ཞི་ཅིན་ཕིང་གིས་ཆ་འཕྲིན་རོགས་སྐྱོར་དཔུང་སྡེར་གཟིགས་ཞིབ་གནང་བ།

    ཟླ་12ཚེས་4ཉིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་ཆ་འཕྲིན་རོགས་སྐྱོར་དཔུང་སྡེར་གཟིགས་ཞིབ་གནང་བ་མ་ཟད། ཆ་འཕྲིན་རོགས་སྐྱོར་དཔུང་སྡེའི་དཔོན་དམག་ཡོངས་ལ་ལྷག་བསམ་ཟོལ་མེད་ཀྱི་འཚམས་འདྲི་ཡང་ཞུས་ཤིང་། འདི་ནི་ཞི་ཅིན་ཕིང་གིས་གསུང་བཤད་གལ་ཆེན་གནང་བཞིན་པ།

    ཟླ་12ཚེས་4ཉིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་ཆ་འཕྲིན་རོགས་སྐྱོར་དཔུང་སྡེར་གཟིགས་ཞིབ་གནང་ནས་ཆ་འཕྲིན་རོགས་སྐྱོར་དཔུང་སྡེའི་ཏང་གི་འཐུས་མི་ཚོགས་ཆེན་ཐེངས་དང་པོ་འཚོགས་པར་སྤྲོ་སེམས་འཁོལ་པོས་རྟེན་འབྲེལ་ཞུས་ཤིང་། འདི་ནི་ཞི་ཅིན་ཕིང་གིས་འཐུས་མི་ཚོར་བྱམས་བརྩེའི་ངང་ཕྱག་གཏོང་བཞིན་པ།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་12ཚེས་5ཉིན་གློག་འཕྲིན་འབྱོར་གསལ། ཚེས་4ཉིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་ཆ་འཕྲིན་རོགས་སྐྱོར་དཔུང་སྡེར་གཟིགས་ཞིབ་གནང་ནས་ཏང་ཀྲུང་དབྱང་དང་ཀྲུང་དབྱང་དམག་ཨུད་ཀྱི་ཚབ་ཞུས་ཏེ་ཆ་འཕྲིན་རོགས་སྐྱོར་དཔུང་སྡེའི་ཏང་གི་འཐུས་མི་ཚོགས་ཆེན་ཐེངས་དང་པོ་འཚོགས་པར་སྤྲོ་སེམས་འཁོལ་པོས་རྟེན་འབྲེལ་ཞུས་གནང་བ་མ་ཟད། ཆ་འཕྲིན་རོགས་སྐྱོར་དཔུང་སྡེའི་དཔོན་དམག་ཡོངས་ལ་ལྷག་བསམ་ཟོལ་མེད་ཀྱི་འཚམས་འདྲི་ཡང་ཞུས་གནང་བ་རེད། ཁོང་གིས་དུས་རབས་གསར་པའི་དམག་དཔུང་སྟོབས་ཆེར་གཏོང་བའི་དགོངས་པ་ལག་བསྟར་དང་དུས་རབས་གསར་པའི་དམག་དོན་འཐབ་ཇུས་བྱེད་ཕྱོགས་ལག་ལེན་བསྟར་ཏེ་འགན་འཁྲི་འཁུར་སེམས་ཆེ་རུ་གཏོང་བ་དང་། གསར་གཏོད་དང་ཚད་བརྒལ་བྱེད་ཕོད་པ། དཔུང་སྡེའི་རྨང་གཞི་བརྟན་དུ་གཏོང་བ་བཅས་བྱས་ནས་དེང་རབས་ཅན་གྱི་ཆ་འཕྲིན་རོགས་སྐྱོར་དཔུང་སྡེ་སྟོབས་ཆེན་ཞིག་ཧུར་ཐག་བསྐྲུན་ཏེ། རང་རེའི་དམག་གི་དྲ་རྒྱའི་ཆ་འཕྲིན་མ་ལག་འཛུགས་སྐྱོང་མཆོང་སྐྱོད་ལྟ་བུའི་འཕེལ་རྒྱས་ཡོང་བར་སྐུལ་འདེད་གཏོང་དགོས་པའི་ནན་བཤད་གནང་བ་རེད།

    ཆ་འཕྲིན་རོགས་སྐྱོར་དཔུང་སྡེ་ནི་དམག་རིགས་ཀྱི་གྲུབ་ཆ་དང་བཀོད་པ་ལེགས་སྒྲིག་སྒྱུར་བཅོས་ཁྲོད་གསར་དུ་བཙུགས་པའི་འཐབ་ཇུས་རང་བཞིན་གྱི་དམག་རིགས་ཤིག་ཡིན་ཞིང་། ད་ལོའི་ཟླ་4པར། ཞི་ཅིན་ཕིང་སྐུ་ངོ་མས་ཆ་འཕྲིན་རོགས་སྐྱོར་དཔུང་སྡེར་དམག་དར་བསྩལ་བ་མ་ཟད། བཀའ་སློབ་ཀྱང་གནང་བ་རེད།

    སྔ་དྲོའི་ཆུ་ཚོད་10པ་ཙམ་ལ། ཞི་ཅིན་ཕིང་ཆ་འཕྲིན་རོགས་སྐྱོར་དཔུང་སྡེའི་ལས་ཁུངས་སུ་ཕེབས་ནས་སྤྲོ་སེམས་འཁོལ་བའི་ཐལ་མོའི་རྡེབ་སྒྲའི་ཁྲོད་ཆ་འཕྲིན་རོགས་སྐྱོར་དཔུང་སྡེའི་ཏང་གི་འཐུས་མི་ཚོགས་ཆེན་ཐེངས་དང་པོའི་འཐུས་མི་ཡོངས་ལ་བྱམས་བརྩེའི་ངང་མཇལ་འཕྲད་གནང་བ་དང་ཚང་མ་དང་ལྷན་བཞུགས་དྲན་རྟེན་སྐུ་པར་ཡང་བསྐྱོན་པ་རེད།

    དེ་རྗེས། ཞི་ཅིན་ཕིང་གིས་ཆ་འཕྲིན་རོགས་སྐྱོར་དཔུང་སྡེའི་ལས་དོན་སྙན་སེང་གསན་པ་དང་འབྲེལ་གསུང་བཤད་གལ་ཆེན་ཡང་གནང་ཞིང་། ཁོང་གིས། མིག་སྔར་རེས་སྐོར་གསར་པའི་ཚན་རྩལ་གསར་བརྗེ་དང་དམག་དོན་གསར་བརྗེ་འཕེལ་རྒྱས་མྱུར་པོ་འགྲོ་བ་དང་དམག་འཁྲུག་གི་རྣམ་པར་འགྱུར་ལྡོག་མགྱོགས་མྱུར་འབྱུང་ནས་དེང་རབས་དམག་འཁྲུག་ཁྲོད་ཀྱི་དྲ་རྒྱའི་ཆ་འཕྲིན་མ་ལག་གི་གནས་བབ་དང་ནུས་པ་སྔར་བས་མངོན་གསལ་དོད་དུ་འགྲོ་བཞིན་ཡོད། ཆ་འཕྲིན་རོགས་སྐྱོར་དཔུང་སྡེ་ནི་དང་ཐོག་འཐབ་འཛིང་རུ་ཁག་ཅིག་ཡིན་པས། དམག་དཔུང་སྟོབས་ཆེར་གཏོང་བ་དང་གཡུལ་ས་ལས་རྒྱལ་ཐུབ་པའི་མཐོ་ཚད་ནས་དྲ་རྒྱའི་ཆ་འཕྲིན་མ་ལག་འཛུགས་སྐྱོང་གི་གལ་འགངས་ཤིན་ཏུ་ཆེ་བའི་རང་བཞིན་དང་ཕྲག་ཏུ་འཁུར་བའི་ལོ་རྒྱུས་ཀྱི་འགན་འཁྲི་གསལ་པོ་ཤེས་པར་བྱས་ཏེ་དྲ་རྒྱའི་ཆ་འཕྲིན་མ་ལག་འཛུགས་སྐྱོང་དང་དམག་གྲབས་གཡུལ་འགྱེད་ལ་ཞབས་ཞུ་འདེགས་སྐྱོར་གྱི་ནུས་པ་གང་མགྱོགས་ཆེ་རུ་གཏོང་དགོས་ཞེས་གསུངས་པ་རེད།

    ཞི་ཅིན་ཕིང་གིས་བསམ་བློར་བཅིངས་འགྲོལ་དང་། དངོས་ཐོག་བདེན་འཚོལ། དུས་བསྟུན་མདུན་སྐྱོད་བཅས་མཐའ་འཁྱོངས་བྱས་ཏེ་སྤྱི་འདོམས་འཆར་འགོད་ལ་ཤུགས་སྣོན་རྒྱག་པ་དང་། འཕེལ་རྒྱས་གཏོང་སྟངས་གསར་གཏོད་བྱེད་པ། ལག་ལེན་འཚོལ་ཞིབ་ཧུར་ཐག་བྱེད་པ་བཅས་བྱས་ནས་དྲ་རྒྱའི་ཆ་འཕྲིན་མ་ལག་འཛུགས་སྐྱོང་གི་ལས་དོན་ཁག་ཏན་ཏིག་དང་ཡག་པོ་སྒྲུབ་དགོས།

    དམག་རྒྱག་ཐུབ་པ་དང་རྒྱལ་ཁ་ལེན་ཐུབ་པར་དམིགས་ཏེ་ཆ་འཕྲིན་ཞབས་ཞུའི་འགན་སྲུང་བྱེད་སྟངས་ལེགས་སུ་གཏོང་བ་དང་། དྲ་རྒྱའི་ཆ་འཕྲིན་གྱི་སྤྱི་པའི་ཞབས་ཞུའི་ལས་སྟེགས་འཛུགས་སྐྲུན་ལ་སྐུལ་འདེད་མགྱོགས་ལ་བརྟན་པོ་གཏོང་བ། རིགས་ཁག་གི་གྲངས་གཞིའི་ཆ་འཕྲིན་མཉམ་འདྲེས་བེད་སྤྱོད་ཡག་པོ་བྱེད་པ། དྲ་རྒྱའི་ཆ་འཕྲིན་གྱི་བདེ་འཇགས་འགོག་སྲུང་ལ་ཚད་མཐོའི་མཐོང་ཆེན་བྱེད་པ། མཉམ་འདྲེས་མ་ལག་དང་། སྐུལ་འདེད་མ་ལག ནུས་སྤྲོད་མ་ལག་བཅས་མགྱོགས་པོ་འཛུགས་པ། བཀོད་འདོམས་བྱེད་སྟངས་གསར་གཏོད་དང་དམག་འཐབ་བྱེད་སྟངས་བསྒྱུར་པར་སྣེ་ཁྲིད་བཅས་བྱེད་དགོས། སྒྱུར་བཅོས་ཀྱི་ལས་འགན་དོན་འཁྱོལ་ལ་རྒྱུན་མཐུད་སྐུལ་འདེད་གཏོང་བ་དང་། ལས་ཀའི་འཁོར་སྐྱོད་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་བ། འབྲེལ་ཡོད་ཁྲིམས་སྲོལ་དང་ལམ་ལུགས་འཐུས་སྒོ་ཚང་དུ་གཏོང་བ། མཉམ་སྐྲུན་དང་། མཉམ་སྤྱོད། མཉམ་རོལ་བཅས་ཀྱི་ཁོར་ཡུག་བཟང་པོ་གཏོད་པ་བཅས་བྱས་ཏེ། དྲ་རྒྱའི་ཆ་འཕྲིན་མ་ལག་འཛུགས་སྐྱོང་གི་སྤུས་ཚད་མཐོ་རུ་དང་ཕན་འབྲས་ཆེ་རུ་གཏོང་དགོས་པའི་ནན་བཤད་གནང་བ་རེད།

    ཞི་ཅིན་ཕིང་གིས། ཆ་འཕྲིན་རོགས་སྐྱོར་དཔུང་སྡེ་ནི་བཙུགས་མ་ཐག་པའི་དུས་མཚམས་སུ་གནས་ཡོད་པས། ཕྱོགས་ཡོངས་ནས་རང་ངོས་འཛུགས་སྐྱོང་ལ་ཤུགས་སྣོན་རྒྱག་པ་དང་རྨང་གཞི་འདིང་བ་དང་ཕུགས་ལ་ཕན་པའི་ལས་དོན་ཡག་པོ་བསྒྲུབ་པར་མཐོང་ཆེན་བྱས་ཏེ་དཔུང་སྡེའི་འཕེལ་རྒྱས་ཀྱི་རྨང་གཞི་བརྟན་དུ་གཏོང་དགོས། ཀྲུང་དབྱང་དམག་ཨུད་ཀྱི་ཆབ་སྲིད་ལས་དོན་ཚོགས་འདུའི་དགོངས་དོན་ལག་བསྟར་གཏིང་ཟབ་བྱས་ཏེ་ཏང་གིས་དམག་དཔུང་ལ་འགོ་ཁྲིད་གཙང་བཙན་བྱེད་པའི་གཞི་རྩའི་རྩ་དོན་དང་ལམ་ལུགས་མཐའ་འཁྱོངས་བྱེད་པ་དང་། ཏང་གི་གསར་གཏོད་རིགས་པའི་གཞུང་ལུགས་ཀྱིས་དྲག་ཆས་སྤྲོས་པར་ཤུགས་སྣོན་རྒྱག་པ། བསམ་བློའི་རྩ་བའི་གནད་དོན་ལ་དམ་འཛིན་བྱས་ནས་བསམ་བློར་དག་ཐེར་གཏིང་ཟབ་བྱེད་པ། སྤྱོད་བཟང་སྒྲིག་ནན་དང་རུལ་རྒོལ་ནན་པོ་བཅས་བྱས་ཏེ་དཔུང་སྡེའི་ལྷག་བསམ་རྣམ་དག་དང་། རྦད་དེ་དྭངས་གཙང་། མཐའ་གཅིག་ཏུ་བློས་འཁེལ་བ་བཅས་ལ་འགན་ལེན་བྱེད་དགོས། ཆ་འཕྲིན་རོགས་སྐྱོར་དཔུང་སྡེའི་ཏང་ཨུད་སྐབས་དང་པོས་ལས་གཏོད་ཀྱི་འདུ་ཤེས་ཟབ་ཏུ་དང་གསར་འབྱེད་ཀྱི་སྙིང་སྟོབས་ཆེ་རུ་བཏང་སྟེ་ལས་ཐོག་དང་པོར་འགན་འཁྲི་ཨང་དང་པོ་ཁུར་ནས་རིམ་ཁག་ཏང་ཨུད་ཀྱི་ཚན་ཁག་ལེགས་འདེམས་དང་བཀོད་སྒྲིག་ཡག་པོ་བྱེད་པ་དང་། འཐབ་ས་དང་པོའི་བཀོད་འདོམས་པུའུ་དང་འཐབ་ས་དང་པོའི་དམག་འཐབ་མཁར་རྫོང་སྟོབས་ཆེར་གཏོང་བ། ཏང་རྩ་འཛུགས་ཀྱི་འགོ་ཁྲིད་ནུས་པ་དང་། སྒྲིག་འཛུགས་བྱེད་ནུས། ལག་ལེན་བསྟར་ནུས་བཅས་ཆེ་རུ་གཏོང་དགོས། སྦྲེལ་ལམ་ཧྲིལ་པོའི་འཛུགས་སྐྱོང་ལ་དམ་འཛིན་བྱེད་པའི་འདུ་ཤེས་ལག་ལེན་བསྟར་ནས་ཤེས་ལྡན་པ་གསོ་སྐྱོང་བྱེད་སྟངས་གསར་གཏོད་བྱས་ཏེ་བྱང་ཚད་མཐོ་བ་དང་ཆེད་ལས་ཅན་གྱི་དྲ་རྒྱའི་ཆ་འཕྲིན་ཤེས་ལྡན་པའི་དཔུང་ཁག་ཅིག་གཏོད་དགོས། གནད་སྨིན་འཛུགས་སྐྱོང་ལ་དམ་འཛིན་བྱ་རྒྱུ་མཐའ་འཁྱོངས་ཀྱིས་ཚན་རིག་དང་མཐུན་པའི་དོ་དམ་ལ་ཤུགས་སྣོན་དང་། རིགས་དབྱེ་མཛུབ་ཁྲིད་ལ་སྣང་ཆེན། གཞི་རིམ་འཛུགས་སྐྱོང་ལ་དམ་འཛིན་ཏན་ཏིག་བཅས་བྱས་ནས། དཔུང་སྡེའི་ཚད་ལྡན་སྒྲིག་ལམ་དང་བདེ་འཇགས་བརྟན་ལྷིང་རྒྱུན་འཁྱོངས་བྱེད་དགོས་ཞེས་གསུངས་པ་རེད།

    མཇུག་ཏུ་ཞི་ཅིན་ཕིང་གིས། ཀྲུང་དབྱང་དམག་ཨུད་ཀྱིས་སྤྱི་ཡོངས་ལ་སྤྱི་འདོམས་བྱེད་ཤུགས་ཆེ་རུ་གཏོང་བ་དང་། དམག་ཨུད་ལས་ཁུངས་ཀྱི་འབྲེལ་ཡོད་སྡེ་ཚན་གྱིས་རང་འགུལ་ངང་མདུན་དུ་མཛུབ་ཁྲིད་བྱེད་པ། ཚན་པ་ཁག་གིས་མཐུན་སྦྱོར་གཞོགས་འདེགས་ཧུར་ཐག་བྱེད་པ་བཅས་བྱས་ཏེ། ཐུན་མོང་ཐོག་ཆ་འཕྲིན་རོགས་སྐྱོར་དཔུང་སྡེ་འཛུགས་སྐྱོང་ཡག་པོ་བྱས་ནས་རང་རེའི་དམག་གི་དྲ་རྒྱའི་ཆ་འཕྲིན་མ་ལག་འཛུགས་སྐྱོང་གི་རྣམ་པ་གསར་པ་གཏོད་དགོས་པའི་ནན་བཤད་གནང་བ་རེད།