ལུའོ་ཁྲའོ་ཧྥེང་གིས་བདེ་འཇགས་ཐོན་སྐྱེད་ལས་ཀར་མངོན་བཤེར་ལྐོག་ཞིབ་གནང་།

    སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། ཟླ་1པོའི་ཚེས་7ཉིན། ཁུལ་ཨུའི་ཧྲུའུ་ཅི་ལུའོ་ཁྲའོ་ཧྥེང་གིས་སེམས་ཀྱི་ཉི་ཟླ་གྲོང་ཁྱེར་དུ་ཕེབས་ནས་བདེ་འཇགས་ཐོན་སྐྱེད་དང་མེ་གསོད་བདེ་འཇགས། ནགས་ཚལ་རྩྭ་ཐང་མེ་གསོད་མེ་འགོག འགྲོ་ལམ་འགྲིམ་འགྲུལ་བདེ་འཇགས་སོགས་ལས་ཀར་ཞིབ་དཔྱད་གནང་། བདེ་འཇགས་ཐོན་སྐྱེད་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གལ་ཆེའི་རྣམ་བཤད་དང་ཞིང་ཨུ་དང་ཞིང་ཆེན་སྲིད་གཞུང་ལས་ཀ་བླང་བྱ་ལག་བསྟར་གཏིང་ཟབ་བྱེད་པ་དང་བདེ་འཇགས་ཐོན་སྐྱེད་ལས་ཀ་ཁག་དམ་འཛིན་བྱེད་ནས། མི་དམངས་མང་ཚོགས་ཀྱི་ཚེ་སྲོག་རྒྱུ་ནོར་གྱི་བདེ་འཇགས་ལ་ཁག་ཐེག་བྱེད་དགོས་པའི་ནན་བཤད་གནང་།

    སེམས་ཀྱི་ཉི་ཟླའི་དམངས་གཉེར་འབར་གས་དངོས་རྫས་ཀུང་སི་མཛོད་ཁང་དུ་ལུའོ་ཁྲའོ་ཧྥེང་གིས་ཁེ་ལས་ཀྱིས་བསམ་བློ་ངོས་འཛིན་དེ་བས་མཐོ་རུ་གཏོང་བ་དང་བདེ་འཇགས་ཐོན་སྐྱེད་བྱེད་པོའི་འགན་འཁྲི་དམ་འཛིན་བྱས་ནས་བདེ་འཇགས་དོན་རྐྱེན་བྱུང་བར་ནན་འགོག་བྱེད་དགོས་པའི་ནན་བཤད་གནང་བ།

    བོད་ཤར་ཟོག་འདྲེན་ལྟེ་གནས་ལུའོ་ཁྲའོ་ཧྥེང་གིས་ཡུལ་དངོས་སུ་འགྲོ་ལམ་གྱི་བཅོས་སྐྱོང་གནས་ཚུལ་ལ་ལྟ་ཞིབ་གནང་བ་དང་སེམས་ཀྱི་ཉི་ཟླ་གྲོང་ཁྱེར་དགུན་དུས་ཀྱི་འགྲིམ་འགྲུལ་བདེ་འཇགས་འགན་སྲུང་ལས་ཀའི་གནས་ཚུལ་སྙན་སེང་གསན་པ། ཁོང་གིས་མཐའ་ཚད་འཛིན་སེམས་དང་ཉེན་ཟོན་གྱི་བསམ་པ་ཤུགས་ཆེ་རུ་གཏོང་ནས་མི་དམངས་མང་ཚོགས་ཀྱི་ཚེ་སྲོག་རྒྱུ་ནོར་བདེ་འཇགས་དང་སྤྱི་ཚོགས་བརྟན་བརླིང་ལ་སྲུང་སྐྱོང་ནན་པོ་བྱེད་དགོས། གནད་ཆེའི་དུས་ཚོད་དང་ལམ་དུམ་གཙོ་བོར་དོ་ཁུར་བྱེད་ནས་འགྲོ་ལམ་གྱི་འགྲིམ་འགྲུལ་བདེ་འཇགས་དོན་རྐྱེན་བྱུང་བར་ནན་འགོག་བྱེད་དགོས་པའི་ནན་བཤད་གནང་།

    སེམས་ཀྱི་ཉི་ཟླ་གྲོང་ཁྱེར་རྒྱལ་ཐང་གྲོང་རྡལ་ནགས་ར་རུ་ལུའོ་ཁྲའོ་ཧྥེང་གིས་མེ་འགོག་སྒྲིག་ཆས་དང་རླངས་འཁོར། མེ་འགོག་དངོས་ཟོག་སོགས་གསོག་འཇོག་གནས་ཚུལ་ལ་ལྟ་ཞིབ་གནང་བ་དང་མེ་འགོག་རིག་ནུས་སྔོན་དཔག་ལྟ་སྡོམ་མ་ལག་འཁོར་སྐྱོད་གནས་ཚུལ་རྒྱུས་ལོན་བྱུང་ནས་མིག་སྔའི་རང་ཁུལ་གྱི་ནགས་ཚལ་རྩྭ་ཐང་གི་མེ་འགོག་མེ་གསོད་ལས་ཀའི་གནས་བབ་དྲག་པོ་ངོས་འཛིན་བྱས་ནས་སྔོན་འགོག་བྱ་ཐབས་ཁག་དོན་ཐོག་ཏུ་འཁྱོལ་བར་ཁག་ཐེག་བྱེད་དགོས། ལྟ་ཞིབ་སྔོན་དཔག་དང་འབྱུང་རྩའི་དོ་དམ་ཤུགས་ཆེ་རུ་གཏོང་ནས་ནགས་ཚལ་དང་རྩྭ་ཐང་ཉེན་ཁའི་མངོན་མེད་རྐྱེན་ངན་གྱི་ལེབ་བཤེར་བཅོས་སྐྱོང་བྱེད་ཤུགས་ཆེ་རུ་གཏོང་དགོས། མཁོ་བསྟུན་རོགས་སྐྱོར་གྲ་སྒྲིག་བྱེད་ནས་སྟོབས་ཤུགས་གང་ཡོད་ཀྱིས་ནགས་ཚལ་དང་རྩྭ་ཐང་གི་མེ་འགོག་མེ་གསོད་ལས་ཀ་སྒྲུབ་དགོས་པའི་ནན་བཤད་གནང་།

    རྡོ་མཁར་རྫོང་དུ་ལུའོ་ཁྲའོ་ཧྥེང་གིས་རིག་ནུས་མེ་གསོད་ནུས་པ་འདོན་སྤེལ་བྱེད་དགོས་པ་དང་། མཁོ་བསྟུན་དང་ལེན་ལམ་ལུགས་འཐུས་ཚང་གཏོང་ནས་བདེ་འཇགས་ཐོན་སྐྱེད་ལས་ཀ་དམ་འཛིན་བྱེད་དགོས་པའི་ནན་བཤད་གནང་།

    ཉིན་དེར་ལུའོ་ཁྲའོ་ཧྥེང་གིས་ད་དུང་སེམས་ཀྱི་ཉི་ཟླ་མེ་འཁོར་བབས་ཚུགས་སུ་ཞིབ་དཔྱད་གནང་བར་ཕེབས།

    ཁུལ་འགོ་ཁྲིད་དབྱང་ཙི་ཅང་། ཁྲིན་ཆོན། ཧུའུ་ཧྥེན་ཞུང་ཞིབ་དཔྱད་དུ་ཕེབས་རོགས་ཞུས།