ཞི་ཅིན་ཕིང་གིས་2024ལོའི་འཛམ་གླིང་གི་སྲོལ་རྒྱུན་གསོ་རིག་ཚོགས་ཆེན་ལ་རྟེན་འབྲེལ་འཕྲིན་ཡིག་སྤྲིངས་པ།

རྩོམ་པ་པོ།     ཡིག་བསྒྱུར།       དུས་ཚོད།   2024-12-05   རྩོམ་ཁུངས།    མི་དམངས་ཉིན་རེའི་ཚགས་པར།

    ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། ཟླ་12ཚེས་3ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་2024ལོའི་འཛམ་གླིང་གི་སྲོལ་རྒྱུན་གསོ་རིག་ཚོགས་ཆེན་ལ་རྟེན་འབྲེལ་འཕྲིན་ཡིག་སྤྲིངས་པ་རེད།

    ཞི་ཅིན་ཕིང་གིས་བསྟན་དོན། སྲོལ་རྒྱུན་གསོ་རིག་ནི་མིའི་རིགས་ཀྱི་ཤེས་དཔལ་གསར་གཏོད་ཀྱི་གྲུབ་འབྲས་ཤིག་ཡིན་པས་མི་རབས་ནས་མི་རབས་བར་སྲུང་སྐྱོང་དང་སྙིང་བཅུད་རྒྱུན་འཛིན་བྱེད་དགོས་ལ། དུས་བསྟུན་འཕེལ་རྒྱས་དང་གཞུང་འཁྱོངས་གསར་འབྱེད་ཀྱང་བྱེད་དགོས། སྲོལ་རྒྱུན་གསོ་རིག་གི་ཕུལ་བྱུང་འཐུས་ཚབ་ཡིན་པའི་ཀྲུང་ལུགས་གསོ་རིག་ནི་ཀྲུང་ཧྭའི་ཤེས་དཔལ་ཁྲོད་ཀྱི་མཆོག་ནོར་ལྟ་བུ་ཞིག་ཡིན་པས། ཀྲུང་གོས་ཐོག་མཐའ་བར་གསུམ་དུ་དེང་རབས་གསོ་རིག་དང་སྲོལ་རྒྱུན་གསོ་རིག་གཉིས་ཀ་གལ་ཆེ་མཉམ་དུ་བརྩིས་ནས་འཕེལ་རྒྱས་གཏོང་རྒྱུ་མཐའ་འཁྱོངས་བྱས་ཐོག་ཀྲུང་ལུགས་གསོ་རིག་དང་ཕྱི་ལུགས་གསོ་རིག་གི་ལེགས་ཆ་གསབ་རེས་དང་མཐུན་སྦྱོར་འཕེལ་རྒྱས་ལ་སྐུལ་འདེད་གཏོང་བ་དང་། ཀྲུང་ལུགས་གསོ་རིག་གི་དེང་རབས་ཅན་དང་ཐོན་ལས་ཅན་ལ་སྐུལ་འདེད་བཏང་བས་ཐུན་མོང་མ་ཡིན་པའི་སྲོལ་རྒྱུན་གསོ་རིག་འཕེལ་རྒྱས་ཀྱི་ལམ་བུ་ཞིག་ཏུ་སྐྱོད་ཐུབ་ཡོད།

    ཞི་ཅིན་ཕིང་གིས་ནན་བཤད་གནང་དོན། འཛམ་གླིང་གི་དར་རྒྱས་གོང་འཕེལ་ལ་རྒྱལ་ཁབ་ཁག་གིས་འཕྲོད་བསྟེན་བདེ་ཐང་ཁྱབ་ཁོངས་ཀྱི་མཉམ་ལས་ལ་སྔར་བས་ཤུགས་སྣོན་བརྒྱབ་ནས་གོ་ལ་ཧྲིལ་པོའི་འཕྲོད་བསྟེན་ཐད་ཀྱི་འགྲན་སློང་ལ་མཉམ་དུ་ཁ་གཏད་བཅག་སྟེ། མིའི་རིགས་ཀྱི་འཕྲོད་བསྟེན་བདེ་ཐང་གི་གཅིག་མཐུན་ཚོགས་པ་འཛུགས་རྒྱུར་སྐུལ་འདེད་གཏོང་དགོས་པ་དེ་ཡིན། ཀྲུང་གོ་ཕྱོགས་ཀྱིས་ཕྱོགས་ཁག་དང་མཉམ་དུ་སྲོལ་རྒྱུན་གསོ་རིག་ཐད་ཕན་ཚུན་སློབ་སྦྱོང་དང་ཕན་ཚུན་དཔྱད་གཞིར་འཛིན་རྒྱུར་ཤུགས་སྣོན་བརྒྱབ་ནས་སྲོལ་རྒྱུན་གསོ་རིག་གོ་ལ་ཧྲིལ་པོའི་འཕྲོད་བསྟེན་མ་ལག་ནང་མཉམ་འདྲེས་གཏིང་ཟབ་ཐུབ་རྒྱུ་དང་སྲོལ་རྒྱུན་གསོ་རིག་གི་གསར་གཏོད་རྣམ་པའི་གཞན་སྒྱུར་དང་གསར་གཏོད་རྣམ་པའི་འཕེལ་རྒྱས་ལ་སྐུལ་འདེད་བཏང་ནས། སྲོལ་རྒྱུན་གསོ་རིག་ལས་རྒྱལ་ཁབ་ཁག་གི་མི་དམངས་ལ་ཕན་བདེ་དེ་བས་ཆེ་བ་སྐྲུན་འདོད་ཡོད།

    2024ལོའི་འཛམ་གླིང་གི་སྲོལ་རྒྱུན་གསོ་རིག་ཚོགས་ཆེན་དེ་ཉིན་པེ་ཅིང་དུ་འགོ་ཚུགས་ཤིང་། བརྗོད་དོན་གཙོ་བོ་ནི“སྣ་མང་། རྒྱུན་འཛིན། གསར་གཏོད། སྲོལ་རྒྱུན་གསོ་རིག་ལས་འཛམ་གླིང་ལ་ཕན་བདེ་སྐྲུན”ཞེས་པ་དེ་ཡིན། ཚོགས་ཆེན་དེ་ནི་པེ་ཅིང་གྲོང་ཁྱེར་མི་དམངས་སྲིད་གཞུང་དང་། རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན། རྒྱལ་ཁབ་ཀྲུང་ལུགས་གསོ་རིག་དོ་དམ་ཅུས་བཅས་ཀྱིས་ཐུན་མོང་ཐོག་གཙོ་གཉེར་བྱས་པ་དང་འཛམ་གླིང་འཕྲོད་བསྟེན་རྩ་འཛུགས་ཀྱིས་མཉམ་འབྲེལ་ཐོག་གཉེར་བ་ཞིག་རེད།


分享到：QQ空间新浪微博腾讯微博人人网微信