བདེ་ཆེན་ཁུལ་གྱིས་ཧྥུའུ་ཏན་དངུལ་ཁང་དང་བཞུགས་མོལ་གནང་བ།

    སེམས་ཀྱི་ཉི་ཟླ་བོད་ཡིག་དྲ་བའི་འཕྲིན།ཟླ10པའི་ཚེས30ཉིན།བདེ་ཆེན་ཁུལ་དང་ཧྥུའུ་ཏན་དངུལ་ཁང་དབར་བཞུགས་མོལ་ཚོགས་འདུ་འཚོགས་ནས་ཕྱོགས་གཉིས་པོས་སྲིད་གཞུང་དང་དངུལ་ཁང་མཉམ་ལས་གཏིང་ཟབ་ཏུ་གཏོང་བ་དང་མཉམ་ལས་གཉིས་ཕན་ལ་སྐུལ་འདེད་གཏོང་རྒྱུའི་ཐད་སྤེལ་རེས་གཏིང་ཟབ་བྱས་པ་རེད།

    ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་དང་། ཁུལ་ཨུའི་ཧྲུའུ་ཅི་གཞོན་པ། ཁུལ་དཔོན་ཀྲང་ཝེ་ཏུང་།ཧྥུའུ་ཏན་དངུལ་ཁང་གི་ཏང་ཨུའི་ཧྲུའུ་ཅི་དང་ཏུང་ཧྲི་ཀྲང་ཏའེ་ཅུན་བཅས་བཞུགས་མོལ་ཚོགས་འདུར་ཞུགས་པ་རེད།    

    ལུའོ་ཁྲའོ་ཧྥེང་གིས་ཧྥུའུ་ཏན་དངུལ་ཁང་གིས་དུས་ཡུན་རིང་པོའི་ནང་བདེ་ཆེན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རོགས་རམ་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་རེད།ལུའོ་ཁྲའོ་ཧྥེང་གིས་བསྟན་དོན།མིག་སྔར་བདེ་ཆེན་ཁུལ་རིག་གནས་ཡུལ་སྐོར་ཐོན་ལས་འཕེལ་རྒྱས་འགྲོ་ཤུགས་ཆེ་བ་དང་ས་མཐོའི་ཁྱད་ལྡན་དེང་རབས་ཞིང་ལས་ཀྱི་མདུན་ལམ་ཡངས་ཤིང་རྒྱ་ཆེ་བ། ལྗང་མདོག་ནུས་རྒྱུ་དང་ལྗང་མདོག་གཏེར་ལས་ཀྱི་མི་མངོན་པའི་སྟོབས་ཤུགས་ཧ་ཅང་ཆེན་པོ་ཡོད་པས་བྱ་གཞག་ཁག་འཕེལ་རྒྱས་འགྲོ་རྒྱུར་རྣམ་པ་གསར་པ་ཐོན་ཡོད།བདེ་ཆེན་ཁུལ་དང་ཧྥུའུ་ཏན་དངུལ་ཁང་དབར་མཉམ་ལས་ཀྱི་བར་མཐོངས་རྒྱ་ཆེན་པོ་ཡོད་པས་ཧྥུའུ་ཏན་དངུལ་ཁང་གིས་ཁྱད་ལྡན་ལེགས་ཆ་འདོན་སྤེལ་བྱས་ཏེ་སྔར་རྒྱུན་བཞིན་བདེ་ཆེན་གྱི་འཕེལ་རྒྱས་ལ་རྒྱབ་སྐྱོར་གནང་བ་དང་། ལྷག་པར་དུ་ཁྱད་ལྡན་ཐོན་ལས་འཕེལ་རྒྱས་དང་། རྣམ་གྲངས་གལ་ཆེན་འཛུགས་སྐྲུན། གྲོང་ཁྱེར་དོ་དམ་གྱི་རྨང་གཞིའི་སྒྲིག་བཀོད་འཛུགས་སྐྲུན། ཐོན་ལས་འདུས་ཁུལ་རིམ་སྤར། གྲོང་གསེབ་དར་རྒྱས། དངུལ་རྩའི་ཉེན་ཁར་དོགས་ཟོན་དང་སེལ་ཐབས་སོགས་ཀྱི་ཐད་བདེ་ཆེན་ལ་དངུལ་རྩའི་རྒྱབ་སྐྱོར་སྔར་ལས་ཆེ་བ་བྱས་ཏེ། སྲིད་དངུལ་ཕྱོགས་གཉིས་ཀས་ཕྱོགས་ཡོངས་དང་། ཁྱབ་ཁོངས་མང་བ། རིམ་པ་ཟབ་པ་བཅས་ཀྱི་སྒོ་ནས་མཉམ་ལས་བྱེད་པར་སྐུལ་འདེད་བཏང་སྟེ། བདེ་ཆེན་གྱི་སྤུས་ཚད་མཐོ་བའི་འཕེལ་རྒྱས་ལ་སྟོབས་ཤུགས་ལེགས་སྐྱེས་སུ་འབུལ་དགོས།

    ཏའེ་ཅུན་གྱིས་ཧྥུའུ་ཏན་དངུལ་ཁང་གིས་“ས་གནས་ལ་ཞབས་འདེགས་ཞུ་བ་དང་ནུས་པ་ཆུང་འབྲིང་སྦྱིན་པ། དམངས་འཚོར་ཕན་འདོགས་པ”བཅས་ཀྱི་འཕེལ་རྒྱས་ཀྱི་ལས་འགན་རྒྱུན་འཁྱོངས་བྱས་ཏེ། བདེ་ཆེན་འཕེལ་རྒྱས་ཀྱི་དོན་དངོས་ལ་གཞི་ཚུགས་པ་དང་བདེ་ཆེན་གྱི་ཐོན་ཁུངས་ལེགས་ཆ་དང་ཐོན་ལས་ཀྱི་ཁྱད་ཆོས་ལ་དམིགས་ནས་ཇུས་འགོད་དང་བཀོད་སྒྲིག་ཧུར་ཐག་བྱས་ཏེ་བདེ་ཆེན་འཕེལ་རྒྱས་ཀྱི་དགོས་མཁོ་དང་དེ་བས་འཚམ་པ་དང་སྤུས་ཚད་ལྡན་ལ་ཁྱད་ཆོས་ལྡན་པའི་དངུལ་རྩའི་ཞབས་ཞུ་དང་དངུལ་རྩའི་ཐོན་རྫས་མཁོ་འདོན་བྱེད་ནས། འབྲེལ་གཏུག་ལ་རྒྱུན་ཆད་མེད་པར་ཤུགས་སྣོན་རྒྱག་པ་དང་མཉམ་ལས་གཏིང་ཟབ་ཏུ་གཏོང་བ་དང་ཞབས་ཞུ་ལེགས་སུ་བཏང་ནས་ཕྱོགས་གཉིས་པོའི་མཉམ་ལས་ལ་གྲུབ་འབྲས་དེ་བས་མང་བ་ཐོབ་རྒྱུར་སྐུལ་འདེད་བཏང་སྟེ་བདེ་ཆེན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་དངུལ་རྩའི་འགན་ལེན་བརྟན་པོ་རྒྱུན་མཐུད་ངང་མཁོ་འདོན་བྱེད་དགོས་ཞེས་བསྟན་པ་རེད།

    ཧྥུའུ་ཏན་དངུལ་ཁང་གི་ཏང་ཨུའི་ཨུ་ཡོན་དང་ཧང་ཀྲང་གཞོན་པ་ཝང་ཁེ་ཆང་།བདེ་ཆེན་ཁུལ་མི་དམངས་སྲིད་གཞུང་གི་ཁུལ་དཔོན་གཞོན་པ་ལིན་ཧའོ།སེམས་ཀྱི་ཉི་ཟླ་གྲོང་ཁྱེར་དང་འཇོལ་རྫོང་གི་འགན་འཁུར་བློ་མཐུན་གཙོ་བོ། ཁུལ་རིམ་པའི་འབྲེལ་ཡོད་སྡེ་ཁག་གི་འགན་འཁུར་བློ་མཐུན།ཧྥུའུ་ཏན་དངུལ་ཁང་གི་སྤྱི་ཁྱབ་དངུལ་ཁང་གི་འབྲེལ་ཡོད་གཞུང་ལས་ཁང་། སེམས་ཀྱི་ཉི་ཟླ་ཡན་ལག་དངུལ་ཁང་གི་འགན་འཁུར་བློ་མཐུན་གཙོ་བོ་བཅས་བཞུགས་མོལ་ལ་ཞུགས་ཡོད།