གླེགས་བམ་ཆུ་གཤར་འདབས་ལ་གོམ་བགྲོད་བྱེད་པའི་སྤྲོ་སྣང་།

རྩོམ་པ་པོ།     ཡིག་བསྒྱུར།       དུས་ཚོད།   2024-09-19   རྩོམ་ཁུངས།    སེམས་ཀྱི་ཉི་ཟླ་བོད་ཡིག་དྲ་བ།


        རང་བྱུང་ཁམས་དང་ཉེ་བར་བཅར་བ་ནི་དེང་སང་མི་མང་བོས་ཆེས་རེ་སྙེག་དང་དགའ་མོས་བྱེད་པའི་འཚོ་བའི་རྣམ་པ་ཞིག་ཏུ་གྱུར་ཡོད།ཏག་ཏག་བར་འདིར་ཟླ་མཆོད་དུས་ཆེན་གྱི་སྐབས་ལ་འཁེལ་ཡོད་པས་ས་གནས་ཀྱི་གྲོང་མི་མང་པོ་ཞིག་གིས་གུང་གསེང་གི་དུས་ཚོད་བེད་སྤྱད་ནས་ཁ་བ་དཀར་པོའི་གླེགས་བམ་ཆུ་གཤར་དུ་གོམ་བསྐྱོད་བྱས་ཡོད་ཅིང་།   དེ་མིན་ས་གནས་སོ་སོ་ནས་ཡོང་བའི་ཡུལ་སྐོར་བའང་མི་ཉུང་བ་ཞིག་འདུས་ཡོད།   རྫ་ཆུའི་འགྲམ་ངོགས་དང་ཐག་མི་རུང་བའི་རི་འདབས་ཀྱི་འཁོར་བཞག་ཐང་དུ་རླངས་འཁོར་ཆེ་མ་ཆུང་གསུམ་གྱིས་བཀང་འདུག   
        ཀྱག་ཀྱོག་གི་རི་ལམ་བརྒྱུད་ནས་གླེགས་བམ་ཆུ་གཤར་གྱི་ཕྱོགས་སུ་བསྐྱོད་པ་ན།མིག་ལ་མཛེས་ཤིང་ཡིད་གར་འོང་བའི་མཛེས་ལྗོངས་དུ་མ་ཞིག་ཁྱེད་ཀྱི་མིག་ལམ་དུ་མངོན་ཡོང་།   ནམ་མཁའ་སྔོ་ཞིང་དྭངས།  འཇམ་མཉེན་གྱི་ཉི་འོད་ཕྱོགས་རིས་མེད་པར་ཡུལ་ལུང་ཀུན་དུ་ཤར། ཤིང་སྣ་མི་གཅིག་བརྒྱ་དང་བརྒྱད་ཀྱིས་གྲུབ་པའི་གདོད་མའི་ནགས་ཀླུང་གིས་ཕྱོགས་བཞིའི་མུ་ཁྱུད་ཡོངས་སུ་བསྐོར།  བྱ་དང་བྱིའུས་འཕུར་ལྡིང་གར་གྱི་རྩེད་མོ་རྩེ་ཞིང་སྐད་སྙན་སྣ་ཚོགས་སྒྲོག ཕྱོགས་དང་ཕྱོགས་ན་རྫ་རིའི་ཆུ་ཕྲན་ལྷང་ལྷུང་དུ་འབབ་ཞིང་སྐྱེ་འགྲོའི་སྐོམ་གདུང་སེལ། མ་བཅོས་ལྷུན་གྱིས་གྲུབ་པའི་རང་བྱུང་ཁམས་ཀྱི་བྲོ་བ་ཞིག་རང་བཞིན་གྱིས་ཁྱེད་ཀྱི་སྣ་ལམ་དུ་འཐུ་ཡོང་བ་ན།  དེ་དུས་ཁྱོད་ཀྱིས་རང་བྱུང་ཁམས་སུ་འགྲིམས་པའི་བདེ་སྣང་དེ་གཞི་ནས་མྱོང་ཚོར་བྱེད་ཐུབ།     རང་བྱུང་ཁམས་ལ་བཅར་བ་ནི་མཁའ་དབུགས་གཙང་མ་ཞིག་རྔུབ་པའམ།  ཡུལ་ལྗོངས་ཙལ་ལ་བལྟ་བ། ཡང་ན་གོམ་བགྲོད་དང་ལྷིང་འཇགས་ཁོ་ན་ཙམ་བཙལ་བའི་ཕྱིར་མིན་པར། མཚམས་ལ་རེར་ང་ཚོ་རང་ཉིད་ཀྱི་གོམས་གཤིས་སུ་ཆགས་པའི་གནས་བབ་ལས་ཚད་བརྒལ་ཐེངས་གཅིག་བྱེད་དགོས།  རང་བྱུང་ཁམས་ཆེན་པོའི་པང་བ་ནས་ང་ཚོས་རང་ཉིད་ལ་ངོས་འཛིན་དང་།  ཡང་ན་ལྷིང་འཇགས་ཀྱི་ཁྲོད་ནས་བསམ་གཞིགས་ཞིབ་མོ་ཞིག་གཏོང་ཐུབ་ཀྱི་ཡོད།  གོམ་བགྲོད་ཀྱི་གོ་རིམ་ཁྲོད་ནས་ལུས་སེམས་གཉིས་ཆར་ལ་ཕན་ཐོགས་འབྱུང་བཞིན་པ་ཚན་རིག་གིས་བདེན་དཔང་བྱས་ཡོད།  
        དེང་སང་མི་རྣམས་ཀྱི་འཚོ་བའི་ཆུ་ཚད་ཇེ་བཟང་དུ་སོང་བ་དང་བསྟུན་ནས།གུང་གསེང་གཏོང་བའི་གདམ་གསེས་ཀྱང་ཇེ་མང་དུ་སོང་ཡོད་པ་དང་།    འགྲིམ་འགྲུལ་གྱི་ཆ་རྐྱེན་ཡང་ཇེ་བཟང་དུ་སོང་ཡོད།    སྔར་ཡིན་ན་གདོད་མའི་ནགས་འདབས་དང་རྫ་རྐེད་སོགས་སུའང་བགྲོད་པར་རྟ་དྲེལ་དང་རྐང་ཐང་དུ་ཉིན་ཞག་གཉིས་གསུམ་ལ་བསྐྱོད་དགོས་ཀྱང་།   དེང་སང་ཐད་ཀར་དུ་སྣུམ་ལམ་བཟོས་ཡོད་པས།  འགྲོ་འདུག་དང་ཟ་འཐུང་གང་གི་ཐད་ནས་ཀྱང་སྔར་དང་བསྡུར་ན་ཤིན་ཏུ་སྟབས་བདེ་བོ་འདུག་ལ་མགྱོགས་པོར་སོང་ན་ཉིན་མ་གཅིག་གིས་ཆོག  གླེགས་བམ་གྲོང་ཚོ་སྟོད་སྨད་གཉིས་སུ་དེང་རབས་ཀྱི་ཁྱད་ཆོས་ལྡན་པའི་མགྲོན་ཁང་དང་ཟས་སྣ་མང་པོའི་ཟ་ཁང་མང་པོ་ཕྱེས་ཡོད་ལ། ང་རང་ཞག་སྡོག་བྱེད་སའི་མགྲོན་ཁང་གི་བདག་པོ་ནི་ས་གནས་རང་གི་བོད་རིགས་བཟའ་ཟླ་གཉིས་རེད།  ཉིན་གོང་བོར་ཁོང་གཉིས་ཀྱིས་མགྲོན་པོ་སྣེ་ལེན་དང་ཟན་བཟོ་བ།   ཁང་བའི་ཕྱི་ནང་ལ་གར་བདར་བྱེད་པ་སོགས་བྲེལ་བ་ཤིན་ཏུ་ཆེ་ཞིང་། རང་ཉིད་ཀྱི་ལག་ཟུང་དྲོན་མོའི་བརྩོན་འགྲུས་ལ་བརྟེན་ནས་ཡོང་འབབ་འཚོལ་བཞིན་འདུག     ཟན་ཟོས་རྗེས་ས་རུབ་ལ་ཉེ།  གྲོང་མཐའ་ལ་འཆམ་འཆམ་དུ་ཕྱིན་པ་ན།     རྒྱབ་ལ་ཁུག་མ་འཁུར། ལག་ལ་འཁར་བ་བཟུང་།  ལུས་ལ་རྔུལ་ཆུ་བཞུར། གདོང་ལ་འཛུམ་དང་སྤོབས་པའི་ཁེངས་པའི་རྐང་བཞུད་པ་རེ་འགས་རྐང་ལམ་ཕྲ་མོ་རྡོག་པས་མནན་ཏེ་ཟླ་བའི་འོད་སྣང་ལ་བརྟེན་ནས་གླེགས་བམ་གྲོང་ཚོའི་ཕྱོགས་སུ་ཡོང་བཞིན་པ་མཐོང་བྱུང་།    
分享到：QQ空间新浪微博腾讯微博人人网微信