བདེ་ཆེན་གྱིས་གནམ་བདེ་སྒོ་མོ་ཆེའི་ཐང་ཆེན་ནས་ཡོང་བའི་རྒྱལ་དར་བསུ་བའི་མཛད་སྒོ་འཚོགས།

 ཟླ་12པའི་ཚེས་4ཉིན་གྱི་སྔ་དྲོ། དམིགས་བསལ་གྱི་རྒྱལ་དར་སྒྲེང་བའི་མཛད་སྒོ་དེ་བདེ་ཆེན་ཁུལ་ཨུའི་ལས་ཁུངས་ཀྱི་སྒོ་ར་ཆེན་པོའི་ནང་འཚོགས་པ་དང་། གནམ་བདེ་སྒོ་མོ་ཆེའི་ཐང་ཆེན་ནས་ཡོང་བའི་སྐར་ལྔའི་དར་དམར་དེ་དལ་བུར་སྒྲེང་ཡོད། སྤྱི་ཚོགས་ལས་རིགས་ཁག་གི་འཐུས་མིས་ས་གནས་ས་ཐོག་ཏུ་གནམ་བདེ་སྒོ་མོ་ཆེ་ནས་ཡོང་བའི་རྒྱལ་དར་ལ་བསུ་བ་དང་ཞལ་མཇལ་ཞུས་པ་རེད།

      ཤེས་རྟོགས་བྱུང་བར་གཞིགས་ན། ཁུལ་ཨུ་དང་ཁུལ་སྲིད་གཞུང་གིས་རེ་ཞུ་ཧུར་ཐག་ཞུས་པ་དང་པེ་ཅིང་གྲོང་ཁྱེར་མི་དམངས་སྲིད་གཞུང་གི་གནམ་བདེ་སྒོ་མོ་ཆེ་ས་ཁུལ་གྱི་དོ་དམ་ཨུ་ལྷན་གྱི་ཞིབ་མཆན་ཐོབ་པ་བརྒྱུད།  རང་ཁུལ་ལ་ད་ལོའི་ཟླ་9པའི་ཚེས་13ཉིན（བདེ་ཆེན་ཁུལ་སྟོན་དྲན་གསོའི་ཉིན་མོ）གནམ་བདེ་སྒོ་མོ་ཆེའི་ཐང་ཆེན་དུ་སྒྲེང་མྱོང་བའི་རྒྱལ་དར་ཐོབ་པ་རེད། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་75འཁོར་བའི་སྐབས་སུ་བདེ་ཆེན་ཁུལ་སྟོན་དྲན་གསོའི་ཉིན་མོར་ཕུལ་བའི་རྒྱལ་དར་དེ་རང་ཁུལ་གྱི་ངོས་ནས་བརྗོད་ན་དམིགས་བསལ་གྱི་དྲན་གསོའི་དོན་སྙིང་ལྡན་ཡོད་པས་ཁུལ་ཡོངས་ཀྱི་མི་རིགས་ཁག་གི་མང་ཚོགས་ཀྱིས་རྒྱལ་ཁབ་ཀྱི་གནས་ཚུལ་ལ་དགའ་ཞེན་དང་རྒྱལ་ཁབ་སྟོབས་ཆེར་གཏོང་བའི་སྙིང་སྟོབས་སྔར་བས་འཕེལ་ངེས་རེད།

ཉིན་དེའི་སྔ་དྲོའི་ཆུ་ཚོད་9པར་རྒྱལ་དར་སྒྲེང་བའི་མཛད་སྒོ་འགོ་ཚུགས་པ་དང་རྒྱལ་དར་སྲུང་སྐྱོང་རུ་ཁག་གིས་རྒྱལ་དར་ཚོགས་རའི་ནང་དུ་སྲུང་སྐྱེལ་བྱས་པ་དང་རྔམ་བརྗིད་ལྡན་པའི《བློས་བླངས་དམག་གི་མདུན་སྐྱོད་གླུ་དབྱངས》དང་བསྟུན་ནས་མི་སྣ་ཡོངས་ཀྱིས་གནམ་བདེ་སྒོ་མོ་ཆེའི་ཐང་ཆེན་ནས་ཡོང་བའི་སྐར་ལྔའི་དར་དམར་དལ་བུར་སྒྲེང་བ་མིག་གིས་མཐོང་བྱུང་། དེ་རྗེས་བྱེད་སྒོའི་ནང་ཞུགས་མཁན་ཏང་ཡོན་ཚོས་མཉམ་དུ་ཏང་ཞུགས་དམ་བཅའ་བསྐྱར་དྲན་བྱས་པ་རེད། ཁུལ་ཨུའི་རྒྱུན་ཨུའམ་ཁུལ་ཨུའི་རྩ་འཛུགས་པུའུ་ཡི་པུའུ་ཀྲང་ལི་དབྱང་གིས་རྒྱལ་དར་ཞལ་འདེབས་ལག་ཁྱེར་སྒྲོག་སྦྱངས་གནང་བ་དང་འབྲེལ་ཁུལ་ཨུའི་ཚབ་ཞུས་ནས་བདེ་ཆེན་དམར་དམག་རྒྱང་སྐྱོད་རྟེན་རྫས་བཤམས་མཛོད་ཁང་གི་འགན་འཁུར་བར་ལག་ཁྱེར་རྩིས་སྤྲོད་ལེན་བྱས་པ་དང་ལག་རྟགས་ཐོབ་པའི་རྒྱལ་དར་དེ་བདེ་ཆེན་དམར་དམག་རྒྱང་སྐྱོད་རྟེན་རྫས་བཤམས་མཛོད་ཁང་གིས་ཡུན་རིང་ཉར་ཚགས་བྱ་རྒྱུ་རེད། སྒྲོག་འགྲེལ་ཆུང་གྲས་ཀྱི་ལྷུ་ཚིགས་ནང་བྱེད་སྒོའི་ནང་ཞུགས་མཁན་ཚོས་ད་དུང་རྒྱལ་དར་བཅའ་ཁྲིམས་དང་རྒྱལ་གླུའི་བཅའ་ཁྲིམས་མཉམ་དུ་སློབ་སྦྱོང་བྱས་པ་རེད།

   རང་ཁུལ་གྱི་འགོ་ཁྲིད་ཧྲི་ཁྲུན་མིང་དང་།དབྱང་ཅི་ཝུན། ཕན་ཞུའེ་དབྱིང་། ལིའུ་ཐེན་མིང་། དབྱང་ཁྲེང་ལེའང་བཅས་དང་། ཁུལ་ཐད་གཏོགས་ལས་ཁུངས་ཀྱི་ལས་བྱེད་ལས་བཟོ་དང་། ཁུལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་སྔོན་ཐོན་མི་སྒེར་དང་།ངལ་རྩོལ་དཔེ་བཟང་བ། ཀུན་སྤྱོད་དཔེ་བཟང་བ། སྔོན་ཐོན་ལས་དོན་པ། སློབ་གྲྭའི་དགེ་སློབ། སྤྱི་བདེ་ལས་བྱེད་ཉེན་རྟོག་པ། དེ་བཞིན་ཆོས་ལུགས་ལས་རིགས་ཀྱི་མི་སྣའི་འཐུས་མི་བཅས་དང་སེམས་ཀྱི་ཉི་ཟླ་གྲོང་ཁུལ་གྱི་མང་ཚོགས་ཁག་གཅིག་རྒྱལ་དར་སྒྲེང་བའི་མཛད་སྒོར་ཞུགས་ཡོད་པ་རེད།