པོ་ཏ་མཚོ་ལྗོངས་ཁུལ་དུ་ཕྱི་རོལ་ལུས་རྩལ་གྱི་བྱེད་སྒོ་འདི་སྤེལ་འདུག

    སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཟླ12པའི་ཚེས7ཉིན།པོ་ཏ་མཚོ་མཛེས་ལྗོངས་ཁུལ་གྱི་ཕྱི་རོལ་ལུས་རྩལ་དགའ་ནེའུ་དུས་ཆེན་དང་“སེམས་ཀྱི་ཉི་ཟླ·གངས་འཁྱག་གི་དུས་ཆད”ཞེས་པའི་བྱེད་སྒོ་སྤེལ་འགོ་ཚུགས།གྲོང་མི་དང་ཡུལ་སྐོར་བ་བརྒྱ་ལྷག་ཙམ་བྱེད་སྒོའི་ནང་ཞུགས་ཏེ་གངས་ལ་ལྟ་བ་དང་།    གངས་རྩེད་རྩེ་བ་སོགས་བྱས་ནས་དགུན་དུས་ཀྱི་སེམས་ཀྱི་ཉི་ཟླར་ཡུལ་སྐོར་བྱེད་པའི་སྤྲོ་སྣང་ཚོར་བར་བྱས་པ་རེད།

    ཐེངས་འདིའི་བྱེད་སྒོ་ནི་བདེ་ཆེན་ཁུལ་སློབ་གསོ་ལུས་རྩལ་ཅུས་དང་བདེ་ཆེན་ཁུལ་ཡུལ་སྐོར་ཚོགས་པས་ཐུན་མོང་ཐོག་གཉེར་ལ། དམིགས་ཡུལ་ནི་བདེ་ཆེན་གྱི་ཐུན་མོང་མ་ཡིན་པའི་གངས་འཁྱགས་ཐོན་ཁུངས་བེད་སྤྱོད་ཡག་པོ་བྱས་ཏེ་“འཛམ་གླིང་གི་སེམས་ཀྱི་ཉི་ཟླ། འཛམ་གླིང་གི་རྐང་ཐང་གནས་མཆོག”གི་སྤུས་རྟགས་གཟུགས་བརྙན་སྔར་བས་བཏོད་དེ་བདེ་ཆེན་གྱི་དགུན་དུས་ཡུལ་སྐོར་ལ་གསོན་ཤུགས་གསར་པ་བསྣན་ནས་“སེམས་ཀྱི་ཉི་ཟླའི”གསེར་ཡིག་གི་སྒོ་བྱང་རྒྱུན་ཆད་མེད་པར་ཕྱིས་རྒྱུ་རེད།

    དངུལ་དཀར་གྱིས་སྤྲས་པའི་གངས་འཁྱག་གི་པང་དུ་གྲོང་མི་དང་ཡུལ་སྐོར་བས་གངས་འཁྱག་གི་རྣམ་གྲངས་མང་པོ་ཞིག་མྱོང་རོལ་བྱེད་བཞིན་ཡོད།    ཀོང་ཤིས་ནས་ཡོང་བའི་ཡུལ་སྐོར་བ་ཧྲི་ཡུན་ཡན་གྱིས་ལྷོ་ཕྱོགས་ནས་ཁ་བ་མཐོང་བ་དང་གངས་རྩེད་བྱེད་ཐུབ་པར་ཧ་ཅང་དགའ་ཞིང་།    ལྷག་པར་དུ་ཉེ་འཁོར་གྱི་རི་ཀླུང་དང་།    རྩྭ་ཐང་།    ཆུ་བོ་སོགས་ཀྱི་རང་བྱུང་ཁོར་ཡུག་འོག་ཏུ།    སྔར་བས་སྤྲོ་སྣང་མི་འདྲ་བ་ཚོར་ཐུབ་པས།    དོན་སྙིང་ཆེན་པོ་ལྡན་ཞེས་བཤད་བྱུང་།

    པོ་ཏ་མཚོ་ཡུལ་སྐོར་ཐོན་ལས་ཡན་ལག་ཀུང་སིའི་ཏང་སྤྱི་ཁྱབ་ཀྲི་པུའི་ཧྲུའུ་ཅི། སྤྱི་ཁྱབ་ཅིང་ལི་ཧྥེང་ཅན་ཧྭ་ཡིས་2024ལོའི་ལོ་འགོར་གཉེར་བའི་དུས་ཚིགས་དང་པོའི་གངས་འཁྱགས་བྱེད་སྒོར་རིམ་རྩིས་བྱས་ན་སྣེ་ལེན་ཞུ་ཚད་མི་ཐེངས་ཁྲི་ལས་བརྒལ་ནས་ཡོང་འབབ་སྒོར་ཁྲི་200ཙམ་བྱུང་བས་རྒྱ་ཆེའི་ཡུལ་སྐོར་བའི་ཚད་མཐོའི་ཁས་ལེན་ཐོབ་ཡོད།  ལོ་གཅིག་རིང་ཇུས་འགོད་ཞིབ་ཚགས་དང་གྲ་སྒྲིག་ཞིབ་ཚགས་བྱས་པ་བརྒྱུད་ཐེངས་འདིའི་“སེམས་ཀྱི་ཉི་ཟླ·གངས་འཁྱག་གི་དུས་ཆད”ཀྱི་བྱེད་སྒོ་དེ་རྨང་གཞིའི་སྒྲིག་བཀོད་དང་།ཐོན་རྫས་བཀོད་སྒྲིག གཉེར་སྐྱོང་བྱེད་སྟངས། བྲིན་ཚོང་དྲིལ་བསྒྲགས་སོགས་ཞབས་ཞུའི་ནུས་པ་ཁག་ཕྱོགས་ཡོངས་ནས་མཐོ་རུ་བཏང་སྟེ་གངས་འཁྱགས་ལ་དགའ་པོ་བྱེད་མཁན་ཚང་མ་པོ་ཏ་མཚོའི་མཛེས་ལྗོངས་ཁུལ་དུ་“གངས་འཁྱགས་དུས་ཆད”ཡག་ཤོས་འཕྲད་ཐུབ་པའི་འགན་ལེན་བྱས་ཡོད་ཅེས་ངོ་སྤྲོད་བྱས་པ་རེད། རྒྱུས་ལོན་བྱུང་བ་ལྟར་ན།ཉེ་བའི་ལོ་འགའི་རིང་།པོ་ཏ་མཚོ་ལྗོངས་ཁུལ་གྱིས་ལས་རྣམ་དང་།རྣམ་པ།ཐོན་རྫས་བཅས་གསར་གཏོད་བྱ་རྒྱུར་རྒྱུན་ཆད་མེད་པར་སྐུལ་འདེད་བཏང་སྟེ་རང་བྱུང་ཐོན་ཁུངས་ཀྱི་ལེགས་ཆ་དེ་འཕེལ་རྒྱས་ཀྱི་ལེགས་ཆར་བསྒྱུར་བར་བྱས་ནས།གངས་འཁྱགས་གཉིས་སྤྱོད་ཀྱི་རླངས་འཁོར་དང་།གངས་འཁྱགས་ཀྱི་རྒྱ་ཁོག་ཆུང་ཆུང་།བོད་ཆས་ཡུལ་སྐོར་པར་ལེན་བཅས་དང་དེ་བཞིན་གཡོར་གྲུ་དང་།ས་དབྱིབས་ཡོངས་ཀྱི་རླངས་འཁོར་ཉམས་ལེན།ཡིད་ཡུལ་ཁ་ཧྥེ་ཉམས་ལེན་བྱེད་གནས།སྒར་ས་སྒར་རྒྱག་པ།རང་བྱུང་སློབ་གསོ་ཞིབ་འཇུག་སློབ་སྦྱོང་།ཕྱི་རོལ་གྱི་རྐང་ཐང་ཐོན་རྫས་སོགས་ཀྱི་རྣམ་གྲངས་བཏོན་ནས་ཡུལ་སྐོར་བའི་རོལ་རྩེད་ཉམས་ལེན་ཕྱོགས་ཡོངས་ནས་ཕུན་སུམ་ཇེ་ཚོགས་སུ་བཏང་ཡོད།