འཇོལ་རྫོང་གི་སློབ་གསོས་དཀའ་སྡུག་གི་ཁྲོད་ནས་འབད་བརྩོན་བྱས་མཐར་འབྲས་བུ་སྨིན།

    འཇོལ་རྫོང་སློབ་ཆུང་གཉིས་པ་དེ་འབྲི་ཆུའི་གྲོག་རོང་གི་རི་སྐེད་དུ་ཆགས་ཡོད།  སློབ་གྲྭ་འདིར་མི་དགུའི་ལམ་ལུགས་ཀྱི་རྐང་རྩེད་སྤོ་ལོའི་རྩེད་ར་ཙམ་མ་གཏོགས་མེད་མོད། འོན་ཀྱང་འདིར་ལག་རྩེད་སྤོ་ལོ་ཐང་7དང་། ཆུ་རྐྱལ་ཁང་1། མདའ་འཕེན་ཁང་1། ཁང་ནང་གི་ལུས་རྩལ་ཁང་1བཅས་ཡོད་པ་རེད།

    2012ལོར་འཇོལ་རྫོང་གིས་གཅིག་སྡུད་གཞི་ཁྱོན་ལྡན་པའི་སློབ་གྲྭ་གཉེར་ལ། ལོ་15ཡི་གཞུང་གྲོན་སློབ་གསོའི་སྲིད་ཇུས་དོན་འཁྱོལ་བྱས་པས་ཞིང་འབྲོག་པའི་བུ་ཕྲུག་ལ“འགན་ལེན་གསུམ”(ཟས་སྡོད་སློབ་ཡོན་གསུམ)གྱི་སློབ་ཡོན་མི་དགོས་པའི་སློབ་གསོ་ལོངས་སུ་སྤྱོད་རྒྱུ་བྱུང་ཡོད། གཅིག་སྡུད་གཞི་ཁྱོན་ལྡན་པའི་སློབ་གཉེར་བྱས་རྗེས་འཇོལ་རྫོང་སློབ་ཆུང་གཉིས་པས་གཅིག་རྗེས་གཉིས་མཐུད་ངང་བརྒྱུད་ལམ་སྣེ་མང་གི་སློབ་ཁང་དང་།    རྩིས་རྒྱག་འཕྲུལ་འཁོར་ཁང་།   ཞབས་བྲོ་སློབ་ཁང་།       མཛེས་རྩལ་སློབ་ཁང་།      ཚོད་ལྟ་ཁང་། ལུས་རྩལ་ཁང་བཅས་བསྐྲུན་ཡོད་པ་རེད།

    “དེ་གོང་འཇོལ་རྫོང་གི་སློབ་ཆུང་ཁག་གངས་རི་དང་གྲོག་རོང་དུ་ཡོད་པ་མ་ཟད། མང་ཆེ་བ་དགེ་རྒན་རེ་དང་སློབ་གྲྭ་རེ་ཡིན”ཞེས་ད་ལོ་ལོ་42ལ་སླེབས་པའི་བཀྲ་ཤིས་རྡོ་རྗེས་བཤད། ཁོ་2004ལོར་བདེ་ཆེན་ཁུལ་མི་རིགས་དགེ་འོས་སློབ་གྲྭ་ནས་ཐོན་ཏེ་འཇོལ་རྫོང་གཡག་རྭ་ལ་ཤང་ལྷ་ཆེན་སློབ་ཆུང་དུ་དགེ་རྒན་གྱི་ལས་ཀ་གཉེར་ལ། སློབ་གྲྭ་དེར་སློབ་མ་16ཡོད་དང་དགེ་རྒན་ཁོ་གཅིག་བུ་མ་གཏོགས་མེད་པ་རེད།

    བཀྲ་ཤིས་རྡོ་རྗེ་ཡིས་ཕྱིར་དྲན་བྱས་པ་ན་སྐབས་དེར་དུ་ལྷགས་ཆེན་ཁ་སློབ་ཆུང་དུ་སློབ་ཁང་གཅིག་མ་གཏོགས་མེད་ལ། ཤིང་གི་ཀ་བ་དང་ས་ཡི་མཁར་བྱས་པས་དབྱར་དུས་ཆར་ཐིགས་ཡོང་ལ་དགུན་དུས་བསེར་རླུང་གཡུག་པ་རེད། “སློབ་ཁང་དེ་ནི་གྲོང་མིའི་བྱེད་སྒོ་ཁང་རེད། གལ་སྲིད་གྲོང་ཚོའི་ནང་ཚོགས་འདུ་འཚོགས་སྐབས་ངས་སྒྲོག་ཙེ་དང་། རྐུབ་སྟེགས། ནག་པང་བཅས་ཁང་པའི་ཕྱི་རོལ་དུ་སྤོ་རྒྱུ་ལས་མ་འདས། མུ་མཐུད་སློབ་ཚན་ཉན་རྒྱུ་ཡིན”ཞེས་བཤད།

“སྐད་ཡིག་དང་། རྩིས་རིག རོལ་དབྱངས། ལུས་རྩལ་སོགས་ཚང་མ་ངས་སློབ་དགོས། ལུས་རྩལ་མཁོ་ཆས་ལག་རྩེད་སྤོ་ལོ་ལས་མེད། ཁུང་བུ་བརྡོལ་ནས་དབུགས་ཤོར་རྗེས་རྐང་རྩེད་སྤོ་ལོ་རྒྱག་གི་ཡོད”ཅེས་བཀྲ་ཤིས་རྡོ་རྗེ་ཡིས་བཤད། ཁོང་གིས་སློབ་མ་ཁ་ཤས་ཀྱི་ཁྱིམ་ཐག་རིང་བས་རྐང་པ་རི་ཞིང་ནགས་ལ་སྤོ་དགོས་པས་སློབ་གྲྭར་སྐྱོད་པ་དང་སློབ་ཚན་གྲོལ་བའི་དུས་ཚོད་ཆུ་ཚོད་གཅིག་ནར་འགྱངས་དང་སྔ་སྣུར་བྱེད་དགོས་ཀྱི་ཡོད་ཅེས་བཤད།

    གཅིག་སྡུད་གཞི་ཁྱོན་ལྡན་པའི་སློབ་གཉེར་བྱས་རྗེས་ད་ཆ་འཇོལ་རྫོང་སློབ་ཆུང་གཉིས་པའི་སློབ་མ་རྣམས་གཟའ་ཟླ་བ་ནས་གཟའ་པ་སངས་བར་སློབ་གྲྭར་སློབ་སྦྱོང་དང་འཚོ་བ་བསྐྱལ་རྒྱུ་དང་གཟའ་མཇུག་ཏུ་ཁྱིམ་བདག་གིས་ཁྱིམ་དུ་བསུ་རྒྱུ་རེད། སློབ་མ་ཚོས་སློབ་གྲྭར་སློབ་སྦྱོང་དང་འཚོ་བ་སྐྱེལ་བའི་ཞོར་ལ་རྐང་རྩེད་སྤོ་ལོ་དང་།     ལག་རྩེད་སྤོ་ལོ།        ཕིང་ཕང་སྤོ་ལོ།    བྱ་སྒྲོའི་སྤོ་ལོ།       མདའ་འཕེན། སྐོར་བྲོ། གཞས །       ཡིག་གཟུགས། རི་མོ།      མི་མེད་གནམ་གྲུ་སོགས་སྤྲོ་སྣང་འཛིན་གྲྭ་20ལྷག་ཙམ་རང་འདེམས་བྱ་རྒྱུ་ཡོད་པ་རེད།

    སློབ་མས་དགའ་ཤོས་བྱེད་པའི་འཛིན་གྲྭ་ནི་རྐང་རྩེད་སྤོ་ལོ་ཡིན།        སློབ་གྲྭ་དེའི་བུད་མེད་རྐང་རྩེད་སྤོ་ལོའི་རུ་ཁག་གིས་2019ལོར་ཡུན་ནན་ཞིང་ཆེན་སློབ་རའི་རྐང་རྩེད་སྤོ་ལོའི་སློབ་ཆུང་གི་བྱ་དགའ་ཨང་དང་པོ་བླངས་པ།                    སྐྱེས་པའི་རྐང་རྩེད་སྤོ་ལོའི་རུ་ཁག་ལ་2023ལོར“བདེ་སྐྱིད་མཐའ་མཚམས་བུམ་པའི”ཀྲུང་གོའི་ཚང་ཡོན་གཞོན་ནུ་ལོ་ཆུང་གི་རྐང་རྩེད་སྤོ་ལོའི་གདན་ཞུའི་འགྲན་བསྡུར་གྱི་སྐར་གྲངས་ཀྱི་ཨང་དང་པོ་ཐོབ་པ་རེད།