རྨི་ལམ་ངན་པ་རྨིས་ན་ཇི་ལྟར་བྱེད་དགོས།

    དགོང་མོར་རྨི་ལམ་རྨིས་རྒྱུ་མང་དྲགས་པ་དེ། གཟུགས་པོར་ན་ཚ་ཡོད་པའི་སྔ་ལྟས་ཡིན་ནམ་ཞེ་ན། མི་ཞིག་བདེ་ཐང་ཡིན་མིན་དང་། གཉིད་ཀྱི་སྤུས་ཚད་ཡག་པོ་ཡོད་མེད་དེ། རྨི་ལམ་རྨིས་ཡོད་མེད་དང་འབྲེལ་བ་མེད་ལ།  རྨི་ལམ་མང་ཉུང་དང་ཡང་འབྲེལ་བ་མེད་པ་རེད།

    རྨི་ལམ་རྨིས་པ་ནི་གཉིད་ལོག་པའི་གོ་རིམ་ཁྲོད་ཀྱི་རྒྱུན་ལྡན་གྱི་སྣང་ཚུལ་ཞིག་ཡིན་ལ། དེ་ནི་གཉིད་ལོག་པའི་གོ་རིམ་ཁ་ཤས་སུ་ཀླད་ཆེན་གྱི་འགུལ་སྐྱོད་བྱེད་སྟངས་ཤིག་ཡིན། མི་ཚང་མས་མཚན་མོ་རེ་ལ་གཉིད་ལོག་པའི་དུས་འཁོར་མང་པོ་ཞིག་བརྒྱུད་དགོས། མཚན་མོ་ཧྲིལ་བོའི་གཉིད་ལོག་པའི་སྐབས་སུ། མི་མང་ཆེ་བས་རྨི་ལམ་མང་པོ་རྨིས་སྲིད་མོད། འོན་ཀྱང་རྨི་ལམ་ཡོད་ཚད་ཡིད་ལ་འཛིན་ཐུབ་པ་ཞིག་མིན།     དེར་བརྟེན། རྨི་ལམ་རྨི་བ་རང་ཉིད་ནི་རྒྱུན་ལྡན་གྱི་སྐྱེ་ཁམས་སྣང་ཚུལ་ཞིག་ཡིན་མོད། གལ་ཏེ་རྒྱུན་དུ་རྨི་ལམ་ངན་པ་རྨིས་པའམ(སྐྲག་ནས་གཉིད་སད་པའི་རིགས་ལྟ་བུ)ཡང་ན་རྨི་ལམ་ངན་པ་མིན་ནའང་ཉིན་མོར་འཚོ་བ་དང་ལས་ཀར་ཤུགས་རྐྱེན་མངོན་གསལ་ཐེབས་པའི་ཚོར་བ་བྱུང་ན།  ཆེད་ལས་མི་སྣ་བཙལ་ནས་དུས་ཐོག་ཏུ་སྨན་བཅོས་བྱ་དགོས།