་མགྱོགས་མྱུར་སྤེལ་ནས་ཚད་གཞི་དེ་བས་མཐོ་བའི་སྒོ་ནས་ལས་དོན་ཡག་པོ་སྒྲུབ་པ་དང་སྲིད་ཇུས་ཀྱི་གོ་སྐབས་དམ་འཛིན་བྱས་ཏེ་རང་ཁུལ་གྱི་བཙོག་ཆུ་གཙང་སེལ་དང་།གད་སྙིགས་གཙང་སེལ།ཞིང་ལས་ཁ་གཏིང་གཉིས་ཀྱི་སྦགས་བཙོག་བཅོས་སྐྱོང་སོགས་ཐད་ཀྱི་ཞན་ཆ་གསབ་དགོས། ཀྲུང་དབྱང་གི་སྐྱེ་ཁམས་ཁོར་ཡུག་སྲུང་སྐྱོང་ལྟ་ཞིབ་ཀྱི་ཚུར་ལན་གནད་དོན་དག་ཐེར་ཡོ་བསྲང་བྱེད་པར་རྒྱུན་མཐུད་ངང་སྐུལ་འདེད་གཏོང་བ། གཅིག་ཤེས་ཀུན་གྲོལ་གྱིས་གནད་དོན་གཅིག་དག་ཐེར་ཡོ་བསྲང་དང་།གནད་དོན་རིགས་གཅིག་ཐག་གཅོད།ལམ་སྲོལ་ཁག་ཅིག་འཐུས་ཚང་དུ་གཏོང་བ། ཁྱབ་ཁོངས་གཅིག་ཚད་ལྡན་དུ་གཏོང་བ་བཅས་ལ་སྐུལ་འདེད་བཏང་སྟེ།སྐྱེ་ཁམས་སྲུང་སྐྱོང་རྒྱུན་ལྡན་ཅན་དང་ཡུན་ཕན་ཅན་དུ་འགྱུར་བར་བྱ་དགོས།

    ཚོགས་འདུའི་ཐོག་ད་དུང་《བདེ་ཆེན་བོད་རིགས་རང་སྐྱོང་ཁུལ་གྱི་གྲོང་ཁྱེར་དང་གྲོང་རྡལ་ཅན་གསར་པའི་འཆར་འགོད་(2024—2035)ཞིབ་བཤེར་བྱ་རྒྱུར་བསྐྱལ་བའི་མ་ཟིན》ལ་ཞིབ་འཇུག་བྱས་ནས་མི་རྩ་བར་འཛིན་པའི་གྲོང་ཁྱེར་དང་གྲོང་རྡལ་ཅན་གསར་པའི་འཐབ་ཇུས་ལག་བསྟར་གཏིང་ཟབ་བྱེད་པ་དང་།ཆོས་ཉིད་ལ་བརྩི་སྲུང་དང་།རིགས་དབྱེ་ཇུས་འདོན།ལེགས་བསྡུས་ཞིབ་གཉེར་དང་ལས་ཆོད་ཆེ་བ་བཅས་མཐའ་འཁྱོངས་བྱས་ནས་མི་དམངས་ཀྱི་ཉིན་བཞིན་ཆེ་རུ་འགྲོ་བའི་མཛེས་སྡུག་ལྡན་པའི་འཚོ་བའི་དགོས་མཁོ་རྒྱུན་ཆད་མེད་པར་སྐོང་བ་དང་།རང་ཁུལ་གྱི་གྲོང་ཁྱེར་དང་གྲོང་རྡལ་ཅན་དུ་འགྱུར་བའི་སྤུས་ཚད་དང་ཆུ་ཚད་བརྟན་པོའི་ངང་མཐོ་རུ་གཏོང་དགོས།

ཁུལ་གྱི་འགོ་ཁྲིད་དབྱང་ཞུའེ་ཝུན་དང་།ཧུའུ་ཧྥེ་ཞུང་།ལིའོ་ཝུན་ཚའེ།ལི་ཐའོ་།པའོ་ཡུས་ཏུང་།ཧོང་ལུང་ཞིན།ཀྲོང་ཞའོ་ཕིན་བཅས་ཚོགས་འདུར་ཞུགས་པ་རེད།


分享到：QQ空间新浪微博腾讯微博人人网微信