“དུས་རབས་གསར་པ·བདེ་ཆེན་གསར་པ” བདེ་ཆེན་ཁུལ་གྱི་སྤུས་ཚད་མཐོ་བའི་འཕེལ་རྒྱས་ཀྱི་སྨྱན་སྦྱོར་ཡོངས་ཀྱི་བཅར་འདྲིའི་བྱེད་སྒོ་སྤེལ་འགོ་ཚུགས་པ།

    ཟླ་9པའི་ཚེས་25ཉིན་ཁུལ་ཨུའི་དྲིལ་བསྒྲགས་པུའུ་དང་ཡུན་ནན་ཉིན་རེའི་ཚགས་པར་ཚགས་པར་ལས་རིགས་ཚོགས་པས་མཉམ་དུ་གཉེར་བའི“དུས་རབས་གསར་པ·བདེ་ཆེན་གསར་པ”བདེ་ཆེན་ཁུལ་གྱིས་སྤུས་ཚད་མཐོ་བོའི་འཕེལ་རྒྱས་ཀྱི་སྨྱན་སྦྱོར་ཡོངས་ཀྱི་བཅར་འདྲིའི་བྱེད་སྒོ་སྤེལ་འགོ་ཚུགས་པ་རེད།  

    ཡུན་ནན་ཉིན་རེའི་ཚགས་པར་ཚགས་པར་ལས་རིགས་ཚོགས་པའི་ཏང་ཨུའི་ཧྲུའུ་ཅི་དང་ཧྲེ་ཀྲང་ཧོ་ཙུའུ་ཁུན་དང་། ཁུལ་ཨུའི་རྒྱུན་ཨུའམ་ཁུལ་ཨུ་རྩ་འཛུགས་པུའུ་ཡི་པུའུ་ཀྲང་ལི་དབྱང་འགོ་ཚུགས་མཛད་སྒོར་ཕེབས་ཡོད་པ་རེད།

 ཧོ་ཙུའུ་ཁུན་གྱིས་བདེ་ཆེན་ནི་དད་གུས་དང་ཡིད་སྨོན་བྱེད་སའི་གནས་མཆོག་ཅིག་ཡིན་པས། ད་ཐེངས་ཀྱི་བཅར་འདྲིའི་བྱེད་སྒོའི་ནང་ཞུགས་མཁན་སྨྱན་སྦྱོར་གྱི་གསར་འགོད་པ་ཁག་གི་རྐང་ཤུགས་དང་། མིག་ཤེས། ཀླད་ཤུགས། པིར་ཤུགས་བཅས་རྒྱུན་ཆད་མེད་པར་ཆེ་རུ་བཏང་སྟེ་ལག་ནང་གི་པར་ཆས་ལ་བརྟེན་ནས་དུས་རབས་གསར་པའི་བདེ་ཆེན་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ཚ་ཚ་འུར་འུར་གྱི་ལག་ལེན་ལ་དམིགས་པ་དང་། ཁུལ་ཡོངས་ཀྱི་གོང་འོག་ཚང་མའི་དར་རྒྱས་འཕེལ་རྒྱས་མགྱོགས་སུ་གཏོང་བའི་འགྱུར་ལྡོག་ལ་དམིགས་པ། བདེ་ཆེན་གྱི་མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བའི་དུས་རབས་ཀྱི་ཉམས་འགྱུར་ལ་དམིགས་པ། བརྩེ་སེམས་ལ་བརྟེན་ནས་བདེ་ཆེན་གྱི་འཕེལ་རྒྱས་དང་འགྱུར་ལྡོག་ཐོ་འགོད་བཅས་བྱ་རྒྱུའི་རེ་བ་ཡོད་ཅེས་བཤད་པ་རེད།  ཡུན་ནན་ཉིན་རེའི་ཚགས་པར་ཚགས་པར་ལས་རིགས་ཚོགས་པས་སྨྱན་སྦྱོར་མཉམ་འདྲེས་ཀྱི་ལེགས་ཆ་འདོན་སྤེལ་གང་ལེགས་བྱས་ཏེ་བདེ་ཆེན་ཉིན་རེའི་ཚགས་པར་ཁང་དང་། བདེ་ཆེན་ཁུལ་རྒྱང་སྒྲོག་བརྙན་འཕྲིན་ཁང་། རྫོང(གྲོང་ཁྱེར)གསུམ་གྱི་སྨྱན་སྦྱོར་མཉམ་འདྲེས་ལྟེ་གནས་བཅས་ཀྱི་གསར་འགོད་པ་དང་མཉམ་དུ་བཅར་འདྲི་ཚོགས་པ་བཙུགས་ཏེ་བདེ་ཆེན་གྱི་རྫོང(གྲོང་ཁྱེར)གསུམ་དུ་བཅར་འདྲི་བྱེད་པར་བསྐྱོད་དེ་ཁྱོན་ཡོངས་དང་། ཐབས་ལམ་མང་པོ། འབུར་གཟུགས་ཅན་བཅས་ཀྱི་སྨྱན་སྦྱོར་མཉམ་འདྲེས་ཐོག་ནས་དྲིལ་བསྒྲགས་ཡག་པོ་བྱས་ཏེ་དྲིལ་བསྒྲགས་ཀྱི་མཉམ་ཤུགས་ཆེན་པོ་ཞིག་ཆགས་པ་བྱེད་པ་དང་སྨྱན་སྦྱོར་གཙོ་བོའི་ཁྱབ་སྤེལ་ནུས་པ་དང་། ཁྲིད་སྟོན་ནུས་པ། ཤུགས་རྐྱེན་ནུས་པ། ཀུན་གྱིས་ཡིད་ཆེས་བྱེད་ཚད་བཅས་འདོན་སྤེལ་གང་ལེགས་བྱས་ནས་ཞིང་ཆེན་ཡོངས་དང་ཐ་ན་རྒྱལ་ཡོངས་ཀྱི་ཁྱབ་ཁོངས་ནང་བདེ་ཆེན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཕན་འབྲས་སྔར་བས་འོས་སྦྱོར་བྱས་ཏེ་ཕྱི་ཕྱོགས་སུ་བདེ་ཆེན་གྱི་གཟུགས་བརྙན་བཟང་པོ་བཏོད་དེ་བདེ་ཆེན་གྱི་སྤུས་ཚད་མཐོ་བའི་མཆོང་སྐྱོད་ལྟ་བུའི་འཕེལ་རྒྱས་ལ་སྐུལ་འདེད་གཏོང་རྒྱུ་ཡིན་ཞེས་བསྟན་ཡོད།

    ལི་དབྱང་གིས་ཡུན་ནན་ཉིན་རེའི་ཚགས་པར་ཚགས་པར་ལས་རིགས་ཚོགས་པས་དུས་ཡུན་རིང་པོའི་ནང་བདེ་ཆེན་ལ་སེམས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་རེད།  ཁོང་གིས་ཡུན་ནན་ཉིན་རེའི་ཚགས་པར་ཚགས་པར་ལས་རིགས་ཚོགས་པའི་བཅར་འདྲི་ཚོགས་པ་བདེ་ཆེན་དུ་བསྐྱོད་ནས་བདེ་ཆེན་དང་ཉེ་བཅར་བྱེད་པ་དང་། བདེ་ཆེན་གྱི་རང་བྱུང་མཛེས་ལྗོངས་དང་མཛེས་སྡུག་ལྡན་པའི་མི་རིགས་ཀྱི་རིག་གནས་ཉམས་སུ་མྱོང་བ། བདེ་ཆེན་གྱི་མི་རིགས་ཁག་གི་བུ་ཕྲུག་མཐུན་སྒྲིལ་རོགས་རེས་དང་གསར་འབྱེད་ཡར་བརྩོན་གྱི་བསམ་པའི་ཉམས་འགྱུར་ཚོར་བ། བདེ་ཆེན་གྱི་དཔལ་འབྱོར་དང་སྤྱི་ཚོགས་དབྱར་མཚོ་རྒྱས་པ་ལྟར་གོང་འཕེལ་དང་ཉིན་རེ་བཞིན་རྣམ་པ་གསར་པ་ཐོན་པའི་གྲོང་ཁྱེར་དང་གྲོང་གསེབ་ཀྱི་འགྱུར་ལྡོག་བདེན་དཔང་བཅས་བྱ་རྒྱུ་མ་ཟད། ད་དུང་དྲིལ་བསྒྲགས་དང་འོས་སྦྱོར་ཡག་པོ་བྱེད་པའི་དཔང་པོ་ཡང་བྱ་རྒྱུ་ཡིན་ཞེས་བཤད་པ་རེད།  གོམ་སྟབས་རྗེས་མར་བདེ་ཆེན་ཁུལ་དང་ཡུན་ནན་ཉིན་རེའི་ཚགས་པར་ཚགས་པར་ལས་རིགས་ཚོགས་པས་ཤེས་ལྡན་མི་སྣ་གསོ་སྐྱོང་དང་ཕྱི་ཕྱོགས་ལ་དྲིལ་བསྒྲགས་སོགས་ཀྱི་ཐད་མཉམ་ལས་སྔར་བས་གཏིང་ཟབ་བྱས་ཏེ་ཐོན་ཁུངས་མཉམ་སྤྱོད་དང་ལེགས་ཆ་གསབ་རེས་བྱས་ནས་ས་གནས་ཀྱི་རིག་གནས་བྱ་གཞག་དང་ཐོན་ལས་ལ་འཕེལ་རྒྱས་གསར་པ་ཡོང་རྒྱུར་ཐུན་མོང་ཐོག་སྐུལ་འདེད་གཏོང་རྒྱུའི་རེ་བ་ཡོད་ཅེས་བཤད་པ་རེད།  

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་བཅར་འདྲིའི་བྱེད་སྒོ་དེ་གཙོ་བོ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་75འཁོར་བ་དང་བདེ་ཆེན་ཁུལ་གྱི་སྐབས་གཉིས་པའི་འཛམ་གླིང་གི“སེམས་ཀྱི་ཉི་ཟླའི”རིག་གནས་ཡུལ་སྐོར་དུས་ཆེན་ལ་དམིགས་ཏེ་བདེ་ཆེན་ལ་ཐོབ་པའི་འཕེལ་རྒྱས་ཀྱི་གྲུབ་འབྲས་དྲིལ་བསྒྲགས་བྱ་རྒྱུ་ཡིན་པ་རེད།  ཡུན་ནན་ཉིན་རེའི་ཚགས་པར་ཚགས་ལས་ཚོགས་པའི་ཨེ་ཤེ་ཡ་ལྷོ་མ་དང་ཨེ་ཤེ་ཡ་ཤར་ལྷོའི་ཁྱབ་སྤེལ་ལྟེ་གནས་ཀྱི་ཤུགས་རྐྱེན་ལ་བརྟེན་ནས་རིག་གནས་ཡུལ་སྐོར་དུས་ཆེན་རྒྱལ་སྤྱིའི་ཐོག་ཁྱབ་སྤེལ་དང་ཕྱི་ཕྱོགས་སུ་འོས་སྦྱོར་ཡག་པོ་བྱས་ཏེ་ཨེ་ཤེ་ཡ་ལྷོ་མ་དང་ཨེ་ཤེ་ཡ་ཤར་ལྷོའི་ཡུལ་སྐོར་བ་དེ་བས་མང་པོས་བདེ་ཆེན་ཤེས་རྟོགས་དང་བདེ་ཆེན་དུ་སྐྱོད་ཐུབ་པ་བྱས་ཐོག་བདེ་ཆེན་གྱི་སྐད་གྲགས་ཆོད་ཚད་དང་ཤུགས་རྐྱེན་ནུས་པ་ཁྱོན་ཡོངས་ནས་ཆེ་རུ་བཏང་སྟེ་བདེ་ཆེན་གྱི་སྤུས་ཚད་མཐོ་བའི་འཕེལ་རྒྱས་ཀྱི་རྣམ་པ་གསར་པ་གཏོད་ཆེད་གླེང་ཕྱོགས་ཀྱི་རྣམ་པ་བཟང་པོ་ཞིག་གཏོད་རྒྱུ་ཡིན་པ་རེད།  

    ཡུན་ནན་ཉིན་རེའི་ཚགས་པར་ཚགས་པར་ལས་རིགས་ཚོགས་པ་དང་། བདེ་ཆེན་ཁུལ་ཨུའི་དྲིལ་བསྒྲགས་པུའུ། བདེ་ཆེན་ཉིན་རེའི་ཚགས་པར་ཁང་སོགས་འབྲེལ་ཡོད་འགན་འཁུར་བློ་མཐུན་འགོ་ཚུགས་མཛད་སྒོར་ཞུགས་ཡོད་པ་རེད།