​ལུའོ་ཁྲའོ་ཧྥེང་གིས་སེམས་ཀྱི་ཉི་ཟླའི་ཁུལ་ཡོངས་ལྟ་སྐོར་རིག་གནས་ཡུལ་སྐོར་རྣམ་གྲངས་ལ་ཞིབ་འཇུག་གནང་།

    སེམས་ཀྱི་ཉི་ཟླ་བོད་ཡིག་དྲ་བའི་འཕྲིན།  ཟླ་11པའི་ཚེས་3ཉིན་གྱི་སྔ་དྲོར། ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་སེམས་ཀྱི་ཉི་ཟླ་གྲོང་ཁྱེར་དུ་ཕེབས་ནས་ཁུལ་ཡོངས་ལྟ་སྐོར་རིག་གནས་ཡུལ་སྐོར་རྣམ་གྲངས་（སྐབས་དང་པོ）ལ་སྐུལ་འདེད་གཏོང་བའི་གནས་ཚུལ་དུ་ཞིབ་འཇུག་གནང་།

    ལུའོ་ཁྲའོ་ཧྥེང་སྔ་རྗེས་སུ་ནགས་ཕག་མཚོ་དང་རྒྱལ་ཁབ་ལམ་ཐིག་214ལྗོངས་གཟིགས་སྡིངས་ཆ་སོགས་སུ་ཕེབས་ནས། ཡུལ་དངོས་སུ་རྣམ་གྲངས་ལམ་ཐིག་འཆར་འགོད་དང་ཁོར་ཡུག་བཅོས་སྒྲིག་སོགས་གནས་ཚུལ་ལ་ཤེས་རྟོགས་བྱས་པ་མ་ཟད། ད་དུང་ཁུལ་དང་གྲོང་ཁྱེར་འབྲེལ་ཡོད་སྡེ་ཚན་དང་རྣམ་གྲངས་འཆར་འགོད་ལས་ཁུངས་ཀྱི་འགན་འཁུར་བློ་མཐུན་དང་བཞུགས་མོལ་གནང་བ། རྣམ་གྲངས་ཀྱི་དུས་འགོའི་ལས་ཀ་སྐུལ་འདེད་གཏོང་ཚུལ་སྙན་སེང་གསན་སྟེ། གོམ་སྟབས་རྗེས་མའི་ལས་ཀར་བླང་བྱ་བཏོན་པ།

    ལུའོ་ཁྲའོ་ཧྥེང་གིས་སེམས་ཀྱི་ཉི་ཟླའི་ཁུལ་ཡོངས་ལྟ་སྐོར་རིག་གནས་ཡུལ་སྐོར་རྣམ་གྲངས་ནི་ཞིང་ཨུ་དང་ཞིང་ཆེན་སྲིད་གཞུང་གི་“ཁུལ་ཡོངས་ཡུལ་སྐོར་སྟབས་ཆེན་གྱིས་འཕེལ་རྒྱས་གཏོང་བ། རྩེར་སོན་ཅན་དང་སྤུས་ཚད་མཐོ་བ། རྩེར་སོན་ཚད་གཞི་ལྟར་རྨང་གཞིའི་སྒྲིག་བཀོད་འཐུས་ཚང་དུ་གཏོང་བའི”བླང་བྱ་དོན་འཁྱོལ་ལག་བསྟར་རྒྱུན་འཁྱོངས་བྱེད་པའི་བྱ་ཐབས་གཙོ་བོ་ཞིག་ཡིན། ཁུལ་ཡོངས་ཡུལ་སྐོར་ལྟ་སྐོར་རྣམ་གྲངས་ལག་བསྟར་གྱིས་སེམས་ཀྱི་ཉི་ཟླའི་ཡུལ་སྐོར་ལས་རིགས་རིགས་བསྒྱུར་རིམ་སྤར་ལ་སྐུལ་འདེད་གཏོང་བ་དང་ཡུལ་སྐོར་སྤུས་ཚད་མཐོ་རུ་གཏོང་བ། ཡུལ་སྐོར་ཉམས་མྱོང་ཕུན་སུམ་ཚོགས་སུ་གཏོང་བ། ཁུལ་ཡོངས་ཡུལ་སྐོར་རྣམ་པ་གསར་པ་ཞིག་གཏོད་པར་གཏིང་ཟབ་པའི་དོན་སྙིང་ལྡན་ཡོད་ཅེས་བསྟན།

    ལུའོ་ཁྲའོ་ཧྥེང་གིས་ཡུལ་གཞན་གྱི་རྒྱལ་ཁའི་ཉམས་མྱོང་དང་བྱེད་སྟངས་ལ་དཔེ་ལྟ་ནས། འཆར་འགོད་ཇུས་འགོད་སྔ་བས་ལེགས་སུ་གཏོང་སྟེ། རྣམ་གྲངས་ཀྱི་འཆར་འགོད་དང་རང་བྱུང་མཛེས་ལྗོངས་མཐུན་སྦྱོར་གཅིག་མཐུན་ལ་ཁག་ཐེག་བྱེད་དགོས། ཚན་རིག་དང་མཐུན་པའི་ཞིབ་འཇུག་དང་དབྱེ་ཞིབ་ཞིབ་བཅོད་བྱེད་ནས།རྣམ་གྲངས་ལམ་རྒྱུད་ཀྱི་མཛེས་ལྗོངས་སྔོ་ལྗང་དང་མཛེས་པོ།དཀར་གསལ་བཅས་ཀྱི་རྣམ་གྲངས་ལ་ཤུགས་སྣོན་དགོས། “མིག་མངས་འགྲིག་སྐོར་གཅིག”གི་བསམ་བློ་བརྟན་པོ་བཙུགས་ནས།མཐུན་སྦྱོར་མཉམ་སྒུལ་ལ་ཤུགས་བསྣན་ཏེ།ནུས་ཤུགས་ཡོད་རྒུས་རྣམ་གྲངས་ཀྱི་རྒྱུ་རྐྱེན་གཙོ་བོའི་འགན་ལེན་ཡག་པོ་བྱེད་དགོས། འཆར་འགོད་སྔོན་སྤྱོད་དང་སྐྱེ་ཁམས་སྲུང་སྐྱོང་སྔོན་ཐོན་རྒྱུན་འཁྱོངས་བྱས་ནས་འཆར་འགོད་ཇུས་འགོད་ལས་ཁུངས་དང་འབྲེལ་མཐུད་བྱེད་ཤུགས་ཆེ་རུ་གཏོང་སྟེ།རྣམ་གྲངས་སྔ་ཙམ་འགོ་ཚུགས་པར་བརྩོན་ལེན་བྱེད་དགོས་པའི་ནན་བཤད་གནང་།

    ཁུལ་འགོ་ཁྲིད་དབྱང་ཙི་ཅང་། ལི་དབྱང་། ཁྲིན་ཆོན་ཞིབ་འཇུག་ཏུ་ཕེབས།