ནད་ཕོག་མ་ཐག་རམས་རྩ་ཟོས་ན་འགྲིག་གམ།

        ཉེ་ཆར། རང་ལོ40ལ་སླེབས་པའི་སྐུ་ཞབས་ཀྲང་ལགས་ལུས་ཤུགས་ཟད་པ་དང་ཁ་སྐོམ་པ་སོགས་ཀྱི་རྐྱེན་པས་སྨན་ཁང་དུ་བསྐྱལ་བ་རེད། སྨན་ཁང་དུ་བསྡད་རྗེས། ཁོ་ལ་རིམ་བཞིན་དྲན་པ་གསལ་པོ་མེད་པ་སོགས་ཀྱི་ནད་རྟགས་ཐོན་ཞིང་། སྨན་པས་དུས་ཐོག་ཏུ་སྨན་བཅོས་བྱས་པ་བརྒྱུད། སྐུ་ཞབས་ཀྲང་ལགས་ཀྱི་ཚེ་སྲོག་ལུས་རྟགས་གཞི་ནས་བརྟན་པོ་བྱུང་། གནས་ཚུལ་དེའི་རྒྱུ་རྐྱེན་གཙོ་བོ་ནི་རམས་རྩ་སྟེ་རྒྱ་སྐད་དུ“板蓝根”ཞེས་པ་ཤོག་ཆག་བརྒྱད་ཟོས་པ་ལས་བྱུང་བ་རེད། མིག་སྔར། དབུགས་ལམ་གྱི་ནད་རིགས་མང་པོ་ཞིག་ཐོན་མང་བའི་དུས་ཡིན་པས། མི་མི་ཉུང་བ་ཞིག་གིས་རང་འགུལ་ངང་རམས་རྩ་བསྟེན་ནས་སྔོན་འགོག་བྱེད་བཞིན་ཡོད། འོ་ན། འདི་ལྟར་བྱས་ན་ཕན་ཐོགས་དངོས་ཐོན་སྲིད་དམ། རམས་རྩ་ཟ་བར་དོ་སྣང་བྱ་དགོས་ས་ཅི་ཞིག་ཡོད།

        རམས་རྩས་ནད་པའི་དྲན་པ་ཐོར་དུ་འཇུག་དོན་གང་ཡིན།

        མ་གཞི་སྐུ་ཞབས་ཀྲང་ལགས་ལ་གཅིན་པ་མངར་འགྱུར་གྱི་ནད་དང་ཁྲག་ཤེད་མཐོ་བའི་ནད་ཀྱི་ལོ་རྒྱུས་ཡོད་མོད། འོན་ཀྱང་ཁོས་དུས་རྒྱུན་དུ་སྨན་པའི་བཀའ་ལྟར་ཚད་ལྡན་གྱི་ཁྲག་མངར་གཅོག་པའི་སྨན་བཅོས་མི་བྱེད་པར་མ་ཟད། རང་འགུལ་ངང་ཁྲག་ཤེད་གཅོག་པའི་སྨན་སྤྱོད་མཚམས་བཞག་ཡོད། ནད་མ་ཕོག་པའི་ཉིན་གོང་མའི་དགོང་ཟས་རྗེས། སྐུ་ཞབས་ཀྲང་ལགས་ལ་ཕོ་བ་སྦོས་ཤིང་སྦུག་སུབ་ཐེབས་པའི་སྣང་ཚུལ་ཐོན། ཉིན་གཉིས་པའི་ཞོགས་པར་ཇེ་བདེ་རུ་འགྲོ་ཆེད་ཁོས་རམས་རྩ་ཤོག་ཆག་བརྒྱད་ཚང་མ་ཟོས་པ་རེད། ཕྱི་དྲོ་ཕྱིར་ཐོན་དུས། སྐུ་ཞབས་ཀྲང་ལགས་ཀྱི་སྦུག་སུབ་ཐེབས་པའི་གནས་ཚུལ་ཇེ་སྡུག་ཏུ་སོང་བ་དང་། ཁ་སྐམ་ཞིང་ཆུ་འཐུང་ནའང་ཞི་འཇགས་སུ་ཕྱིན་མེད་སྟབས། དེ་རྗེས་ཁོ་སྨན་ཁང་དུ་སྨན་བཅོས་བྱེད་པར་སླེབས་པ་རེད། བརྟག་དཔྱད་བྱས་པ་བརྒྱུད། སྐུ་ཞབས་ཀྲང་ལགས་ལ་གཅིན་པ་མངར་འགྱུར་གྱི་ནད་ལ་ཐུམ་རིགས་སྐྱུར་དུག་ཕོག་ནས་དྲན་པ་ཐོར་བ་དང་། ཁྲག་ཤེད་མཐོ་བའི་རིམ་པ་གསུམ་པའི་ནད་རྟགས་བཅས་ཡོད། སྨན་བཅོས་བྱས་པ་བརྒྱུད་སྐུ་ཞབས་ཀྲང་ལགས་ཉེན་ཁ་ལས་ཐར་བ་རེད། སྨན་པས་ངོ་སྤྲོད་བྱས་པར་གཞིགས་ན། སྨན་རྫས་ཀྱི་བྲོ་བ་ཇེ་ལེགས་སུ་གཏོང་ཆེད། ཁྲོམ་རའི་ཐོག་གི་ཀྲུང་ལུགས་སྨན་ཁག་ཅིག་ནང་བུ་རམ་གྱི་གྲུབ་ཆ་ཡོད་པར་མ་ཟད། དེའི་འདུས་ཚད་མཐོ་བས་གཅིན་པ་མངར་འགྱུར་གྱི་ནད་ཕོག་མཁན་གྱིས་ཟོས་ན་འཚམ་པོ་མེད། སྐུ་ཞབས་ཀྲང་ལགས་ལ་གཅིན་པ་མངར་འགྱུར་གྱི་ནད་དང་ཁྲག་ཤེད་མཐོ་བའི་ནད་ཡོད་པས། རམས་རྩ་ཤོག་ཆག་བརྒྱད་ཟོས་རྗེས། ཁོ་ལ་དུས་ཐུང་ནང་མངར་ཆ་མང་པོ་ཟོས་པས། གཅིན་པ་མངར་འགྱུར་ནད་ལ་ཐུམ་རིགས་སྐྱུར་དུག་ཕོག་པ་རེད། འོན་ཀྱང་སྐུ་ཞབས་ཀྲང་ལགས་ཀྱིས་སྔོན་ལ་རང་དགར་སྨན་ཟ་མཚམས་བཞག་པ་དང་། ཁྲག་མངར་ལ་ཞིབ་བཤེར་མི་བྱེད་པ་དང་བཟའ་བཏུང་ལ་ཚོད་འཛིན་མ་བྱེད་པ། སྨན་བཀོལ་སྟངས་སོགས་ལ་ཆོས་ཉིད་མ་བརྒྱུད་པར་ཁྲག་མངར་གློ་བུར་ཡར་འཕར་བར་མངོན་མེད་རྐྱེན་ངན་བཟོ་གི་ཡོད།