བདེ་ཆེན་གྱིས་བེ་ཤར་བརྟེན་ནས་ཕྱུག་འགྱུར་གྱི་ལམ་དུ་བསྐྱོད་པ།
རྩོམ་པ་པོ། ཡིག་བསྒྱུར། དུས་ཚོད། 2024-12-11 རྩོམ་ཁུངས། སེམས་ཀྱི་ཉི་ཟླ་བོད་ཡིག་དྲ་བ།
སེམས་ཀྱི་ཉི་ཟླ་བོད་ཡིག་དྲ་བའི་འཕྲིན།ཉེ་བའི་ལོ་ཤས་རིང་།བདེ་ཆེན་ཁུལ་གྱིས་ནགས་ཚལ་ཁེབས་ཚད་མཐོ་བ་དང་། རང་བྱུང་ཁོར་ཡུག་ལེགས་པ།ནགས་ཁྲོད་ཐོན་ཁུངས་ཕུན་སུམ་ཚོགས་པ་སོགས་ཀྱི་རང་སྤུས་ལ་གཞི་ཚུགས་ནས་ཏང་འཛུགས་སྐྱོང་གི་སྣེ་ཁྲིད་ནུས་པ་འདོན་སྤེལ་གང་ལེགས་བྱས་ཏེ“བེ་ཤ+”རྩོམ་ཡིག་གསར་པ་དང་གསོན་ཉམས་དོད་པོ་བཟོས་ནས་བེ་ཤ་ཐོན་ལས་དེ“ཐར་ཐོར་དང་ཉམས་ཞན”ནས་“དམངས་ཕྱུག་ཐོན་ལས་ཆེན་པོར”འགྱུར་བ་བྱས་ཡོད།བདེ་ཆེན་ཁུལ་སེམས་ཀྱི་ཉི་ཟླ་གྲོང་ཁྱེར་རྒྱལ་ཐང་གྲོང་རྡལ་རྒྱལ་བདེ་གྲོང་ཚོས་“གཅིག་ཅན་བདུན”གྱི་བྱེད་ཐབས་དམ་འཛིན་བྱ་གཞིར་བྱས་ཏེ་ཏང་ཡོན་དང་།ནགས་སྲུང་བ།བུད་མེད།ཐོན་ཡོན་ཚོགས་མི་བཅས་ཀྱིས་ཁོངས་མི་བྱས་པའི་དང་བླངས་ཞབས་ཞུའི་རུ་ཁག་བཙུགས་ནས་གོ་རིམ་མེད་པར་ཤིང་གཅོད་པ་དང་།སྒེར་གྱིས་གང་བྱུང་དུ་འཛུགས་སྐྲུན་བྱེད་པ།རྨོ་ཞིང་དང་རྩྭ་ས་བཟུང་སྤྱོད་བྱེད་པ་སོགས་ཀྱི་བྱ་སྤྱོད་ལ་དོ་དམ་ཚོད་འཛིན་ནུས་ལྡན་བྱས་ཏེ་བེ་ཤ་སྐྱེ་འཚར་ལ་སྣོད་བཅུད་ཁོར་ཡུག་བཟང་པོ་ཞིག་མཁོ་འདོན་བྱས་ཡོད།
དུས་མཚུངས་སུ།རྒྱལ་བདེ་གྲོང་ཚོས་“གྲོང་ཚོ་གཅིག་ལ་སུའོ་གཅིག་དང་ཁེ་ལས་གཉིས”མཉམ་འབྲེལ་ཐོག་རི་བོ་འགན་གཙང་ལེན་པ་དང་གསོ་སྤེལ་རྒྱ་སྐྱེད་གཏོང་བའི་དཔེ་དབྱིབས་ལ་བརྟེན་ནས་བེ་ཤ་ཐོན་ཡུལ་ལ་སྒོ་དབྱེ་རྣམ་པའི་རི་བོ་འགན་གཙང་ལེན་པ་དང་གསོ་སྤེལ་རྒྱ་སྐྱེད་མུའུ་6000་ལྷག་ཙམ་བཏང་ནས་བེ་ཤ་ཐོན་ལས་དེ་“གྲོང་ཚོ་གཅིག་ལ་ཐོན་རྫས་གཅིག”གི་ཁྱད་ལྡན་ཐོན་ལས་སུ་གྲུབ་འབྲས་ཐོབ་པའི་ངང་བཏོད་པ་རེད། སེམས་ཀྱི་ཉི་ཟླ་གྲོང་ཁྱེར་ལའོ་ཅི་ཤང་དང་འཇོལ་རྫོང་ཧྥོ་ཧྲན་ཤང་སོགས་སུ་ད་དུང་གནས་སྐབས་ཏང་ཀྲི་པུའུ་དང་“ཀྲི་པུའུ་+ཡུག་ཁུལ་+དྲ་མིག་”འཛུགས་པ་སོགས་ཀྱི་བྱ་ཐབས་བརྒྱུད་མང་ཚོགས་ལ་བེ་ཤ་སྐྱེ་འཚར་གྱི་ཆོས་ཉིད་དང་བེ་ཤ་ཆུང་ངུ་ལ་སྲུང་སྐྱོང་བྱེད་པའི་གལ་ཆེའི་རང་བཞིན་འགྲེལ་བཤད་བརྒྱབ་པ་དང་མི་རིགས་ཁག་གི་མང་ཚོགས་ལ་འཐུ་བསྡུ་བྱེད་སྐབས་འབུ་ཕྲ་སྲུང་སྐྱོང་དང་ས་རྒྱུ་ཕྱིར་སྐོང་དང་ས་ངོས་སླར་གསོ་ཡག་པོ་བྱ་རྒྱུའི་ཁྲིད་སྟོན་བྱས་ཏེ་“ལྗང་མདོག་ཁྱིམ་གཞིས”ཀྱིས་“སྣོད་བཅུད་ཁེ་ཕན”རྒྱུན་མཐུད་ངང་གཏོང་བར་བྱས་པ།
བདེ་ཆེན་ཁུལ་གྱིས་ད་དུང་བེ་ཤ་སྲུང་སྐྱོང་དང་བེད་སྤྱོད་ལ་ཤུགས་སྣོན་རྒྱག་པ་དང་གསར་གཏོད་བྱེད་པའི་བྱ་ཐབས་མང་པོ་བཏོན་པ་སྟེ།སེམས་ཀྱི་ཉི་ཟླའི་བེ་ཤ་དུས་ཚིགས་འགོ་ཚུགས་པའི་བྱེད་སྒོ་དང་བེ་ཤ་ཞིམ་ཟས་དུས་ཆེན་གཉེར་བ་དང་།བེ་ཤ་ཐོན་ལས་སྤུས་ཚད་མཐོ་བའི་འཕེལ་རྒྱས་ཀྱི་བཞུགས་མོལ་བྱས་པ།སེམས་ཀྱི་ཉི་ཟླའི་བེ་ཤའི་ཟས་མཆོག་ལག་དེབ་དང་ཐོན་ཁུལ་ཆེ་གྲས་བཅུ་ཁྱབ་བསྒྲགས་བྱས་པ།བེ་ཤ་དུས་ཚིགས་རིག་གནས་ཡུལ་སྐོར་གྱི་གཟིགས་སྐྱོང་བྱེད་སྒོ་སྤེལ་བ་བཅས་བྱས་ནས་སེམས་ཀྱི་ཉི་ཟླའི་བེ་ཤ་སྤུས་རྟགས་ཀྱི་ཤུགས་རྐྱེན་ཐེབས་ཤུགས་ཆེ་རུ་བཏང་བ་རེད།
བདེ་ཆེན་ཁུལ་གྱིས་ད་དུང་བེ་ཤ་ཐོན་ལས་ཀྱི་དུས་ཚིགས་རང་བཞིན་ཆེ་བ་དང་མ་དངུལ་འཁོར་རྒྱུག་གི་མྱུར་ཚད་མགྱོགས་པའི་ཁྱད་ཆོས་དང་ཟུང་འབྲེལ་བྱས་ཏེ་“བེ་ཤ་དངུལ་བུན”གསར་གཏོད་བྱས་ནས་བཏོན་ཏེ་བེ་ཤ་འབྲེལ་ཡོད་ལས་གཉེར་བས་འཐུ་བ་དང་ཉོ་ཚོང་བྱེད་པ་ནས་ལས་སྣོན་བྱེད་པའི་བར་གྱི་ཐོན་ལས་སྦྲེལ་ཐག་ཧྲིལ་པོའི་མ་དངུལ་གྱི་དགོས་མཁོ་བསྐངས་པ་རེད། བེ་ཤ་ཁེ་ལས་སྒྲིག་འཛུགས་བྱས་ནས་ཀྲུང་གོའི་རྒྱལ་སྤྱིའི་ནང་འདྲེན་དངོས་མང་སྟོན་ཚོགས་དང་། ཀྲུང་གོའི་ཕྱིར་གཏོང་ནང་འདྲེན་ཚོང་ཟོག་ཉོ་ཚོང་ཚོགས་འདུ། ཀྲུང་གོ—ཨེ་ཤ་ཡ་ལྷོ་མའི་དངོས་མང་སྟོན་ཚོགས་སོགས་གཙོ་གནད་གྲགས་ཅན་འགྲེམས་ཚོགས་ལ་ཞུགས་པ་དང་།བཟའ་བྱའི་བེ་ཤའི་ཐོན་རྫས་དྲིལ་བསྒྲགས་དང་ཁྱབ་གདལ་གཏོང་བ།ཉོ་ཚོང་སྤེལ་རེས་དང་མཉམ་ལས་བྱེད་རྒྱ་ཆེ་རུ་གཏོང་བ་བཅས་བྱས་པ།“བེ་ཤ+”འཕེལ་རྒྱས་གཏོང་སྟངས་འཚོལ་ཞིབ་བྱས་ནས་བེ་ཤ་འཐུ་བའི་ཉམས་ལེན་ལ་དམིགས་ཏེ་གྲོང་གསེབ་ཀྱི་ཡུལ་སྐོར་ཐོན་ལས་འཕེལ་རྒྱས་ཤུགས་ཆེན་བཏང་ནས་བེ་ཤ་ཐོན་ཡུལ་དུ་ཞག་སྡོད་དང་བཟའ་བཏུང་སོགས་ཞབས་ཞུའི་ལས་རིགས་འཕེལ་རྒྱས་འགྲོ་རྒྱུར་སྐུལ་ཁྲིད་བྱས་པ་རེད།
