ཆེས་ཐོག་མར་ཕ་ཡུལ་གྱི་རྒུན་ཆང་ཁྱེར་ནས་རྒྱལ་སྤྱིའི་གསེར་རྟགས་བླངས།

མཚོ་བོད་མཐོ་སྒང་ནི་སྐྱེ་དངོས་སྣ་མང་དང་ཆུ་བོའི་འབྱུང་ཁུངས་སུ་བསྔགས་པ་བཞིན། མདོ་ཁམས་ཆུ་བཞི་སྒང་དྲུག་ལས་བོད་ཀྱི་ཆུ་ཆེན་ཨང་དང་པོ་དང་། འཛམ་གླིང་གི་ཆུ་བོ་ཆེན་པོ་ཨང་གསུམ་པར་གྲགས་པའི་གསེར་ལྡན་འབྲི་ཆུའི་རྒྱུད་ཀྱི་རྒུན་འབྲུམ་དང་། དེ་ཡིས་བསྙལ་བའི་རྒུན་ཆང་ལ་སྔ་ཕྱིར་རྒྱལ་སྤྱིའི་གསེར་གྱི་རྟགས་མ་དང་། ཡ་གླིང་གི་གསེར་གྱི་རྟགས་མ་ཐེངས་གཉིས་ལ་ཐོབ་པ་རེད། མཚོ་བོད་མཐོ་སྒང་ནི་སྐྱེ་དངོས་སྣ་མང་རང་བཞིན་གྱི་འདུ་གནས་གལ་ཆེ་བ་ཞིག་ཏུ་གྱུར་ཡོད་ནའང་། སྐྱེ་དངོས་སྣ་མང་དེ་དག་གི་རིན་ཐང་ནི་ས་ཆ་གང་དེར་སྐྱེས་པའི་མི་ལ་དེ་ཇི་ལྟར་སྔོག་འདོན་བྱེད་པའི་འཇོན་ཐང་ལྡན་མིན་གྱི་ངོས་ནས་འཇོག་དགོས་ཏེ། འདི་ལྟར་གསེར་ལྡན་འབྲི་ཆུའི་རྒྱུད་དུ་སྐྱེས་པའི་མི་ཞིག་གིས་རང་གི་ཕ་ཡུལ་གྱི་ཐོན་ཁུངས་བེད་སྤྱོད་ཅིང་དེ་ཉིད་ཐོན་རྫས་ཅན་དུ་བསྒྱུར། མཐའ་མར་དེ་ཉིད་རྒྱལ་སྤྱིའི་ཚོང་རར་བཀྲམས་ནས་གསེར་གྱི་རྟགས་མ་ལེན་ཐུབ་པ་ནི་རང་གི་ཕ་ས་མ་འཚེར་ལ་ང་རྒྱལ་དང་ཁོག་དཔུང་རྩོད་སྟངས་ཤིག་ཅིས་ཀྱང་ཡིན་ངེས་ཨང་།

ཆུ་བོ་གཞན་དག་བཞག་ནས་གསེར་ལྡན་འབྲི་ཆུ་གཅིག་པུའི་ངོས་ནས་བཤད་ནའང་། གནའ་ནས་ད་ལ་ཐུག་གི་བར་ཆུ་བོ་འདིས་གསོས་ཡོང་བའི་མི་ནི་གྲངས་ལས་འདས་པ་ཞིག་ཡོད་ངེས་ན་ཡང་། འདི་ལྟར་གསེར་ལྡན་འབྲི་ཆུའི་རྒྱུད་ཀྱི་ཐོན་རྫས་ཁྱེར་ཏེ་འགྲན་རྩོད་ཀྱི་འཚང་ཁ་རབ་ཏུ་ཆེ་བའི་རྒྱལ་སྤྱིའི་ཚོང་རའི་གར་སྟེགས་སུ་གསེར་གྱི་རྟགས་མ་ལེན་ཐུབ་མཁན་ག་ཚོད་ཡོད་དམ། དེ་བས་ང་ཚོས་འབྲི་ཆུའི་འབབ་རྒྱུད་ཀྱི་རྒུན་འབྲུམ་དང་རྒྱལ་སྤྱིའི་གསེར་གྱི་རྟགས་མའི་བར་གྱི་གཏམ་རྒྱུད་ལ་ཉན་ཆོག་པ་འདྲ། གཏམ་རྒྱུད་དེ་ནི་སྤྱི་ལོ་1973ལོར་འབྲི་ཆུའི་རྒྱུད་དུ་སྐྱེས་ཤིང་མིང་ལ་སྐལ་བཟང་ཚེ་རིང་འབོད་པའི་མི་ཕལ་པ་ཞིག་གི་སྙིང་སྟོབས་དང་གདོང་མཆོང་། འགྱུར་མེད་ཀྱི་བརྩོན་པ་བཅས་ལས་བྱུང་བ་ཞིག་རེད། ཁོང་གི་ཡབ་ཀྱི་མཚན་ལ་ཚེ་རིང་ཆོས་འཕེལ་དང་། ཡུམ་གྱི་མཚན་ལ་ཚེ་རིང་ལྷ་མོ་ཞུ་ཞིང་བླ་བྲང་གི་ཁྱིམ་ཚང་ཞིག་ཏུ་སྐྱེས། ཕ་ལགས་ནི་སྐབས་དེའི་ཞིན་ཧྭ་དཔེ་ཁང་དུ་ལས་གནས་ཡོད་མཁན་ཞིག་ཡིན་འདུག་སྐད། ཁོང་གི་བྱིས་དུས་ཀྱི་བསམ་པའི་བག་ཆགས་ངོས་སུ་ཕ་ལགས་ཀྱིས་ཕྱི་རོལ་ཏུ་ཡང་ཡང་ཁྲིད་ནས་བཅའ་དངོས་འདྲ་མིན་དང་སྐྱེ་དངོས་རིགས་མང་པོར་འགྲེལ་བཤད་དང་། ངོ་སྤྲོད་བྱས་པའི་བརྒྱུད་རིམ་རེ་རེ་ནི་ད་ལྟའི་བར་བསམ་བློའི་ངོས་སུ་ཡལ་དུ་མེད་པའི་ཕྱིར་དྲན་གྱི་གཏམ་རྒྱུད་རེ་རེ་དང་། དེ་ཡིས་ཕྱིས་སུ་ཁོང་གི་ཚོང་ལས་ཀྱི་བྱ་བའི་བརྒྱུད་རིམ་ནང་། ཕྱི་ནང་གི་དཀའ་ངལ་མང་པོར་འཕྲད་པའི་སྐབས་སུ་ཡང་ཆུང་དུས་ཕ་ལགས་ཀྱིས་བཤད་མྱོང་བའི་སྐད་ཆ་དེ་དག་གིས་ཁོ་ལ་སྙིང་སྟོབས་དང་སྤོབས་པ་མང་པོ་སྦྱིན་མྱོང་འདུག །

ཁོ་རང་ལོ་བརྒྱད་ཀྱི་ཐོག་སློབ་གྲྭ་འགྲིམས་པའི་སྐལ་བ་ཐོབ་ཅིང་། དེ་ལས་ཀྱང་ཁོ་རང་ལོ་བཅུ་ལ་སོན་པའི་ལོ་དེར་པཎ་ཆེན་རིན་པོ་ཆེས་དབུ་ཁྲིད་པའི་སྡེ་རོང་རྫོང་རྒྱུན་སྡོད་བོད་ཡིག་འཛིན་གྲྭར་ཞུགས་པའི་སྐལ་བ་ཐོབ། 1988ལོར་ལྕགས་ཟམ་ཁའི་བོད་ཡིག་སློབ་གྲྭར་ཞུགས་པ་དང་1992ལོར་སློབ་མཐར་ཕྱིན། དེ་ནས་དཀར་མཛེས་ཁུལ་བོད་སྨན་ཁང་གིས་བཙུགས་པའི་བོད་སྨན་འཛིན་གྲྭ་ཐེངས་བཞི་པ་དེར་ཞུགས་ནས་སློབ་སྦྱོང་བྱས་ཤིང་1996ལོར་སློབ་མཐར་ཕྱིན་རྗེས་ཕྱིར་ཕ་ཡུལ་དུ་ལོག་ནས་སྡེ་རོང་སྤུན་གསུམ་ཡུལ་ཤོག་ཏུ་2007ལོ་བར་དུ་སྨན་པའི་ལས་གནས་གཉེར། 2007ལོ་ནས་2014ལོའི་བར་གྲོང་གསེབ་འཕྲོད་བསྟེན་ཞབས་ཞུ་ལྟེ་གནས་སུ་བྱ་བ་གཉེར།

སྐབས་ཐོག་དེའི་བརྒྱུད་རིམ་ཁྲོད་ཁོང་གིས་བརྙན་འཕྲིན་ལས་ཐོག་མར་བྲ་རྒོད་ཀྱིས་བཟོས་པའི་ཇའི་སྐོར་གྱི་གསར་འགྱུར་ཞིག་མཐོང་ཞིང་། ཁོང་ཉིད་གསོ་རིག་ཆེད་ལས་པ་ཡིན་པས་གསར་འགྱུར་དེ་མཐོང་མ་ཐག་བྲ་རྒོད་ཀྱི་ཕན་ནུས་སོགས་དེ་མ་ཉིད་བློ་ལ་ཤར་ཞིང་། སེམས་སུ་ས་གཤིས་མི་འདྲ་བའི་ས་ཆ་སོ་སོར་སྐྱེས་པའི་སྐྱེ་དངོས་ཀྱི་ནུས་པ་མི་འདྲ་བ་དང་། གནམ་གཤིས་དང་ལོ་རེ་རེའི་ཆར་ཆུ་འབབ་ཚུལ་སོགས་ལ་ཡང་འབྲེལ་བ་ངེས་ཅན་ཡོད་ངེས་པ་སོགས་དྲན་ཞིང་།རང་གི་ཕ་ཡུལ་དུ་ཡང་བྲ་རྒོད་ཀྱི་ཐོན་ཁུངས་ཕུན་སུམ་ཚོགས་པས་དེ་ལ་ཚོད་ལྟ་བྱེད་འདོད་ཀྱི་འདུན་པ་དྲག་པོ་སྐྱེས། ཁོང་གིས་དེ་ནི་བརྙན་འཕྲིན་ལས་མཐོང་བའི་ལྟད་མོ་ཙམ་དང་། ལྟད་མོ་དེའི་རྗེས་ཀྱི་བསམ་ཚུལ་ཙམ་དུ་མ་བཞག་པར་དངོས་སུ་ཕ་ཡུལ་དུ་སྐྱེས་པའི་བྲ་རྒོད་ཁྱེར་ནས་ད་ལྟའི་ལིའང་ཧྲན་དབྱིས་རིགས་རང་སྐྱོང་ཁུལ་གྱི་ཞི་ཁྲང་གྲོང་ཁྱེར་དུ་ཆེས་ཐོག་མར་ཚན་རིག་དང་མཐུན་པའི་སྐྱེ་དངོས་བརྟག་དཔྱད་དུ་སོང་། སྤྱིར་བྲ་རྒོད་ནི་སྐམ་ཤས་ཆེ་བའི་ས་ཆར་སྐྱེ་ཞིང་། དབྱིས་རིགས་ཀྱི་ས་ཆར་ཡང་བྲ་རྒོད་རིགས་མང་པོ་ཡོད་མོད། ཚན་རིག་གི་བརྟག་དཔྱད་བྱས་པ་བརྒྱུད་དབྱིས་རིགས་ཀྱི་ས་ཆར་སྐྱེས་པའི་བྲ་རྒོད་ཀྱི་ལུའུ་ཏིང་（芦丁 Rutin）ནི་2.4 དང་3.2ཡིན་པ་དང་། ཁོང་གི་ཕ་ཡུལ་གྱི་བྲ་རྒོད་ནང་གི་ལུའུ་ཏིང་（芦丁 Rutin）ནི་3.2དང་3.8ཡིན་པ་ཤེས་རྟོགས་བྱུང་། སྤྱིར་བྲ་རྒོད་རྒྱ་མ་བརྒྱ་ལྟ་བུ་ཞིག་བྲ་ཕྱེར་བསྒྱུར་སྐབས་ཕྱེ་མ་ལ་དཀར་པོ་དང་སེར་པོ་གཉིས་ཡོད་ཅིང་། སྐབས་བབ་ཇ་བཟོ་བྱེད་ལ་མདོག་སེར་པོ་དེ་བཟང་ཤོས་ཡིན་མོད། དབྱིས་རིགས་ས་ཆར་སྐྱེས་པའི་བྲ་རྒོད་རྒྱ་མ་100འཐག་རྗེས་ཀྱི་བྲ་ཕྱེ་རྒྱ་མ་53དང་། དེའི་ནང་བྲ་སེར་རྒྱ་མ་18ལས་མེད་པ་དང་ཁོང་གི་ཕ་ཡུལ་གྱི་བྲ་རྒོད་རྒྱ་མ་100འཐག་རྗེས་ཀྱི་བྲ་ཕྱེ་རྒྱ་མ་65ཡོད་པ་དང་། དེའི་ནང་བྲ་སེར་རྒྱ་མ་30ཡོད་པ་ཤེས་པས་ཁོང་ལ་རང་གི་ཕ་ཡུལ་གྱི་ཐོན་ཁུངས་བེད་སྤྱད་ནས་ཚོང་ལམ་གསར་འཛུགས་ཀྱི་བསམ་བློའི་སྙིང་སྟོབས་འཕར་མ་བྱུང་ཞིང་། ཚོང་ལམ་གསར་སྐྲུན་གྱི་ལམ་ཁར་ཞུགས་པར་སེམས་ཐག་བཅད་དེ་2012ལོའི་ཟླ་བདུན་པར་དངོས་སུ་སྡེ་རོང་བཀྲ་ཤིས་ཉི་མ་ལུང་ཞིང་ལས་ཐོན་རྫས་ཚད་ཡོད་ཀུང་སི་དབུ་ཚུགས།

དེ་ལྟར་ཚོང་ལམ་གསར་བསྐྲུན་གྱི་བརྒྱུད་རིམ་ཁྲོད་ཁོང་གིས་སྡེ་རོང་ས་གནས་ཀྱི་རྒུན་འབྲུམ་གྱི་ཁྱད་ནུས་མང་པོ་ཞིག་ལ་རྒྱུས་ལོན་བྱུང་ཞིང་། སྤྱིར་རྒུན་ཆང་གི་ཐོན་ཚད་ནི་གོ་ལ་ཧྲིལ་པོའི་ཁྱབ་ཁོངས་སུ་ཉུང་ཉུང་ཡིན་ཞིང་། དེ་ལས་གོ་ལ་ཧྲིལ་པོར་ཆེས་ཁྱབ་ཆེ་ཤོས་ཀྱི་རྒུན་ཆང་ནི་ཧྥ་རན་སིའི་ལྷོ་ནུབ་རྒྱུད་དུ་དང་ནུབ་རྒྱ་མཚོ་ཆེན་མོའི་མཚོ་འགྲམ་དང་ཐག་ཉེ་བའི་པོར་ཏུའོ་（波尔多 Bordeaux）ཡི་རྒུན་འབྲུམ་ཡིན་པ་དང་། དེ་ཡིས་ཐོན་སྐྱེད་བྱས་པའི་རྒུམ་འབྲུམ་ཁྲི་ཞ་ཀྲུའུ（赤霞珠 Cabernet Sauvignon）རྒུན་ཆང་ལ་རྒྱལ་སྤྱིའི་སྒང་སྐད་གྲགས་ཡོད་པ་རེད་ལ། ཏག་ཏག་ནུབ་རྒྱ་མཚོ་ཆེན་པོ་དང་བར་ཐག་ཉེ་བའི་ཧྥ་རན་སིའི་ལྷོ་ནུབ་ཀྱི་རྒུན་འབྲུམ་གྱི་ཐོན་ཁུངས་ཕུན་སུམ་ཚོགས་པའི་ས་ཆ་དེ་དང་། འབྲི་ཆུའི་རྒྱུད་ཀྱི་སྡེ་རོང་ཉི་མ་ལུང་པའི་རྒུན་འབྲུམ་འདེབས་འཛུགས་ཀྱི་ས་ཆ་འདི་གཉིས་སའི་གོ་ལའི་གཞུང་ཐིག་དང་འཕྲེད་ཐིག་གཅིག་གི་རྒྱུད་དུ་ཁེལ་ཡོད་པ་རེད། དེ་བཞིན་དུ་གནམ་གཤིས་ཀྱི་ཆ་ནས་ཀྱང་ཆར་ཆུའི་འབབ་ཚད་མང་བ་སོགས་ནི་མེད་ལ་སྐམ་ཤས་ཆེ་བའི་གནམ་གཤིས་ཡིན་པས་རྒུན་འབྲུམ་འདེབས་འཛུགས་ལ་ཤིན་ཏུ་འཕྲོད་པས་ཡང་བསྐྱར་སྔར་གྱི་ལས་ཀའི་ཐོག་ལ་2013ལོར་རྒུན་འབྲུམ་འདེབས་འཛུགས་དང་ཆང་བཟོ་བའི་ཚོད་ལྟ་བྱས་ཤིང་། ལོ་དེར་རྒུན་ཆང་ཏུན་བདུན་བཟོས་པས་ཚོང་རར་ཤིན་ཏུ་བྲིན་པ་བྱུང་ཞིང་། བྲ་རྒོད་ཀྱི་ཇ་ཏུན་བཅུ་དང་རྒུན་ཆང་ཏུན་གཅིག་གི་ཡོང་འབབ་དང་མཉམ་པར་གྱུར། 2014ལོ་ནས་ཐོན་རྫས་ཀྱི་སྤུས་ཚད་དང་ཆེད་ལས་རང་བཞིན་གྱི་ཉམས་མྱོང་ཕུན་སུམ་ཚོགས་པའི་ཆེད་མཁས་མི་སྣ་གདན་ཞུ་དང་། ཕྱོགས་ཡོངས་ནས་སྔར་ལས་འཕེལ་རྒྱས་སུ་བཏང་ནས་རྒུན་འབྲུམ་འདེབས་འཛུགས་དང་རྒུན་ཆང་བཟོ་གྲྭའི་ལག་རྩལ་ཕྱོགས་སུ་སྔར་ལས་གཟབ་ནན་དང་ཕུན་སུམ་ཇེ་ཚོགས་སུ་བཏང་ནས་ལོ་དེར་རྒུན་ཆང་ཏུན་41བཟོས་ནས་ཚོང་རར་བཀྲམས། དེ་ལྟར་ཐོག་མའི་ལོ་ངོ་དུ་མའི་རིང་གཏན་སྡོད་ཀྱི་སྡོད་ཁང་མེད་པས་སྦྲ་ཕུབ་ནས་སྡོད་དགོས་ཐུག་པ་སོགས་ཕྱི་ནང་གསང་གསུམ་གྱི་དཀའ་ངལ་མང་པོ་བརྒྱུད།

དེ་ལྟར་ད་ལྟའི་བར་ཀུང་སི་ལ་རྒུན་འབྲུམ་འདེབས་འཛུགས་ཀྱི་ས་ཁྱོན་སྨི་གྲུ་བཞི་མ་5168དང་ལོ་རེར་ཕྱིར་འཚོང་གི་ཡོང་འབབ་སྒོར་ས་ཡ་8ལྷག་ཙམ་ཟིན་གྱི་ཡོད་པ་དང་། ཁེ་ལས་ལས་བཟོ་པ་མི་46ཡོད་པའི་ནང་འབྲིང་རིམ་ཆེད་ལས་སློབ་གྲྭའི་ཡོན་ཚད་ཅན་མི་14དང་། ཆེད་ལས་ལག་རྩལ་པ་མི་12ཡོད་པ་རེད་ལ། ལག་རྩལ་མི་སྣའི་ཁྲོད་ཀུང་སིས་རྒུན་འབྲུམ་ཨ་རག་ཆེད་ལས་ཀྱི་ཆེད་ལས་ཤེས་ལྡན་མི་སྣའི་ཚོགས་པ་5གདན་དྲངས་ནས་རྒུན་འབྲུམ་རྟེན་གཞིའི་དོ་དམ་དང་རྒུན་འབྲུམ་ཨ་རག་ཐོན་སྐྱེད་དང་སྤུས་ཚད་དོ་དམ་སོགས་ཀྱི་འགན་འཁུར་དུ་བཅུག་ཡོད་པ་རེད་ལ། དེ་དང་ཆབས་གཅིག་ཀུང་སིས་ནུབ་བྱང་ཞིང་ནགས་ཚན་རྩལ་སློབ་ཆེན་དང་སི་ཁྲོན་ཞིང་ལས་སློབ་ཆེན། དཀར་མཛེས་ཁུལ་ཞིང་འབྲོག་མཁོ་ཚོང་མཉམ་ལས་ཅུས་ཀྱི་སྣེ་ཁྲིད་ནས། 2016ལོར་སྡེ་རོང་རྫོང་བཀྲ་ཤིས་ཉི་མ་ལུང་རྒུན་འབྲུམ་ཆེད་ལས་མཐུན་ཚོགས་བཙུགས་པ་དང་། ཚན་རིག་དང་མཐུན་པའི་སྐྱེ་ལྡན་འདེབས་གསོ་སོགས་སྔོན་ཐོན་གྱི་ཐོན་སྐྱེད་བྱེད་སྟངས་དེ་ཆེས་ཆེད་ལས་ཀྱི་རྣམ་པའི་ཐོག་ནས་ས་གནས་དེ་གའི་རྒུན་འབྲུམ་འདེབས་འཛུགས་ཞིང་དུད་ལ་སྤྲད་པ་དང་ཆབས་ཅིག་ཀུང་སིས་ལོ་རེའི་ས་གནས་ཀྱི་མང་ཚོགས་ཀྱི་འཚོ་བ་ཡང་ཕྱོགས་ཡོངས་ནས་གོང་འཕེལ་དུ་བཏང་བ་དང་། ད་ལྟ་ཀུང་སི། རྟེན་གཞི། མཉམ་ལས་ཁང་། ཞིང་དུད་བཅས་སྟོབས་ཤུགས་མཉམ་སྦྲེལ་དགོས་སྡེ་རོང་རྫོང་ཝ་ཁ་གྲོང་རྡལ་དང་ཆུ་ཡག་གོང་ཡུལ་ཤོག་སོགས་ཤང་གྲོང་འགའ་ཞིག་ཏུ་རྒུན་འབྲུམ་འདེབས་འཛུགས་རྟེན་གཞི་མུའུ་380བཙུགས་པ་དང་། རྒུན་འབྲུམ་ཞིང་པའི་ཆེད་ལས་མཐུན་ཚོགས་ཀྱང་བཙུགས་ནས་ལོ་རེར་རྒུན་འབྲུམ་ཨ་རག་ཏུན་200ཡན་ཐོན་སྐྱེད་དང་མཁོ་འདོན་བྱེད་པའི་ཁྲོམ་རའི་དགོས་མཁོ་འདོན་སྤྲོད་གནང་བཞིན་ཡོད་ལ། ཐོན་རྫས་ཀྱི་སྤུས་ཚད་ལ་ཁག་ཐེག་ཡོད་པ་དང་། རྒྱུ་སྤུས་བཟང་བ། ཁྲོམ་རའི་ཚུར་སྣང་བཟང་བ་སོགས་དཀར་མཛེས་ལྷོ་ལམ་ས་ཁུལ་གྱི་རྒུན་འབྲུམ་ཨ་རག་ཐོན་ལས་ཀྱི་སྟོང་ཆ་བསྐངས་ནས་གྲོང་གསེབ་ཀྱི་དཔལ་འབྱོར་ཡོང་འབབ་འཕར་རྒྱུར་ཐབས་ལམ་གསར་པ་བཏོད་པ་དང་ས་གནས་དེ་གའི་ཞིང་ལས་ལས་སྣོན་ཐོན་ལས་ཅན་གྱི་གསར་སྤེལ་ལ་རྨང་གཞི་བརྟན་པོ་ཞིག་བཏིང་ཡོད་པ་རེད།

ས་ཁུལ་དེ་གའི་རྒུན་འབྲུམ་ཨ་རག་ལས་སྣོན་ཞིབ་ཚགས་བྱེད་པའི་ཆུ་ཚད་མཐོ་རུ་བཏང་བ་དེས་གྲོང་གསེབ་ཀྱི་ཡུལ་སྐོར་གསར་སྤེལ་ལ་སྐུལ་འདེད་བཏང་ཡོད་པ་དང་། ཞིང་པའི་ཡོང་འབབ་མང་དུ་གཏོང་བ་དང་ཞིང་ལས་ཀྱི་གྲུབ་ཆ་ལེགས་སྒྲིག་བྱེད་མགྱོགས་སུ་གཏང་རྒྱུར་དོན་སྙིང་གལ་ཆེན་ལྡན་པ་དང་སྤྱི་ཚོགས་ཀྱི་ཕན་འབྲས་མངོན་གསལ་དོད་པོ་ཐོན་ཡོད། བཀྲ་ཤིས་ཉི་མ་ལུང་ས་མཐོའི་སྐྱེ་ལྡན་རྒུན་འབྲུམ་ཨ་རག་སྙོལ་བཟོའི་རྒྱུ་ཆ་ཚང་མ་སྐྱེ་ལྡན་རྒུན་འབྲུམ་ཡིན་པ་དང་ཐོན་རྫས་ཀྱི་སྤུས་ཚད་ཚད་ལྡན་ཡིན་པ། རྒྱལ་ཁབ་ཕྱི་ནང་གི་སྔོན་ཐོན་གྱི་ཆེད་ལས་ཆང་སྙོལ་སྒྲིག་ཆས་འདེམས་སྤྱོད་བྱས་ཏེ་སྲོལ་རྒྱུན་གྱི་བཟོ་རྩལ་དང་དེང་རབས་ཀྱི་ཚན་རིག་ལག་རྩལ་དང་ཟུང་འབྲེལ་བྱས་ནས་ས་ཁོངས་ཀྱི་ཁྱད་ཆོས་ལྡན་པའི་རྒུན་འབྲུམ་ཨ་རག་སྙོལ་བཟོ་བྱས་ཡོད། གསེར་ལྡན་འབྲི་ཆུའི་རྒྱུད་ཀྱི་རྒུན་འབྲུམ་དང་དེས་བཟོས་པའི་རྒུན་ཆང་གིས་རྒྱལ་སྤྱིའི་ཚོང་ར་ནས་ཀྱང་གོ་གནས་ཤིག་འཛིན་ཐུབ་པར་སྤྱི་ཁྱབ་འགན་འཛིན་སྐལ་བཟང་ཚེ་རིང་ལགས་ཀྱི་དབུ་ཁྲིད་འོག་ལས་གནས་འདིའི་ལས་བཟོ་པ་རེ་རེའི་དཀའ་སྡུག་གི་རྔུལ་ཆུ་ཡང་ཅིས་ཀྱང་ཡོད་ངེས་པ་རེད། ཁོང་གིས་ཚོང་ལམ་གསར་སྐྲུན་གྱི་ལས་ཀ་འདིས་ད་ལྟའི་བར་ཁོ་རང་གི་ཕ་ཡུལ་གྱི་མི་སེར་མང་པོ་ཞིག་གི་ཁྱིམ་གྱི་འཚོ་བ་ལའང་འགན་ཁུར་ཐུབ་ཡོད་ཅིང་། བློ་བརྟན་འགྱུར་མེད་ཀྱི་ལས་ཀ་འདིས་ད་ལྟ་སྤྱི་ཚོགས་ཀྱི་ལས་རིགས་སོ་སོར་ཡང་ཤུགས་རྐྱེན་མང་པོ་ཐེབས་དང་ཐེབས་བཞིན་ཡོད་པ་རེད་ལ། ལོ་རེ་རེ་བཞིན་རྒྱལ་ཁབ་རིམ་པ་དང་ཞིང་ཆེན་རིམ་པ། ཁུལ་རིམ་པ་སོགས་ཀྱི་གསར་འགོད་པ་དང་། བརྙན་ལེན་པ། བཅར་འདྲི་བ། དེ་བཞིན་སློབ་གྲྭ་ཆེན་མོ་སོགས་ཀྱི་ཞིབ་འཇུག་སློབ་མ་དང་ཆེད་ལས་དགེ་རྒན་མང་པོ་སྐོར་དང་སྐོར་བྱས་ནས་ཁོང་གི་བཟོ་གྲྭ་དང་། རྒུན་འབྲུམ་འདེབས་འཛུགས་ཀྱི་ས་ཆ་སོགས་སུ་དངོས་སྦྱོང་དང་ཚད་ལེན། ཡུལ་དངོས་བརྟག་དཔྱད་སོགས་སུ་ཡང་དང་ཡང་དུ་ཡོང་བཞིན་ཡོད་པ་རེད།

2013ལོ་དང་2014ལོར་དཀར་མཛེས་ཁུལ་མི་དམངས་སྲིད་གཞུང་གི"དཀར་མཛེས་ཁུལ་གྱི་ཕུལ་བྱུང་དམངས་གཉེར་ཁེ་ལས་ཀྱི་མཚན་སྙན"ཐོབ། 2015ལོར་ཀྲུང་གུང་དཀར་མཛེས་ཁུལ་ཨུའི་གྲོང་གསེབ་ལས་དོན་འགོ་ཁྲིད་ཚོགས་ཆུང་གིས"ཞིང་ལས་ཐོན་ལས་ཅན་གཉེར་སྐྱོང་ཁུལ་རིམ་པའི་གཙོ་གནད་སྣེ་འདྲེན་ཁེ་ལས”ཀྱི་མཚན་སྙན་གནང་བ་དང་། 2016ལོར་ཀུང་སིར་ཀྲུང་གུང་དཀར་མཛེས་ཁུལ་ཨུ་དང་ཁུལ་མི་དམངས་སྲིད་གཞུང་གི"དཀར་མཛེས་ཁུལ་གྱི་ཕུལ་བྱུང་དམངས་གཉེར་ཁེ་ལས་ཀྱི་མཚན་སྙན"ཐོབ་པ་དང་ཀུང་སིའི་ཁོངས་གཏོགས་ཀྱི་བཀྲ་ཤིས་ཉི་མ་ལུང་རྒུན་འབྲུམ་ཆེད་ལས་མཐུན་ཚོགས་ལ་ཀྲུང་གུང་དཀར་མཛེས་ཁུལ་ཨུ་དང་ཁུལ་མི་དམངས་སྲིད་གཞུང་གི་"ཕུལ་བྱུང་ཞིང་པའི་ཆེད་ལས་མཉམ་ལས་ཁང་”གི་མཚན་སྙན་སོགས་ཐོབ་པ་རེད། 2017ལོའི་ཟླ་11པར་ཁྲེང་ཏུའུ་གྲོང་ཁྱེར་རྒུན་འབྲུམ་ཨ་རག་མཐུན་ཚོགས་ཀྱིས་གཉེར་བའི་ཁྲེང་ཏུའུ་གྲོང་ཁྱེར་རྒུན་འབྲུམ་ཨ་རག་དུས་ཆེན་ཐོག་ཀུང་སིའི་བཀྲ་ཤིས་ཉི་མ་ལུང་རྒུན་འབྲུམ་ཨ་རག་ལ"ལོ་འཁོར་གྱི་འོས་སྦྱོར་སྤུས་རྟགས”ཀྱི་བྱ་དགའ་སོགས་ཞིང་ཆེན་རིམ་པ་དང་ཁུལ་རིམ་པའི་བྱ་དགའ་སྣ་ཚོགས་དང་ཐོབ་པ་རེད་ལ། 2020ལོའི་ཟླ་དགུ་པར། རྒྱལ་སྤྱིའི་རྒུན་ཆང་འགྲན་བསྡུར་ཆེན་མོ་དེ་ཧྲན་ཏུང་ཕེང་ལའེ་རུ་དངོས་སུ་འཚོགས་པ་དང་། ཚོགས་ཐོག་ཏུ་རྒྱལ་ཕྱི་ནང་ནས་ཕེབས་པའི་ཆེད་མཁས་དཔྱད་འདེམས་པ་དྲུག་ཅུ་རེ་ལྔ་ཡོད་པ་དང་། རྒྱལ་སྤྱི་ནང་གི་རྒུན་ཆང་ཐོན་རྫས་ཆིག་སྟོང་ལྷག་ཙམ་འདུས་པའི་ཁྲོད་སྡེ་རོང་རྫོང་བཀྲ་ཤིས་ཉི་མ་ལུང་པའི་རྒུན་ཆང་ལ་གསེར་གྱི་རྟགས་མའི་བྱ་དགའ་ཐོབ་པ་རེད། དེ་བཞིན་དུ་སྐབས་བཅུ་པའི་ཡ་གླིང་ཧྲིལ་པོའི་རྒུན་ཆང་སྤུས་ཚད་འགྲན་བསྡུར་ཆེན་མོའི་སྐབས་སུ་ཡང་སྡེ་རོང་བཀྲ་ཤིས་ཉི་མ་ལུང་པའི་རྒུན་ཆང་ལ་གསེར་གྱི་རྟགས་མའི་བྱ་དགའ་སྔ་ཕྱི་ཐེངས་གཉིས་ལ་ཐོབ་པ་སོགས་རྒྱལ་ཁབ་ཕྱི་ནང་གི་ཆེད་མཁས་པའི་སྡེ་དང་།ཚོང་རའི་སྡེ་སོགས་སྤྱི་ཚོགས་ཀྱི་ལས་སྒོ་སོ་སོར་མཚོ་བོད་མཐོ་སྒང་གི་གསེར་ལྡན་འབྲི་ཆུའི་རྒྱུད་ཀྱི་རྒུན་ཆང་འདི་ཡི་མཚན་སྙན་རླུང་ལྟར་ཁྱབ་པར་གྱུར།

འདི་ནི་མི་ཞིག་གི་ཕུགས་བསམ་དང་རྨི་ལམ་ཡིན་ལ་དེ་ཙམ་ཡང་མིན། འདི་ནི་རང་གི་ཕ་ཡུལ་ལ་གཞན་གྱི་སྔུན་ནས་ང་རྒྱལ་དང་གཟི་བརྗིད་བརྩོན་ལེན་བྱེད་སྟངས་ཤིག་རེད་འདོད། ད་ལྟ་ཁོང་གིས་ཐོན་རྫས་གཙོ་བོ་C-47གྱི་རྒུན་ཆང་དང་། གསེར་སྒྲོལ་མ་རྒན་ཆང་། བཀྲ་ཤིས་ཉི་མ་ལུང་རྒུན་ཆང་། བྲ་བོ་ཇ་བཅས་ཐོན་སྐྱེད་བྱེད་བཞིན་ཡོད། མི་དང་མིའི་བར་གྱི་ཁྱད་པར་ནི་འདི་ལྟར་ཤོར་འགྲོ་བ་རེད་ལ། རླབས་ཆེན་དང་ཕལ་པའི་ཁྱད་པར་ཡང་འདི་ལྟར་དུས་ཚོད་ཀྱིས་ཕྱེ་འགྲོ་བ་ཞིག་ཡིན་པས། མཐའ་མཇུག་གི་རྒྱལ་ཁ་རེག་མཁན་ནི་ནམ་ཡང་བརྩོན་པ་དང་སྙིང་སྟོབས་ཅན་ལ་དབང་བ་འདི་ཡིས་ཤེས་ཡོང་བ་ཞིག་ཀྱང་རེད་དོ། །