དབུ་ཤོག >> མི་རིགས་ཆོས་ལུགས། >> དགོན་སྡེ་ངོ་སྤྲོད།
ལོ་རྒྱུས་ཀྱི་ཡུན་རིང་བའི་སྐྱེ་རྒུ་དགོན་པ།
རྩོམ་པ་པོ། མཚོ་སྔོན་བོད་ཡིག་གསར་འགྱུར། དུས་ཚོད། 2017-11-30 རྩོམ་ཁུངས། མཚོ་སྔོན་བོད་ཡིག་གསར་འགྱུར། ཀློག་གྲངས། 46

སྐྱེ་རྒུ་དགོན་པ།

བོད་གངས་ཅན་ལྗོངས་ཀྱི་ས་དགེ་བཀའ་ཪྙིང་སོགས་གྲུབ་མཐའ་ཆེན་པོ་དུ་མའི་ཡ་གྱལ་དཔལ་ལྡན་ས་སྐྱ་པའི་འཁོན་དཀོན་མཆོག་རྒྱལ་པོ་དང་། དཔལ་བརྩེ་བ་ཆེན་པོ་ས་ཆེན་ཀུན་དགའ་སྙིང་པོ་གཙོས་ས་ཆེན་གོང་མ་རྣམ་ལྔ་སོགས་གདུང་རྒྱུད་འཛིན་པའི་བླ་ཆེན་རྣམ་པས་རིམ་བཞིན་བསྐྱངས་པའི་གཙང་ས་སྐྱ་དགོན་པ་དང་། ངོར་ཆེན་རྡོ་རྗེ་འཆང་ཀུན་དགའ་བཟང་པོ་ནས་ཀླུ་ལྡིང་མཁན་ཆེན་འཇམ་དབྱངས་བསྟན་པའི་ཉི་མ་བར་མཁན་རབས་དོན་བཞིས་རིམ་བཞིན་བསྐྱངས་པའི་གཙང་ངོར་དགོན་གྱི་ཡན་ལག་ཏུ་གྱུར་པའི་དཔལ་ས་སྐྱའི་ཆོས་སྡེ་ཆེན་པོ་མདོ་ཁམས་སྒ་སྟོད་སྐྱེ་རྒུ་དོན་གྲུབ་གླིང་ནི། རུས་ཆེན་བཞི་ཡི་ཡ་གྱལ་སྒ་ཞེས་གྲགས་པའི་དམུ་ཚ་སྒ་ཡི་ཁོངས་སུ་གཏོགས་པ་ཡིན། ད་ལྟ་རྒྱ་བོད་ཡོངས་སུ་གྲགས་པ་སྒ་སྐྱེ་རྒུའི་མི་ལ་སྒ་པའི་མི་དང་། སྒ་ཁོག་གི་མི་ཞེས་གྲགས།དོན་ལ་སྒ་པའི་རུས་ཚོ་ཆེ་དྲུག་གི་ཁོངས་སུ་གཏོགས། ཆོས་སྡེ་ཆེན་མོ་དེའི་ཆགས་གནས་ནི་ཡུས་ཧྲུའུ་བོད་རིགས་རང་སྐྱོང་ཁུལ་གྱི་ལྟེ་གནས། འབྲི་ཀླུང་སྔོན་མོ་གཡོན་ནས་དལ་གྱིས་འབབ་པའི་རྩལ་ཤིས་རྒྱ་གར་ལུང་བའམ་བྱ་ཤུལ་རྒྱ་གར་ལུང་བ་ཡིན། ཡུས་ཧྲུའུ་ས་ཁུལ་ལ་དགོན་སྡེ་མང་པོ་མཆིས་པའི་ནང་ནས་དགོན་དེ་ནི་ཆེས་སྔོན་དུས་ནས་ཡོད་པའི་གནའ་བོའི་ཆོས་སྡེ་ཆེན་པོ་ཡིན་པའི་རྟགས་མངོན་གསལ་ཅན་མང་པོ་ཡོད་ལ།ད་ལྟའི་སྒ་སྐྱེ་རྒུ་ཆོས་སྡེ་ཆེན་པོ་དེ་ལ་སྒ་རྒྱལ་བ་གཡུང་དྲུང་ཞེས་པ་དེས།བོན་གྱི་དགོན་པ་གཉིས་ཕྱག་བཏབ་སྟེ། གཡུང་དྲུང་བོན་པོའི་ཆོས་སྡེ་སྟག་རྩེ་དགོན་དང་གཡུང་དྲུང་གནམ་མཆོང་དགོན་ཞེས་གྲགས་ཆེན་བྱུང་སྐད། བོད་རྒྱལ་ཁྲི་སྲོང་ལྡེ་བཙན་གྱི་སྐུ་རིང་ལ་པ་གོར་བཻ་རོ་ཙ་ན་ཁམས་ཕྱོགས་སུ་ཐེངས་གསུམ་ཆིབས་ཕེབས་གནང་དུས་གྲའུ་བོན་སྡེ་ཆོས་ཞབས་ཚུད་ཅིང་ཪྙིང་མའི་ཆོས་སྡེ་ཆེན་པོ་ཞིག་གི་གྲུབ་མཐར་གྱུར་ཏེ། ཪྙིང་ཆོས་ཤིན་ཏུ་དར་བ་བྱུང་སྐད་དོ། 

  ཕྱིས་སུ་འགྲོ་མགོན་ཆོས་རྒྱལ་འཕགས་པ་བློ་གྲོས་རྒྱལ་མཚན་སྤྱི་ལོ1265ལོར་ཁམས་ཕྱོགས་སུ་ཕེབས་གནང་སྐབས། དཔལ་ས་སྐྱ་པའི་གྲུབ་མཐའ་ཞིག་ཏུ་འགྱུར་བའི་རྟེན་འབྲེལ་དུ་སྐྱེ་རྒུ་དགོན་པ་ལ་ཇོ་བོ་བཅུ་གཅིག་ཞལ་གྱི་ཞལ་ཐང་གནང་བ་ད་ལྟ་རྒྱ་ནག་སྤྲུལ་སྐུ་སྐུ་ཕྲེང་བདུན་པ་ཀུན་དགའ་རྒྱལ་མཚན་མཆོག་གི་བླ་བྲང་ན་མཇལ་རྒྱུ་ཡོད་པ་དེའོ།། གཞུང་གི་པུ་ཊ་དང་། ཙནྡན་གྱི་སྒྲོལ་མ་བཅས་འཛམ་གླིང་ན་རིན་ཐང་བྲལ་བའི་རྩ་ཆེན་གྱི་ནང་རྟེན་གནང་། དེའི་སྐབས་གྲའུ་དཔོན་གྱི་མིས་པོའི་རལ་གྲི་སོགས་རིན་ཐང་བྲལ་བའི་དངོས་རྫས་འབོར་ཆེན་ཡོད་པར་མ་ཟད། དཔལ་ས་སྐྱའི་བླ་བྲང་ཆེན་པོ་ཞིག་འཛུགས་པར་མཛད་དོ།། རིམ་བཞིན་བོད་ཀྱི་རྡོ་རྗེ་གདན་དུ་བཞུགས་པའི་དཔལ་ས་སྐྱའི་བླ་ཆེན་རྒྱ་གར་ཤེས་རབ་རྒྱལ་མཚན་ཁམས་ཕྱོགས་སྒ་སྟོད་སྐྱེ་རྒུ་དགོན་དུ། སྤྱི་ལོ1398ལོར་ཆིབས་ཕེབས་གནང་སྐབས་དཔལ་ས་སྐྱའི་ལམ་འབྲས་གཙོས་སྐྱ་སེར་མང་པོ་ལ་དམ་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཕབ་པ་མ་ཟད། གྲའུ་དཔོན་མཆོད་འོག་སྡེ་ཁག་གཉིས་ཀྱིས་རྒྱབ་སྐྱོར་དང་རོགས་རམ་ཐུགས་ཁར་འོག་ནས་སྔར་གྱི་ཆོས་སྡེའི་བཟོ་བཀོད་སྟེང་ལ་སྒ་སྐྱེ་རྒུ་དོན་གྲུབ་གླིང་ཞེས་དཔལ་ས་སྐྱའི་གྲུབ་མཐའ་ལ་བསྒྱུར་བ་མ་ཟད། ད་དུང་ལོ་རྒྱུས་སྟེང་དུ་ས་སྐྱའི་ཆོས་སྡེ་ཆེན་པོ་ཞིག་ཏུ་གྲགས་སོ།

  དགོན་དེའི་བཟོ་བཀོད་བརྗིད་ཉམས་ཆེ་ཞིང་། གྲྭ་པ་གྲངས་མང་བཞུགས་པ། རིན་ཐང་བྲལ་བའི་རིག་དངོས་ཕུན་སུམ་ཚོགས་པ་དང་མཁས་གྲུབ་གཉིས་ལྡན་གྱི་སྐྱེས་ཆེན་མང་པོ་བྱུང་བས་མཚན་སྙན་དགུང་དང་མཉམ་པའོ།། ངོར་མཁན་ཆེན་དཔལ་ལྡན་ཆོས་སྐྱོང་གིས་གཙུག་ལག་ཁང་དེ་ཐོག་མར་བཞེངས་དུས་རྟེན་འབྲེལ་བརྟག་སྐབས།འདུ་ཁང་བསམ་འགྲུབ་རྒྱ་མཚོ་བཞེངས་པའི་ས་ཆ་དེ་ན་རྒན་མོ་ཞིག་གིས་བ་ཞིག་འཇོ་བཞིན་པའི་སྐབས། བ་དཀར་མོ་དེ་ལ་འོ་མ་མང་ཉུང་ཇི་ལྟར་འཇོ་རྒྱུ་ཡོད་དྲིས་པས། བཞོ་ཟོ་བསམ་འགྲུབ་འཁྱིལ་བའི་ནང་དུ་འོ་མ་རྒྱ་མཚོ་ལྟར་གང་འདུག་ཟེར་བ་རྟེན་འབྲེལ་ཤིན་ཏུ་འགྲིགས་ཏེ་གཙུག་ལག་ཁང་དེ་ལ་འདུ་ཁང་ཆེན་མོ་བསམ་འགྲུབ་རྒྱ་མཚོ་ཞེས་མཚན་གསོལ་བར་གྲགས།

  དགོན་དེའི་གཙོ་ཆེ་བའི་མཆོད་གནས། བདག་ཅག་གི་སྟོན་པ་མཉམ་མིད་ཤཱཀྱ་ཐུབ་པ་དང་། སློབ་དཔོན་ཆེན་པོ་པདྨ་འབྱུང་གནས། ལྷ་གུར་གྱི་མགོན་པོ། དཔལ་མགོན་ཞལ་བཞི་པ། དཔལ་ལྡན་ལྷ་མོ་དྲེལ་དཀར་མ། གསང་སྔགས་རྒྱུད་སྡེ་བཞིའི་ལྷ་ཚོགས་དང་། དཔལ་རྡོ་རྗེ་འཇིགས་བྱེད། སྒྲོལ་མ་རང་བྱོན། ས་ཆེན་གོང་མ་རྣམ་ལྔ། ལམ་འབྲས་བླ་མ་བརྒྱུད་པའི་བླ་མ་རྣམས་ཡིན། སྔོན་ས་ཆེན་གོང་མ་རྣམ་ལྔ་སོགས་ཟངས་གསེར་དང་གསེར་ཞུན་མ་ལས་གྲུབ་པའི་འདྲ་སྐུ་སྣ་ཚོགས།རྟེན་གཙོ་ཀྱཻ་རྡོར་ལི་མ་གཙོས་སྐུ400ལྷག་ཙམ་བཞུགས། བཀའ་བསྟན་འགྱུར་དང་བཅས་པའི་པོ་ཏི་ཆིག་ཁྲི་ཉེ་བ་ཡོད། ཁྱད་པར་དཔལ་ལྡན་ཆོས་སྐྱོང་གིས་བཞག་པའི་བཀའ་འགྱུར་གསེར་བྲིས་མ་སོགས་རིན་ཐང་གཞལ་ཐབས་བྲལ་བའི་དངོས་རྫས་འབོར་ཆེན་ཡོད་ཀྱང་དུས་འཁྲུག་གི་དབང་གིས་བོར་བརླག་ཟིན་ཏེ་མིང་ཙམ་གྱི་གནས་སུ་གྱུར་པའོ།། སྐྱེ་རྒུ་དགོན་གྱི་ཡན་ལག་ཏུ་གྱུར་པའི་སྒ་སྐྱེ་རྒུ་དོན་གྲུབ་གླིང་པའི་བཤད་གྲྭ་ནི་ཐོག་མར་ཡིད་ལྷུང་ལྷ་རྒྱལ་དགོན་པའི་སྤྲུལ་སྐུ་ཡིད་ལྷུང་བླ་རྒན་ཞེས་པས་ཇོ་ཁང་ནང་ལ་ཆོས་འཆད་ཉན་བྱས་ཏེ་མཁན་པོ་ནོར་ཚེ་སོགས་མང་པོ་བྱོན། ཕྱིས་སུ་འཇམ་དབྱངས་བློ་གཏེར་དབང་པོ་དང་། རྫོགས་ཆེན་གཞན་དགའ་རིན་པོ་ཆེ་གཙོས་སྐྱེས་ཆེན་དམ་པ་དུ་མ་ཞིག་གིས་སྐྱེ་རྒུ་དགོན་དུ་བཤད་གྲྭ་བཙུགས་པར་མ་ཟད་ཤིན་ཏུ་དར་རྒྱས་ཆེན་པོ་བྱུང་བའོ།། དེའི་ནང་དུ་རྒྱུན་བཞུགས་ཀྱི་མཁན་པོ་དང་། ལས་ཚན་གྱི་མཁན་པོ་ཞེས་བླ་དཔོན་གཉིས་བསྐོ་བཞག་བགྱིས་ཏེ་བསྟན་འཛིན་གྱི་སྐྱེས་བུ་མང་པོ་བྱོན་ནོ།   །

 

རྩོམ་སྒྲིག་པ། (ཚེ་རིང་དོན་འགྲུབ།)