བདེ་ཆེན་ཁུལ་སྤྱི་ཚོགས་ཚན་རིག་ལས་རིགས་མཉམ་འབྲེལ་ལྷན་ཚོགས་ཀྱི་འཐུས་མི་ཚོགས་ཆེན་ཐེངས་གསུམ་པ་འཚོགས་པ།
རྩོམ་པ་པོ། ཡིག་བསྒྱུར། དུས་ཚོད། 2024-11-28 རྩོམ་ཁུངས། སེམས་ཀྱི་ཉི་ཟླ་བོད་ཡིག་དྲ་བ།
སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཟླ་11པའི་ཚེས་27ཉིན། བདེ་ཆེན་ཁུལ་སྤྱི་ཚོགས་ཚན་རིག་ལས་རིགས་མཉམ་འབྲེལ་ལྷན་ཚོགས་ཀྱི་འཐུས་མི་ཚོགས་ཆེན་ཐེངས་གསུམ་པ་སེམས་ཀྱི་ཉི་ཟླར་འཚོགས་པ།
ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་ཚོགས་ཆེན་དུ་ཞུགས་པ་དང་གསུང་བཤད་གནང་བ། ཞིང་ཆེན་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་གཞོན་པ་ཝང་ཅན་ཧྭ་ཚོགས་ཆེན་དུ་ཞུགས་པ་དང་རྟེན་འབྲེལ་ཞུས། ཁུལ་ཨུའི་ཧྲུའུ་ཅི་གཞོན་པ་ཕེང་ཧྲན་འགོ་ཚུགས་མཛད་སྒོ་གཙོ་སྐྱོང་གནང་བ།
ལུའོ་ཁྲའོ་ཧྥེང་གིས་ཁུལ་ཨུ་དང་ཁུལ་དམངས་ཆེན། ཁུལ་སྲིད་གཞུང་། ཁུལ་སྲིད་གྲོས་བཅས་ཀྱི་ཚབ་བྱས་ནས་ཚོགས་ཆེན་རྒྱལ་ཁའི་ངང་འཚོགས་པར་སྤྲོ་སེམས་འཁོལ་བའི་རྟེན་འབྲེལ་ཞུས་བ་དང་། ཚོགས་ཞུགས་འཐུས་མི་ཡོངས་དང་རྒྱལ་ཡོངས་རྒྱ་ཆེའི་སྤྱི་ཚོགས་ཚན་རིག་ལས་བྱེད་པར་ལྷག་བསམ་ཟོལ་མེད་ཀྱི་འཚམས་འདྲི་ཞུས་བ། ཁོང་གིས་ཁུལ་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་ཀྱི་འཐུས་མི་ཚོགས་ཆེན་ཐེངས་གཉིས་པ་ནས་བཟུང་ཁུལ་ཡོངས་མཚན་ཉིད་རིག་པ་དང་སྤྱི་ཚོགས་ཚན་རིག་གི་བྱ་བཞག་ནས་ཐོབ་པའི་གྲུབ་འབྲས་ལ་གདེང་འཇོག་གང་ལེགས་བྱས་པ་དང་ཁུལ་ཡོངས་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་རྩ་འཛུགས་ཀྱིས་ཏང་གི་གསར་གཏོད་རིག་པའི་གཞུང་ལུགས་དེ་གངས་ལྗོངས་ས་མཐོར་ཟབ་སྤེལ་གཏོང་བར་ནུས་ཤུགས་དེ་བས་ཆེ་རུ་གཏོང་བ། ཀྲུང་གོའི་ལུགས་ཀྱི་དེང་རབས་ཅན་གྱི་བདེ་ཆེན་ལག་བསྟར་ལ་སྐུལ་འདེད་གཏོང་བའི་ཁྲོད་ལེགས་སྐྱེས་འབུལ་བ། བྱ་སྤྱོད་གསར་པ་མངོན་འགྱུར་བྱུང་བ། རྣམ་པ་གསར་པ་འགྲེམ་སྟོན་བྱེད་དགོས་པའི་རེ་བ་བཏོན།
ལུའོ་ཁྲའོ་ཧྥེང་གིས་ཁུལ་ཡོངས་སྤྱི་ཚོགས་ཚན་རིག་འཐབ་ཕྱོགས་ཀྱིས་ཐོག་མཐའ་བར་གསུམ་དུ་མར་ཁེ་སིའི་རིང་ལུགས་ཀྱི་སློབ་སྟོན་གོ་གནས་དང་མི་དམངས་ལྟེ་བར་འཛིན་པའི་ཞིབ་འཇུག་ཁྲིད་ཕྱོགས་རྒྱུན་འཁྱོངས་བྱས་ནས། མར་ཁེ་སིའི་རིང་ལུགས་ཀྲུང་གོ་ཅན། དུས་རབས་ཅན།མང་ཚོགས་ཅན་བཅས་སུ་འགྱུར་བར་རྒྱུན་མཐུད་ངང་སྐུལ་འདེད་གཏོང་དགོས། ལྟེ་བར་དམིགས་པ་དང་ཁྱོན་ཡོངས་ལ་ཞབས་འདེགས་ཞུ་རྒྱུ་མཐའ་འཁྱོངས་བྱས་ནས། ཁུལ་ཨུ་དང་ཁུལ་སྲིད་གཞུང་ལ་སྤུས་ཚད་མཐོ་བའི་ཐབས་ཇུས་འདྲི་རྟོག་བཏོན་དགོས། ཏང་གིས་ཚན་རིག་དང་སྤྱི་ཚོགས་ཚན་རིག་ལས་ཀའི་འགོ་ཁྲིད་བྱེད་ཤུགས་ཆེ་རུ་བཏང་བ་དང་ལེགས་སུ་བཏང་ནས་ཁུལ་ཡོངས་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་ཀྱི་རྩ་འཛུགས་འཛུགས་སྐྲུན་དང་ཤེས་ལྡན་མི་སྣའི་དཔུང་ཁག་འཛུགས་སྐྲུན་བྱེད་ཤུགས་ཆེ་རུ་གཏོང་དགོས་པའི་ནན་བཤད་གནང་།
ལུའོ་ཁྲའོ་ཧྥེང་གིས་ཁུལ་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་ཀྱི་འགོ་ཁྲིད་ཚན་པ་སྐབས་གསར་པས་འགན་འཁྲི་དང་ལས་འགན་ཕྲག་ཏུ་འཁུར་དགོས། ཁུལ་ཡོངས་སྤྱི་ཚོགས་ཚན་རིག་རྩ་འཛུགས་ཀྱིས་ཟམ་པ་དང་འབྲེལ་ཐག་ཡག་པོ། སྤྱི་ཚོགས་ཚན་རིག་ལས་རིགས་ཀྱི་ཤེས་ལྡན་མི་སྣར་རྒྱ་ཁྱབ་ཏུ་མཐུན་སྒྲིལ།སྤྱི་ཚོགས་ཚན་རིག་ལས་རིགས་ཀྱི་ཐོན་ཁུངས་ཆ་ཚང་སྡེབ་སྒྲིག སྤྱི་ཚོགས་ཚན་རིག་ལས་རིགས་ཀྱི་སྟོབས་ཤུགས་གཅིག་སྒྲིལ་གང་ལེགས་བཅས་བྱེད་དགོས། ཁུལ་ཡོངས་སྤྱི་ཚོགས་ཚན་རིག་ལས་བྱེད་པ་ཡུལ་དངོས་དང་གཞི་རིམ། མང་ཚོགས་བཅས་སུ་ཟབ་ཞུགས་བྱེད་དགོས། རིམ་ཁག་ཏང་ཨུ་དང་སྲིད་གཞུང་གིས་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་ལས་ཀར་འཕེལ་རྒྱས་ཁོར་ཡུག་དང་ལས་སྒྲུབ་ཆ་རྐྱེན་དེ་བས་ཡག་པོ་གསར་གཏོད་བྱེད་དགོས་པའི་ནན་བཤད་གནང་།
ཝང་ཅན་ཧྭས་བདེ་ཆེན་ཁུལ་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་ཀྱིས་ས་ཁོངས་ཀྱི་ཁྱད་ཆོས་ལྡན་པའི་སྤྱི་ཚོགས་ཚན་རིག་ཁྱབ་སྤེལ་སྤུས་རྟགས་གསར་གཏོད་བྱེད་དགོས་པ་དང་སྐུབས་བཅུ་གཅིག་པའི་ཞིང་ཨུའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་གཏིང་ཟབ་ཏུ་དོན་འཁྱོལ་མཐར་ཕྱིན་བྱེད་དགོས། རང་འགུལ་གྱིས་ཞིང་ཡོངས་སྤྱི་ཚོགས་ཚན་རིག་ལས་དོན་ཀྱི་སྤྱི་ཡོངས་སུ་མཉམ་འདྲེས་བྱེད་དགོས་པའི་བླང་བྱ་བཏོན།
ཁུལ་འགོ་ཁྲིད་ཁྲིན་ཆོན། ཡུས་ཡུང་ཧུང་། ལིན་ཧའོ། ཧྲེན་ཁྲོན་མིང་འགོ་ཚོགས་མཛད་སྒོར་ཞུགས། མཐའ་མཚམས་ཁུལ་དང་གྲོང་ཁྱེར་གྱི་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་ཀྱི་རྟེན་འབྲེལ་འཕྲིན་ཡིག་བསྐུར་ཡོད། ཁུལ་རིག་རྩལ་ལྷན་ཚོགས་ཀྱི་འགན་འཁུར་བློ་མཐུན་གྱིས་མི་དམངས་ཚོགས་པའི་ཚབ་ཞུས་ནས་ཤིས་ཚིག་གནང་བ།
ཚོགས་ཆེན་ཐོག་ཁུལ་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་སྐབས་གཉིས་པའི་ཨུ་ཡོན་ལྷན་ཁང་གི་ལས་ཀའི་སྙན་ཞུ་སོགས་ཉན་བ་དང་གྲོས་ཞིབ་གནང་བ། ཁུལ་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་སྐབས་གསུམཔའི་ཨུ་ཡོན་ལྷན་ཁང་གི་ཨུ་ཡོན་བདམས་ཐོན་བྱུང་བ།
