ཀྲུང་གུང་ཀྲུང་དབྱང་གཞུང་དོན་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གིས།《གྲོང་ཁྱེར་གསར་པའི་རྨང་གཞིའི་སྒྲིག་བཀོད་འཛུགས་སྐྲུན་ལ་སྐུལ་འདེད་བཏང་ནས་མཉེན་ལྡན་གྲོང་ཁྱེར་གཏོད་རྒྱུའི་སྐོར་གྱི་བསམ་འཆར》བཀྲམ་པ།
རྩོམ་པ་པོ། ཡིག་བསྒྱུར། དུས་ཚོད། 2024-12-09 རྩོམ་ཁུངས། མི་དམངས་ཉིན་རེའི་ཚགས་པར།
ཉེ་ཆར་ཀྲུང་གུང་ཀྲུང་དབྱང་གཞུང་དོན་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གིས《གྲོང་ཁྱེར་གསར་པའི་རྨང་གཞིའི་སྒྲིག་བཀོད་འཛུགས་སྐྲུན་ལ་སྐུལ་འདེད་བཏང་ནས་མཉེན་ལྡན་གྲོང་ཁྱེར་གཏོད་རྒྱུའི་སྐོར་གྱི་བསམ་འཆར》བཀྲམ་པ་རེད།
《བསམ་འཆར》ནང་བླང་བྱ་བཏོན་དོན། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱས་ནས་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ལག་བསྟར་གཏིང་ཟབ་བྱེད་པ་དང་། གྲོང་ཁྱེར་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་ཕྱོགས་ཡོངས་ནས་དོན་འཁྱོལ་བྱེད་པ། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་མཐའ་འཁྱོངས་བྱེད་པ། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱེད་པ། སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་བདེ་འཇགས་སྤྱི་འདོམས་བཅས་བྱས་ཏེ་གནད་དོན་ཕྱོགས་སྟོན་དུ་འཛིན་པ་དང་ཁྱོན་ཡོངས་ཀྱི་ལྟ་བ་མཐའ་འཁྱོངས་བྱེད་པ་དང་། སྲིད་གཞུང་གིས་ཁྲིད་སྟོན་དང་སྤྱི་ཚོགས་ཞུགས་རྒྱུ་མཐའ་འཁྱོངས་བྱེད་པ། དངོས་ཐོག་བདེན་འཚོལ་དང་ཡུལ་བབ་དང་བསྟུན་རྒྱུ་མཐའ་འཁྱོངས་བྱེད་པ། ཚན་རྩལ་གསར་གཏོད་དང་གྲངས་འཛིན་ནུས་སྤྲོད་མཐའ་འཁྱོངས་བྱེད་པ། རབས་གསར་པའི་ཆ་འཕྲིན་ལག་རྩལ་དང་གྲོང་ཁྱེར་གྱི་རྨང་གཞིའི་སྒྲིག་བཀོད་འཛུགས་སྐྲུན་མཉམ་འདྲེས་གཏིང་ཟབ་ཐུབ་རྒྱུར་སྐུལ་འདེད་གཏོང་བ་བཅས་བྱས་ནས་ཆ་འཕྲིན་ལས་སྟེགས་འཛུགས་སྐྲུན་སྣེ་ཁྲིད་དུ་བྱེད་པ་དང་། རིག་ནུས་སྒྲིག་བཀོད་འཛུགས་སྐྲུན་རྨང་གཞིར་བྱེད་པ། རིག་ལྡན་བཀོལ་སྤྱོད་རྣམ་པ་བརྟེན་སར་བྱེད་པ་བཅས་བྱས་ཏེ་གྲོང་ཁྱེར་གྱི་རྨང་གཞིའི་སྒྲིག་བཀོད་གྲངས་འཛིན་ཅན་གྱི་སྒྱུར་བཀོད་ལ་སྐུལ་འདེད་གཏོང་བ་དང་། རིག་ནུས་ཕན་ཆེའི་གྲོང་ཁྱེར་གསར་པའི་རྨང་གཞིའི་སྒྲིག་བཀོད་ཀྱི་མ་ལག་བསྐྲུན་པ། གྲོང་ཁྱེར་སྒྲིག་བཀོད་ཀྱི་མཉེན་ཆ་དང་། དོ་དམ་གྱི་མཉེན་ཆ། བར་མཐོངས་ཀྱི་མཉེན་ཆ་བཅས་རྒྱུན་མཐུད་ངང་ཆེ་རུ་བཏང་ནས་གྲོང་ཁྱེར་གྱི་བདེ་འཇགས་འཕེལ་རྒྱས་ལ་སྐུལ་འདེད་གཏོང་དགོས།
དམིགས་ཚད་གཙོ་བོ་ནི། 2027ལོར་སླེབས་སྐབས་གྲོང་ཁྱེར་གསར་པའི་རྨང་གཞིའི་སྒྲིག་བཀོད་འཛུགས་སྐྲུན་ལ་འཕེལ་རིམ་མངོན་གསལ་དོད་པོ་ཐོབ་པར་བྱས་ནས་མཉེན་ལྡན་གྲོང་ཁྱེར་འཛུགས་སྐྲུན་གྱི་འདེགས་སྐྱོར་ནུས་པ་རྒྱུན་ཆད་མེད་པར་ཆེ་རུ་བཏང་སྟེ་འདྲ་བཟོ་ཆོག་ལ་ཁྱབ་གདལ་གཏོང་ཐུབ་པའི་ཉམས་མྱོང་དང་བྱེད་ཐབས་ཁག་གཅིག་ཆགས་པར་བྱ་རྒྱུ་དང་། 2030ལོར་སླེབས་སྐབས་གྲོང་ཁྱེར་གསར་པའི་རྨང་གཞིའི་སྒྲིག་བཀོད་འཛུགས་སྐྲུན་ལ་ཕན་འབྲས་མངོན་གསལ་དོད་པོ་ཐོབ་པར་བྱས་ནས་ཆུ་ཚད་མཐོ་བའི་མཉེན་ལྡན་གྲོང་ཁྱེར་ཁག་གཅིག་བསྐྲུན་རྒྱུར་སྐུལ་འདེད་བཏང་སྟེ་གྲོང་ཁྱེར་བདེ་འཇགས་ཀྱི་མཉེན་ཆ་རྒྱུན་མཐུད་ངང་ཆེ་རུ་འགྲོ་བ་དང་གྲོང་ཁྱེར་འཁོར་སྐྱོད་དེ་བས་བདེ་འཇགས་དང་། གོ་རིམ་ལྡན་པ། རིག་ལྡན། ཕན་ཆེ་བཅས་ཡོང་བར་བྱ་རྒྱུ་རེད།
