ཀྲུང་གུང་ཀྲུང་དབྱང་གཞུང་དོན་ཐིང་གིས།《ཕྱོགས་མི་ཏང་ཡོན་གྱི་དོ་དམ་ལས་དོན་ལ་སྔར་བས་ཤུགས་སྣོན་རྒྱག་པ་དང་ལེགས་སུ་གཏོང་རྒྱུའི་སྐོར་གྱི་བསམ་འཆར》བཀྲམ་པ།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་11ཉིན་གློག་འཕྲིན་འབྱོར་གསལ། ཉེ་ཆར། ཀྲུང་གུང་ཀྲུང་དབྱང་གཞུང་དོན་ཐིང་གིས《ཕྱོགས་མི་ཏང་ཡོན་གྱི་དོ་དམ་ལས་དོན་ལ་སྔར་བས་ཤུགས་སྣོན་རྒྱག་པ་དང་ལེགས་སུ་གཏོང་རྒྱུའི་སྐོར་གྱི་བསམ་འཆར》（གཤམ་དུ《བསམ་འཆར》ཞེས་བསྡུ་རྒྱུ）བཀྲམ་ནས་དུས་རབས་གསར་པའི་ཕྱོགས་མི་ཏང་ཡོན་གྱི་དོ་དམ་ལས་དོན་ཡག་པོ་བསྒྲུབ་པའི་ཐད་བཀོད་སྒྲིག་བྱས་པ་རེད།

    《བསམ་འཆར》ནང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱེད་པ་དང་ཏང་གི་སྒྲིག་ཡིག་དང་ཏང་ནང་ཁུལ་གྱི་འབྲེལ་ཡོད་ཁྲིམས་སྲོལ་གཞི་འཛིན་སར་བྱས་ཏེ། ཕྱོགས་མི་ཏང་ཡོན་གྱི་དོ་དམ་ལས་དོན་སྐོར་གྱི་ཏང་ཀྲུང་དབྱང་གི་བཀོད་སྒྲིག་གལ་ཆེན་ཕྱོགས་ཡོངས་ནས་ལག་བསྟར་བྱེད་པ་དང་། གནད་དོན་ཕྱོགས་སྟོན་དུ་འཛིན་རྒྱུ་དང་དམིགས་ཚད་ཀྱི་ཕྱོགས་སྟོན་ཕན་ཚུན་གཅིག་གྱུར་ཡོང་རྒྱུ་མཐའ་འཁྱོངས་བྱེད་པ། བརྒྱུད་རིམ་ལྡན་པའི་འདུ་ཤེས་དང་། དམ་པ་དོན་གཉེར། སྒྱུར་བཅོས་གསར་གཏོད་བཅས་མཐའ་འཁྱོངས་བྱས་ཏེ་གནད་སྨིན་ནུས་ལྡན་དང་གཅེས་སྐྱོང་ཞབས་ཞུ་དེ་ཕྱོགས་མི་ཏང་ཡོན་ལ་དོ་དམ་བྱེད་པའི་བརྒྱུད་རིམ་ཧྲིལ་པོ་དང་ཕྱོགས་ཁག་ནས་མངོན་པར་བྱེད་པ་དང་། ཕྱོགས་མི་ཏང་ཡོན་འགྲོ་ཡུལ（སྡེ་ཚན）གྱི་གཞི་རིམ་ཏང་རྩ་འཛུགས་ནང་དུས་ཐོག་ཏུ་འཇུག་པ། གཞི་རིམ་ཏང་རྩ་འཛུགས་ཀྱི་དོ་དམ་འགན་འཁྲི་དང་ཕྱོགས་མི་ཏང་ཡོན་གྱི་འགན་འཁྲིའི་བླང་བྱ་དོན་འཁྱོལ་བྱེད་པ། ཕྱོགས་མི་ཏང་ཡོན་གྱི་རྒྱུན་ལྡན་གྱི་སློབ་གསོ་དང་དོ་དམ་ལ་དམ་འཛིན་ཏན་ཏིག་བྱེད་པ། ཕྱོགས་མི་ཏང་ཡོན་གྱི་ཏང་རྩ་འཛུགས་འཛུགས་སྐྱོང་བྱེད་ཤུགས་ཆེ་རུ་གཏོང་བ། རྩ་འཛུགས་ཀྱི་འགོ་ཁྲིད་བྱེད་ཤུགས་ཆེ་རུ་གཏོང་བ་བཅས་ཕྱོགས་5ཡི་ཐད་ནས་ཕྱོགས་མི་ཏང་ཡོན་གྱི་དོ་དམ་ལས་དོན་ལ་སྔར་བས་ཤུགས་སྣོན་རྒྱག་པ་དང་ལེགས་སུ་གཏོང་རྒྱུའི་ལས་འགན་གྱི་བྱེད་ཐབས་དང་ཞིབ་ཕྲའི་བླང་བྱ་བཏོན་ཡོད་པ་རེད།

    《བསམ་འཆར》ནང་། རིམ་ཁག་ཏང་ཨུད་དང་ལྷག་པར་དུ་རྫོང་རིམ་པའི་ཏང་ཨུད་ཀྱིས་ཕྱོགས་མི་ཏང་ཡོན་གྱི་དོ་དམ་ལས་དོན་ལ་ཤུགས་སྣོན་རྒྱག་པ་དང་ལེགས་སུ་གཏོང་རྒྱུ་དེ་ཏང་འཛུགས་སྐྱོང་གི་ལས་འགན་གལ་ཆེན་དང་རྒྱུན་གཏན་རང་བཞིན་གྱི་ལས་དོན་ལ་བརྩིས་ནས་གཞི་རིམ་ཏང་འཛུགས་སྐྱོང་ལས་དོན་གྱི་འགན་འཁྲིའི་ལམ་ལུགས་ནང་བཅུག་སྟེ་འགོ་ཁྲིད་དང་མཛུབ་ཁྲིད་ལ་ཤུགས་སྣོན་རྒྱག་དགོས་པ་དང་། རིམ་ཁག་ཏང་ཨུད་རྩ་འཛུགས་སྡེ་ཚན་གྱིས་ཞིབ་ཕྲའི་མཛུབ་སྟོན་བྱེད་ཤུགས་ཆེ་རུ་བཏང་སྟེ་ཏང་ཨུད་ཀྱི་སྤྱི་ཚོགས་ལས་དོན་སྡེ་ཚན་དང་སྤྱི་བདེ། མི་སྤྱི་སོགས་སྡེ་ཚན་དང་མཉམ་དུ་ཕྱོགས་མི་ཏང་ཡོན་གྱི་དོ་དམ་ལས་དོན་ལ་དུས་བཀག་ལྟར་བརྡ་ཁྱབ་གཏོང་བ་དང་ཞིབ་འཇུག་བྱས་ཏེ་ཕྱོགས་མི་ཏང་ཡོན་གྱི་དོ་དམ་ཆ་འཕྲིན་མཉམ་སྤྱོད་དང་ལས་དོན་མཉམ་འཛིན་ལ་སྐུལ་འདེད་གཏོང་དགོས་པའི་ནན་བཤད་བྱས་ཡོད་པ་རེད།