དབུ་ཤོག >> སྐྱེ་ཁམས་ཡུལ་སྐོར། >> གནས་སྐོར་མཛེས་ལྗོངས།
ཤྭ་བ་རི་རྫོང་།
རྩོམ་པ་པོ། མི་གསལ། དུས་ཚོད། 2017-11-23 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས། 40

   ཤ་བ་རི་རྫོང་ནི་ཟི་ལིང་ཤར་ཕྱོགས་ཕིན་ཨེན་རྫོང་གི་ནུབ་ཏུ་ལེ་བར28ཀྱི་སར་རྒྱབ་རི་བྲག་ལ་བརྟེན་ཅིང་།མདུན་རི་དང་ལུང་ཐང་ནགས་ཀྱིས་ཁེབས་པ་ཆུ་ཕྲན་བསིལ་མ་ལྷུང་ལྷུང་དུ་འབབ་པའི་ཡུལ་ལྗོངས་ཕུན་སུམ་ཚོགས་པ་ཞིག་ཡིན།གནའ་སྔ་མོར་ཡུལ་ལྗོངས་ཕུན་སུམ་ཚོགས་པ་འདི་ནི་ཤ་བས་རྩེད་འཇོ་རོལ་བའི་གནས་དབེན་པ་ཞིག་ཡིན་པས་ཤ་རྫོང་ཞེས་པའི་མིང་དུ་བཏགས་སྐད།དེ་ཡང་ཀརྨ་སྐུ་ཕྲེང་བཞི་པ་རོལ་བའི་རྡོ་རྗེ1340ལོ་ནས1383ལོའི་བར་ཡོན་རྒྱལ་རབས་བཅུ་བ་ཐོ་ཀན་ཐེ་མུར་གྱིས་གདན་དྲངས་པ་ལྟར་རྒྱ་ནང་དུ་ཕེབས་དུས་ཤ་རྫོང་རི་ཁྲོད་དུ་བཞུགས་མྱོང་བ་མ་ཟད།བྱ་ཁྱུང་དགོན་པ་འདེབས་པ་པོ་ཤར་ཕྱོགས་རིགས་པའི་དཔའ་བོ་ཆོས་རྗེ་དོན་གྲུབ་རིན་ཆེན་དང་འདུལ་བ་ཆོས་རྗེ་འོད་ཟེར་རྒྱ་མཚོ་རྣམས་ཀྱང་གནས་འདིར་ཡུན་རིང་དུ་བཞུགས་ཤིང་སྒོམ་སྒྲུབ་མཛད།གྲུབ་ཆེན་གནམ་སྔོན་རབ་འབྱམས་པས་ཀརྨ་པའི་སྐུ་གདུང་མཆོད་རྟེན་དང་གཙུག་ལག་ཁང་བཞེངས།