བོད་མིས་སྲོལ་རྒྱུན་གྱི་ལོ་གསར་རོལ་སྟངས།
དབུ་ཤོག >> མི་རིགས་ཆོས་ལུགས། >> སྲོལ་རྒྱུན་དུས་སྟོན།
བོད་མིས་སྲོལ་རྒྱུན་གྱི་ལོ་གསར་རོལ་སྟངས།
རྩོམ་པ་པོ། པདྨ་མ་མཚོ། དུས་ཚོད། 2018-02-20 རྩོམ་ཁུངས། སེམས་ཀྱི་ཉི་ཟླའི་བོད་ཡིག་དྲ་བ། ཀློག་གྲངས། 567

       བོད་ཟླ་དང་བོའི་ཚེས་གཅིག་ནས་ཚེས་ལྔ་ཡི་བར་དུ་མི་རྣམས་ཀྱིས་གྱོན་ཆས་གཟབ་མཆོར་གང་ཡོད་མནབས་ཏེ་བླ་མ་ལོ་གསར་དང་རྒྱལ་པོ་ལོ་གསར་རིམ་བཞིན་གཏོང་སྲོལ་ཡོད་ལ།དུད་ཚང་སོ་སོ་ནས་གཙང་བོའི་འགྲམ་དུ་ཀླུ་བསང་གཏོང་བ་དང་དཀར་སྤྲོ་རྒྱག་པ།  རང་ཁྱིམ་གྱི་མཁར་སྟེང་དུ་ཁམས་མཐུན་དར་ལྕོག་འཛུགས་པ།གྲོང་བ་ཕན་ཚུན་བར་དུ་གྲོ་སོ་ཕྱེ་མར་དང་ཆང་ཕུད་བསྐོར་རེས་ཀྱིས་བསྣམས་ཏེ་ཕར་འགྲོ་ཚུར་འོང་གིས་ལོ་སར་གྱི་སྤྲོ་དགའི་དཔལ་ལ་རོལ།

       ཚེས་གཅིག་ཉིན་གྱི་སྔ་མོར་རྒན་གཞོན་ཚང་མ་ཞོགས་པའི་དུས་སྔ་མོ་ནསལངས་ཏེ།ཚང་མས་རྒྱན་གོས་གཟབ་མཆོར་སྤྲས་ཏེ། སྔོན་ལ་ཆུ་ལེན་པ་དང་། ཐོག་བསང་ཕུད་པ། དགོན་པར་ཕྱིན་ནས་རྟེན་མཆོག་རྣམས་ལ་མཆོད་མཇལ་ཕུལ་བ།རང་ཁྱིམ་དུ་ཇ་བསྲུབས་མ་དང་། གྲོ་འབྲས། ཕྱེ་མར། ཆང་ཕུད། གྲོ་ཐུག ཆང་སྐོལ། དཀར་སྤྲོ་སོགས་རོ་བཅུད་ལྡན་པའི་ཟས་རིགས་སྣ་ཚོགས་ལ་རོལ་བར་བྱེད་ཅིང་།གཏམ་གྱི་ཐོག་མའང་ཕན་ཚུན་འཛུམ་མདངས་དང་བཅས་ལོ་གསར་བཟང་། བཀྲ་ཤིས་བདེ་ལེགས། ཨེ་མ་བག་དྲོ་སྐུ་ཁམས་བཟང(ལྷ་སའི་ཁུལ་དུ)ཞེས་སྙན་པར་བརྗོད།ཉིན་དེར་རང་ཁྱིམ་དུ་སྤྲོ་སྐྱིད་བྱེད་ཅིང་ཁ་རྩོད་རྒྱག་པ་སོགས་ཚུལ་མིན་གྱི་བྱ་སྤྱོད་ཚིག་ངན་གང་ཅིར་འཛེམ་པར་བྱ་བ་སོགས་སྲོལ་བཟང་དེ་དག་ལག་བསྟར་བྱེད།

       ཚེས་གཉིས་དང་གསུམ་ནས་བཟུང་གཉེན་ཉེ་དང་།གྲོགས་པོ། དཀར་ཉེ་སོགས་ལ་ཕན་ཚུན་མགྲོན་སྐྱོད་སོགས་ཀྱིས་ཞིང་གྲོང་དུ་ལོ་གསར་གྱི་འཁྲུག་ཆ་ཆེ་ཞིང་།ལྷ་མོ་ཁག་གིས་རྣམ་ཐར(དྲི་མེད་ཀུན་ལྡན། འགྲོ་བ་བཟང་མོ། གཟུགས་ཀྱི་ཉི་མ། སྣང་ས་འོད་འབུམ།སྲོང་བཙན་སྒམ་པོ། སྲས་དོན་ཡོན་དོན་འགྲུབ་སོགས)འཁྲབ་ཅིང་ཕོ་གསར་ཚོས་མདའ་རྩལ་འགྲན་བཞིན་ལོ་སྐྱིད་པོའི་ངང་སར་བ་ཡིན།དེ་མིན་གླུ་ལེན་གར་རྩེད(གླུ་དང་རྩེད་རིགས་སྣ་མང་) ཐག་འཐེན། སྦ་ཀ་འགྲན་པ། གླང་ཆེན་ས་འདྲུད།གཉེན་སྟོན། བུ་སྟོན། གྱ་སྟོན་སོགས་ཀྱང་སྐབས་དེ་དུས་སྤེལ། དུས་ཀྱི་འཕེལ་རྒྱས་དང་བསྟུན་ནས་ས་ཁུལ་འགའ་རེ་རུ་ལྒང་ལི་འགྲན་སྡུར་སོགས་ཀྱི་རིག་རྩལ་བྱེད་སྒོའང་སྤེལ་བཞིན་མཆིས།བོད་མིས་ལོ་གསར་གཏོང་བའི་དུས་ཚོད་ཀྱང་ཅུང་རིང་སྟེ། ཕལ་ཆེ་བས་ཚེས་གཅིག་ནས་བཅོ་ལྔའི་བར་གཏོང་བར་བྱེད།




རྩོམ་སྒྲིག་པ། (རིན་ཆེན་ཚེ་རིང་། )