ཡུན་ནན་འཇོལ་རྫོང་གླེགས་བམ་གྲོང་ཚོའི་སྟོན་ལྗོངས་མཐོང་བ་ཀུན་སྨོན།

    མི་རྣམས་ཀྱི་བཤད་རྒྱུན་ལ།   གཡོན་ན་ལྷ་ཡུལ་དང་གཡས་ན་གླེགས་བམ་ཡོད་པར་གླེང་།  དེ་ནི་གཙོ་བོ་གླེགས་བམ་གྲོང་ཚོའི་ངོ་མཚར་བའི་སྣོད་བཅུད་ཀྱི་བཀོད་པ་ལ་བསྟོད་བསྔགས་བྱས་པ་ལས་བྱུང་ཞིང་།   དེ་ཡང་གླེགས་བམ་གྲོང་ཚོ་ནི་ཁ་བ་དཀར་པོའི་ནང་བསྐོར་གྱི་གླེགས་བམ་རྦབ་ཆུར་བསྐྱོད་སའི་བརྒྱུད་ལམ་གཅིག་པུ་དེ་ཡིན་ཞིང་།  སྟོད་ན་གངས་དཀར་རི་བོ་མུ་འབྲེལ་ལ།  བར་ན་རྫ་རི་དང་ནགས་རིས་ཡོངས་སུ་བརྒྱན་པ།  མཚམས་དང་མཚམས་ན་རྫ་ཆུ་སྔོན་མོ་ལྷང་ལྷུང་དུ་འབབ་པ།  འདབས་ན་མུ་ཏིག་བསྟར་ལ་བརྒྱུས་འདྲའི་གླེགས་བམ་གྲོང་ཚོ་ཆགས་ཡོད་པས།  གནས་འདིའི་བཀོད་པ་ནི་སུ་ཞིག་གིས་ཆེད་དུ་བཀོད་སྒྲིག་བྱས་པ་དང་མཚུངས་པར་མཛེས་ཤིང་ལྟ་ན་སྡུག   དུས་ཚིགས་རེ་རེར་རང་རང་གི་མཛེས་སྡུག་མི་འདྲ་བ་རེ་ཡོད་པ་བཞིན་སྟོན་མཇུག་གི་གླེགས་བམ་གྲོང་ཚོའི་མཛེས་སྡུག་མཐོང་བ་ན་ཞིང་ཁམས་འདི་ལ་མ་བཅོས་རང་བྱུང་གི་ཡིད་སྨོན་ཞིག་སྐྱེས་ཡོང་།  ལོ་ལྟར་གནས་འདིར་ཕྱོགས་བཞི་མཚམས་བརྒྱད་ནས་ཡོང་བའི་ཡུལ་སྐོར་བ་བགྲངས་ལས་འདས་པ་ཡོང་གི་ཡོད།