རྒན་པ་ཚོས་དགུན་དུས་སུ་ཡིད་གཟབ་གནང་དགོས་པའི་གནད་དོན་འགའ།

ནད་ཐོག་སྨན་བཅོས་ཀྱི་གཞི་གྲངས་ལས་མངོན་པ་ལྟར་ན། དགུན་དུས་སུ་རྒན་པའི་སྙིང་དང་ཁྲག་རྩའི་ནད་འཕར་ཚད་དེ་དབྱར་དུས་ཀྱི་ལྡབ་གཉིས་ལྷག་ཡིན་པས། རྒན་པ་ཚོ་ཞོགས་པ་མལ་ལས་ལངས་རྗེས་གཤམ་གྱི་གནད་དོན་འདི་དག་ལ་ཡིད་གཟབ་གནང་དགོས།

གཅིག ཞོགས་པ་གཉིད་ལས་སད་རྗེས་མྱུར་མོར་མལ་ལས་ལངས་མི་རུང་། གཉིད་ལོག་པའི་སྐབས་སུ། ཀླད་ཆེན་སྐྱི་རིམ་ནི་གཉིད་ལོག་པ་དང་ཚོད་འགོག་གི་རྣམ་པར་གནས་ཤིང་། སྐྱེ་ལུགས་ཀྱི་བྱེད་ནུས་སྣ་ཚོགས་དལ་མོའི་ངང་འཁོར་སྐྱོད་བྱེད་བཞིན་ཡོད་པས། གལ་ཏེ་སྐབས་དེར་མྱུར་མོར་མལ་ལས་ལངས་ན། ཀླད་པར་ཁྲག་མཁོ་འདོན་མི་འདང་བ་དང་། གྲིབ་སྐྱོན་ཕོག་པའམ་ཡང་ན་གློ་བུར་དུ་འཆི་བ་སོགས་ཀྱི་ཆག་སྒོ་འབྱུང་སྲིད། དེ་བས་མལ་ལས་ལངས་དུས་དལ་མོ་བྱེད་དགོས་ཏེ། དཔེར་ན་གཉིད་སད་མ་ཐག་ཏུ་མིག་གདངས་ནས་ཉལ་ཁྲིའི་སྟེང་དུ་སྐར་ཆ30ཙམ་ཉལ་དགོས་པ་དང་། དེ་ནས་རིམ་གྱིས་དལ་མོར་ཡར་ལངས་རྗེས་ཉལ་ཁྲིའི་འགྲམ་དུ་སྐར་ཆ30ཙམ་བསྡད་རྗེས་ད་གཟོད་སར་འབབ་དགོས། 

གཉིས། བཤང་གཅི་ཤུགས་ཀྱིས་བཙིར་མི་རུང་། རྒན་པར་མཚོན་ན། བཤང་གཅི་བཙིར་ནས་གཏོང་བ་ནི་འཛེམ་བྱ་ཆེན་པོ་ཞིག་ཡིན། བཙིར་དྲགས་ན། ཁྲག་ཤེད་ཇེ་མཐོར་འགྲོ་བ་དང་། སྙིང་གི་ཤ་གནད་ལ་གསོ་རླུང་ཟད་ཚད་ཇེ་ཆེར་འགྲོ་བཞིན་ཡོད་པས། སྙིང་གི་ཤ་གནད་ལ་ཁྲག་ཆད་པ་དང་། སྙིང་ལ་ཟུག་གཟེར་ལངས་པ། ཡང་ན་སྙིང་གི་འཕར་ཚད་འཁྲུག་པ་སོགས་བྱས་ཏེ། སྙིང་རྩ་འགགས་པ་དང་ཚབས་ཆེ་དུས་ཐ་ན་སྲོག་ཤོར་བའི་ཉེན་ཁ་ཡོད། བཙོག་པ་འགག་སླ་བའི་རྒན་པ་ཚོར་མཚོན་ན། དུས་རྒྱུན་སྔོ་ཚོད་དང་སིལ་ཏོག་མང་ཙམ་བཟའ་བ་དང་། ཆུ་མང་ཙམ་འཐུང་བ། འགུལ་སྐྱོད་འོས་འཚམ་བྱེད་པ། ཡང་ན་ཆེད་ལས་སྨན་པའི་མཛུབ་སྟོན་འོག་བཤལ་སྨན་འཐུང་ཆོག

གསུམ། ཞོགས་པར་རྩོལ་བཅག་ཆེ་མི་རུང་། མི་མང་པོ་ཞིག་ཞོགས་པའི་ལུས་སྦྱོང་ལ་དགའ།  དགུན་དུས་གནམ་གཤིས་གྲང་ཞིང་། ཁང་པའི་ཕྱི་ནང་གི་དྲོད་ཚད་ལ་ཧེ་བག་ཆེ་བས། གལ་ཏེ་སྐབས་འདིར་འགུལ་སྐྱོད་དྲག་པོ་བྱས་ན། སྙིང་ཤའི་གསོ་རླུང་མཁོ་སྤྲོད་བྱེད་ཚད་མང་དུ་ཕྱིན་ནས། སྙིང་གི་ཁུར་པོ་ཇེ་ལྕིར་འགྲོ། རྒན་རྒོན་གྱི་ངོས་ནས་བཤད་ན། གསོ་རླུང་མཁོ་འདོན་བྱེད་ཚད་མི་འདང་བ་དང་། སྙིང་ལ་ཁྲག་མི་འདང་བའི་གནས་ཚུལ་ཐོན་གྱིན་ཡོད། ཚབས་ཆེ་བའི་སྐབས་སྙིང་རྩ་འགག་པའི་ཉེན་ཁ་ཡོད། དེ་བས་དགུན་དུས་ཞོགས་པར་རྩལ་སྦྱོང་ལ་འགྲོ་བའི་སྐབས་སུ་ལུས་པོར་དྲོད་སྲུང་ཡག་པོ་བྱེད་དགོས་པ་དང་། འགུལ་སྐྱོད་དྲག་པོ་མི་བྱེད་པ། འགུལ་སྐྱོད་མ་བྱས་པའི་སྔོན་ལ་གྲ་སྒྲིག་སྦྱོང་བརྡར་བྱེད་དགོས།

བཞི། ལུས་པོ་ཆུ་ཚ་མོས་བཀྲུ་མི་རུང་། དགུན་དུས་གནམ་གཤིས་གྲང་མོ་ཡིན་པས། མི་ལ་ལ་མལ་ལས་ལངས་པའམ་ཡང་ན་ཞོགས་པར་ལུས་རྩལ་བརྩེས་ནས་ཕྱིར་ཁྱིམ་དུ་ཐོན་རྗེས། ཆུ་ཚ་མོས་ལུས་པོ་འཁྲུད་ཀྱིན་ཡོད། མིའི་ལུས་ཁམས་ཀྱི་དྲོད་ཚད་དམའ་བའི་སྐབས་སུ། ཆུ་ཚ་མོ་གློ་བུར་དུ་མགོ་ནས་མར་བབས་ན། མགོ་དང་ལུས་པོ་ཡོངས་ཀྱི་པགས་པའི་ཁྲག་རྩ་གློ་བུར་དུ་རྒྱས་ཏེ། ཁྲག་མང་པོ་ཞིག་པགས་པའི་ངོས་སུ་འདུས་པས། སྙིང་དང་ཀླད་པ་སོགས་དོན་སྣོད་གཙོ་བོ་དག་ལ་ཁྲག་ཤིན་ཏུ་དཀོན་པ་དང་། མགོ་ཡུ་འཁོར་བ་དང་བྲང་ཁ་བསྡམས་པ། ཐ་ན་སྙིང་གཟེར་ལངས་པ་དང་སྙིང་རྩ་འགག་པ་སོགས་ཀྱི་གནས་ཚུལ་འབྱུང་སྲིད། ལུས་པོ་འཁྲུད་བྱེད་ཀྱི་ཆུའི་དྲོད་ཚད་ཏུའུ38ནས40བར་ཚོད་འཛིན་བྱས་ན་འཚམ་པོ་ཡིན།