ཞི་ཅིན་ཕིང་གིས་ཨ་རིའི་ཙུང་ཐུང་ལ་བདམས་ཐོན་བྱུང་བའི་ཐེ་རོན་ཕུའུ་དང་ཞལ་པར་ཐོག་ནས་བཀའ་མོལ་གནང་བ།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་1ཚེས་17ཉིན་གློག་འཕྲིན་འབྱོར་གསལ། ཟླ་1ཚེས་17ཉིན་གྱི་དགོང་མོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཞལ་ཆད་ལྟར་ཨ་རིའི་ཙུང་ཐུང་ལ་བདམས་ཐོན་བྱུང་བའི་ཐེ་རོན་ཕུའུ་དང་ཞལ་པར་ཐོག་ནས་བཀའ་མོལ་གནང་བ་རེད།

    ཞི་ཅིན་ཕིང་གིས་ཐེ་རོན་ཕུའུ་སླར་ཡང་ཨ་རིའི་ཙུང་ཐུང་ལ་བདམས་ཐོན་བྱུང་བར་རྟེན་འབྲེལ་ཞུས་ཤིང་། ཁོང་གིས་ང་ཚོ་ཚང་མས་ཕན་ཚུན་མཉམ་འགུལ་བྱེད་པར་ཚད་མཐོའི་མཐོང་ཆེན་བྱེད་པ་དང་། ཚང་མས་ཀྲུང་ཨའི་འབྲེལ་བ་ཨ་རིའི་ཙུང་ཐུང་གི་འགན་འཁུར་ཡུན་གསར་པའི་ནང་འགོ་ཡག་པོ་ཞིག་འཛུགས་ཐུབ་པའི་རེ་བ་བྱེད་པ། ཀྲུང་ཨའི་འབྲེལ་བ་འགོ་འཛུགས་ས་གསར་པའི་ཐོག་འཕེལ་རིམ་དེ་བས་ཆེ་བ་ཡོང་བར་སྐུལ་འདེད་གཏོང་འདོད་ཡོད་ཅེས་གསུངས་པ་རེད།

    ཞི་ཅིན་ཕིང་གིས་ནན་བཤད་གནང་དོན། ཀྲུང་ཨ་རླབས་ཆེན་རྒྱལ་ཁབ་གཉིས་ཀྱིས་རང་རང་སོ་སོའི་ཕུགས་འདུན་དོན་གཉེར་བྱེད་པ་དང་མི་དམངས་རྣམས་དེ་བས་མཛེས་སྡུག་ལྡན་པའི་འཚོ་བ་སྐྱེལ་རྒྱུ་ཡོང་བར་གཞོལ་བཞིན་ཡོད། ཀྲུང་ཨ་རྒྱལ་ཁབ་གཉིས་དབར་ཐུན་མོང་གི་ཁེ་ཕན་རྒྱ་ཁྱབ་དང་མཉམ་ལས་ཀྱི་བར་མཐོངས་ཆེན་པོ་ཡོད་པས་རོགས་ཟླ་དང་གྲོགས་པོར་གྱུར་ནས་ཕན་ཚུན་གྲུབ་འབྲས་གཏོད་པ་དང་། ཐུན་མོང་དར་རྒྱས་ཡོང་བ། རྒྱལ་ཁབ་གཉིས་པོར་བདེ་རྩ་སྐྲུན་པ། འཛམ་གླིང་ལ་ཕན་པ་ཐོབ་པ་བཅས་བྱེད་ཐུབ།

ཞི་ཅིན་ཕིང་གིས་གསུངས་དོན། རྒྱལ་བབ་མི་འདྲ་བའི་རྒྱལ་ཁབ་ཆེན་པོ་གཉིས་ཡིན་པའི་ཀྲུང་ཨའི་དབར་མི་མཐུན་པའི་ཆ་ཐོན་སྲིད། འགག་རྩ་ནི་ཕན་ཚུན་གྱི་ལྟེ་བའི་ཁེ་ཕན་དང་དོ་ཁུར་གལ་ཆེན་ལ་བརྩི་འཇོག་བྱས་ནས་གནད་དོན་ཐག་གཅོད་འོས་འཚམ་བྱེད་པའི་ཐབས་ཤེས་འཚོལ་རྒྱུ་དེ་རེད། ཐའེ་དབན་གྱི་གནད་དོན་ནི་ཀྲུང་གོའི་རྒྱལ་ཁབ་ཀྱི་བདག་དབང་དང་མངའ་ཁོངས་ཆ་ཚང་དང་འབྲེལ་བ་ཡོད་པས། ཨ་རི་ཕྱོགས་ཀྱིས་ངེས་པར་དུ་གཟབ་ནན་ངང་ཐག་གཅོད་བྱ་རྒྱུའི་རེ་བ་ཡོད། ཀྲུང་ཨའི་དཔལ་འབྱོར་ཚོང་དོན་གྱི་འབྲེལ་བའི་ངོ་བོ་ནི་གཉིས་ཁེ་གཉིས་ཕན་ཡིན་པས། ཁ་གཏད་དུ་ལངས་པ་དང་གདོང་ཐུག་བྱེད་པ་ནི་ང་ཚོའི་གདམ་ག་ཞིག་མ་རེད། ཕྱོགས་གཉིས་པོས་ཕན་ཚུན་བརྩི་འཇོག་དང་། ཞི་བདེ་མཉམ་གནས། མཉམ་ལས་གཉིས་ཕན་བཅས་ཀྱི་རྩ་དོན་གཞིར་བཟུང་མཉམ་ལས་ལ་ཤུགས་སྣོན་རྒྱག་པ་དང་རྒྱལ་ཁབ་གཉིས་དང་འཛམ་གླིང་ལ་ཕན་པའི་དོན་ཆེན་དང་། བྱ་བ་དངོས། བྱ་བཟང་བཅས་མང་ཙམ་བསྒྲུབས་ཏེ་ཀྲུང་ཨའི་གྲུ་གཟིངས་ཆེན་པོ་གཉིས་བརྟན་ལྷིང་དང་། སྐྱོན་བྲལ། རྒྱུན་མཐུད་ཆོག་པའི་འཕེལ་རྒྱས་བཅས་ཀྱི་ཆུ་ལམ་བརྒྱུད་ནས་རྒྱུན་ཆད་མེད་པར་མདུན་ཕྱོགས་སུ་སྐྱོད་ཐུབ་པར་བྱེད་དགོས།

    ཐེ་རོན་ཕུའུ་ཡིས་ཀྲུའུ་ཞི་ཞི་ཅིན་ཕིང་གིས་རྟེན་འབྲེལ་ཞུས་པར་ཐུགས་རྗེ་ཆེ་ཞུས་པ་དང་། ཁོང་གིས་ཀྲུའུ་ཞི་ཞི་ཅིན་ཕིང་དབར་གྱི་རླབས་ཆེན་གྱི་འབྲེལ་བར་མཐོང་ཆེན་བྱེད་པ་དང་། མུ་མཐུད་སྐད་ཆ་ཤོད་རེས་དང་འབྲེལ་གཏུག་རྒྱུན་འཁྱོངས་བྱ་རྒྱུའི་རེ་བ་བྱེད་པ། ཀྲུའུ་ཞི་ཞི་ཅིན་ཕིང་དང་གང་མགྱོགས་ཐུག་འཕྲད་བྱ་རྒྱུའི་རེ་སྒུག་བྱེད་ཀྱི་ཡོད། ཨ་ཀྲུང་ནི་དེང་གི་འཛམ་གླིང་ཐོག་རྒྱལ་ཁབ་གལ་ཆེ་ཤོས་ཡིན་པས། ཡུན་རིང་མཛའ་གྲོགས་རྒྱུན་འཁྱོངས་བྱས་ནས་ཐུན་མོང་ཐོག་འཛམ་གླིང་ཞི་བདེ་སྲུང་སྐྱོང་བྱེད་དགོས་ཞེས་གསུངས་པ་རེད།

    རྒྱལ་ཁབ་གཉིས་པོའི་གཙོ་བདག་གིས་ཡུག་རེན་གྱི་ཉམས་ཉེན་དང་ཕ་ལེ་སི་ཐན་དང་དབྱི་སི་རལ་གྱི་གདོང་ཐུག་སོགས་ཐུན་མོང་ཐོག་དོ་ཁུར་བྱེད་པའི་རྒྱལ་སྤྱི་དང་ས་ཁུལ་གྱི་གནད་དོན་གལ་ཆེན་ཐད་བསམ་འཆར་བརྗེ་རེས་གནང་བ་རེད།

རྒྱལ་ཁབ་གཉིས་པོའི་གཙོ་བདག་གིས་འཐབ་ཇུས་ཀྱི་འབྲེལ་གཏུག་ཐབས་ལམ་བཙུགས་ནས། རྒྱལ་ཁབ་གཉིས་པོས་ཐུན་མོང་ཐོག་དོ་ཁུར་བྱེད་པའི་གནད་དོན་གལ་ཆེན་ཐད་རྒྱུན་གཏན་རང་བཞིན་གྱི་འབྲེལ་བ་རྒྱུན་འཁྱོངས་བྱ་རྒྱུའི་མོས་མཐུན་གནང་བ་རེད།