དབུ་ཤོག >> བོད་ཀྱི་རིག་གནས། >> ལོ་རྒྱུས། >> བོད་ཀྱི་ལོ་རྒྱུས།
མྱི་ཟུར་གྱི་རི་སྐྱབས་རྟ་རྒྱུག་ལྟད་མོ་ཆེ་བ།
རྩོམ་པ་པོ། པདྨ་ཚེ་རིང་།ཚེ་རིང་དོན་གྲུབ། དུས་ཚོད། 2017-11-06 རྩོམ་ཁུངས། སེམས་ཀྱི་ཉི་ཟླའི་བོད་ཡིག་དྲ་བ། ཀློག་གྲངས། 64

སེམས་ཀྱི་ཉི་ཟླ་བོད་ཡིག་དྲ་བའི་འཕྲིན། སྤྱི་ཟླ11པའི་ཚེས3ཉིན་སེམས་ཀྱི་ཉི་ཟླ་གྲོང་ཁྱེར་ལུའོ་ཅི་ཤང་མྱི་ཟུར་གྲོང་ཚོ་ནས་ལོ་རེར་ཐེངས་རེ་སྒྲུབ་བཞིན་པའི་རི་སྐྱབས་རྟ་རྒྱུག་གི་དམངས་སྲོལ་རིག་གནས་བྱེད་སྒོ་བསྡུས་པ་རེད།  


མྱི་ཟུར་གྲོང་ཚོའི་གཉའ་གྲོང་དང་བར་གྲོང་།   ཐང་འབྲོག  ཕ་ལག་སོགས་རང་བྱུང་གྲོང་མི་ཚོ་ཆུང་བཞིའི་བོད་རིགས་མང་ཚོགས་ཚོས་ལུས་ལ་བཀྲག་མདངས་ལྡན་པའི་དུས་ཆེན་གྱི་གཟབ་ཆས་སྤྲས་ནས་གཞི་བདག་ཞལ་དཀར་གྱི་ཉེ་འདབས་སུ་འཛོམས་ཏེ་བསང་གཏོང་བ་དང་།  ལ་ཙེ་སྐྱེལ་པ།    རྟ་རྒྱུག་པ། སྐོར་བྲོ་འཁྲབ་པ་སོགས་ཀྱི་བྱེད་སྒོ་སྣ་ཚོགས་སྤེལ་ནས་སྤྲོ་སྐྱིད་ལྡན་པའི་དུས་ཆེན་ཞིག་རོལ་ཡོད་པ་རེད།


ཞོགས་པའི་དུས་ཚོད་བརྒྱད་ཀྱི་སྟེང་གྲོང་མི་ཚོས་ལུས་ལ་གཟབ་ཆས་སྤྲས་ཤིང་ཞིམ་མངར་ལྡན་པའི་ཟས་རིགས་སྣ་ཚོགས་འཁྱེར་བཞིན་ཁྱིམ་ཚང་རེ་རེ་ནས་ཞོན་རྟ་ཁྲིད་དེ་གཞི་བདག་ཞལ་དཀར་བཀྲ་ཤིས་དཔལ་ལྡན་གྱི་འདབས་སུ་འཛོམས་ཡོད།



གྲོང་མི་རྣམས་ཀྱིས་སྔ་གཞུག་ལྟར་གྲལ་བསྒྲིགས་ནས་ཅོག་ཙེའི་སྟེང་དུ་མར་དང་རྩམ་པ།  ཕྱུར་བ། སིལ་ཏོག་སོགས་བཤམ་པ་དང་།  མཚམས་པས་ཞལ་འདོན་གནང་ཚར་རྗེས་གྲོང་ཚོའི་སྐྱེས་པ་ཡོངས་ཡར་ལངས་ཏེ་བསང་ཐབ་ཀྱི་མདུན་ནས་དུང་དཀར་འབུད་ཅིང་།  བསང་མཆོད་རྒྱ་ཆེན་པོ་བྱས་ཏེ་དར་ལྕོག་འཐེན་པ་དང་ལ་ཙེ་སྐྱེལ་ནས་མི་ཕྱུགས་ལ་ན་ཚ་དང་གོད་ཁ་མེད་པའི་གསོལ་འདེབས་བྱེད།  


བསང་བཏང་ཚར་རྗེས་རི་ལ་བསྐོར་བ་བྱེད་པ་དངོས་སུ་མགོ་རྩོམ་པ་རེད།    གྲོང་མི་ཚོས་རང་རང་གི་རྟ་ཁྲིད་ནས་གཞི་བདག་ལ་བསྐོར་བ་ལན་གཅིག་བྱེད་ཅིང་།  སྐབས་དེར་སྦྲང་ཆར་སིལ་མ་ཞིག་རྟགས་དང་རྟེན་འབྲེལ་ཡག་པའི་རྒྱན་དུ་བབས།   མི་རྣམས་ཀྱིས་དད་སྣང་དང་ལྷག་བསམ་སྙིང་ལ་བཅང་བཞིན་གཞི་བདག་ལ་བསྐོར་བ་ལན་གཅིག་རྒྱབ་ཚར་བ་རེད།  


ཉིན་གུང་གི་དུས་ལ་ཐོན་པས་གྲོང་ཚོའི་ཕོ་མོ་རྒན་གཞོན་ཡོངས་ཀྱིས་རང་གི་འདུག་གནས་ནས་ཞིམ་མངར་ལྡན་པའི་ཟ་མ་ལོངས་སུ་སྤྱོད་པ་དང་།  ཕྱི་ཕྱོགས་ནས་ཐོན་པའི་ཡུལ་སྐོར་བ་མང་པོས་ཀྱང་ས་གནས་དེ་གའི་ཟ་མ་ཉམས་སུ་མྱོང་བཞིན་རང་བྱུང་མཛེས་ལྗོངས་དང་ངོ་མཚར་བའི་རིག་གནས་ལ་བསྟོད་བསྔགས་ཡང་ཡང་འཐེན་གྱི་ཡོད།   དུས་སྟོན་གྱི་བར་སྐབས་གང་རུང་ནས་ཡུལ་འདི་ནི་ཆེ་བར་བརྩི་བཀུར་དང་ཆུང་བར་བྱམས་སྐྱོང་ཡོད་པ་ཞིག་ཡིན་པ་ཤེས་ཐུབ།

ཕྱི་དྲོའི་བྱེད་སྒོ་ནི་སྡེ་དམངས་རྣམས་ཀྱིས་སྲོལ་རྒྱུན་ལ་བརྟེན་ནས་རང་ངོས་ཀྱིས་རྩ་འཛུགས་བྱས་པ་ཞིག་ཡིན།  རྣམ་པ་ལྷན་རྒྱས་ནས་དགའ་སྤྲོའི་འཛུམ་མདངས་དང་བཅས་བཀྲ་ཤིས་མཆོད་པའི་གཡང་ཆགས་སྐོར་བྲོ་འཁྲབ་བཞིན་མི་ལ་ན་ཚ་མེད་ཅིང་ཕྱུགས་ལ་གོད་ཁ་མེད་པ།   ལོ་ལེགས་ཕུན་སུམ་ཚོགས་པའི་སྨོན་ལམ་ཞུ་བ་རེད།  


རྩོམ་སྒྲིག་པ། (སྒྲོལ་མ་གཡང་མཚོ།)