དབུ་ཤོག >> བོད་ཀྱི་རིག་གནས། >> རྩོམ་རིག >> གནའ་རབས་བརྩམས་ཆོས།
མི་ཉག་གི་རྒྱལ་ཁམས་སུ་གནང་བའི་ཡི་གེ།
རྩོམ་པ་པོ། ས་སྐྱ་པཎྚི་ཏ་ཀུན་དགའ་རྒྱལ་མཚན། དུས་ཚོད། 2013-03-26 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས། 106

       ཨོཾ་སྭསྟི་སིདྡྷཾ།མི་ཉག་གི་རྒྱལ་ཁམས་ན་ཆོས་རྒྱལ་བྱང་ཆུབ་སེམས་དཔའ་རྣམས་ཀྱི་བླ་མའི་མཆོད་གནས་སངས་རྒྱས་ཀྱི་བསྟན་པ་རིན་པོ་ཆེའི་སྲོག་ཤིང་ཆེན་པོར་གྱུར་པ།དཔལ་སྡེ་ཆེན་ལྷུན་གྱིས་གྲུབ་པའི་གཙུག་ལག་ཁང་ཆེན་པོར་གཉུག་མར་བཞུགས་པའི་མཁན་སློབ་ཞལ་བཞུགས་པ་རྣམ་པས་དབུ་མཛད།དགེ་འདུན་རྣམས་ཀྱི་ཕྱག་ཏུ་ཕུལ་བ།   རྣམ་དག་ཆོས་རྒྱལ་འབྱོར་བའི་ཆབ་ཀྱིས་ཀུན་ནས་ཐ་གྲུར་ལེགས་བལྟམས་ཤིང་།།མི་མཚུངས་བློ་ཅན་མཁས་པའི་མེ་ཏོག་ཕྱོགས་ཀུན་ཁྱབ་པའི་འདབ་མ་ཅན། །སྡོམ་བརྩོན་དམ་པ་བུང་བའི་ཚོགས་ཀྱིས་ལེགས་བཤད་སྦྲང་རྩིའི་ཕྱིར་བསྟེན་པ།།སྡེ་ཆེན་བསྟན་རྩ་པདྨོའི་འབྱུང་གནས་ཆུ་གཏེར་ཆེན་པོ་རྒྱལ་གྱུར་ཅིག །དེ་ཡི་དགེ་འདུན་བློ་གྲོས་གསལ་ལྡན་པ།།ཚུལ་ཁྲིམས་དག་པའི་དྲི་ངད་ཕྱོགས་རྣམས་སུ། །རབ་ལྡང་མཁྱེན་བརྩེའི་མཆེ་བ་རྣོ་བ་ཅན།།བདག་ཉིད་ཆེན་པོ་སྤོས་ཀྱི་གླང་པོ་ཁྱོད། །འཇིག་ཚོགས་ལྟ་བའི་རལ་པའི་ཚོགས་མང་རབ་འཁྲུགས་བག་ལ་ཉལ་བའི་མིག་དམར་པ།།འཛིན་པའི་སྤར་མོ་རྡོ་རྗེའི་རྩེ་ལྟར་རྣོ་བ་དང་བཅས་ཀུན་ནས་ལྡང་བའི་ཡན་ལག་ཅན། །ཕྲ་རྒྱས་ཚོགས་ཀྱིས་མཆེ་བས་རབ་གཏམས་བདག་ཏུ་འཛིན་པའི་ཁ་སྒོ་ཀུན་ནས་ཕྱེ།།སྲིད་པའི་རི་དྭགས་རབ་བསྙེགས་མི་མཐུན་ཕྱོགས་ཀྱི་ཕྱུགས་བདག་ཉེ་བར་མ་གྱུར་ཅིག  ཁྱེད་ཀྱི་རྣམ་ཐར་ཆེན་པོའི་ཆེན་པོ་ཕྱོགས་ཀུན་ཁྱབ་པའི་སྙན་པ་ཡི།།གྲགས་པ་རྒྱ་ཆེན་ཕུལ་དུ་བྱུང་བ་སྐྱེ་བོའི་ཚོགས་ཀྱིས་རབ་བསྒྲགས་པ། །རིང་ན་གནས་ཀྱང་མངོན་བཞིན་གོང་ནས་གོང་དུ་འཕེལ་བར་གྱུར།། དེ་སླད་མཆོད་འོས་སྡོམ་བརྩོན་ཁྱེད་རྣམས་ལ། །དགའ་བའི་ཡིད་ཀྱིས་ཚིག་གི་མེ་ཏོག་གི །ཕྲེང་བ་སྤེལ་ལེགས་ངག་གིས་རབ་བརྒྱུས་པ།།འདི་ན་དགེ་བ་སྤེལ་ཕྱིར་བདག་འབུལ་ལོ། །བདེ་བར་གཤེགས་པའི་བསྟན་པ་རིན་ཆེན་གཏེར།།འདུལ་བའི་རྒྱ་མཚོའི་ནང་ན་ལེགས་གནས་པ། །དགེ་འདུན་དགེ་ལེགས་ཚོགས་སྒོར་འཇུག་རྣམས་ལ། །རྗེས་སུ་སྟོན་པའི་བཤེས་གཉེན་དེད་དཔོན་མཆོག།ཡན་ལག་བཞི་ལྡན་དཔུང་གིས་ཞབས་བརྟན་ཅིང་། །གདུང་རྒྱུད་དག་པའི་སྤྱི་གཙུག་རབ་མཐོ་བ།།ཕས་རྒོལ་འཇོམས་པའི་རྒྱལ་པོ་གླང་པོ་ཆེ། །ཡང་དག་ལམ་འཛུད་ལྕགས་ཀྱུ་འཛིན་པ་པོ།།དགེ་ལེགས་ཆར་རྒྱུན་ཕྱོགས་རྣམས་ཀུན་ཁྱབ་ཅིང་། །ཟབ་ཡངས་ཆོས་ཀྱི་འབྲུག་སྒྲ་སྟོང་སྒྲོགས་ཤིང་།།གདུལ་བྱའི་ལོ་ཏོག་ཤིན་ཏུ་རྒྱས་མཛད་པ། །སྡོམ་བརྩོན་ཆེ་ཁྱེད་ཆར་སྤྲིན་ཆེན་པོ་ལགས། །མཁས་པའི་སློབ་གྲྭའི་ཚལ་དུ་རབ་འཁྲུངས་ཤིང་།།དམ་པའི་ལེགས་བཤད་ཆབ་ཀྱིས་ལེགས་བསྐྲུན་པ། །ཡོན་ཏན་ཚོགས་ཀྱི་མེ་ཏོག་འདབ་མ་ཅན། །ཕན་བདེའི་འབྲས་འབྱིན་དཔག་བསམ་ལྗོན་ཤིང་ཁྱེད།།སྡེ་བ་ཀུན་གྱི་བསྟན་པའི་རྩ་བ་སྟེ། །ཆོས་རྒྱལ་ཆེན་པོའི་གཙུག་གི་ནོར་བུར་གྱུར།།དབང་ཕྱུག་རྣམས་ཀྱི་མཆོད་བྱའི་དམ་པ་སྟེ། །མགོན་མེད་རྣམས་ཀྱི་དཔག་བསམ་ལྗོན་པའི་ཤིང་།།དེ་སླད་ཁྱེད་ཀྱི་མཛད་པར་བགྱི་བ་ནི། །ད་དུང་སྡོམ་བརྩོན་འབུམ་ཕྲག་ལྷག་པ་དང་།།མཁས་པའི་སློབ་གྲྭ་བརྒྱ་ཕྲག་དུ་མ་དང་། །ལེགས་བཤད་འཚོལ་བ་བྱེ་བ་ཕྲག་འགའ་ཞིག  །བདེ་བར་གཤེགས་པའི་བསྟན་པ་སྤེལ་བ་དང་། །ཡུན་རིང་རྙེད་དང་བཀུར་སྟི་གྲགས་ལྡན་པས།།སྐྱེ་བོ་ཀུན་ལ་སྨན་པར་བྱ་བའི་ཕྱིར། །བདག་ཉིད་ཆེན་པོ་ཁྱེད་ཀྱིས་བརྩོན་པར་ཞུ།།སྡོམ་བརྩོན་བདེ་ལ་ལེགས་པར་གནས་བྱའི་ཕྱིར། །ཁྲིམས་སུ་བྱ་བ་ཇི་སྙེད་ཡོད་པ་ཀུན།།དགག་སྒྲུབ་ཚུལ་ལ་གཟུ་བོའི་ལམ་ཉིད་ཀྱིས། །རྣམ་པར་དཔྱད་ན་བསྟན་པ་འཕེལ་ལགས་གྲང་།།མཚན་མ་ཅུང་ཟད་མངོན་རྟགས་ཉིད་བྱས་ནས། །དགེ་སྦྱོང་དག་པ་བསྙེལ་པར་མཛད་ལགས་ན།།རྣམ་ཐར་དག་པའི་གྲངས་སུ་བགྲང་མོད་ཀྱི། །འོན་ཀྱང་འཐད་པ་རིགས་པའི་སྤྱན་གྱིས་གཟིགས། །དགེ་སྦྱོང་ལྷོད་པའི་ལུས་ངག་མ་བསྡམས་ཤིང་།།བློ་ངན་ཐོས་པའི་ནོར་དང་མི་ལྡན་པ། །འགའ་ཞིག་བརྩེ་བས་རྗེས་སུ་འཛིན་པ་ཡང་།།བསྟན་པའི་ཚེར་མར་འགྱུར་དུ་དོག་པ་མཆི། །སློབ་པར་འདོད་པའི་དགེ་སློང་བློ་གྲོས་ཅན།།ཁྲིམས་ཀྱིས་བསྡམས་པ་ཡུལ་ནས་བགྲོད་མིན་པ། །དེ་དག་འཁོར་དང་འབྱོར་བ་ལྷན་ཅིག་ཏུ།།མཁས་པའི་མདུན་སར་བཏང་ན་ཅིས་མི་ལེགས། །ཤིན་ཏུ་མཁས་ཀྱང་གྲགས་པ་མ་ཐོབ་ལ།།སྦྱིན་བདག་ཉུང་ཞིང་འཁོར་དང་མི་ལྡན་པ། །དེ་དག་གཙུག་ལག་ཁང་བཟང་སྡེ་ཆེན་གྱི།།སོ་སོའི་འཆད་པོར་སྩལ་ན་ཅིར་འགྱུར་ལགས། །དབང་པོ་དུལ་བ་བསླབ་པའི་ཁུར་འཛིན་པ།།བསོད་སྙོམས་རྒྱུ་བས་ཁ་ཟས་མི་འཕྲོད་ཅིང་། །གནས་མལ་གོས་དང་སྨན་གྱིས་ཕོངས་པ་ཡི།།སྡོམ་བརྩོན་དེ་དག་བདག་གིར་མཛད་པར་གསོལ། །མཁས་པ་མཁས་པའི་ཚོགས་ཀྱིས་ཡོངས་བསྐོར་པ།།ཆེ་བའི་ཆེ་བ་བདག་ཉིད་ཆེ་རྣམས་ལ། །དེ་སྐད་གསོལ་བ་ཀུན་དགའི་རྒྱལ་མཚན་དཔལ།།བཟང་པོ་ཞེས་བྱར་གྲངས་པ་དེ་ཉིད་ལགས། །ད་དུང་ཞུ་བར་གསོལ་བ་མཆིས་མོད་ཀྱི།།དོན་མཐུན་འདི་དག་འགྲོ་བར་འདོད་པ་དང་། །བདག་ཀྱང་རྣམ་པར་གཡེང་བ་མང་བས་ན།།རེ་ཞིག་གུས་པའི་མཚན་མ་འདི་འབུལ་གྱིས། །བརྩེ་བས་བདག་དང་བདག་གི་རྗེས་འབྲང་བ།།ཡུལ་དང་ཡུལ་གཞན་དག་ཏུ་བགྲོད་འགྱུར་རམ། །དུས་དང་དུས་མིན་ཇི་ལྟར་གནས་ཀྱང་རུང་།།ཐུགས་རྗེའི་ཐུགས་ཀྱིས་རྗེས་སུ་འཛིན་པར་ཞུ། །དཔལ་སྡེ་ཆེན་གྱི་གཙུག་ལག་ཁང་ཆེན་པོར་བཞུགས་པའི་མཁན་སློབ་རིན་པོ་ཆེས་དབུ་མཛད་དགེ་འདུན་རྣམས་ཀྱི་ཕྱག་ཏུ་ཕུལ་བ་འདི་ནི།དཔལ་ལྡན་ས་སྐྱའི་དགོན་པར་གནས་པ། ཤཱཀྱའི་དགེ་སློབ་ཀུན་དགའ་རྒྱལ་མཚན་དཔལ་བཟང་པོ་ཞེས་བྱ་བས་གསོལ་བ་ལགས།ཡི་གེ་མི་འཁྱར་བའི་རྟེན་ཁ་ཆེའི་གུར་ཀུམ་ཞོ་བཅུ་གསུམ་འབུལ།