ཀོང་ཏུང་ཀྲུའུ་ཧའེ་གྲོང་ཁྱེར་དུ་རླངས་འཁོར་བཏང་ནས་འགྲོ་འོང་བྱེད་མཁན་ལ་བརྡུངས་པའི་གྱོད་གཞིར་ཞི་ཅིན་ཕིང་གིས་མཛུབ་སྟོན་གལ་ཆེན་གནང་ནས་ནན་བཤད་གནང་དོན།

ནུས་ཤུཌ་ཡོད་རྒུས་རྨས་མ་སྐྱོབ་བཅོས་དང་ལག་དམར་བར་ཁྲིམས་གཅོད་ནན་པོ་བྱས་ཏེ་ཉེན་ཁ་འགོག་ཟོན་བྱེད་ཤུགས་ཆེ་རུ་དང་གྱོད་གཞི་ཚབས་ཆེན་ཐོན་རྒྱུ་ནན་འགོག་བྱེད་དགོས།

ལི་ཆང་གིས་མཆན་བཀོད་མཛུབ་སྟོན་གནང་བ།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་11ཚེས་12ཉིན་གློག་འཕྲིན་འབྱོར་གསལ། ཟླ་11ཚེས་11ཉིན་གྱི་དགོང་མོ། ཀོང་ཏུང་ཀྲུའུ་ཧའེ་གྲོང་ཁྱེར་ཤང་ཀྲོའུ་ཆུས་ལུས་རྩལ་ལྟེ་གནས་སུ་རླངས་འཁོར་བཏང་ནས་འགྲོ་འོང་བྱེད་མཁན་ལ་བརྡུངས་པའི་གྱོད་གཞི་ཐོན་པ་དང་། མིག་སྔའི་བར་མི་35རྐྱེན་ལམ་དུ་ཤོར་བ་དང་མི་43ལ་རྨས་སྐྱོན་ཚབས་ཆེན་ཕོག་ཡོད་པ་རེད།

    གྱོད་གཞི་ཐོན་རྗེས། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་ཚད་མཐོའི་མཐོང་ཆེན་དང་མཛུབ་སྟོན་གལ་ཆེན་གནང་ཞིང་། ཁོང་གིས་གསུངས་དོན། ཀོང་ཏུང་ཀྲུའུ་ཧའེ་གྲོང་ཁྱེར་ཤང་ཀྲོའུ་ཆུས་ལུས་རྩལ་ལྟེ་གནས་སུ་རླངས་འཁོར་བཏང་ནས་འགྲོ་འོང་བྱེད་མཁན་ལ་བརྡུངས་པའི་གྱོད་གཞི་ཐོན་སྟེ་མི་སྣ་ཤི་རྨས་ཚབས་ཆེན་བྱུང་བ་དེའི་ངོ་བོ་ནི་ཧ་ཅང་ངན་པོ་ཞིག་རེད། དེར་བརྟེན་ནུས་ཤུགས་ཡོད་རྒུས་རྨས་མ་སྐྱོབ་བཅོས་བྱེད་པ་དང་ཤི་རྨས་བྱུང་བའི་མི་སྣ་དང་ཁོང་ཚོའི་ནང་མིར་སེམས་གསོ་དང་རྗེས་འཇུག་ལས་དོན་ཡག་པོ་སྒྲུབ་དགོས་པ་དང་། ལག་དམར་བར་ཁྲིམས་ལྟར་ཆད་པ་ནན་པོ་གཅོད་པ། ས་གནས་ཁག་དང་འབྲེལ་ཡོད་སྡེ་ཚན་གྱིས་བསླབ་བྱ་གཏིང་ཟབ་བླངས་ནས་གཅིག་ཤེས་ཀུན་གྲོལ་གྱིས་ཉེན་ཁ་འབྱུང་རྩ་ནས་འགོག་ཟོན་བྱ་རྒྱུར་ཤུགས་སྣོན་རྒྱག་པ་དང་། འགལ་ཟླ་དང་རྩོད་གཞི་དུས་ཐོག་ཏུ་སེལ་བ། གྱོད་གཞི་ཚབས་ཆེན་ཐོན་རྒྱུ་ནན་འགོག་བཅས་བྱས་ཏེ། མི་དམངས་མང་ཚོགས་ཀྱི་ཚེ་སྲོག་བདེ་འཇགས་དང་སྤྱི་ཚོགས་བརྟན་ལྷིང་ནུས་ཤུགས་ཡོད་རྒུས་འགན་ལེན་བྱེད་དགོས།

    ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་དང་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་མཆན་བཀོད་མཛུབ་སྟོན་གནང་ཞིང་། ཁོང་གིས་རྨས་མ་ནུས་ཤུགས་ཡོད་རྒུས་མྱུར་སྐྱོབ་བྱེད་པ་དང་རྗེས་འཇུག་ལས་དོན་ཡག་པོ་བསྒྲུབས་ནས་གྱོད་གཞི་གང་མགྱོགས་གསལ་རྟོགས་བྱེད་པ་དང་འབྲེལ་ཁྲིམས་ལྟར་ལག་དམར་བར་ཆད་པ་ནན་པོ་གཅོད་དགོས། འགོག་ཟོན་བྱ་རྒྱུ་ཟུང་འབྲེལ་བྱས་ནས་ཉེན་ཁ་དང་མངོན་མེད་རྐྱེན་ངན་དང་སྤྱི་ཚོགས་ཀྱི་འགལ་བ་གྲལ་བཤེར་དང་སེལ་བའི་ལས་དོན་ཏན་ཏིག་བསྒྲུབས་ཏེ། སྤྱི་ཚོགས་སྤྱི་ཡོངས་བརྟན་པོ་ཡོང་བའི་འགན་ལེན་བྱེད་དགོས་ཞེས་གསུངས་པ་རེད།

    ཞི་ཅིན་ཕིང་གི་མཛུབ་སྟོན་གལ་ཆེན་གཞིར་བཟུང་ཀྲུང་དབྱང་གིས་ལས་དོན་ཚོགས་ཆུང་ས་གནས་དེ་གར་ལས་དོན་ལ་མཛུབ་ཁྲིད་དང་བཀོད་སྒྲིག་བྱེད་པར་མངགས་པ་དང་། ཀོང་ཏུང་ཞིང་ཆེན་དང་དེ་བཞིན་ཀྲུའུ་ཧའེ་གྲོང་ཁྱེར་གྱིས་རྨས་མ་སྐྱོབ་བཅོས་དང་། གྱོད་གཞི་མྱུལ་ཞིབ། སྤྱི་ཚོགས་ཁྱོན་ཡོངས་ནས་འགོག་ཟོན་སོགས་ཀྱི་ལས་དོན་ནུས་ཤུགས་ཡོད་རྒུས་སྒྲུབ་བཞིན་ཡོད་པ་རེད།