སྙིང་རྩ་འགག་པའི་ནད་ཀྱི་མྱུར་སྐྱོབ་ཤེས་བྱ།

    རྒྱལ་ཁབ་འཕྲོད་བསྟེན་བདེ་ཐང་ཨུ་ཡོན་ལྷན་ཁང་གིས་བསྒྲགས་པའི་གཞི་གྲངས་ལས་མངོན་པ་ལྟར་ན། རང་རྒྱལ་དུ་ལོ་རེར་གློ་བུར་དོས་དྲག་ཅན་གྱི་སྙིང་རྩ་འགག་པའི་ནད་བྱུང་བའི་མི་གྲངས་ཁྲི100ཙམ་ཡོད་ལ། དེའི་ནང་ནད་པ3རེའི་ནང་ནས་མི1རྐྱེན་ལམ་དུ་ཤོར་བ་དང་། ཤི་ཚད་བཅུ་ཆའི་གསུམ་ལས་བརྒལ་ཡོད།

    སྙིང་རྩ་འགག་པའི་ནད་ཀྱི་རྒྱུན་མཐོང་འབྱུང་རྐྱེན།

    འགུལ་སྐྱོད་དྲག་པོ་བྱེད་པ་དང་ཐང་ཆད་དྲགས་པ། བཟའ་བཏུང་ཚད་ལས་བརྒལ་བ། ཆང་བག་མེད་དུ་འཐུང་བ། སེམས་ཁམས་ལ་གཡོ་འགུལ་བྱུང་བ། གནམ་གཤིས་འགྱུར་ལྡོག་ཆེ་བ་སོགས་ཡིན།

    སྙིང་རྩ་འགག་པའི་ནད་ཀྱི་དཔེ་མཚོན་ནད་རྟགས།སྙིང་རྩ་འགག་པ་ནི་སྙིང་ལ་ཁྲག་མཁོ་འདོན་བྱེད་པའི་ཁྲག་རྩ་དོག་པའམ་འགག་པའི་དབང་གིས་སྙིང་གི་ཤ་གྲིམ་ལ་ཁྲག་ཆད་པ་དང་ཤི་འདྲུལ་བྱུང་བ་ཡིན་པས། དེར་དཔེ་མཚོན་གྱི་ནད་རྟགས་སྐོར་ཞིག་ཡོད་དེ།

    གཅིག  ན་ཟུག་ལངས་པ། བརྒྱ་ཆའི་བདུན་ཅུར་ཉེ་བའི་མངོན་ཚུལ་ནི་བྲང་ཁ་ན་བ་དང་རྔུལ་ནག་མང་པོ་འདོན་པ་དེ་ཡིན།

    གཉིས། ན་ཡུན་རིང་བ། སྙིང་རྩ་འགག་ནས་བྲང་ཁ་ན་བའི་དུས་ཡུན་ཅུང་རིང་ཞིང་། མང་ཆེ་བ་སྐར་མ20ལས་བརྒལ་བ་དང་། ན་ཟུག་རང་བཞིན་གྱིས་འཇགས་མི་ཐུབ།

    གསུམ། སྙིང་རྩ་འགག་ཚབས་ཆེ་ན་ཁྲག་ཤེད་ཇེ་དམའ་རུ་འགྲོ་བ་དང་། རིག་པ་མི་གསལ་བར་འགྱུར་བ། མགོ་ཡུ་འཁོར་ནས་འགྱེལ་བ། གཅིན་པ་འཕྲལ་མར་ཇེ་ཉུང་དུ་འགྲོ་བ་སོགས་ཀྱི་ནད་རྟགས་ཐོན་སྲིད།

    སྙིང་རྩ་འགག་པའི་ནད་འབྱུང་དུས་ཇི་ལྟར་བྱ་དགོས་སམ།

    གོང་གསལ་གྱི་ནད་རྟགས་ཐོན་ཚེ། མྱུར་དུ་རིག་ཚན་མང་པོའི་སྨན་བཅོས་ནུས་པ་ལྡན་པའི་ཚད་ལྡན་སྨན་ཁང་དུ་ཕྱིན་ནས། དོས་དྲག་ཅན་གྱི་སྙིང་རྩ་འགག་པའི་ནད་འབྱུང་སྲིད་པའི་ཉེན་ཁ་དུས་ཐོག་ཏུ་བསལ་དགོས། གལ་ཏེ་གློ་བུར་སྙིང་རྩ་འགག་ཚེ་གཤམ་གྱི་མྱུར་སྐྱོབ་མན་ངག་གསུམ་ཡིད་ལ་གཟུང་དགོས།

    གཅིག སེམས་རྣལ་དུ་ཕབ་སྟེ་རོགས་སྐྱོབ་ལ་བསྒུག་དགོས།

    ནད་པ་ཉལ་དུ་འཇུག་པ་དང་། ཟང་ཟིང་མི་བྱེད་པ། ཁང་པའི་ནང་གི་སྒེའུ་ཁུང་ཕྱེ་ནས་ནད་པར་དབྱང་རླུང་འདང་ངེས་རྔུབ་ཏུ་གཞུག་དགོས། གལ་ཏེ་ནད་པར་སྙིང་གློ་བུར་དུ་ལྡིང་མཚམས་བཞག་པའི་གནས་ཚུལ་ཐོན་ན། དུས་ཐོག་ཏུ་གློ་སྙིང་སླར་གསོ་བྱ་དགོས།

    གཉིས། དུས་ཐོག་ཏུ་མྱུར་སྐྱོབ་ཁ་པར་བརྒྱག་དགོས།

    སྙིང་རྩ་འགག་པའི་ནད་པར་ནད་བྱུང་རྗེས་ཀྱི་སྐར་མ120ཡི་ནང་དུ་སྐྱོབ་བཅོས་བྱ་རྒྱུ་ནི་ཤིན་ཏུ་གལ་ཆེན་པོ་ཡིན་པས། དུས་ཐོག་ཏུ་མྱུར་སྐྱོབ་ཁ་པར་བརྒྱག་དགོས། གཟབ་དགོས་པ་ཞིག་ལ་ནད་པ་གཅིག་པུ་སྨན་ཁང་དུ་གཏན་ནས་འགྲོ་རུ་འཇུག་མི་རུང་། གལ་ཏེ་ལམ་བར་ནས་གློ་བུར་དུ་ནད་གཞི་ཇེ་སྡུག་ཏུ་ཕྱིན་པའམ་ཐོལ་གྱིས་ཤི་བའི་གནས་ཚུལ་ཐོན་ན། འཕྲལ་མར་སྐྱོབ་བཅོས་བྱ་མི་ཐུབ།

    གསུམ། མྱུར་མོར་གཤགས་བཅོས་བྱ་དགོས།

    སྨན་བཅོས་མི་སྣ་ཐོན་རྗེས། སྨན་བཅོས་མི་སྣར་གཞོགས་འདེགས་ཡག་པོ་བྱ་དགོས། གལ་ཏེ་སྙིང་རྩ་འགག་ཡོད་པ་གཏན་འཁེལ་བྱས་ཚེ་མྱུར་མོར་གཤགས་བཅོས་བྱ་དགོས། སྙིང་རྩ་འགག་པའི་སྐབས་སུ། པྲོག་དབྱིབས་འཕར་རྩའི་རིང་སྣེ་འགག་པའི་སྙིང་ཤའི་ཕྲ་ཕུང་ལ་ཁྲག་དང་དབྱང་རླུང་མཁོ་སྤྲོད་བྱེད་མི་ཐུབ། སྐར་མ20ལས་བརྒལ་ན། སྙིང་ཤ་ཤི་འདྲུལ་འབྱུང་སྲིད། ཤི་འདྲུལ་རྒྱ་ཁྱོན་ཇི་ལྟར་ཆེ་ན་ཤི་ཚད་དེ་ལྟར་མཐོ་བ་རེད། །