བོད་ཀྱི་རི་འཛེགས་ལུས་རྩལ་པ་གྲགས་ཅན་མགོན་པོ་སྐུ་གཤེགས་པ།

    བོད་རང་སྐྱོང་ལྗོངས་ཀྱི་དེ་སྔའི་ལུས་རྩལ་ཨུ་ཡོན་ལྷན་ཁང་གི་ཀྲུའུ་རེན་གཞོན་པ། བོད་ཀྱི་རི་འཛེགས་ལུས་རྩལ་པ་གྲགས་ཅན་རྒན་གྲས་མགོན་པོ་མཆོག་སྙུན་གཞིས་རྐྱེན་པས་སྤྱི་ལོ་2024ལོའི་ཟླ་བ་12ཚེས་5ཉིན་སི་ཁྲོན་ཁྲེང་ཏུར་སྐུ་གཤེགས་པ་དང་། སྐུ་གཤེགས་དུས་དགུང་ལོ་91ལ་ཕེབས་ཡོད། བློ་མཐུན་མགོན་པོ་མཆོག་ནི་སྤྱི་ལོ་1933ལོར་བོད་ལྗོངས་གཞིས་ཀ་རྩེ་གཉའ་ནང་རྫོང་དུ་སྐུ་འཁྲུངས་པ་དང་། སྤྱི་ལོ་1956ལོའི་ཟླ་བ་9པར་གསར་བརྗེའི་ལས་ཀར་ཞུགས། སྤྱི་ལོ་1960ལོའི་ཟླ་བ་5ཚེས་25ཉིན་ཁོང་དང་ཝང་ཧྥུ་ཀྲོའུ། ཆུས་ཡུན་ཧྭ་བཅས་ནས་རི་བོ་ཇོ་མོ་གླང་མའི་རྩེ་མོར་འཛེགས་པས། ཁོང་རྣམས་ལ་ལུས་རྩལ་གྱི་གཟེངས་རྟགས་དང་རྒྱལ་ཡོངས་ཀྱི་ཟིན་ཐོ་གཏོར་བའི་གཟེངས་རྟགས་ཐོབ་པ་དང་། རྒྱལ་ཁབ་རིམ་པའི་ཕུལ་བྱུང་ལུས་རྩལ་པར་ཡང་བདམས། སྤྱི་ལོ་1961ལོའི་ཟླ་བ་3པར་ཀྲུང་གོ་གུང་ཁྲན་ཏང་ནང་ཞུགས། དེ་རྗེས་སྔ་ཕྱིར་ཀྲུང་གོའི་རི་འཛེགས་རུ་ཁག་གཅིག་སྡུད་སྦྱོང་བརྡར་རུ་ཁག་གི་རུ་དཔོན་གཞོན་པ་དང་། བོད་ལྗོངས་རི་འཛེགས་རུ་ཁག་གི་རུ་དཔོན་གཞོན་པ། བོད་ལྗོངས་ལུས་རྩལ་ཨུ་ཡོན་ལྷན་ཁང་གི་ཧྲུའུ་ཅི་གཞོན་པ་དང་ཀྲུའུ་རེན་གཞོན་པ། བསྐོར་ཞིབ་པ། བོད་ལྗོངས་ལུས་རྩལ་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་སོགས་ཀྱི་འགན་བཞེས། སྤྱི་ལོ་1995ལོར་ལས་འཁྱུར་ངལ་གསོ་གནང་། ཁོང་གིས་བོད་ལྗོངས་ཀྱི་རི་འཛེགས་ལུས་རྩལ་བྱ་གཞག་གོང་འཕེལ་ཆེད་ལེགས་སྐྱེས་ཆེན་པོ་ཕུལ་གནང་ཡོད། 

    སྤྱི་ལོ་1960ལོའི་ཟླ་བ་6ཚེས་7ཉིན་ཝང་ཧྥུ་ཀྲོའུ་དང་། མགོན་པོ།（དཀྱིལ） ཆུས་ཡུན་ཧྭ་བཅས་ཇོ་མོ་གླང་མར་འཛེགས་ཟིན་ནས་ལྷ་སར་འབྱོར་རྗེས་ལྷ་སའི་ལས་རིགས་ཁག་གི་མི་རྣམས་ནས་དགའ་བསུ་ཆེན་པོ་ཞུས་པ།