དབུ་ཤོག >> མི་རིགས་ཆོས་ལུགས། >> སྲོལ་རྒྱུན་དུས་སྟོན།
བདེ་ཆེན་སྐོར་བྲོ།
རྩོམ་པ་པོ། སེམས་ཀྱི་ཉི་ཟླའི་བོད་ཡིག་དྲ་བ། དུས་ཚོད། 2017-04-17 རྩོམ་ཁུངས། སེམས་ཀྱི་ཉི་ཟླའི་བོད་ཡིག་དྲ་བ། ཀློག་གྲངས། 179

སྐོར་བྲོ་ནི་རོལ་ཆས་ཀྱི་རམ་དཀྲོལ་མེད་པའི་ཐུན་མོང་གི་བྲོ་གར་ཞིག་ཡིན། བདེ་ཆེན་ས་ཁུལ་གྱི་ས་ཆ་འགའ་ཤས་སུ་སྐོར་བྲོ་ཞེས་འབོད་ཀྱི་ཡོད་ཅིང་། ས་ཆ་འགའ་ཤས་སུ་ཚ་ལ་(རྩེ་མོ་རྩེད་པའི་དོན)ཞེས་འབོད་ཀྱི་ཡོད། 

 

སྐོར་བྲོ་ལ་དུས་ཡུན་རིང་པོའི་ལོ་རྒྱུས་ལྡན་དེ། སྤྱི་ལོའི་དུས་རབས་བདུན་པའི་སྔོན་དུ་ཕུགས་འདེད་ཆོག་ཅིང་། བདེ་ཆེན་བོད་རིགས་ཀྱི་ཐོན་སྐྱེད་འཚོ་བའི་འཕེལ་རྒྱས་དང་བསྟུན་ནས་རིམ་གྱིས་འཕེལ་རྒྱས་དང་འགྱུར་ལྡོག་བྱུང་ཡོད། དེའི་ཕྱིར། སྐོར་བྲོ་ལ་ནས་རྡུང་བ་དང་བལ་འཁལ་བ། ཨ་རག་བསྙལ་བ་སོགས་ཀྱི་ནང་དོན་ཡོད་ལ། དཔའ་བོ་ལ་བསྟོད་པ་དང་། བདེ་ཆེན་བོད་རིགས་ཀྱི་ཡུལ་སྲོལ་གོམས་འདྲིས་དང་གཉེན་སྒྲིག ཁང་གསར་བཞེངས་པ། སྐུ་མགྲོན་བསུ་བ་སོགས་ཀྱི་ནང་དོན་ཡོད། སྐོར་བྲོ་ནི་སྤྲོ་དགའ་བྱེད་པའི་བྲོ་གར་ཞིག་ཡིན་ཞིང་། གཉེན་སྒྲིག་སྟོན་མོ་དང་ལོ་གསར་སོགས་འདྲ་མིན་སྣ་ཚོགས་ཀྱི་དགའ་སྤྲོའི་དུས་ཆེན་ཐུག་དུས་ཕོ་མོ་རྒན་གཞོན་མི་དབྱེ་བར་ཀུན་གྱིས་སྐོར་བྲོ་འཁྲབ་ཆོག་པ་རེད།

 

 

 

བདེ་ཆེན་གྱི་སྐོར་བྲོ་ལ་ཚ་རྙིང་དང་ཚ་གསར་ཁག་གཉིས་ཡོད་དེ། ཚ་རྙིང་ནི་སྐོར་བྲོ་རྙིང་པ་ཡིན་ཞིང་ཚ་གསར་ནི་སྐོར་བྲོ་གསར་པ་ཡིན། ཚ་རྙིང་ནི་བོད་བཙན་པོའི་སྐབས་སུ་བདེ་ཆེན་དུ་དར་བ་ཡིན་ཞིང་། བྲན་གཡོག་སྤྱི་ཚོགས་དང་གདོད་མའི་ཆོས་ལུགས་ཀྱི་རྣམ་པ་མཚོན་ཡོད་ལ། མཆོད་འབུལ་གྱི་རང་བཞིན་ལྡན་པས། ཆོས་པ་དང་མི་རྒན་རྣམས་ཀྱིས་ཚ་རྙིང་འཁྲབ་པར་དགའ་པོ་ཡོད། བྲོ་ཚིག་གི་ནང་དོན་དང་གར་འགྲོས་ནི་གནའ་ཉམས་དོད་པོ་ཡིན། དཔེར་ན།《བསམ་ཡས་ལྷ་ཁང་བཞེངས་པ》ཞེས་པ་དང་《གཟི་བྱིན་ཆགས་པའི་དགོན་སྡེ》《ལོ་ལེགས་བྱུང་བ》ཞེས་པ་སོགས་ཡོད། སྐོར་བྲོ་དེ་རིགས་འཁྲབ་དུས་གཏན་འཁེལ་གྱི་བྲོ་ཚིག་མ་གཏོགས་སྤྱོད་མི་ཆོག་པ་དང་། གར་འགྲོས་ཀྱང་དལ་ཞིང་བག་ཆགས་པོ་རེད། ཚ་གསར་གྱི་བྲོ་ཚིག་དང་གར་འགྲོས་ནི་གནས་བབ་དང་བསྟུན་ནས་བསྒྱུར་ཆོག་ཅིང་། ངལ་རྩོལ་དང་། ཞིང་ཕྱུགས་ལས། ཚོང་ལས། ཕོ་མོའི་བརྩེ་དུང་མཚོན་པ་སོགས་ནང་དོན་འདྲ་མིན་སྣ་ཚོགས་ཡོད། དཔེར་ན།《གསེར་ཐང་གི་སྟེང་ལ》ཞེས་པ་དང་《བྱང་ཕྱོགས་རྩྭ་ཐང་ཆེན་མོ》ཞེས་པ་སོགས་ཡོད།

 

བདེ་ཆེན་གྱི་སྐོར་བྲོ་ལ་ས་གནས་ཀྱི་ཁྱད་པར་ཡོད་དེ། དཔེར་ན། འཇོལ་པའི་སྐོར་བྲོ་ལ་ཐོག་མཐའ་བར་གསུམ་དུ་གཏན་འཁེལ་གྱི་གོ་རིམ་བརྒྱུད་ནས་འཁྲབ་དགོས་པ་སྟེ། སྤྱིར་བཏང་གི་གོ་རིམ་ནི། གཞས་བ་འབོད་པ། གཡང་བྲོ། བསུ་བྲོ། བསྟོད་བྲོ། འཛོམས་བྲོ། གྲམ་བྲོ། བཀག་བྲོ་དང་བཀྲ་ཤིས་བརྗོད་པ་བཅས་ཀྱི་གོ་རིམ་ལྟར་འཁྲབ་དགོས། དེའི་ནང་དུ་གཞས་བ་འབོད་པ་དང་བཀྲ་ཤིས་བརྗོད་པ་མ་གཏོགས་པར། དེ་མིན་གྱི་བྲོའི་གདངས་ནི་ཁག་འགའ་ནས་ཁག་བཅུ་ཕྲག་འགའ་ཤས་བར་མི་འདྲ་བ་ཡོད། འོན་ཀྱང་འཁྲབ་དུས་ངེས་པར་དུ་གོ་རིམ་ལྟར་འཁྲབ་དགོས།

 

རྩོམ་སྒྲིག་པ། (Test)