སྦྲང་མ་གསོས་ནས་ཕྱུག་འགྱུར་གྱི་སྣེ་ཁྲིད་བྱས་པའི་བཀྲ་དོན།

རྩོམ་པ་པོ།     ཡིག་བསྒྱུར།       དུས་ཚོད།   2025-01-17   རྩོམ་ཁུངས།    སེམས་ཀྱི་ཉི་ཟླ་བོད་ཡིག་དྲ་བ།

        འཇོལ་རྫོང་ཐང་སྟེང་ཤང་དུ་འཇོལ་རྫོང་རྫོང་ཉན་ནུང་ས་མཐོའི་ཤིན་ཡུས་ཧྥེང་ལས་རིགས་གསོ་སྤེལ་ཚོང་ཁང་གི་འགན་འཁུར་བ་བཀྲ་དོན་གྱིས་སྦྲང་མ་གསོ་པ་དེ་འབྲི་སྨྱུག་ཏུ་བརྩིས་ནས། གྲོང་གསེབ་དར་རྒྱས་ཀྱི་མཛེས་སྡུག་ལྡན་པའི་རི་མོ་ཞིག་བྲིས་ཡོད།

        2023ལོར་ཕུགས་བསམ་རུམ་ལ་བཅུག་པའི་བཀྲ་དོན་གྱིས་སྦྲང་གསོ་ཐོན་ལས་འཕེལ་རྒྱས་ཀྱི་མི་མངོན་པའི་སྟོབས་ཤུགས་ཚོར་སྣང་སྐྱེན་པས། ཁོང་གིས་ཕྱོགས་མང་པོའི་ཐད་མ་དངུལ་གྲབས་གསོག་བྱས་ཤིང་། ཞིང་དུད་ཀྱི་ལག་ནས་སྦྲང་ཕྲུག་སྒམ་60ཞིབ་ཚགས་བདམས་ཏེ་ཁོང་གི“ཞིམ་མངར་གྱི་བྱ་གཞག་”འགོ་ཚུགས་པ་རེད། བཀྲ་དོན་གྱིས་ཉིན་མཚན་མེད་པར་སྦྲང་མ་གསོ་པའི་ལག་རྩལ་ལ་ཞིབ་འཇུག་བྱས་ལ།  ཉམས་མྱོང་ཕུན་སུམ་ཚོགས་པའི་སྦྲང་མ་གསོ་མཁན་ལ་ཁེངས་སྐྱུང་གིས་བློ་འདྲི་བྱས་ཏེ། ས་གནས་དེ་གའི་གནམ་གཤིས་དང་སྦྲང་རྩི་འབྱུང་ཁུངས་ཀྱི་ཆ་རྐྱེན་དང་འཚམ་པའི་གསོ་སྤེལ་བྱེད་ཐབས་ཆ་ཚང་ཞིག་རིམ་བཞིན་འཚོལ་ཞིབ་བྱས། ཁོང་གིས་གཟབ་ནན་གྱི་ལྟ་སྐྱོང་འོག་སྦྲང་ཁྱུ་རིམ་བཞིན་ཁོར་ཡུག་དང་འཚམ་པ་དང་གྲངས་འབོར་བརྟན་པོའི་ངང་མང་དུ་ཕྱིན་ཡོད། ད་ཆ་ཁོང་ནི་སྦྲང་རིགས་སྒམ་120ཡོད་པའི་སྦྲང་གསོ་མཁས་པ་ཞིག་ཏུ་གྱུར་ཡོད།
        བཀྲ་དོན་གྱིས་མི་གཅིག་ཕྱུག་ན་ཕྱུག་པར་མི་བརྩི་ལ། གྲོང་ཚོ་ཡོངས་ཕྱུག་ན་ད་གཟོད་དངོས་གནས་ཕྱུག་ཡིན་པའི་གནས་ལུགས་རྟོགས་ཏེ། གྲོང་གསེབ་རྣམས་ཐུན་མོང་ཐོག་ཕྱུག་འགྱུར་གྱི་ལམ་དུ་བསྐྱོད་ཆེད་ཁོང་གིས་ཁྱིམ་ཚང་རེ་རེ་བཞིན་གྲོང་མི་སྦྲང་མ་གསོ་པའི་གྲལ་དུ་ཞུགས་རྒྱུའི་སྐུལ་སློང་བྱས་པ་རེད། འདོད་བློ་ཡོད་པའི་ཞིང་དུད་དྲུག་ལ་བཀྲ་དོན་གྱིས་ཁོང་ཚོར་སྤུས་ལེགས་སྦྲང་མའི་ས་བོན་མཁོ་འདོན་བྱས་པ་མ་ཟད། ད་དུང་རང་ཉིད་ཀྱིས་སྦྲང་མ་གསོ་བའི་ལག་རྩལ་སློབ་ཁྲིད་ཀྱང་བྱས་པ་རེད། སྦྲང་སྒམ་བཞག་ནས་སྦྲང་མ་དོ་དམ་བྱེད་པ་དང་། ནད་དང་འབུའི་གནོད་འཚེ་སྔོན་འགོག་བྱེད་པ་ནས་སྦྲང་རྩི་བསྡུ་ལེན་བྱེད་པའི་ཐབས་རྩལ་བར་ཁོང་གིས་ངང་རྒྱུད་རིང་པོས་འགྲེལ་བཤད་བྱས་ནས་ས་གནས་ས་ཐོག་ཏུ་དཔེ་སྟོན་བྱས་པ་རེད། ཁོང་གི་སྐུལ་ཁྲིད་འོག་ཞིང་དུད་ཚོས་མྱུར་དུ་སྦྲང་མ་གསོ་བའི་གནད་འགག་ཁོང་དུ་ཆུད་པ་དང་། རང་ཁྱིམ་གྱི་བྱ་གཞག་མངར་མོ་འགོ་བཙུགས་ནས་ཡོང་འབབ་ཀྱང་དེ་དང་བསྟུན་ནས་མང་དུ་ཕྱིན་ཡོད།

 

        2024ལོར་བཀྲ་དོན་གི་སྦྲང་ར་ནས་སྤུས་ལེགས་སྦྲང་རྩི་རྒྱ་མ་1600བསྡུ་རུབ་བྱས་པ། སྦྲང་རྩིའི་ཁ་དོག་དྭངས་གསལ་དང་། བྲོ་བ་ཞིམ་པ། འཚོ་བཅུད་ཕུན་སུམ་ཚོགས་པས། ཁྲོམ་རའི་ཐོག་ཧ་ཅང་དགའ་བསུ་ཐོབ་པས། བཀྲ་དོན་དང་ཞིང་དུད་ཚོར་ཁེ་བཟང་མང་པོ་ཐོབ་ཡོད་ལ། འཇོལ་རྫོང་ཉན་ནུང་ས་མཐོའི་ཤིན་ཡུས་ཧྥུང་ལས་རིགས་གསོ་སྤེལ་ཚོང་ཁང་གི་སྐད་གྲགས་ཆེན་པོ་ཐོབ།

        བཀྲ་དོན་ནི་སྦྲང་མ་གསོ་མཁན་མཁས་པ་ཞིག་ཡིན་པ་མ་ཟད། ད་དུང་གྲོང་གསེབ་བཅོས་སྐྱོང་དང་འཛུགས་སྐྲུན་ལས་དོན་ལ་ཧུར་ཐག་འབད་བརྩོན་བྱེད་ཀྱི་ཡོད། 2016ལོ་ནས་ད་བར་ཁོང་གིས་སྔ་རྗེས་སུ་ཞང་དང་རྫོང་རིམ་པ་གཉིས་ཀྱི་མི་དམངས་འཐུས་ཚོགས་ཀྱི་འཐུས་མིས་འགན་འཁུར་ནས་མི་དམངས་ལ་སྐད་ཆ་བཤད་པ་དང་གྲོང་གསེབ་འཕེལ་རྒྱས་གཏོང་ཆེད་བསམ་འཆར་དང་ཐབས་ཇུས་འདོན་པ། བྱ་སྤྱོད་དངོས་ལ་བརྟེན་ནས་ཐོག་མའི་བསམ་འདུན་དང་ལས་འགན་ལག་ལེན་བསྟར་བ་བཅས་རེད།

        ལོ་མང་རིང་བཀྲ་དོན་གྱིས་ཐང་སྟེང་ཤང་གི་ཕ་གྲོགས་དང་གྲོང་མི་དང་མཉམ་དུ་གྲོང་གསེབ་དར་རྒྱས་ཀྱི་བརྗིད་ཉམས་ལྡན་པའི་ལེའུ་བྲིས་པ་དང་ས་གནས་དེ་གའི་རྒྱ་ཆེའི་གཞོན་ནུ་ཕ་ཡུལ་དུ་ལོག་ནས་ལས་གཏོད་བྱ་རྒྱུར་མིག་དཔེ་བཏིང་ཡོད།མ་འོངས་པའི་འཆར་འགོད་སྐོར་གླེང་སྐབས་བཀྲ་དོན་ལ་ཡིད་ཆེས་ཀྱིས་ཁེངས་ཤིང་། ཁོང་གིས“འདི་ལོར་གསོ་སྤེལ་གཞི་ཁྱོན་སྔར་བས་ཆེ་རུ་གཏོང་བ་དང་གསོ་སྤེལ་ལག་རྩལ་མུ་མཐུད་ལེགས་སུ་གཏོང་བ། སྦྲང་རྩི་ཐོན་ཚད་དང་སྤུས་ཚད་མཐོ་རུ་གཏོང་རྒྱུ་རེད། དེ་དང་ཆབས་ཅིག་སྦྲང་རྩིའི་སྤུས་རྟགས་ཐོ་འགོད་བྱས་ནས་སྦྲང་རྩིའི་ཉམས་ལེན་བྱེད་སྒོ་སྤེལ་ནས་ཡུལ་སྐོར་བ་སྦྲང་རྩིའི་ར་བར་ལྟ་སྐོར་དང་སྦྲང་རྩིའི་བསྡུ་ལེན་ནང་ཞུགས་རྒྱུའི་ཡིད་དབང་འགུག་སྟེ་སྦྲང་རྩིའི་ཐོན་ལས་དང་གྲོང་གསེབ་ཡུལ་སྐོར་ཟུང་འབྲེལ་དམ་ཟབ་བྱས་ནས་གྲོང་གསེབ་དར་རྒྱས་ཀྱི་ཐབས་ལམ་གསར་པ་འཚོལ་ཞིབ་བྱས་ནས་མི་མང་པོ་ཞིག་ལ་འཇོལ་རྫོང་གི་སྦྲང་རྩིའི་རིག་གནས་ཤེས་རྟོགས་དང་གྲོང་གསེབ་ཀྱི་ཐུན་མོང་མ་ཡིན་པའི་ཡིད་དབང་འཕྲོག་ཤུགས་ཚོར་ཐུབ་པ་བྱ་རྒྱུ་ཡིན་པ་རེད། ”

分享到：QQ空间新浪微博腾讯微博人人网微信