བདེ་ཆེན་བོད་རིགས་རང་སྐྱོང་ཁུལ་སྨྱན་སྦྱོར་མཉམ་འདྲེས་ལྟེ་གནས་ཀྱི་བྱང་འབྱེད་མཛད་སྒོ་སྤེལ་བ།

    སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཟླ11པའི་ཚེས13ཉིན་གྱི་སྔ་དྲོར།བདེ་ཆེན་བོད་རིགས་རང་སྐྱོང་ཁུལ་སྨྱན་སྦྱོར་མཉམ་འདྲེས་ལྟེ་གནས་དངོས་སུ་སྒོ་བྱང་བཀལ་ནས་བཙུགས་པ་དེ་ཐོག་ནས་རང་ཁུལ་གྱི་སྨྱན་སྦྱོར་མཉམ་འདྲེས་འཕེལ་རྒྱས་གཏིང་ཟབ་འགྲོ་བའི་གོམ་སྟབས་གལ་ཆེན་ཞིག་སྤོས་པ་མཚོན་ཡོད།

     ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་གིས་མཆན་འགོད་མཛུབ་སྟོན་གནང་ནས་ཁུལ་སྨྱན་སྦྱོར་མཉམ་འདྲེས་ལྟེ་གནས་འཛུགས་རྒྱུ་གོ་སྐབས་སུ་བྱས་ཏེ་དར་ཆ་སྒྲེང་བ་དང་། དམངས་སེམས་གཅིག་ཏུ་སྒྲིལ་བ། མི་གསར་པ་གསོ་སྐྱོང་། རིག་གནས་དར་སྤེལ། གཟུགས་བརྙན་འགྲེམས་སྟོན་བཅས་སྔར་བས་ཡག་པོ་བྱས་ནས་ཁུལ་ཡོངས་ཀྱི་གསར་འགྱུར་ལས་དོན་གྱི་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ་དང་།ཀྲུང་གོའི་རྣམ་པའི་དེང་རབས་ཅན་གྱི་བདེ་ཆེན་འཛུགས་སྐྲུན་བྱེད་པའི་ལག་ལེན་གྱི་མཉམ་ཤུགས་ཆེན་པོ་གཅིག་ཏུ་སྒྲིལ་དགོས་པའི་བླང་བྱ་བཏོན་པ་རེད།

    ལུའོ་ཁྲའོ་ཧྥེང་གིས་མཆན་བཀོད་མཛུབ་སྟོན་ནང་བསྟན་དོན།ཁུལ་སྨྱན་སྦྱོར་མཉམ་འདྲེས་ལྟེ་གནས་བཙུགས་པའི་སྐབས་འདིར་བློ་མཐུན་ཚོས་ཞི་ཅིན་ཕིང་གི་རིག་གནས་དགོངས་པ་དང་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་གཏིང་ཟབ་བྱེད་པ་དང་། བསྒྱུར་བཅོས་གོ་སྐབས་སུ་བཟུང་ནས་དར་ཆ་སྒྲེང་བ་དང་།དམངས་སེམས་གཅིག་སྡུད།མི་གསར་པ་གསོ་སྐྱོང་།རིག་གནས་དར་སྤེལ།གཟུགས་བརྙན་འགྲེམས་སྟོན་བཅས་བྱས་ཏེ་ཁུལ་ཡོངས་ཀྱི་གསར་འགྱུར་ལས་ཀའི་ཆུ་ཚད་རྒྱུན་ཆད་མེད་པར་མཐོ་རུ་གཏོང་དགོས། ཡང་དག་པའི་ཆབ་སྲིད་ཀྱི་ཁ་ཕྱོགས་སྟངས་འཛིན་ནན་པོ་བྱས་ཏེ་ཏང་གི་རིགས་པའི་གཞུང་ལུགས་འཆད་འགྲེལ་དང་སྲིད་ཇུས་དྲིལ་བསྒྲགས་གཏིང་ཟབ་བྱས་ནས་ཀྲུང་གོའི་རྣམ་པའི་དེང་རབས་ཅན་གྱི་བདེ་ཆེན་འཛུགས་སྐྲུན་བྱེད་པའི་ལག་ལེན་གྱི་མཉམ་ཤུགས་ཆེན་པོ་གཅིག་ཏུ་སྒྲིལ་དགོས།ལྟེ་བའི་ལས་དོན་ལ་དམིགས་པ་དང་“དོན་ཆེན་བཞི”ལ་དམ་པོར་དམིགས་ནས་“བརྒྱད་ལྟ་ལྔ་བསྡུར”བྱས་པ་བརྒྱུད་བདེ་ཆེན་གྱི་གཏམ་རྒྱུད་ཡག་པོ་བཤད་དེ་མང་ཚོགས་ཀྱིས་སྔར་ལས་རང་རྟོགས་ཀྱི་སྒོ་ནས་ཏང་གི་བཀའ་དྲིན་ཚོར་བ་དང་ཏང་གི་བཀའ་ལ་ཉན་པ། ཏང་གི་རྗེས་སུ་འབྲང་བ་བཅས་བྱེད་དུ་འཇུག་དགོས། གསར་འགྱུར་གྱིས་མི་དམངས་ལ་ཞབས་འདེགས་ཞུ་རྒྱུ་མཐའ་འཁྱོངས་བྱས་ཏེ་གཞི་རིམ་དུ་སྔར་བས་ཟབ་འཇུག་དང་མང་ཚོགས་དང་ཉེ་བཅར་བྱས་ནས་མི་དམངས་མང་ཚོགས་ཀྱི་བསམ་འདུན་ཡག་པོ་མཚོན་པ་བྱས་ཏེ་གསར་འགྱུར་བརྩམས་ཆོས་སྔར་བས་མང་བ་འདོན་དགོས།དྲང་སྲུང་གསར་གཏོད་མཐའ་འཁྱོངས་བྱས་ཏེ་སྨྱན་སྦྱོར་གསར་བཅོས་ཀྱི་དུས་རབས་འཕེལ་ཕྱོགས་དང་བསྟུན་ནས་སྨྱན་སྦྱོར་གྱི་ཁྱབ་སྤེལ་ནུས་པ་དང་།ཁྲིད་སྟོན་ནུས་པ།ཤུགས་རྐྱེན་ནུས་པ།ཀུན་གྱིས་ཡིད་ཆེས་བྱེད་ཚད་བཅས་རྒྱུན་ཆད་མེད་པར་ཆེ་རུ་གཏོང་དགོས། ནུས་པ་དང་བྱང་ཚད་མཐོ་རུ་གཏོང་བ་དང་། འགྲོ་ནུས་དང་ལྟ་ནུས། བསམ་ནུས།འབྲི་ནུས་བཅས་ཆེ་རུ་བཏང་ནས་ཆབ་སྲིད་བརྟན་པོ་དང་།ལས་སྒོ་བྱང་ཆུབ་པ།སྤྱོད་ཚུལ་བཟང་བ།ཏང་དང་མི་དམངས་ཐུགས་བློ་བདེ་བའི་གསར་འགྱུར་གླེང་ཕྱོགས་ལས་དོན་དཔུང་ཁག་གིས་སྤྱི་ཚོགས་རིང་ལུགས་དེང་རབས་ཅན་གྱི་བདེ་ཆེན་གསར་པ་འཛུགས་སྐྲུན་བྱ་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་དགོས། 

    ཁུལ་ཨུའི་ཧྲུའུ་ཅི་གཞོན་པ་ཕེང་ཧྲན། ཁུལ་ཨུའི་རྒྱུན་ཨུ།ཁུལ་དཔོན་གཞོན་པ་ཧུའུ་ཧྥེ་ཞུང་བྱེད་སྒོར་ཞུགས་ནས་ཐུན་མོང་ཐོག་ཁུལ་སྨྱན་སྦྱོར་མཉམ་འདྲེས་ལྟེ་གནས་ཀྱི་སྒོ་བྱང་གི་ཁེབས་རས་འབྱེད་པ་རེད།

སྒོ་བྱང་འགེལ་བའི་མཛད་སྒོའི་ཐོག་ཁུལ་ཨུ་སྒྲིག་ཁོངས་གཞུང་དོན་ཁང་གི་འབྲེལ་ཡོད་འགན་འཁུར་བས་《བདེ་ཆེན་བོད་རིགས་རང་སྐྱོང་ཁུལ་སྨྱན་སྦྱོར་མཉམ་འདྲེས་ལྟེ་གནས་འཛུགས་རྒྱུར་མོས་མཐུན་བྱ་རྒྱུའི་སྐོར་གྱི་ཀྲུང་གུང་ཡུན་ནན་ཞིང་ཨུ་སྒྲིག་གཞི་སྒྲིག་ཁོངས་ཨུ་ཡོན་ལྷན་ཁང་གཞུང་དོན་ཁང་གི་མཆན་འགོད་བཀའ་ལན》སྒྲོག་སྦྱངས་གནང་བ།ཕེང་ཧྲན་གྱིས་ཁུལ་ཨུ་དང་ཁུལ་སྲིད་གཞུང་གི་ཚབ་ཞུས་ནས་ཁུལ་སྨྱན་སྦྱོར་མཉམ་འདྲེས་ལྟེ་གནས་བཙུགས་པར་རྟེན་འབྲེལ་ཞུས་པ་དང་འབྲེལ་གོམ་སྟབས་རྗེས་མའི་ལས་དོན་ལ་བླང་བྱའང་བཏོན་པ་རེད།

    རྒྱུས་ལོན་བྱུང་བ་ལྟར་ན།ཁུལ་སྨྱན་སྦྱོར་མཉམ་འདྲེས་ལྟེ་གནས་ནི་ཁུལ་ཨུ་ཐད་གཏོགས་ཀྱི་སྤྱི་ཕན་རིགས་གཉིས་པའི་བྱ་གཞག་ཚན་པ་དང་ཁྲུའུ་རིམ་པ་ཡིན། བདེ་ཆེན་ཉིན་རེའི་ཚགས་པར་ཁང་དང་བདེ་ཆེན་བོད་རིགས་རང་སྐྱོང་ཁུལ་རླུང་འཕྲིན་བརྙན་འཕྲིན་ཁང་གི་སྒོ་བྱང་སྣོན་འགེལ་བྱས་ནས་བཀལ་ལ། ཁོངས་གཏོགས་ཁུལ་ཨུ་དྲིལ་བསྒྲགས་པུས་དོ་དམ་བྱེད་ཀྱི་ཡོད།གཙོ་བོ་གསར་འགྱུར་སྨྱན་སྦྱོར་ལས་དོན་སྐོར་གྱི་ཏང་ཀྲུང་དབྱང་གི་བྱེད་ཕྱོགས་སྲིད་ཇུས་དང་ཐབས་ཇུས་བཀོད་སྒྲིག་དང་དེ་བཞིན་ཞིང་ཨུ་དང་ཁུལ་ཨུའི་འབྲེལ་ཡོད་ལས་ཀའི་བླང་བྱ་ལག་བསྟར་དོན་འཁྱོལ་བྱ་རྒྱུའི་འགན་འཁུར་ནས་ཏང་གི་མགྲིན་ཚབ་པའི་ནུས་པ་འདོན་སྤེལ་གང་ལེགས་བྱེད་པ། ཁུག་རིམ་པའི་སྨྱན་སྦྱོར་ཐོན་ཁུངས་ཀྱི་སྟོབས་ཤུགས་བསྡུ་སྒྲིལ་དང་གཙོ་རྒྱུན་བསམ་བློའི་གླེང་ཕྱོགས་སྟོབས་ཆེར་གཏོང་བ་དང་གསར་འགྱུར་དྲིལ་བསྒྲགས་ཀྱི་སྤུས་ཚད་དང་ཕན་འབྲས་ཆེ་རུ་བཏང་བ་བརྒྱུད་སྤྱི་ཚོགས་རིང་ལུགས་དེང་རབས་ཅན་གྱི་བདེ་ཆེན་གསར་པ་འཛུགས་སྐྲུན་བྱ་རྒྱུར་དེ་བས་ལེགས་པའི་སྒོ་ནས་རོགས་རམ་བྱས་ཡོད།

    ཁུལ་ཐད་གཏོགས་འབྲེལ་ཡོད་སྡེ་ཚན་གྱི་འགན་འཁུར་བ་དང་ཁུལ་ཨུ་དྲིལ་བསྒྲགས་པུའི་འགོ་ཁྲིད་ཚན་ཁག་གི་ཁོངས་མི། རྫོང་(གྲོང་ཁྱེར)གསུམ་གྱི་ཨུ་ལྷན་དྲིལ་བསྒྲགས་པུའི་པུའུ་ཀྲང་དང་སྨྱན་སྦྱོར་མཉམ་འདྲེས་ལྟེ་གནས་ཀྱི་ཀྲུའུ་རེན།ཞིང་ཆེན་རིམ་པའི་སྨྱན་སྦྱོར་བཅའ་སྡོད་ས་ཚིགས་ཀྱི་གསར་འགོད་པ་དང་།བདེ་ཆེན་ཉིན་རེའི་ཚགས་པར་ཁང་དང་བདེ་ཆེན་ཁུལ་རླུང་འཕྲིན་བརྙན་འཕྲིན་ཁང་གི་ལས་འཁྱུར་ངལ་གསོ་བྱས་པའི་ལས་བྱེད་པའི་འཐུས་མི།ཁུལ་རིམ་པའི་དཔེ་ཆ་མཛེས་བརྙན་མཐུན་ཚོགས་ཀྱི་འཐུས་མི།ཁུལ་སྨྱན་སྦྱོར་མཉམ་འདྲེས་ལྟེ་གནས་ཀྱི་ལས་བཟོ་པ་ཡོངས་བྱེད་སྒོར་ཞུགས་ཡོད།