དབུ་ཤོག >> བོད་ཀྱི་རིག་གནས། >> གསོ་རིག >> སྨན་སྦྱོར་ཤེས་བྱ།
སྙིང་འཕྱོས་ནད་ཀྱི་བརྟག་བཅོས།
རྩོམ་པ་པོ། མི་གསལ། དུས་ཚོད། 2017-08-03 རྩོམ་ཁུངས། མཚོ་སྔོན་བོད་ཡིག་གསར་འགྱུར། ཀློག་གྲངས། 246

    སྙིང་འཕྱོས་ནད་ཅེས་པ་ནི་བསམ་བློའི་བརྩེ་དུང་ལ་ཕོག་ཐུག་ཆེན་པོ་བྱུང་བ་སོགས་རྐྱེན་བྱས་ཏེ་ལུས་ལ་ལྷན་སྐྱེས་སུ་གནས་པའི་ཉེས་པ་རླུང་གི་བྱེད་ལས་ལོག་ནས་སྙིང་ལ་ཞུགས་ཏེ་རླུང་འཁྲུགས་པའི་དབང་གིས་ཤེས་པ་འཕྱོས་ནས་ངེས་བརྟན་མེད་པར་གྱུར་པའི་ནད་ཅིག་རེད།

    སློང་རྐྱེན།

    སྙིང་འཕྱོས་ནད་ནི་ཁ་ཟས་རོ་ཁ་བའི་རིགས་དང་།ནུས་པ་ཡང་རྩུབ་བསིལ་བའི་ཟས་རིགས་བསྟེན་དྲགས་པ།ལྟོ་དང་གཉིད་ཆག་པ།ལྟོ་སྟོང་ལ་དྲག་ཤུལ་གྱི་ལས་བྱས་པ།ཁ་ཡི་ལས་ཆེ་བ།ཤུགས་བཀག་པ་དང་ངུས་དྲགས་པ།ཁྲག་མང་དུ་ཟགས་པ་དང་འཁྲུ་སྐྱུགས་དྲགས་པོས་བཏབ་པ།བརྩེ་ཞིང་ཞེན་ཆགས་ཆེ་བའི་ཡུལ་གང་ཞིག་གློ་བུར་དུ་འཕོ་འགྱུར་བྱུང་སྟེ་དེས་བསམ་བློའི་བརྩེ་དུང་ལ་ཕོག་ཐུག་ཆེན་པོ་བྱུང་བ་དང་། བློ་ཕམ་ཆེན་པོ་བསྐྱེད་པ། བསམ་ཤེས་བཟོད་བསྲན་མི་ཐུབ་པ་སོགས་ཀྱིས་སློང་གིན་ཡོད་པ་རེད།

    ནད་རྟགས།

    ནད་རྟགས་སུ་མགོ་བོ་ན་བ་དང་།བརྗེད་ངེས་ཆེ་བ།ཤེས་པ་འཕྱོས་ཤིང་དོན་མེད་དུ་སྙིང་མི་དགའ་བ།བསམ་བློར་སྟོང་སྣང་ཤར་བ།སྐབས་རེར་སྡུག་ནས་ངུ་འབོད་དྲག་པོ་བྱེད་པ།སྐབས་རེར་དགའ་བའི་ཚུལ་གྱིས་གད་མོ་ཆེན་པོ་བགད་པ།སྐབས་རེར་གླུ་གཞས་གཏོང་བ།སྐབས་རེར་འཆལ་འཆོལ་སྨྲ་བ།གནས་གཅིག་ཏུ་སྡོད་མི་ཚུགས་པ།སྐབས་རེར་གློ་བུར་དྲན་པ་ཐོར་ནས་སར་འགྱེལ་ཏེ་སྐར་མ་ཁ་ཤས་རིང་དབུགས་སྒོང་པའམ་ཡང་ན་འཚང་ཆེ་བ།མིག་བཙུམ་ཞིང་ཁ་མ་གྲགས་པར་སྡོད་པ།ཡན་ལག་རེངས་པ།སྐབས་རེར་སྐད་ཆ་རྫོགས་མེད་བཤད་པ་བཅས་ཡིན་རུང་།གཞི་རྩའི་དྲན་ཤེས་གསལ་པོ་ཡོད་པ།གཞན་བྲང་གཞུང་དཀར་ནག་མཚམས་སོགས་རླུང་གསང་རྣམས་བརྫིས་ན་ན་བ་དང་།འཕར་རྩའི་རྒྱུ་བ་སྟོང་ལ་གྲངས་མྱུར་བ།དྲི་ཆུའི་མདོག་སྔོ་ཞིང་ལྦུ་བ་ཆེ་བ་སོགས་ཀྱི་མངོན་ཚུལ་འབྱུང་བ་ཡིན།

    བཅོས་ཐབས།

    བཅོས་ཐབས་སུ་ཁ་ཟས་ལ་སྣུམ་བཅུད་དྲོད་ཀྱི་ཁ་ཟས་ཟྭ་དང་ཙོང་སྒོག ཟན་སྐམ། རུས་ཚོད། བུ་རམ། མར་རྙིང་། འབྲུ་མར། ལུག་ཤ་དང་བུར་ཆང་། འོ་མ་སོགས་བསྟེན་དགོས།བཅུད་མེད་པ་དང་ནུས་པ་ཡང་རྩུབ་ཁ་བ་དང་བསིལ་བའི་རིགས་ཏེ་འབྲུ་རྙིང་དང་ཕག་ཤ་ལྟ་བུ་ལ་འཛེམ་དགོས།སྤྱོད་ལམ་དུ་ཁོར་ཡུག་ཟང་ཟིང་མིན་པའི་དབེན་གནས་དང་མུན་ཁུང་སོགས་དྲོ་བའི་གནས་སུ་འདུག་པ།གཉིད་ལོག་པ་དང་ཡིད་འོང་གི་གྲོགས་བསྟེན་ལ་རྩོལ་བཅག་དང་དྲག་ཤུལ།སྨྲ་བརྗོད་མང་བའི་ལས་སོགས་སྤང་དགོས།སྨན་དུ་བི་མ་ལ་དང་སེམས་ཀྱི་བདེ་སྐྱིད་།ཨ་གར་བརྒྱད་པ།བཙན་དུག་སྨན་མར་སོགས་རྒྱུན་སྤྱོད་སྨན་སྦྱོར་དང་།བྱེ་བྲག་རྒྱུད་དང་ཉམས་ཡིག་གཞན་ནས་བསྟན་པའི་འབྲེལ་ཡོད་སྨན་རྫས་བརྟེན་པ་དང་།དཔྱད་དུ་སྤྱི་གཙུག་དང་བྲང་གཞུང་དཀར་ནག་མཚམས།ཚིགས་པ་དང་པོ།རྒྱབ་ཀྱི་སྙིང་གསང་དང་སྲོག་རྩའི་གསང་རྣམས་སུ་ཧོར་གྱི་མེ་བཙའ་འཇོག་པ་སོགས་ཀྱི་ཐབས་ཤེས་ལ་བརྟེན་ནས་བཅོས་དགོས་པ་ཡིན་ནོ། །

 

 

རྩོམ་སྒྲིག་པ། (གཡང་མཚོ།)